حبيبتي بكماء

الحلقه 15 والاخيره

الكاتبةوعدالخضر

((حبيبتي_بكماء ))

في ليل كانت مُنية راقده بعد ماروحو من سهرة اصحاب محمد

رن تليفونها

رفعاته وحطاته ع وذنها بـ تعب

محمد : افتحي الباب اني قدام دارك

حطت التلفيون بـأستغراب وفتحت الباب

خش بسرعه وسكر الباب وراه

اشرت بمعنى : بسم الله خيرك توا ؟?

محمد : شهر ساد ولا

رفعت حاجبها

اشرت بمعنى : ساد لـ شنو

محمد : لـ توتي روحك

اشرت بمعنى : وعلاش بنوتي روحي شن تقول مافهمتك والله

محمد : عرسنا بعد شهر وتي روحك

اشرت بمعنى : هههههههه شن خطر عليك توا بس

محمد : ماتضحكيش نتكلم بجد قولي ساد ولالا

اشرت بمعنى : اي عادي ساد

محمد : خلاص تم الصبح نكلموهم

اشرت بمعنى : هههههه وربي مجنون

محمد باسها ع خدها

وطلع

حطت يدها ع خدها في نفس المكان

ورقدت

في الصباح خبرو اهلهم وبعد عرايك و كلام ع انه مايلحقو ووو في نهايه وافقو وبدو يجهزو للعرس

بعد شهر :

اليوم الـ قبل الزفة

يوم الحنه

كانو البنات ملتمات ويحنو في مُنية وهي فرحانه هلبا

ريان : شن الكساد هذا نوضو انهيجو يابنات

وناضو يغنو ويكشكو

الغالي وين قالوا خوود قال ياهيه يالمووت ?

البراني شكارة خيشة ❤وولد العم معاه العيشه

البراني شكارة سكر ❤وولد العم عسل ايقطر

بوقصه سوده ع الخد اتقول عليه الله و احد ?

وين انشوفه قلبي يدق عزيز انحبه تبوا الحق ??

لووووولوووولي ايديكن هي لوووولووولي ??????????????

وكملوها تصفيق ورقيص وغناء

ثاني يوم

ناضت مُنية ع صوت مألوف

فتحت عيونها بشويه

محمد : صباح الورد أميرتي

ناضت وشافتله

اشرت بمعنى : احي شن جابك اهني

محمد : قلت نصبح ع عروستي بيش تتعود عليا

أشرت بمعنى : والله دمك خفيف هي اطلع برا

محمد : ماتنفع معاك الرومانسيه بككل انتي

ناضت وقعدت اتدف فيه لين طلع

خبط الباب فتحتله

ورفعت حاجبها

محمد : حاجه اخيره ، ياريت اتمشطي شعرك لأن وضعه مزي ?

حطت يدها ع شعرها لقاته واقف زي عصاة المكنسه ??

اشرت بمعنى : اطلللع

طلع ، وخبط مره اخرى فتحتله بنفاذ الصبر

اشرت بمعنى : اياااه علينا شن في ثاني !

ابتسملها

محمد : ي حليلي ع الحنه وخلاص ?

غطت وجهها بيديها بـ حمشة

قرب منها
محمد : شن رايك نختصرو باقي اليوم ووو

دفاته بلطف

اشرت بمعنى : محمد تحششم ?

محمد : ي قلب محمد انتي ?

سمعو صوت تنحنيح

ريان : احم احم

تلفتو عليها

اشرت بمعنى : محمد جاء بيخبرني ع حاجه مهمه

ضحكت ريان

ريان : هههههه اي واضح بكل ??

محمد : هي اني نازل تبي شي كلميني

ونزل وهو متحشم

قربت منها ريان

ريان : شن كنتو اتديرو ياصايعين ?

ضربتها ع كتفها

ريان : اخخخ ، باه هي انزلي افطري بيش نمشو للكوافير

بعد ساعات :

كانت مُنية واقفه بـ فيلوها المنفوش وشعرها المنسدل ع ظهرها بـرقة وشادة باقة ورد و الضحكه مرسومه ع فمها وطالعه احلى عروس

خش محمد ومنظره خيااال لابس بدلة سودة زي لون لحيته وشعره ? !

باس ع راسها

محمد : مبروك علينا أميرتي

ابتسمتله وطلعو

بعد سنتين ?? :

مُنية كانت قالقه وتشوف للسقف ومحمد راقد جنبها في سابع نومه

حطت يدها ع بطنها

مُنية :
” ياوليدي الحلو امتى بتجي بس ااه ياربي مش عارفه كيف ح نتحمل اني مانقدرش نتكلم مع ولدي مانقدرش انرد عليه بعد يناديني مانقدرش انطمنه بعد يخاف مانقدرش انغنيله بيش يرقد ولا ح نقدر انقريه ولا انلعبه ياارب انت ادرى بوجعي وتعبي يارب اشفيني و ردلي صوتي ”

حست بـ حركه في بطنها

مُنية :
” ههههههه حبيبي نايض انت يااحليله الي مايرقد كان أمه نايضه حمدالله خلاص هانت كم يوم وتكون بين ايديا ولو كان ربي حرمني من صوتي حمدا لله عطاني حاجات احلى ”

غمضت عيونها

بعد دقايق حست بمياه نازله منها

لمست السرير لقت المياه منها

فتحت عيونها بصدمه

وحطت يدها ع محمد وقعدت اتهز فيه

ناض محمد مخلوع فتح عيونه وشافلها

لقاها دموعها ينزلو بغزارة ومعرقه وتعبانه هلبا

محمد : مُنية مُنية خيرك بسم الله

حطت يدها ع بطنها ومش قادرة اتدير اي إشارة بيش يفهمها

( توجع واجد بعد تكون تبي اتعيط ومش قادر بعد تحس روحك عاجز عن ابسط شي ال هو الكلام توجع واجد والله ، ربي يشفي كل مريض يارب )

فتح عيونه

محمد : بتجيبي ?

هزت بـ راسها إيجابا

محمد : شن لازم ندير توا وووه ??

كانت تبي تقوله ارفعني للمستشفى راني حاسه روحي نتقطع بس ماقدرت اتدير شي غير انها تغمض عيونها وتبكي بـ وجع

محمد : اه اي شن بندير ايوا اصبري تو نجيك

كان محمد متلخبط ومش عارف شن يدير لأن اول مره يتعرض لموقف هك

فتح الدولاب وطلعلها عبايه وسندها وطلع بيها

ركبها في السياره وهي شاده في قميصه وتبكي وبتموت من الوجع

وصلو للمستشفى
حطوها في النقالة ودخلوها ومحمد قاعد برا ماشي جاي ومتوتر ومش عارف شن يدير

فجآة سمع صوت عيطه مرأة

وقف في مكانه مصدوم

تعاودت نفس العيطه بس معاها كلام “محمد محمد نادولي محمد ووووووه ”

وقبل مايطلع من صدمته انفتح الباب

الممرضة : انت محمد

قعد يشوفلها وهو مش فاهم شي

الممرضة : يااستاذ نكلم فيك انت محمد

محمد : اي اي اني

الممرضة : تفضل معانا زوجتك تبيك

خش للغرفه

مُنية : محمد ووووه معاش نقدر وووه ???

قرب منها وشدت في يده بقوة

الدكتورة : هي يامدام اضغطي اكتر خلاص هي

غمضت مُنية عيونها وضغطت اكتر
مُنية : ووووووه

سمعو صوت” واع واع واع ?? ”

رفعت الدكتوره البيبي ومداته للممرضة بيش ينظفوه وهك

فتحت مُنية عيونها بصعوبه

مُنية : يادكتوره عطيني ولدي نشوفه بالله عليك

الدكتوره : حاضر خل ينظفوه من الدم بس

مُنية : لا لا نبيه هك جيبوه ليا بالله عليكم

الدكتوره : حاضر ?

لفت الممرضه البيبي

ومداته لـ مُنية

حضنت مُنية ولدها بـ حنان وقعدت اتبوس فيه

مُنية : ياحبيبي انت قداش كنت متمنية شوفتك حمدالله حمدالله

رفعت راسها في محمد الكان واقف جنبها ومصدوم بكل الي صار

مُنية : محمد شوف ولييدنا شوفه يهبل

نزل محمد راسه عليهم وكان منظرهم خياال كيف مُنية شاده ولدها بحنان وفرحانه بيه والبيبي مغمض عيونه ومتمسك في قميص امه

نزلت دمعه من عيونه

محمد : حمدا لله ياربي الحمدالله

ونزل سجد سجدة الشكر في وسط غرفة الولاده

ناض وحضن مُنية وولدهم بكل حب

بعد دقائق

الدكتوره : خلونا انضفو البيبي ونفحصوه وبنرجعوه ليكم

مُنية : خليه شويه

محمد : حبيبتي توا يرجعوه لينا

ابتسمت بـ رضا وعطتهم البيبي

الدكتوره : ياريت تطلع حتى انت الأم محتاجه شوية راحه

ابتسم محمد وطلع

والفرحه مش سايعته

طلعتله الممرضه

الممرضه : يااستاذ نبو شنطة البيبي

محمد : اي اي نسيتها والله باه تو نجيبه

وقبل لا يكمل كلامه رن تلفيونه

رفع التليفون و رد

سعاد : وينك ياوليدي من مبكري نتصل ماتردو

محمد : والله ياخالتي التليفون كان صامت وماانتبهله مع الدوشه

سعاد : دوشة شنو بسم الله

محمد : مُنية جابت اليوم

سعاد : لووووولي لووووولي لوووووولي لووووولي مبرووك الف مبرووك وين انتو توا

محمد : في مستشفى…

سعاد : اي توا انجوكم

محمد : خالتي بالله عليك جيبي معاك شنطه البيبي انسيناها في الحوش

سعاد : ان شاء الله هي مع سلامه

وصلو باقي العيله

خشو الغرفه الموجودة فيها مُنية راقده بتعب

ومحمد مقعمز جنبها ومغمض عيونه

ابراهيم : محمد

فتح عيونه

محمد : يامرحبا نورتو تفضلو

سعاد قربت من بنتها ومسحت ع شعرها

فتحت مُنية عيونها

سعاد : مبروك يابنتي ان شاء الله يتربى في عزكم يااارب

مُنية : أمي

شافتلها سعاد بصدمه وشدت يدها

سعاد : مُنية انتي تكلمتي ولا اني نحلم

ضغطت مُنية ع يد امها اكتر مؤكده

مُنية : اي يا امي تكلمت و ردلي صوتي الحمدالله

حضنت سعاد بنتها و بعدها حضنوها باقي العيله كلهم وقعدت الفرحه فرحتين

بعد ساعات

شافت مُنية لـ محمد

مُنية : محمد وين وليدنا علاش ماجابوه لـ توا

محمد : مش عارف اصبري شوي

حطت يدها ع قلبها

سعاد : هي توا يجيبوه يابنتي خيرك بسم الله

ابتسمت لأمها

شوي وانفتح الباب وخشو الممرضات وحده رافعه تورته مزينة ع شكل بيبي والثانيه بالونات ازرق وابيض و ثالثه رافعه ورود واخر وحده رافعه البيبي

حطو البيبي في يد امه وزينو المكان

محمد : شن رايك في المفاجأة

مُنية : شكرا هلبا فرحتني والله

محمد : ي عمري انتي ربي يخليك ليا ياارب

مُنية : حمدالله ربي جبر بـ خاطرنا واستجاب لـ دعواتنا وردلي صوتي ، محمد شكرا هلبا ع وقفتك معايا و ع تمسكك بيا وكيف كل مايعايروك بيا تحبني اكتر وكيف كنت اتقول بـ فخر قدام الكل #حبيبتي_بكماء

و بـ هك انتهت روايتنا ان شاء الله نالت اعجابكم ونتلاقو في روايه جديده

الخلاصة

– من الضروري اننا مانفقدو الأمل و تكون ثقتنا في ربي كبيره ودائما نتفائلو خير يعني زي ماصار لـ مُنية كانت دائما املها بالله كبير وبعد كل العناء والتعب ربي جزاها بالخير والفرج

– الحب اغلى حاجه ولازم انحافظو ع الشخص الـ نحبوه بكل الطرق

– ماتخلوش كلام الناس يأثر عليكم ومهما مايقولو ومهما مايحالو يضايقوكم ماتعدلو عليهم

وزي مانقوللكم ديما الحب فطرة فينا ماتخلوش الاحقاد تنزعه مننا ??

وشكرا ووواجد لكن من تابعني وتابع رواياتي لكل من قالي كلمه طيبة ربي يحفظكم