حبيبتي بكماء

الحلقه 13

الكاتبةوعدالخضر

(( حبيبتي_بكماء ))

مرت الايام :

محمد و مُنية عايشين احلى قصة حب ومحمد مهتم بـ مُنية وكأنها طفلته ومش مخلي حد يقربها ولا يزعلها

نادر وعيلته صينو حوشهم و رجعوله

في يوم

سعاد : مُنـيـة بنتي نادي محمد ع العشاء

هزت راسها إيجابا وجت بتمشي

سعاد : البسي حجابك بنتي

لبست حجابها ومشتله

فتحت باب الغرفه لقاته راقد ومتغطي سكرت الباب وراها ومخططه تخلعه ?

قربت منه وطبست عليه ، رفعت البطانيه من وجهه

محمد : بخخخ ??

طاحت عليه

اشرت بمعنى : خززززي خوفتني

شدها من خصرها ورفعها لفوق

محمد : من حفر حفرة لأخيه وقع فيها ?

اشرت بمعنى : باهي اطلقني تو ، جيت بنقولك ع العشاء بس

محمد : مافيش مرتاح هك

ضرباته ع صدره

محمد : اخخخ وجعتيني ، مهم نطلقك بس بشرط

اشرت بمعنى : ومازال تتشرط توا نديرلي راي

وقعدت تحاول اتنوض وتبعد عنه وهو يزيد يضغط عليها

بعد تعب استسلمت

اشرت بمعنى : وووك تقول مصارع باه خلاص شن هو شرطك

محمد : خمسة وخميسة في عين الحاسد ?

اشرت بمعنى : وووك بلا براده تكلم توا يخش علينا حد واتطيح في رؤوسنا

محمد : باه افتحي الدرج الي تحت وطلعيلي تلفيوني منه

اشرت بمعنى : ووك مبردك شن فيها كان جبته بروحك

محمد : اسسس ديري الي قتلك عليه

فتحت الدرج بتطلع التليفون لقت علبة صغيرونه حمراء ، رفعتها وشافتلها بتفحص

اشرت بمعنى : شن هذي

طلقها من بين ايديه ، ساوت تقعمزتها وشافتله

محمد : افتحيها

هزت بـ راسها ايجابا وفتحتها

لقاته خاتم ألماس يهبللل

حطت يدها ع فمها بـ صدمه ودموعها نزلو
ركعلها ورفع العلبة

محمد : تقبلي تكوني زوجتي وام صغاري يااغلى مافي دنيتي يامن حبيتها من اول ماشفتها يامن بيكون حبك خالد في قلبي لأخر يوم في عمري

غمضت عيونها

اشرت بمعنى : محمد انت عارفني قداش نحبك بسس مانبيش نظلمك معاي ، مانبيش تتزوج بكماء ويقعدو يعايرو فيك بيها مانبيش انضيعلك حياتك في صمت تام من حقك يكون عندك زوجة تهدرز معاك وتسمع صوتها

محمد : اي صح كلامك علاش نتزوج بكماء ونتعب روحي ع خاطرها وهي 24 ساعة ساكته

سكر العلبة واتجه ع الباب ، دموعها نزلو بغزارة

رجعلها و قعمز تحت رجليها

فتحلها العلبة وطلع الخاتم

محمد : البسي البسي خير من يجيك كف ع وجهك يعميك مره وحده

ضحكت من بين دموعها

محمد : حبيتك انتي حبيت روحك الحلوه وطيبتك واخلاقك حبيت غيرتك عليا ووفاءك ليا مش صوتك ومش كانك بكماء ح نبطل حبي ليك لو كان تقعدي عمياء و مشلوله بنقعد نحبك وبعدين الي صارلك بسبب بعدي عنك وتوا ح نكون ديما معاك لين يرجعلك صوتك وان كان مارجعش مايهمني لأني نحبك زي ماانتي

حضناته بكل قوة
ضحك وحضنها حتى هو

بعد ثواني مسح دموعها

محمد : هي البسيه وبطل هبال

لبساته

محمد : ايوااا هك الكلام الصح ، اسمعي ليا ساعة انعبرلك هي جاء وقت الاكل

ضرباته ع كتفه

اشرت بمعنى : ديما همك في بطنك

ومشو لسفرة العشاء

بعد كملو

محمد : ياعمي بنخشلك في الموضوع طول بدون مقدمات لأنكم عيلتي وماعندي غيركم

إبراهيم : تكلم خوفتني ان شاء الله خير

محمد : لالا خير والله ياعمي نويت نكمل نص ديني ونتزوج

تحشمت مُنية ووجها قعد احمرر

ابراهيم : حمدالله حمدالله عندك وحده في راسك ولا خالتك سعاد اتشوفلك وحده زينة

محمد : لالا الزين منكم وفيكم طالب يد بنتك مُنية ع سنه الله ورسوله وطامع في موافقتكم

ابراهيم : يوم السعد والله وين نلقو احسن منك ياوليدي ، لكن الموافقة في يد البنت

سعاد شافت لـ مُنية بـ فرح

سعاد : لوووووووووولي لوووووووولي لووووووولي
اموافقين طبعا

مُنية تحشمت وناضت

ابراهيم : هههههههه نسألها ونردو عليك

محمد : ان شاء الله هي اني بنطلع توا تبو شي

خشت سعاد ع بنتها وهي اتزغرط وبنان ترقص
سعاد : لووووووولي لووووووولي
بنان : ?????

بنان : ماما بناخد دار مُنية باهي ??

اشرت بمعنى : ووه مازال ماتزوجت وانتي اتخططي

سعاد : هي بنان اطلعيلي لـ برا نبي اختك بروحها

شافتلهم بـ مكر
بنان : كلام نساوين صح ?

سعاد : غير اطلعي انتي ماعليك

بنان : باه ?

سكرت الباب

سعاد : ….

فتحت بنان الباب مره ثانيه

وقفت وقعدت تقلد في امها

بنان : عينك ع راجلك يابنيتي وكان تبي توصلي لـ قلبه طيبيله ??

رفعت امها الشبشب وضربتها بيه

سعاد : سككري الباب قتلك واطلعي بلا قلة ادب يابنان ولا نجيك راه

بنان : لا تجيني لا نجيك لكن عندي اخر نصيحه مُنية عليك و ع اللبس المشخلع يحبوه راه ??

رفعت سعاد شبشبها الثاني

سكرت بنان الباب ومشت تجري

سعاد : ووك هالبنية بتفقعلي مرارتي كان نعرف من وين اتجيب في هالكلام بس ، مهم بنيتي موافقه ع محمد ولا

نزلت مُنية راسها بـ حشمة

سعاد : ياخيتي سلمها الي تتحشم ، عارفتك اتحبيه من زمان وحتى هو يحبك

اشرت بمعنى : كيف عرفتي ؟.

سعاد : واضح كل شي وبعدين في حاجه ثانيه تو بعد انوض ونجيبهالك مهم توا جاوبي

هزت راسها ايجابا

زغرتت سعاد بـ فرح وحضنت بنتها وطلعت بلغت ابراهيم بموافقة بنتهم

بعد ساعات من الفرح خشت سعاد ع مُنية ال ع وشك ترقد

قعمزت جنبها
ومدتلها ظرف

سعاد : هذي يابنتي رساله خلهالك محمد قبل سنين قبل مايسافر و دسيتها عنك لأن ماكنتش نبي تقعدي تستني فيه وهو مش معروف يروح او لا وكنت خايفه مايوفي بـ وعده بس توا اقريها عادي ، تصبحي ع خير

طلعت سعاد وسكرت وراها الباب

فتحت مُنية الرساله وبدت تقرا فيها وكانت الرساله عبارة عن اتعذار من محمد لـ مُنية بسبب سفره وبعده عنها وقاللها انه يحس ب شعور حلو هلبا اتجاهها و وعدها ان بعد يرجع ح يصلح كل شي وانه ماودعها خوفا من ردة فعلها

سكرت مُنية الرسالة وحطتها ع قلبها ورقدت

بعد مرور كم يوم :

يوم الخطوبه تحديدا

محمد : خالتي سعااد تعاليلي شويه بالله عليك

مشت سعاد تجري ولابسه ومتأنقه

سعاد : نعم ياوليدي ان شاء الله خير

صفر بصوت عالي

محمد : احلى سعاد فيك ياليبيا ?

حطت يدها ع راسها وساوت شعيراتها

سعاد : هههههههه ليبيا بس

محمد : الدنيا كلها والله ?

ضرباته ع كتفه

سعاد : يعطيك السلامه وخلاص ?
، ها قولي شن في

محمد : هههههه كنت بنقولك خالاتي قريب يوصلو ومكانهم بعيد لو اتوتولهم مكان يرتاحو فيه وهك لو مافيها ازعاج

سعاد : حاضر من عيوني يا وليدي ازعاج شنو بس

محمد : العروس وتت روحها ؟

سعاد : اي مازال القفطان بس

محمد : زعما احلى منك ?

سعاد : هههههههه اكيد عاد طالعه لـ امها

ركبت سعاد لـ مُنية فوق

خبطت الباب وخشت

اشرت بمعنى : ماما شن رايك

نزلت دمعة فرح من سعاد

سعاد : والله وكبرتي يابنتي وبتتزوجي

ريان : خااالتي ماتبكي عاااد خطوبة هيي ولا عزاء

سعاد : دموع الفرح يابنيتي

ريان : ها شن رايك فيها

شافت سعاد لـ مُنية

سعاد : الصلاة على النبي طالعه أميرة مشاءالله عليك

سمعو صوت تخبيط الباب

بِنان : منووو

محمد : اني محمد

بِنان : لالاا مافيش خشه شن تبي

محمد : ناديلي خالتي سعاد خالاتي وصلو

( طبعا خالات محمد يسكنو في منطقة بعيدة وماعنده خلطه بيهم يعني خوات امه وبس وهم زوز عائشة الكبيره وبناتها رحاب وزينة وخديجه اصغر منها بناتها هاجر وبشرى )

طلعتله وسكرت الباب ونزلت معاه

سلمت عليهم سعاد

سعاد : يامرحبا واهلين شرفتونا والله

عائشة ( خالة محمد ) : بيكم زاد الشرف

سعاد : هي تفضلو معايا بيش ترتاحو المعازيم قريب يوصلو

دخلتهم غرفة الظيوف

التمو المعازيم والهدرزه والضحك و تزويع الحلويات والعصائر والاغاني

كانت مُنية متوتره وترعش

اشرت بمعنى : متأكده طالعه حلوة خايفه مانعجب خالاته ?

ريان : تي وربي تهبلي هي ان شاء الله تعجبيهم ماتخافي

اشرت بمعنى : ان شاء الله ان شاء الله

ريان : هي انزلي

ونزلت وكانت طالعه حلوه هلبا لابسه قفطان سماوي مخصر و مرصع وطوله متوسط وامدايره تسريحة شعرها بسيطه مع مكياج خفيف

نزلت والعيون كلها عليها من جمالها وبساطتها
سلمت ع خالات محمد وقعمزت وابتسمت للكل

قعدو خالات محمد يتهامسو بصوت واطي

خديجة : سمحه مشاءالله عليها
عائشة : اي لكن شكلها دمها تقيل حتى بعد سلمت مافتحت فمها
خديجة : مرات متحمشه
خديجة : توا يذوب الثلج ويبان المرج

سعاد : يابنات المتحجبه اتغطي روحها العريس بيخش

خش محمد وكان لابس بدلة عربيه امطلعته غزااال يهبل مع اللحية والساعة والابتسامة

لبسها الدبلة وباسها ع راسها
محمد : ربي يخليك ليا ويقدرني نسعدك
ابتسمتله

وقطعو التورته وطلع

انتهت الحفلة والمعازيم روحو

وركبت مُنية اتبدل ملابسها ومحمد جاء يهدرز مع خالاته ومعاهم سعاد

عائشة : يابنات ( تقصد بناتها وبنات اختها ) امشو هدرزو مع مرت خوكم

ركبو لغرفة مُنية وخشو طول

تفاجأت من خشتهم وعدم استأذانهم
وبان هالشي ع وجهها

زينة : اسفين لو ازعجناك

هزت بـ راسها نفيً

قعمزو

بشرى : قوليلنا يامرت خونا ههههه شن تقري ؟

اشرت بمعنى : في معهد الفنون

شافو لبعضهم بأستغراب

زينة : خيرك اتأشري هك مافهمتك الحق ، فهمتن حاجه يا بنات

بشرى : لا والله ترا ادوي كويس

تدخلت ريان

ريان : خلوها ترتاح وانتو خاشين عليها لا احم لا دستور

زينة : وانتي شن دخلك تتكلمي بدالها هي ماعندها لسان ولا كيف ؟

شافت مُنية لـ ريان

واشرتلها بيش اتقوللهم انها بكماء

ريان : عندها لسان وخير منكن ، غير فقدت النطق بس

بشرى : وشن فقدت النطق هذي ترجمي

زينه : يعني بكوشه احييي ومشت تجري ووراها البقية

خشت زينه للصاله لقت محمد معاهم قعمزت جنب امها عائشة وهمستلها

زينة : رااه خطيبة محمد بكوشة ماتتكلم توا بنت خالتها خبرتنا

حطت عائشة يدها ع صدرها بصدمة وعيونها قريب يطلعو من مكانهم

وشافت لـ بنتها

زينة : والله زي مانحكيلك هي

سعاد : بسم الله خير خير شن في

وقفت عائشة ووراها الباقين

شافت لـ محمد
عائشة : من وين بيجي الخير بس بتتزوج بكوشة يامحمد والله ماهي صايره !