بداية النهاية رواية للكاتب محمد مالك
#بداية_النهاية
الحلقة ( 2 )
للكاتب محمد مالك
^
(( اي سؤال او استفسار حطوه في تعليقات وحنرد عليه والخاص حتا هوا ? ))
رجب : مش عارفين شن نديروله نرفعوه وخلاص مفيش حل ثاني
علاء قيم انتا من غادي واني من اهنى
طالعين بي صقر
رواسي فتحت الباب وشافت دم قدام عتبة الباب
وعيطت باعلي صوتها
علاء تلفت للباب بيشوف ع شن عيطت رواسي
لقى احمد المغربي ع العتبة مذبوح !
فرج سكر الباب وايده ترعش
علاء..اثر الصدمة في وجهه
رواسي يدها ع فمها وتبكي
ساجدة..تبكي وايدها ترعش : هاده شني الي قدام الباب تبصرو صح ولا ؟!
حطو صقر ع الارض
رواسي حطت راس صقر ع رجلها
رجب..متوتر : مذبوح الي قدام الباب !
علاء: هاده البواب أحمد
علاء: تلفتو امشو من اهنى بنفتح الباب اني
شهد: لالالا متفتحش
فرج شد ايد شهد : امشي غادي خودي اختك وامشي
رجب: به صقر ميتنفسش !
رواسي: يتنفس
رجب: متاكدة ؟!
رواسي: ايه لكن نبض بطئ
رجب: فرج قيم معاي صقر نحطوه غادي
الساعة ( 9:22 )
رفعو صقر
وعلاء فتح الباب
نزل ركبه ونص يشوف في احمد كيف مقتول ويتقزز من المنظر يشوف بالسيف
علاء: يشوف في الظلام في كم واحد واقفين
رجب: في حد واقف ولا ؟!
علاء: ايه ظلام المشكلة بس
رجب: زعما !
علاء: ايه مرات هوا
رجب..بصوت عالي : من انتاا ؟! شن تبي ؟؟!
الراجل الي يشوفو فيه واقف في مكانه ك انه جماد بس الواضح انه يشوفلهم
علاء..سكر الباب
علاء خش الصالة وين كلهم مقعمزين ويبكو البنات
علاء : اني وصقر عرفنا ان بوكم في سبب خلاه يسوق او مقتول لكن الواضح مقتول
ساجدة..تبكي: مقتول ؟! شن تقول
علاء..ياشر ع الباب : كل شئ واضح بعد ما شفت شخص مذبوح ع عتبة الباب
رجب: وفي واحد واقف في الظلام مش عارف من هوا ؟!
شهد: اطلع شوفه من هوا ؟!
فرج: كيف يطلع مرات مسلح يقتله والواضح انه الي قتل احمد المغربي
شهد..تبكي شدت ف ايد فرج : روح بيا تربح معاش نبي منكم شى مسامحتكم
رواسي : لازم نطلعو من الحوش منقدروش نقعدو
علاء: متقدروش افهمو انكم متقدروش تطلعو
رواسي: ليش خوك صقر يتنفس بالسيف وفي حد مختل برا وفي جثة قدام الباب
علاء: انتي سالتي سؤال وجاوبتي عليه
رواسي : ؟!
علاء: في شخص مختل البرا من قتل احمد غيره يعني مرات مش واحد بس مرات اكثر من واحد منقدرش تطلعو في الظلام مرات نطلعو يقتلونا واحد وراء الثاني احسن حل نقعدو للفجر يطلع الصبح ع الاقل نقدرو نشوفو ف الظلام الدامس
رواسي: بالك المختل يهجم علينا في الحوش
علاء: هلبا مش حيقدر واصعب من ان نطلعوله البرا
رواسي..ترعش وتبكي وحاطه ايدها ع راس صقر
فرج: الحل الوحيد والمضمون الي قاله لكم علاء اول ما يطلع الصبح نطلعو
شهد تدعي وتقراء ف قران
ساجدة: ووه عليا شن يصبرني متت وعشت توا
علاء : تعال رجب نسكرو الباب كويس والرواشن
فرج..طلع فونه: مفيش تغطية
شهد: خليكم كلكم في الدار جنب بعض ترا
الساعة ( 9:32 )
فرج ..رافع فونه فوق يحاول يجبد تغطية
وشهد تشوف من الروشن
علاء ورجب ف الدور الي فوق يشوفو ف الرواشن وكل شئ مسكر
علاء: يا راجل تقول فيلم رعب ايدي ترعش لتوا
رجب: نقول مرات نطلعو خير
علاء: لو بنطلعو مش حنضمنو انه مش حيصير لينا حاجة
رجب: ولما نقعدو حتضمن انه مش حيصير شئ
علاء: ع الاقل في ضى ونشوفو وف جنب بعض الصبح نطلعو
رجب: والله معاد عرفت اني ووجعني مسكين البواب
علاء: الله يرحمه
رجب: به ليش بيقتلو بوك ؟
علاء: الفلوس يا معلم يا اما بوك مدخل روحه ف موضوع كبير
شهد..تعيط : وووووه
نزل علاء و رجب يجرو
فرج..شاد شهد: خيرك شن فيه
شهد…بتوتر وتعاود ف الكلمة الف مرة : شفته برا برا في في واحد يقولي باي بي ايده
فرج شاف من الروشن ملقى شئ
علاء..بعصاب: وانتي شن قربك الروشن مش قادرين تقعدو ف مكان واحد انهار الاحرف
الساعة 9:40
هشام حاط ايديه الزوز ع راسه
رجب..يشوف لي هشام وعرفه في حاله صدمه
علاء: انتا خيرك زي الوليه شاد تركينة ومسمعناش صوتك ولا حسك
هشام: في شخص ميت قدام عتبة الباب ومش ميت موته طبيعية مذبوح ذبح كيف تبيني ندير اصلا الحوش هاده نكد حزن غم كله فيه من لما صغار
علاء: توا مش وقت تسهويك ودراما اني قلبي يوجع فيا لتوا من المشهد والصدمة الي شفتها…علاء يتكلم وقص ع كلامه صوت دق الباب
كلهم سكتو ويشوفو لي بعض
علاء..حط صبعه ع فمه
ويمشي شور الباب بشوية بشوية
شاف من العين السحرية لقاها ظلام حط وذنه ع الباب
سمع صوت بهمس مزال 20 دقيقة
علاء بعد من الباب
وبعد الطقه معاش طق الباب
رواسي تدعي وتشوف كل شوية ف نبض صقر خائفةع سندها
وعلاء حاس بمسوليئة واي حد يموت من خوته او يصرله شى مش حيسامح روحه
اما هشام متفكر مكالمة بوه قبل اسبوع من الحادث وحاط ايده ع راسه مش قادر يحكي لخوته عليها !
ساجدة تبكي منهارة
شهد تقراء في قران وف جنبها فرج
اما رجب سارح ف عالم ثاني
__
علاء: سمعت كان مكذبنيش ربي انه مزال 20 دقيقة
رجب: 20 دقيقة شن ؟
علاء: لا حطيت وذني ع الباب سمعت كانه حد قالي مزال 20 دقيقة
رجب: هادو مختلين شكلهم يلعبو علينا ما نطلعو نضربوهم ولا نركبو سياراتنا ونجرو
علاء : ايه اطلع ويطلع عنده مسدس وقولي كان وصلت لي باب السيارة
رجب: به شن الحل شوية ثانية يخشولك الحوش
علاء: خليكم كلكم هنا ع الاقل لو صار شئ نقعدو
جنب بعضنا الي يبي يخش الحمام ( اكرمكم الله ) يخش من توا لن بعدها محدش يتحرك من هنا فيكم للصبح
ساجدة..تمسح في دموعها: اني بنمشي الحمام ع سريع
علاء: به برى ورجب تعال نديرو دورة في الدور الثاني مرة ثانية
علاء ورجب ركبوو
اما ساجدة مشت الحمام وترعش
صقر..يكح
رواسي: صقر
صقر..يفتح ف عيونه ويسكر
رواسي: جيب امياه يا هشام
هشام..ناض هيا هيا
رواسي: تنفس بشوية عليك
صقر..يتنفس بصعوبة
هشام خش ومعاه امياه
رواسي رفعت راس صقر : اشرب بشوية
شرب صقر شوية والباقي دارت المياه بيدها ومسحت ع وجهه بيها
هشام يشوف من الروشن ويتفكر في مكالمة بوه
فرج شد يد هشام : حول من الروشن
هشام: نسيت بكل
صقر شد حيله وقعمز
رواسي: شن يوجع فيك
صقر : شى غير دايخ بس
الساعة 9:59
سمعووو صوت عياط من الحمام
ناضو كلهم يجرو و اول الواصلين كانو رجب وعلاء
علاء حاط يده ع شعره ومصدوم
ورجب شاد ف ساجدة الي مضروبة بالموس
هشام وصل يجري ومعاه اخواته وقف ع الباب
شهد: لا اله الا الله
نأض رجب ويعيط : كله منك وعطى لي علاء بوكس
…يتبع
تفاعل محبط محبط محبط محبط اربعة مرات نكتبها كان تشوفو كمية حماس الي كتبت بيه حلقة الاولي وكنت متوقع دعم وتفاعل اقوا من هكي بس احبطني التفاعل مشكلة لما خشيت شفت عدد الي يقرو طلع عددهم 6000 يعني 500 بس يتفاعل والباقي يمر مرور الكرام ؟!
ع العموم حلقة اليوم قصيرة غدوة طويلة باذن الله وحتكون فيها احداث اكثر مقدرتش نوفق ونطول اكثر من هكي لكن مش عارف شن جاني اليوم نايض من ساعة 7 الصبح لتوا عيوني بيتسكرو نكتب بالسيف مقدرتش نخليكم من غير حلقة ?
لايك مهم جدا والله تفاعل يزيد من معنوية الشخص الي يقدم ف محتوي ?
للكاتب محمد مالك