بداية النهاية رواية للكاتب محمد مالك
حلقة ( 1 )
للكاتب/محمد مالكلايك اهم من التعليق ?
(( شفت تعليقاتكم يقولو فيها شبهه من بارنوايا لو اسمه صح هكي ? مفيهاش شبهه بكل اقرو واحكمو بروحكم وقولو من احسن بعدين ? ))
(( توضيح بوهم توفى ف شهر 1 مش 10 وبعد العزاء بزبط اتفقو انهم يتلقطو في حوش بوهم الي ف الجبل عشان يتفاهمو ع الورث وتوا تشوفو الاحداث?? ))
رواسي تلبس ف الوشاح : صقر كملت شهد ( اختهم )
صقر واقف ع المرايه يصور
رواسي: وقتهم صورك توا
صقر: ايه قالت بيجيبها راجلها وبيقعد معانا
رواسي: تخاف خوتك يديرو العار قدام الراجل بدات علاء
صقر: يمشو يملحو
رواسي: هيا ساعة 2 الظهر توا امتا نوصلو زعما ؟!
صقر: معا ساعة 8 نكونو غادي
رواسي: به هيا
طلع صقر ورواسي ركبو السيارة واتجهو لي حوش بوهم الي من 2014 ما مشوش غادي
____
علاء في الورشة يغسل في ايديه
وسكر الورشة وركب شقته فوق الورشة
خش خدا دوش ع سريع ولبس
فونه يرن
علاء : ايوا يا معلم كل شئ واتي باذن الله!
_______
رجب يكلم في ساجدة فايبر
رجب ( خوي ) : اني ف المطار انتي وين
ساجدة.( اختهم) : في الاستقبال تلقاني
رجب شاف ساجدة من بعيد سكر المكالمة ومشى شورهاا
رجب : عاش من شافك
ساجدة مبتسمة
رجب حضن ساجدة
ساجدة: حي عليك كبرت والشيب ركبك
رجب: ههههههه هاده حال الدنيا هم وغم تقول ياريته قعدت صغير وما كبرت وعرفت الدنيا ع الحقيقة !
____
شهد..اطق ع باب عمتها ( ام راجلها )
معتوقة : مرحبتين بنيتي خشي
شهد : لا الحوش بعيد هلبا يدوب نلحق نطلع من توا غير بنخليلك البنت بس
معتوقة..خدت بنت شهد في حضنها: ااغه
شهد: هيا بنمشي عمتي هاده الساكو بتاعها فيه كل شئ ليها صحيتي غدوا الظهر نكون اهنى ان شاء الله
معتوقة: تمام في امان الله
سكرت الباب
طلعت شهد وركبت معا راجلها فرج
______
صقر فاتح اغاني باعلي صوت ويغني
رواسي: قصدك الطريق كلها بتغني
صقر: مزال 5 ساعات مش نوصلو معناها يا بتسمعي صوتي سمع مش طبيعي
رواسي..نقصت المسجل : ارحم وذني واسكت
صقر: هههههههههه
رواسي: حقا كلمت هشام ؟
صقر: لالا ناقص اني
رواسي:بالك ميجيش ؟!
صقر: لا مدام موضوع فيه فلوس حيجي
رواسي: في سؤال يدور ف راسي من العزاء
صقر: شن هوا ؟!
رواسي: الله يرحمها مش مبطل سواقه ؟
صقر: انسان عايش بروحه كيف يمشي ويجي كان يعني اكيد حيرجع يسوق
رواسي..رفعت حاجبها : مرات
بعد مرور 6 ساعات وصولهم للحوش ?
الساعة ( 8:00 ) المغرب
رواسي..طلعت فونها بتتصل بخالتها : حي تغطية مفيش
صقر..نزل من السيارة: شكله محدش وصل
رواسي: ساعة 8 امتا بيوصلو هادو
صقر شاف حد مقعمز بعيد شوية ويدخن : علاء هاده ؟؟!
رواسي: مش عارفة ؟! غير شوف عندك تغطية
صقر..طلع فونه من جيبه: لالا مفيش تغطية
رواسي: حلو لا نت لا مكالمات
صقر: ليلة وفراقها صبح غدوا بتروحي
شافو ضئ سيارة ودرست جنبهم نزلت منها شهد
شهد..حضنت رواسي: اهلين امتا وصلتو
صقر: قبلك بخمس دقائق
فرج نزل من السيارة: السلام عليكم
صقر: وعليكم السلام كيف الحال
فرج: الحمد الله كيف حالك انتا
صقر: الحمد الله
رواسي: شوفي عندك تغطية مدار شفرتك انتي
شهد..فتحت شنطتها طلعت فونها: لالا مفيش حتا مدار
الي كان بعيد يدخن يشوفو فيه جاي بشوية
فرج: من هاده ؟
صقر: والله ما نعرف
فرج: عند من مفتاح الحوش ؟!
رواسي: عندك انتي شهد ولا
شهد : ايه عندي شوية بسس
علاء وصل فيهم رمى الدخان وعفس عليه
علاء: السلام عليكم
كلهم: وعليكم السلام
علاء..شاف لي فرج : مش قلتو اجتماع عائلي
صقر..رفع حاجبه: ومن قال انه مش من العائلة
علاء: اااه امالا اهلا وسهلا بيك افتحولنا الباب صقع الجو
شهد: اعوذ بالله من الشيطان الرجيم
شهد فتحت الباب وهما بيخشو درست سيارة رجب وساجدة معا بعضهم
نزلو من السيارة وسلمو ع بعضهم وحضنو بعضهم
الساعة ( 8:30 )
مقعمزين كلهم في الصالة
ودوشة بكل وكلهم يهدرزو
رن باب الحوش
علاء: توا نفتح اني
صقر: لا خليك اكيده هشام هاده مش ناقصة شوشرة ومشاكل توا
علاء؛ تعرف شكلك نسيت اني خوك الكبير انتا مش كان لعبت حديد ودرت جسم تحساب روحك راجل
صقر: راجل وغصبا عن خشمك
علاء..وقف : شكلك تبي تنضرب يا ولد انتا
رجب: اسمعو يوم واحد هوا تحملو بعضكم كيف ما يجي وفكونا تربحو
الباب يرن
ناضت ساجدة فتحت الباب
هشام: ثلاثة سنين مش تفتحو متاكد تعزمو في بعضكم من يفتحلي
ساجدة: الناس يقولو اهلين كيف حالكم شن اخباركم مش هكي يرحبو
هشام: هههههه السلام عليكم يا عيلة
كلهم : وعليكم السلام
هشام: البواب هاده شن موضوعه الي برا عزاني في بوي توا يخدم عنده كان ولا كيف
علاء: هاده كان يوصل في بوك ويرفع فيه ويجيبله ف الخضراء والبضاعة كل يوم
هشام: ااه مغربي هوا شكله
علاء: مغربي ايه
شهد : رواسي ساجدة تعالو نديرو سفرة عشاء جبت كم حاجة
رواسي : هيا
علاء..ولع سبسي : شن الجو يا هشام
هشام..براس خشمه : الحمد الله
علاء: هههههههه يالله المفرخ كبرو ودارو شخصية
هشام: قاعد نفسية ودراه كبد زي ما انتا
صقر: شكله بنقعدو نحزو للصبح يا رجب
رجب: شن بديرلهم هي ربي يهديهم
صقر: كيف حال حلا يا فرج
فرج: هههه تبكي امبكرى تبي امها
صقر: ايه الصغار كلهم هكي
فرج: ايه لكن ساعة بس وتنساها
صقر؛ ايه
فرج: السنون بدو يطلعو تعيط طول الليل
ساجدة خشت حطت مفرش ع الطاولة
وقعدو بشوية بشوية يجيبو ف الحاجات
صقر: قتلي يا علاء البواب المغربي هوا الي يوصل في بوي ويجيب فيه ؟!
علاء: ايه هكي قالي
صقر ناض : شن اسمه هوا ؟!
علاء: مش عارف ع ما اظن احمد
صقر: تعال معاي ترا
صقر طلع البرا وينادي عليه
صقر: وين مشي هاده
علاء: اهوا جي
احمد: السلام عليكم
صقر: وعليكم السلام كيف الحال
احمد: الحمد الله
صقر: بنسالك انتا الي تجيب في بضاعة بوي الله يرحمه وتوصل فيه ولا ؟!
احمد: ايه انا
صقر: يعني بوي ميسوقش ؟!
احمد: ايه
علاء استوعب الموضوع وشاف لي صقر : قصدك ؟!
صقر: به سيارة بوي من كان يسوق فيها ؟!
احمد : انا نسوق فيها
صقر: به يوم الحادث شفت بوي طلع بيها ؟!
احمد: لالا اني كنت عند صغاري طلعت مشوار وراجع لما رجعت قالو لي ع الحادث
صقر: تمام صحيت
علاء وصقر رجعو الحوش
علاء: شن الي خلا بوي يطلع بالسيارة
صقر: من قالك طلع بيها مرات من الاساس
علاء..حط ايديه ع راسه
صقر: غير متقولش لي حد توا
علاء: قصدي قاتلينه مرات
صقر: مرات وين تندري
رواسي تنادي: صقرر هياا تعال ك بتاكل !
صقر: هيا ومتقولش لي حد
خشو الاثنين
وقعمزو كلهم ع الطاولة
الساعة ( 8:50 )
رجب: اياه اياه قداش لينا ع تقعميزة معا بعض
شهد:غير فكونا من المشاكل وتمشي الليلة بخير
علاء ساارح ويفكر
هشام..شاف لي علاء : يخمم خونا الكبير
ساجدة..فنصت ف هشام: فكنا عاد
صقر..ياكل ويتكلم: هشام من يومها يشوف الوضع هدوء يقعد يناشب
رواسي تشوف لي العائلة كيف كلهم يهدرزو ومتلقطين
عجبها المشهد معا انه متاكدة انه مستحيل يتكرر !*
فرج: مفيش تغطية بكل
علاء: نبي نفهم شى واحد ليش بوكم مكبد ع الحوش هاده معا انه لا فيه تغطية والضى بالهون ومفيش سكان في جنبه منقطع ع العالم وعاجبه
رواسي: مش عارفة نقول ع خاطر رائحة ماما فيه
علاء: ترا فكيني من الوهم الله يرحمها وهوا الي قتلها بالنكد اصلا
رواسي: جيبلي ليبين متزوجين ومفيش بينهم مشاكل وعراكات بس في الاول والاخير يحبو بعضهم مهما صار بينهم
علاء: بوك صغاره ميحبهمش بيحب مرته
هشام…خبط ع الطاولة : الله يرحمه
علاء: عاودها ثاني لما اني نتكلم نكسرلك راسك
صقر: صح كلام هشام الله يرحمه متعرفش مرات يحبك اكثر ما نحبوك احنى ف ترحم عليه وانسى الي فات مات
رجب: غير حطو كل شئ ع جنب ونجو لي موضوعنا الي تلمينا ع خاطره
ساجدة: غير ناكلو ونهدرزو قبل بعدين توا نتكلمو عليه العفو وانتو مستعجلين ع الفلوس قريب تموتو كان مفيش فلوس حتا نصكم ما حتجو كنتو
علاء: ايه نجي من نشوف خليقة هشام امالا
شهد: يا علاء يا علاء اسكت تربح
رواسي: تعرفو صح تتعاركو وقريب تاكلو بعضكم بس مشهد تجمعنا كلنا ع طاولة وحدة من سنين حلووو هلباا اكثر ما تتصورو
الساعة( 9:00 )
صقر…يكح
شهد تصب في امياه هااك اشرب
صقر شد طاسة المياه وشرب منها وهوا يشرب اغمى عليه
رواسي..بصوت عالي: صقررر
ناضو كلهم يجروو
علاء شااد راس صقر : تسمع فيا
ويضرب فيه ع وجهه تسمع فيا ؟!
رواسي حاطه ايده ع نبض صقر
رواسي: وووه عليا ميتنفسش
رجب اقلبه ع ظهره وقعد يضرب في ظهره
شهد: ارفعوه المستشفي بسرعة بسرعة
علاء: مش حنوصلو بيه حي لازم نديرو حلل
ساجدة حاطه ايدها ع فمه ومش عارفة تتكلم ولا تتصرف
رجب : مش عارفين شن نديروله نرفعوه وخلاص مفيش حل ثاني
علاء قيم انتا من غادي واني من اهنى
طالعين بي صقر
رواسي فتحت الباب وشافت دم قدام عتبة الباب
وعيطت باعلي صوتها
علاء تلفت للباب بيشوف ع شن عيطت رواسي
لقى..
يتبع
حلقة اولي رايكم بيها وينهم الي قالو تشبه بارنوايا ?
لايك مهم جدا بالنسبة ليا وع تفاعلكم نطول الحلقة نتمنا فهمتو فكرة الرواية كيف توا اي سؤال اكتبوه ف تعليقات وحنرد عليكم حلقة الجاية
هي انطلقو من القاتل ومن الي هيعيش وشن شافت رواسي في فم الباب ؟!
روايات محمد مالك
اول رواية بوليسية وان شاء الله تنال اعجابكم
دمتم سالمين ??