بداية النهاية رواية للكاتب محمد مالك
الحلقة 9 والاخيرة !
للكاتب: محمد مالكشهد مصدومة من المشهد كيف انه ….
هشام !واقف وشاد سلاحه ع صقر
صقر..معنداش جهد يوقف ع رجليه وينزف
صقر..يتكلم بالسيف
هشام: تعرف يا صقر قلت اثنين حيتعبوني الي هما انتا وعلاء ف اني قلت نتفكا من صقر اول واحد نديرله سم درتلك سم ف العشاء لو تتفكر انتا نخنقت وطحت بس الي نبي نعرفه كيف ما متش يعني مكتوبلك تساعدني ههههههه قتلت كل الي بندفعلهم وفرت عليا ومكتوبلي يوجعني ضميري ونقتل اخ ليا ثاني مقتلتش حد بايدي الأ رجب وتوا انتا
صقر..يتكلم بصعوبة ويتنفس بصعوبة من الالم : ساجدة
هشام: ااه ساجدة فتحت روشن المطبخ لما جبت امياه وفي حد خش وطلع ههههه شن رايك
شهد تتفرج شادة الموس وايدها ترعش
هشام: تصدق اكثر واحد حيوجعني ضميري عليه رواسي كانت طيبة وحنينة معاي الله غالب بسببك انظلمت
صقر…يعيط بصوت عالي..ودم يطلع من فمه: لما نقتلك
هشام: هههههههه انتا مش قادر توقف ع رجليك لكن والله نصفقلك قتلت 6 ولا 7 ع ما اظن متوقعتش شئ زي هكي منك
صقر…يعيط وعروقه طالعات من العياط: لما نقتلك لما نقتلك
هشام..مبتسم : معا سلامة يا خوي الغالي
هشام سحب سلاحهه
ورفع اتجاه راس صقر
صقر يعيط لوطا ( لما نقتلك )
هشام..اشر بايده ( باي ) لي صقر
شهد ايدهاا ترعش
خدت نفس
وفتحت الباب بقوة وتجري نقزت ع ظهر هشام
وف ايدها
الموس ضربت هشام ف رقبته
وطاحت ع الارض
هشام تلفت يشوف لي شهد وايده ع رقبته كيف تنزف بغزارة قاعد متكلمش طاح
شهد ايدها ترعش وقلبهاا يدق
مشت لي صقر تجري
شهد..حاطه ايدها ع وجهة: شن ندير توا شن ندير
صقر..ينطق بالسيف: اهربي توا اهربي
شهد..بتقيم صقر مقدرتش
صقر: لا اهربي اهربي وجيبي حد بعدين اهربي
شهد..تبكي : حنجيب حد وعد
شهد نزلت الدروج تجري وتبكي
طلعت من الباب
تجري كان مفيش حد وظلام
كانت الساعة 5:00
تسمع في صوت الكلاب خافت مشت بشوية لحد خطمت قدام الاقفاص قلتهم محبوسين
وقعدت تجري للطريق
طاحت ووقفت عشرة مرات
رجليها دم من الطياح وايديها خبوش
تجري لدرجة تتنفس بصعوبة وجسمها مش قادر يمشي خطوة زيادة
شهد طاحت ع الرئيسي
تتنفس بسرعة كبيرة
بعدت ع الحوش بس مزال الطريق طويلة تبي ساعات ع الرجلين
وهيا راقدة ع طريق
شافت ضئ سيارة
حطت ايدها ع عيونها من قوة الضى
نزل راجل
راجل: شن مهبولة ولا كيف راقدة ع طريق نوضي بالك اصلا مفروض عفست عليك اني انقصو من المهبلة ف ليبيا
الراجل..شاف لي رجل وايدين شهد لقاهم دم
راجل..باستغراب: حولى من الطريق
شهد: وصلني بالله عليك
راجل..خائف ويبي يرفض يقولك شكلها مدايرة عملة واني بنحصل فيها
شهد..تبكي: بالله عليك موضوع حياة او موت لازم نلحق بسرعة
راجل..متوتر: به اركبي
شهد..ركبت تجري السيارة
راجل ركب يسوق ويشوف لي شهد باستغراب
راجل: نسالك عادي
شهد تشوف للروشن وساكته
راجل: مدام مرديتيش معناها عادي خيره حالتك هكي ؟! حد تعرضلك ؟! وشن جابك الطريق هادي
شهد تشوف للروشن وكانت سرحانه تفكر ف الي صار ومردتش حتا عليه
راجل: اني اسمي يعقوب للعلم انتي شن اسمك ؟!
شهد برضو مردتش عليه
يعقوب: استغفر الله مطيحني الا ف المهبلة اني
مرت ساعتين لحد وصلو لي وسط البلاد قريب من حوش شهد
شهد: صحيت اني بننزل اهنى
يعقوب حط ايده ع رجل شهد : وين ماشية هكي مسد ساكته طول الطريق زيادة مفيش مقابل ؟!
شهد..تلفت لي يعقوب وعطاته بوكس ف خشمه
فتحت الباب
ونزلت تجري
يعقوب شاد خشمه ينزف
شهد..تجري
والناس يشوفولها
الساعة كانت 7:00
شهد تجري لحد وصلت شارعهم
كان واقف ف شارعهم يسخن ف سيارة
خو فرج الكبير معتز
معتز شاف شهد نزل يجري من السيارة
معتز..يعيط: تي وين وشاحك خيرك هكي فرج وينه ؟!
شهد طاحت ع الارض
معتز قامهاا وخش الحوش
معتز: امي يا امي
معتوقة…: خيرك تعيط ع الصبح
معتز: افتح الباب بسرعة
معتوقة فتحت الباب لقاته شاد شهد
معتوقة: حي شن صاار
معتز:منعرفش
معتز خش بيها الدار وحطها ع السرير
معتوقة: وينه خوك فرج
معتز..بعصاب ويعيط : منعرفش منعرفش
معتز طلع فونه يتصل ب فرج يعطي فيه خارج نطاق التغطية
معتوقة تجري جابت امياه ومسحت وجهه شهد
نص ساعة وفتحت عيونها شهد
معتوقة فاقت يا معتز فاقت
فتحت عيوني لقيت روحي ف مستشفي
معتز: شهد وين فرج وخيره حالتك هكي
شهد ..دموع ينزلو ع خدها من غير ما تحس : ماتو كلهم كلهم ماتو مزال صقر صقر يستنا فيا صقر
معتوقة..:ووه عليا وليدي شن صارله
معتز: من هما الي ماتو فهمينا انتي وين كنتي اصلا
شهد..تتكلم وتبكي: اني وخوتي تلقينا امس وفرج كان معانا شوية وجو ناس برا الحوش قعدو يقتلو فينا واحد وراء الثاني
معتز..وجهه احمر: غير شن تخرفي فرج وينه توا فررج وينه
شهد…بعياط..وتبكي: فرج مات مات مات مات
معتز حط ايده ع راسه : هوا وين توا
شهد: في حوشنا
معتز..يعيط: وين حوشكم
شهد: مش حتعرف طريقه بروحك
معتز: هيا نوضي نمشو
شهد:اعطيني تلفونك بسرعة
معتز طلع فونه عطاهولها
معتوقة تبكي اااه يا وليدي اااه
شهد اتصلت بعمتها وحكتلها
معتز: هياا بسرعة نمشو
شهد..تبكي: لا نشوف نيروز قبل
معتز: نخطمو عليها ف طريقنا
شهد ناضت طلع بيها معتز خطمت ع نيروز حضنتها وطلعت
شهد: لازم تجيب شرطة منعرفوش شن يصير غادي مرات قاعدين
معتز اتصل بصاحبه يخدم ف كتيبة حكاله ع الموضوع وطلعو معاه ثلاثة سيارات
ساعة 9:00 الصبح وصلو الحوش
شهد فتحت الباب وخشت تجري
معتز خش وراء شهد
اول ما وصل الباب نصدم من الي شافه
كانت مجزرة بمعنى الكلمة جثث ف كل مكان
شهد ركبت تجري لي صقر
وصلت الدار
لقت صقر مغمض عيونه وميتحركش
حطت ايدها ع النبض لقاته ميت
شهد انهارت..تبكي: سامحني سامحني ملحقتش
معتز والشرطة مصدومين لوطا
شهد ناضت لقت هشام مرمي ع الارض ميت
قعدت تضرب فيه برجلها وتعيط : انتا السبب انتا السبب
مر اسبوع اسبوعين شهر شهرين انشهرت القصة وناس بدت تحكي فيها
دارو العزاء وشهد خشت ف حاله نفسية وتاخد ف علاج نفسي قعدت
حالتها ف تحسن بس مش قادرة تنسا لحظة من الليلة المشومة الليلة الي خسرت تقريبا كل غالي عليها ع خاطر شن ع خاطر فلوس ورث وسخ دنيا الورث والفلوس حترفعوهم معاكم القبر ولا يوم الي تقابلو فيه الله عز وجل الفلوس حينفعوكم هلبااا ولا ؟!
كمية جهل وحقد وكره ف قلوب البشر كبيرة لا رواية لا اثنين حتقدر توصل كمية الحقد الي عند البشر ف الوقت هاده مرات ماشي ف الشارع تشوف لي واحد تلقاه يفنص فيك ؟! علاش متعرفش وهاده الي صاير ف ليبيا عركة ع وسخ دنيا والابرياء انضرو من الي صار
( ان الله لا يغير ما بقوم حتى يغيروا ما بأنفسهم )
النهاية
وصلت
كان معاكم محمد مالك اتمنا نهاية عجبتكم هكي وكانت رواية جديدة من نوعها كامل تحياتي ليكم وشكرا ع القراء ولو وصلت للحرف هاده ف ربي يسعدك
متنسوش الايك مهم
ودمتم سالمين ?