حطيتك في عيوني
حطيتك_فعيوني
??للكاتبه زهور جمال الدين ??
???الحلقه الاولى ?? ?
سنه 78 عمك محمد( م 55 )تزوج عمتك وردة( م60 ) …وخداها وسافرو روسيا..
لانه يشتغل فالسلك الدبلوماسى تبع السفارة الروسيه ..
المهم جابو ولدهم نورى فى روسيا سنه 79.. طبعا سموه نوري على جده بو بوه ..
وبعد ثلاث سنوات جابو سراج سنه 82
وفى سنه 83 روحو ليبيا .. لان عادةً فى خدمة السفارات 4 سنوات وروح ..
قعدو فى ليبيا وكبرو نورى وسراج والجو جميل .. بوهم حالته كويسه مدللهم ومدلل امهم ..
وفى سنه 90 جتهم بعته ثانية للكويت
مشو شهر يناير و وردة كانت حامل ..
شهر 4 سنة 90 جابت بنوته زي الغزالة .. وسمتها” “مباهر ”
الاسم كان متداول هلبا فالكويت والخليج وعاجب وردة …ف سمت بنتها بالاسم هدا
شهر 8 كانت مباهر عمرها 4 شهور.. جى غزو العراق للكويت ..
وكل السفارات روحت ..ومن ضمنهم السفارة الليبيه
روح عمك محمد بعويلته وع اساس بيرجعو للكويت ..
حرب العراق والكويت استمرت لعند شهر فبراير سنه 91 …
لما تمت الحرب واعلنو التحرير رجعت كل السفارات للكويت ..
جهز محمد نفسه على اساس يرجع هوا حالياً .. والعويلة وردة والصغار يلحقوه بعد اسبوعين
سافر محمد للسفارة .. وبعد اسبوع جى خبر لوردة ان زوجها محمد توفى ..
وبعد ثلاثه ايام وصل الجثمان لطرابلس ودفنوه
كانت مباهر عمرها 10 شهور
مادياتهم كانت كويسه .. وبوهم كان عنده مصنع مياه معقمه خاش شريك مع زوز صحابه فى بنغازى …
قعدو ساكنين فى طرابلس ..والشارع اللى وراهم ساكنين فيه حوش جدهم بو امهم
___________________
سنه 2015
كبرو الصغار ..نورى عمره 36 سنه ومزال مش متزوج ولا مرتبط ..انسان واعى ومتفهم ومتحمل المسؤلية من لما هوا صغير..متخرج من ادارة الاعمال ..يشتغل فى وزارة الخارجيه
وسراج عمره33 سنه .. شادها تعارف وبنات وهياجه وكريمات شعر …خاطب ايمان م 96 تقرا فى سنه اولى طب ..وهوا متخرج من كليه الاقتصاد قسم محاسبه ويشتغل فى برج طرابلس
مباهر عمرها 25 سنه ..تخرجت من كلية اللغات قسم انجليزى …
وشادتها هياجه وخلاص زى خوها سراج .. ماتبيش تخدم .. ولا تلبس الحجاب..
علاقه نورى ب مباهر قوية ومعتبرها بنته وهيا معتبراته خوها وصديقها الوحيد يقوللها طيحى فالبير اطيح
تجربت حب لبنت ليبية عبر الهاتف في واقعنا اليبي و احداث سياسية في دولة ذئاب خشت في الحب هذا ، بس شن حتكون نهاية الحب هذا ؟
اما علاقتها بسراج زى ناقر ونقير ..24 ساعه وهما اصواتهم طالعه مالعرايك
وردة عاشت تربي فصغارها لين كبرتهم .. لما توفى زوجها رجعت لخدمتها كمدرسه .. وهيا حاليا مديرة للمدرسه اللى هيا فيها .. نور عيونها نورى .. ودلالها كله واخدينه سراج ومباهر
______________
نورى كبّر خدمت بوه .. ومصنع المياه صار مصنع مياه ومشروبات .. وكبرت الخدمه اللى شادها الحاج صالح صديق بوه …
وفالحوش نورى هوا الكل فالكل .. وبيش ماتصيرش مشاكل..دار لكل واحد فيهم معاش .. لانها ورثه الجميع ومن حقهم ..
__________
-سراج: قلتلك حطى ام الحجاب على راسك لما تطلعى
-مباهر: انت مدخلكش فيا
-سراج : تى والله كان متسكرى فمك نجى انربيك
-مباهر: انت غير ربي روحك قبل
وردة جت فتحت دار مباهر: خيركم شن فى
-سراج: قلتلها معش تطلع هكى تلبس حجاب تشبحى فيها الشوارع كلها مليشيات
-مباهر: لما نبى نلبس حجاب نلبسه بقناعتى ..مش انت تلبسهولى ..غير برة استر خطيبتك اللى ادور فالشوارع على رجليها لبسها مشحط وشعرها مفتوح
-سراج: ايمان مازالت فرخه صغيرة .. لكن انتى كبيرة والعين عليك
-مباهر : ياواعر فخواته ياسعد المراءة اللى جاته
-وردة: ضمى فمك انتى وياه .. يا ضحك الجيران عليا
-طلع سراج من الدار: تو نوريك فى جرتك انا لين تستقيمى
-مباهر: مستقيمه انا .. شوف روحك قبل
_______________________
العشية مباهر تبى تطلع بالسيارة ..
-مباهر: ماما اهو بنطلع
-وردة : وين طالعة توة فكينى من خوك
-مباهر: تي شنو كانا نورى مسافر بيدير روحه راجل عليا .. تو يروح نورى ويوريه حساباته
-وردة: سلم بنيتى فكينى من خوك .. يروح نورى واطلعى زى ماتبى
-مباهر: منعطلش يا ماما والله شوى نفوت على سرور نمشو ل ماكس تاخد حاجات هيا تبيهم وانروح
-وردة : سرور هادى وين خوتها شنو ملزومين بيها احنا
-مباهر تبوس فى امها : غير هيا يا ماما شوى ونجى
-وردة تضعف طول من بوسات مباهر: عندك ساعه متعطليش
-مباهر: ماما الشوارع زحمه ساعه هادى انشالله توصلنى لحوش سرور
ولعت مباهر سيارتها وطلعت
فاتت على سرور ركبتها
لقت معاها اكرام بنت خالتها ركبت معاهم وطلعو
_____________
مشو لماكس دارو دورة وشرت سرور اللى تبيه وطلعو ..
-اكرام: متقولوليش بتروحو توة
-مباهر : فكينى من امى قالتلى متعطليش
وشرين تليفون مباهر .. قامت التليفون وردت
-مباهر: الوو .. ايوة .. ايه مباهر نورى تفضل .. اهلين بيك خوى .. تو انا نجيكم ونستلمها الهديه .. مشكور
وسكرت الخط
-سرور : شكون
-مباهر: مكتبه الوفاق
-سرور تضحك : من منو زعما الهدية
-مباهر : الله اعلم
-اكرام : تى باهى هيا نمشو توة واستلميها
-سرور : ومنقالك انها بتستلمها ..
-اكرام: تعرفى انتى شخصيتك كلها تناقض يا مباهر..
تطلعى وتسوقى وفاتحه شعرك ومتكلميش فى اولاد ..
وماتاخديش فى هدايا .. بالرغم اللى يشوفك يقول عليك انك كل يوم تكلمى فى واحد
-مباهر: يابنتى الحريه ثم الحرية ثم الحريه .. وبعدين انا حتى فاتحه شعرى لبسى كله محترم كم طويل وجاكيتات
-اكرام : نبى نفهم علاش متبيش تكلمى شباب .. تى والله احلى حاجه الزواج على حب
-مباهر : ومن قالك انى حنتزوج .. مستحيل والله مايكتبها عليا الزمان
-سرور: لكن هدا غلط يا مباهر.. الزواج سنه الحياة
-مباهر: مايلزمنيش
-اكرام : باهى وبتقعدى هكى منغير صغار
-مباهر: هدا هوا الموضوع اللى كان نلقاله حل بس
وقعدو يهدرزو فالسيارة .. وروحت بسرور واكرام لحوشهم ..
ادن المغرب
وجت مروحه .. تمشى فالطريق لين مشية السيارة بدت غلط ..
وقفت مباهر السيارة وفتحت الباب شافت العجلة
-مباهر : الشيت العجلة انفشت
قعدت فالسيارة وتفكر من بتكلم .. خوها سراج دراه كبد وبيقعد يحل فى فمه عليها ..
تلفتت لاخر الشارع لقت لافته مكتوب عليها ورشه قالت الحمدلله اهو لقيت حل ..
نزلت من السيارة مشت للورشه .. لقتهم منزلين السرانتى ومسكرينه بالمفتاح.. .والعامل واقف قدام الباب …
-مباهر: لو سمحت سيارتى وقفت بيا والعجلة شورها انفشت
-العامل: احنا خلاص سكرنا
-مباهر : نقولك سيارتى واقفه وتشوف فيها الدنيا ليل
-العامل: المعلم روح ..وهوا معاه المفتاح ..اهو نمشى معاك انا نشوفها
مشت هيا والعامل لسيارتها ..شافها لقى العجله مطربقه نهائيا ..
-العامل: وين العجلة الاحتياط انركبهالك ..
-مباهر: فالكوفينو ..
وفتحتله الكوفينو شافها لقاها حتى هيا مفشوشة …
-العامل : ماتركبش تبى ترقيع والورشه مسكرة
-مباهر : باهى كلم المعلم متاعك يجى يفتح ..قوله بنت واقفه فالطريق تو يقدّر هوا
اتصل العامل بالمعلم متاعه .. وحكاله .. فقاله اهو تو نجى انا قاعد قريب
مباهر تسمع فالصوت وتتخايل فالمعلم هدا شيبانى وكرشه منكوت
عشرة دقايق وقفت سيارة هونداى دهبيه ..
نزل منها شاب ..لابس سروال اميركانى .. وتيشرت ازرق كحلى وجيبوطى اسود ..
الشاب : هيا هادى السيارة يا محمد
-العامل: هيا دى يا معلم
ومباهر تشبحله وتضحك فى خاطرها وين الشيب والكرش المنكوت ???.. طلع شبوب صغير ..كانا يجى خوى سراج يشوفنى توة لما يقتلنى وتضحك …
-الشاب مد المفتاح للعامل : هاك برة جيبلها عجلة جديدة
-مباهر: لا معنديش حقها توة ..يرقعلى اللى فالسيارة ويركبهالى وخلاص
-الشاب شبح للعامل: برة جيب
-مباهر تكنطت انه يبيش يرد عليها: لوسمحت نكلم فيك انا .. منحبش ناخد حاجه بالدين
-شبحلها الشاب: تو هدا منظر طالعه بيه بنت عقاب الليل .. تى والله لو نعرف ان هكى منضر صاحبة السيارة رانى ما وليت بعد مابدلت حوايجى
-مباهر: اولا احنا مغرب مش عقاب ليل ..ثانيا انت مش شغلك فيا ..انت لا بوى ولا امى ..
وصل العامل جايب العجله الجديدة
-مباهر تشبح للعامل: لا شكرا ماصارليش
حول الشاب جبوطى متعه وقال للعامل هات الكريك وماباش يرد على كلامها
شبحلها قاللها اركبى فالسيارة وسكرى الباب
وبالفعل ركبت للسيارة
نزل حط الكريك قام السيارة وغيرلها العجلة
ونزل السيارة
ولبس جييوطى متعه وجى ماشى لسيارته
-مباهر : اسمع
-الشاب: نعم
-مباهر: غدوة نجيب الفلوس متع العجله للورشة ..
نقوللهم الحساب المدفوع باسم من
-الشاب : باسم منصور
-مباهر: باهى شكرا يا سيد منسور ..وغدوة نجيبلك الفلوس انشالله
-منصور: اسمى منصووور ..مش منسور
-مباهر: باهى غير بلا عياط .. وصحيت
ومشت بالسيارة روحت للحوش ..
امها قلبها يغلى..
جت الساعه 10 ومباهر مروحتش
الساعه 10 ونص وصلت للحوش
-وردة: باهى اللى وصلتى يا هانم .. اركبى بسرعه غيري حوايجك خوك قريب يروح يلقاك هكى يديرنا مشكلة
-مباهر: وووك خوك خوك .. درهتيلى كبدى بيه يا ماما
-وردة : اركبى وبعتالى نتفاهمو
ركبت مباهر غيرت حوايجها ونزلت دارت توست وقعمزت جنب امها وحكتلها عالسيارة ..
وعطتها امها فلوس بيش ترفعهم غدوة للورشه
وبالفعل ثانى يوم مشت مباهر للورشه بيش تعطى منصور فلوسه ..
فقاللها العامل انه كان هنايا وطلع .. عطت الفلوس للعامل وروحت
وكلها غيظ انها ملقاتاش .. لانها كانت ناوية تسمعه كلمتين قنينات على هزوته على منضرها
_________________
وفات اسبوع …
روح نورى للحوش ..
وطبعا الامن ح يستتب من اول وجديد فالحوش …لان سراج ومباهر الزوز يخافو من نورى
نورى كيف وصل ومقعمزين فالصالون هوا وامه
-وردة: الحوش منغيرك مايسواش يا نورى
-باس نورى على يد امه: الدنيا كلها منغيرك ماتسواش ياغالية
نزلت مباهر تجرى .. وسلمت على نورى وباست عليه
-مباهر تضحك : الغايب ليك يا ماما والهدايا ليا
-نورى: الحاجات اللى بعتيهملى عالفايبر كلهم جبتهملك
-مباهر تفتح فالشناطى: سلم نويرة وانا بمن رافعه راسى غير بيك
-وردة : غير كانا يسمع كلامى بس ويخلينى نخطبله
-مباهر: خطوبة شنو ياماما وزواج شنو ..
خلينا هكى عيله مع بعضنا ..
اهو خطبتى لسراج شن استفدتى 24 ساعه وهوا مشاكل وعراك معاها وانتى فالحشايم مع اهلها
-وردة: انتى ضمى فمك ومادخلكش
-نورى :حقه هوا وينه سراج ..
مباهر تسمع فى تليفونها يشرين ..ركبت تجرى لدارها
-مباهر: الو اهلين سرو
-سرور: شن صار قلتى لامك
-مباهر: تى فكينا منها الحفله هادى ..
جاية الفرخه سارة وانا والله ماعندى ليها خلوق
_________________
زعما حفلت شنو اللى تبى تمشيلها مباهر
وزعما شن بيصير فيها
وتتلاقى مع منصور مرة ثانية ولا لا
الحلقه الجاية نكملو..انزلها بعد ساعه ?
نحبكم ❤