رواية ابتزاز بقلمى زهور جمال الدين
#ابتزاز
بقلم زهور جمال الدين?
?الحلقه الثامنه ?
“حقيقيه ممزوجه بالخيال”
_
قام حمزة تليفونه واتصل
-حمزة / يا فندى عامر .. قول للقوة تتجه لى صلاح الدين جهه كليه الاسنان
-فندى عامر / تم يا فندى .. انت فالمكان موجود ولا ماشيله
-حمزة / اهو ماشى لكن الطريق زحمه
صكرو الخط وخدى حمزة اشارة الشرطه اللى تعوى وحطها عالسيارة من فوق .. وبدت السيارات تفتحله فالطريق
شرين تليفونه لقاه نبيل متصل
-حمزة / ايوة
-نبيل / تعالة فيسع راهو خش حوش معش طلع منه ..
-حمزة / اهو جايك فالطريق والقوة قريب توصل
-نبيل بدى يرعش / قوة!!! .. قوة شنو لا قوة الا بالله.. منهوا الشخص هدا وشن تبو منه ..ياوخى كانا القصه فيها مشكلة طلعونى منها وخلى انروح
-حمزة / تصدق لو تسيبه وتروح قبل مانوصل .. الشمس ماعاد تشوفه .. وكان وصلتنى بيه جاك الخير اكله
-نبيل / غير صكر صكر اهو طلع خلى نشدها فى جرته
-حمزة / رد بالك اضيعه .. اهو جاييك انا
حمزة يجرى بالسيارة والعواية تعوى فوق سيارته
_________________________________________
_
فى الطريق
-مودة / يعنى انتو علاقه ولا لا
-هند / اووووو ف.. خيرك معش سكتى يامودة
-مودة / ماهو نبى نعرف انتى منين تعرفه … الولد يشبحلك وهوا خايف عليك .. نضراته ليك كلها حب
-هند / والله
-مودة / وراسك يا هنودة .. يمى على نضرة عيونه الحارة .. واااك محلاها
-هند / نقولك وماتقوليش
-مودة مبتسمه / قولى بسرعه
-هند تشبح للطريق ومبتسمه / خطبنى من مختار
-مودة شهقت / لا لا
-هند / والله
-مودة / قصدك انتو تعرفو بعضكم من زمان
-هند / لا والله .. من يوم وفاة نرمين الله يرحمها بس .. تدكرى لما عطتنى رقمه وقالتلى كلميه
-مودة / الله يرحمها ويغفرلها
-هند / اامين
-مودة / يعنى توة خطبك رسمى وبتتزوجو
-هند / احنا العائلة بالكامل مرينا المدة اللى فاتت بي ظروف سيئة .. ماعتقدش ان فى مكان للفرح فى حياتنا حاليا
مودة سكتت كأنها موافقتها الراى
-هند / نحطك فى حوشكم ولا تروحى معاى
-مودة / لا خلى نروح معاك.. فكينى تو يشوفنى خوى منير مروحة متأخر يديرلى وجيج .. بالله كلمى ماما قولليها بنروح معاك
-هند/ باهى براحتك.. تو نكلمها توة
_________________________________________
_
فى صلاح الدين
-طلال / خليك شاد وراه يا نبيل
-نبيل / هوا يجرى .. هاك تشبح فيه
وقفو عالسومافرو
-طلال / انزل يا نبيل .. تو نسوق انا
-نبيل / نخافك تكصرها يا راجل دافع فيها دم قلبى
-فتح نبيل الباب/ تى انزل بسرعه يا راجل السومافرو قريب يفتح ..
نزل نبيل وركب طلال .. ولف نبيل لى كرسى طلال قعمز فيه
فتح السومافرو … طلع سامى يجرى وطلال فى جرته ..
فات السومافرو ..
-طلال / كلم الفندى قوله صاحبنا شكله ماشى لى وادى الربيع ..
-نبيل / تم ..
قام نبيل تليفونه وخبر حمزة باللى صار
-حمزة / انا وراكم وقريب نوصلكم .. والقوة وراى .. ماتخافوش غير خليكم فى جرته
-نبيل / تم يافندى …
مشو قيس العشرة دقايق … وخش سامى طريق فرعيه .. لكن الشباب قعدو واقفين ماخشوش وراه لانه بيكشفهم ..
فات اول استراحه .. وفات الثانيه … الثالثه درس السيارة وطق عالباب فتحوله وخش ..
طبعا نبيل على طول كلم حمزة وبلغه
-حمزة / اطلعولى عالطريق بيش نزبطكم
-نبيل / تمام
وصكرو الخط
-طلال / واحد يقعد هنايا بيش يراقب والثانى يطلع بالسيارة بيش يجيبهم
-نبيل / انت تقعد .. وانا نطلع …
-طلال / تم الكلام .. غير خلينا متواصلين بالتليفون
-نبيل / تم
نزل طلال لبد ورا شجرة .. ووركب نبيل مكان السواق ولف بالسيارة وطلع عالرئيسى ..
_________________________________________
_
فى حوش فاطمه …
درست هند السيارة قدام الباب … نزلت هيا ومودة .. خشت من الجنان … لقت كندرة قدام باب المربوعه البرانى …
-هند / شوره خالك مختار عنده حد
-مودة / الباين شخص واحد لان كندرة وحدة برة
-هند / قداش ادققى
وصلو باب اللوح .. وفتحت الباب بالمفتاح ..
خشو للسقيفه… حولو كنادرهم .. ومشو للصالة .. لقت اختها صالحة جايه عندهم …
-خشت هند / صالحة
-صالح تبكى / اهلين يا هند
-نزلت هند تبوس على اختها / اهلين اوخيتى …
سلمت عليها وبكت معاها … وسلمت مودة على خالتها وبكت معاها حتى هيا … وفاطمه نفس الشى تبكى
-هند تمسح فدموعها / جاية تشوفى فى مختار
-صالحة / لا جايه نخطب فيك لى ربيبي
-هند غصرتها العبرة / تو هدا كلام … انتى فى بابه تو يا صالحة بيش يبعتوك للموضوع هدا
-صالحه / بنيت امى .. الموضوع مايتأجلش .. حمزة بيسافر يوم الاحد لى المانيا .. ويبى يدير العرس ويرفعك معاه
-هند انصدمت / ااه… يوم الاحد
-مودة مصدومه / الاحد
-هند / انتى شن تحكى انا والله مافهمت عليك .. زواج شنو وعرس شنو اللى يحكى عليه الخميس واليوم احد
-مودة / انا مسامحتكم .. هكى الضرف صار..لا قلنالك بنجيبو قفة ولا بنديرو زكار .. يقرا عليك فاتحه وتمشى
-هند دموعها زى المطر / كيف ندير حاجه زى هادى وانتى فى عز حزنك ياوخيتى
-صالحة تبكى / لكن نقولك من توة .. لو وافقتى وقلتى باهى والله والله مانى مسامحاتك كان ماتلبسيش فيلو
هند تبكى
-صالحة / بنية امى .. بري وديري على روحك صغار وسيور
الولد كويس وماينهانش .. والله ماك لاقيه خير منه
-هند / لكن هكى فيسع فيسع يكلفتنى فى ست ايام..وبعدين
انا قلبي مزال مابردش على موتت بنت اختى
-صالحة / عمك محمد يكلم فى مختار عليك .. قولينا رايك من توة
-هند تبكى / خيرك ساكته يااام
-فاطمه / اللى قالتهولك اختك كله صح .. حتى انا نتهنى عليك
خدت هند شنطتها وركبت من الدروج ماشيه لى دارها .. طلعت التليفون من الشنطه وضربت رقم حمزة
__________________________________________
_
عالرئيسى
نبيل كلم حمزة وقاله على لون سيارته..وقعدو متواصلين بالتليفون لين وصل حمزة والقوة وراه
لما شاف سيارة نبيل .. درس .. ونزل سلم عليه .. وقفت السيارات كلها عاليمين ..
-حمزة يكلم فى القوة قريب 23 سيارة / نبيه حى .. بأى طريقه لازم تجيبوهولى حى
-كلهم / تم يا فندى
صكر نبيل سيارته وخلاها مدرسة برة… وركب مع حمزة فى سيارته .. وخشو للطريق بالسيارة فى جرت بعضهم ..
يمشو بالشوى بيش مايديروش صوت ..
-نبيل يكلم فى طلال بالتليفون / ماتخافش هادى سيارات الشباب اللى خاشه توة
-طلال / تمام ..هى تعالو…. وصكرو الخط
-حمزة تلفت لى نبيل / اول مانوصلو انزل انت وصاحبك اركبو فى التندرا البيضا اللى ورانا … ووخرو بيها للطريق .. مرات عندهم سلاح .. ويبدا الضرب بالرصاص .. وانتو منغير سلاح
-نبيل / تمام يا فندى
-حمزة / ونبيكم تنزلو من التندرا تركبو سيارتكم وتشدو الطريق لى توصلو حياشكم .. مانبيهمش يشوفوكم .. وغدوة بيناتنا تليفون
-نبيل / تمام .. صحيت يافندى
بالفعل وصلو لى طلال .. ركبهم حمزة فى التندرا وقاللهم اطلعو عالرئيسى..
مشى حمزة على رجليه ومعاه جماعته بسلاحهم …
وصلو للاستراحة .. وقفو قدام الباب .. ضربو جهه المفتاح بطلقه .. انفتح الباب طول ..
– طلعو ثلاث ولاد يجرو من داخل / خيركم شن فى … انتو شكون
-حمزة ماسك كلاشن / قيم ايديك فوق انت وياه يا حيوان
-الولاد الثلاثه بدو يرعشو / خيركم شن فى يافندى
-مشولهم زوز من القوة .. كل واحد عطوه ضربه على ضهره طاح عالوطا / قيم ايديك يا مسخ .. الفندى يكلم فيك ولا
الاولاد / والله مادرنا حاجه …
-حمزة / السيارة السودة لشكون
-واحد من الاولاد / ليا انا
-حمزة / طلعوه بروحه هدا نبى نسود ايامه زى سواد سيارته
وتلفت لى واحد واقف / خودو تليفوناتهم
مشى الشاب ضرب واحد من الاولاد على راسه / تليفونك وين يا خامر
-الولد / لداخل عالطاولة
-حمزة / قيموهم المسخين وجيبوهم وراى للمقر وماتنسوش تليفوناتهم
قاموهم وهاتك ياضرب/ نوضو يا مسخين يا حيوانات ..
ركبوهم كل واحد فى سيارة ومعاه اربع انفار ..
وهما يتراعشو هادوكا الاولاد …
ركب حمزة فى سيارته .. وجنبه ضابط معاه ..
شرين تليفونه ..قامه وشاف لقاها هند تتصل .. حط التليفون عالفودرة وماردش..قاعداعصابه محروقات ..عاودت الاتصال مرة ثانيه… ..
خدى التليفون ورد بعصبيه/ مدامه مارديتش عليك اكيد مشغول ولا
هند يبست فمكانها وانصدمت بعياطه … صكر التليفون وحدفه …
بعد ساعه الا ربع وصلو للمقر متعهم … نزلو الاولاد وهما يضربو فيهم …
-حمزة / دخلوهم لداخل … وديرولهم اللازم الثلاثه بيش اللى نسأله يقول الحق من اول حرف .. جيبوهملى بعد المغرب
_________________________________________
_
ادن العصر …
خش حمزة للحمام توضا … وطلع صلى … ومشى لى غرفته الدخلانيه عنده فيها سرير اتكى عليه .. ادكر هند .. وقف طلع للمكتب برة خدى تليفونه ورجع للسرير فتحه .. وضرب رقمها
المرة الاولى ماردتش … شرين مرة ثانيه ردت
-حمزة / الو
هند ساكته
-حمزة / هند … ردى عليا.. سمعينى صوتك
وهيا ساكتة
-حمزة / حبيبتى
-هند انفجرت / انت واحد كداب .. فى وقت مصلحتك تتصل وتكلم .. لكن لما نتصل انا تصكر فى وجهى .. يعنى مكالماتنا على هواك انت
-حمزة مبتسم / فى وقت مصلحتى … وينها المصلحة اللى خديتها منك ..
هند ساكته
-حمزة / جاوبينى
-هند / منعرفش
-حمزة / والله يابنت ماعندى فيك طميعه .. نبيك بالحلال
-هند بصوت واطى وهدوء/ شديته الولد
-حمزة / ماتغيريش الموضوع .. الولد تو نحكيلك عليه بعدين
…جتكم عمتى صالحة وبوى
-هند / جتنا .. لكن انت كيف تقوللها انك بتتزوج لاحد
-حمزة / لانى مسافر الاثنين
-هند / كيف تبينى نتزوجو هكى طول
-حمزة/ امالا عرض … انتى تبينى ولا لا
هند ساكته
-حمزة / تكلمى .. ردى عليا
-هند / نبيك .. لكن مش بالسرعه هادى
-حمزة / انا هادى ضروفى …فكرى وخممى وردى عليا
-هند / منغير مانخمم .. انا موافقه .. لكن قلت ندير محاولة.. بالك توسع بالك شوى
-حمزة / مش حنوسع بالى وبنقرا عليك فاتحة الاحد .. ومنسافر بيك الاثنين .. وبتوافقى غصبا عنك
-هند / حيلك حيلك ..لعلمك انا مازلت مريضه..وكل ليله لازم ناخد باندول بيش نرقد..راسى يوجع قريب يتفجر منى
-حمزة قلبه عصره / معليش … مش قضيه حبوب البندول كل ليله مش ح يعيقو زواجنا
-هند / ومدرستى
-حمزة / ح ناخدلك اجازة سنوية
-هند / مايعطوش
-حمزة / بأدن الله بعلاقاتى نقدر نديرلك راى … هاا شن قلتى
موافقه ولا شنو
-هند / والولد اللى شديته .. بتلحق اديرله محكمه فى 6 ايام
-حمزة يضحك / محكمه ?.. هدا محكمته عندى هنايا .. تو يبانله الواطى
-هند / هوا اعترفلك
-حمزة / مزال ماطلبتش يجيبوهولى .. خلى ناكل حاجه .. لانى والله من فطور الصبح
-هند / باهى صحتين والف عوافى مقدما
-حمزة / مش ح نسكر الا بعد ماتقوليلى موافقه
-هند بخجل / موافقه
-حمزة ?/ احلى كلمه قلتيها من يوم تعرفت عليك
وصكرو المكالمه
____________________________________________
_
بعد ساعه …
حمزة ينادى / يا محمود
فتح محمود الباب/ جيبلى الولد اللى بروحه وجيب معاه تليفونه
-محمود / تم يا فندى
طلع محمود … قعد قريب ربع ساعه … وبعدها فتح الباب ودخل سامى رايح وجهه زى الخريطة مضروب من جميع الجهات ….
-حمزة / صحيت يا محمود .. خليه واطلع وسكر الباب
محمود وقف سامى فى وسط الغرفه وحط تليفونه فوق المكتب وطلع وصكر الباب
حمزة قعد مقعمز عالمكتب يشبح لى سامى .. وبعدين وقف مشى جيهته .. وعمك سامى يرعش باللى فيه
-حمزة وقف جنب سامى وشده من رقبته / منين تعرف نرمين …
-سامى يرعش/ منو نرمين
-ضغط حمزة على رقبه سامى ويعيط / انت داير علاقة معاها .. ولا شنو … ليش ركبت معاك ..
-سامى مطبس راسه / والله مانعرفها ولا عمرها ركبت معاى
حدفه حمزة طاح عالوطا … ومشى خدى التليفون بيفتحه .. ضغط عالازراز ماباش التليفون ينفتح ..مشى لى سامى ضربه كانشو على رجليه
-حمزة مدله التليفون / افتح الرمز يا مسخ
-سامى يرعش/ اللى تبيه نقولهولك … ونعترفلك بيه ونوقع عليه … بالله عليك خلى تليفونى على تركينه
-حمزة خبطه على جنبه / تى افتحه يا مسخ
-سامى / بالله عليك .. والله مانقدر نفتحهولك
مشى حمزة للباب فتحه بالقوة / يا محمود..جيبلى الاسلاك الكهربائية
-سامى يبكى / لا … بالله عليكم لا ..حاضر نفتحه توة
___________________________________________
_
المهم بعد ماخوفوه الواطى سامى فتحلهم التليفون .. طبعا حمزة اول شى مشاله الفيس .. فتح صفحة سامى يبي يشوفها …
لقى اسم البروفايل ” غلا الروح ”
-خبطه على جنبه / داير روحك باسم بنت يا مسخ
قعد يتفرج عالبروفايل يلقى غلا الروح هادى ادمن فقروب اسمه الفراشات … لان الاشعارات والبلاغات كلها جايه منه
خش عالماسنجر لقى هلبا رسايل مكلم فيهم بنات .. خش عالرسايل لقاه يطلب فى صورة بنات…
لقى رسالة باعت فيها رسالة صوتيه / لازم نعرف انك بنت اول شى ابعتى صورتك ونمسحها طول .. وبعدها ابعتى تسجيل بي صوتك ..
-ضربه على رجله/ منهيا المراة اللى تتكلم
-سامى/ هدا انا
-حمزة / وكيف داير صوتك مراة
-سامى/ بي برنامج يا فندى
رجع شاف للرسايل لقى البنت اللى تكلم فيها بعتت صورة .. بقوللها هوا مش واضحة بيش تزيد تبعت صور ثانيه …
حمزة خداه غضب كبير … وتلفت لى سامى طاح فيه ضرب
-حمزة / يا مسخ با حيوان يا خنتى .. اتزلبح فى بنات الناس وداير روحك بنت … ياوسخ
شد التليفون ويقلب فيه / ترا خلى نصكر الفيس هدا ونشوف اكيدة عندك اكثر من فيس ..
لقى فيس ثانى .. اسمه خديجه لفك السحر ..
-ركه ضربه بي رجله / وداير روحك شباحه يا مسخ
لقى فيس ثانى يهدد بيه فى نرمين باعتلها صورها …
وقف قام سامى من سوريته / منين حصلت صور اختى يا حقير
-سامى / هكرتلها تليفونها بي برناج وخشيت عالاستوديو وخديت صورها …
-حمزة يعيط / وليش تهدد فيها .. وليش ركبتها معاك نبى نفهم انا …
-سامى / لانى بعتها لى سحار نيجيري
-حمزة مصدوم / كيف بعتها لى سحار نيجيري .. . ليش شن بيدير بيها
-سامى / هيا عندها نقطه سودة فعيونها .. والسحار يطلع بيهم فى الفلوس اللى تحت الارض …
-حمزة كظم غضبه وشبحله / احكيلى اللى صار بالتفصيل .. ورد بالك ادس عليا كلمه .. راك قاعد ماتعرفنيش
-سامى / حاضر نكملك .. بعتلها صورها نهدد فيها .. ودرتلها موعد… قلتلها اطلعى غصبا عنك
-حمزة وجهه احمر / باهى
-سامى / مشيتلها فالموعد كلمتها عالماسنجر وقلتلها اطلعى
نبيك .. طلعتلى ..قلتلها اركبى .. مابيتش .. هددتها بى صورها .. ركبت … خدرتها بي الاسبراى ورفعتها لى للشيخ
-حمزة يعيط / يعنى انت داير روحك الادمن غلا الروح .. اللى فاتح قروب نسائي ومخلى البنات اينزلو صورهم .. وعايين الثقه فيكم … وانو حاميها حراميه …
وعطاه خبطه / وداير روحك شباحة يا مسخ
_________________________________________
_
حمزة هجم على سامى ..
-حمزة / وبعدين شن صار بعد مارفعتهاله
-سامى / انا على طول ضربتلها المخدر فى الوريد ..
حمزة داس غضبه / وبعدين ..
لما خش الشيخ .. فتحلها عينها .. قال النقطه السودة اللى فى عينها صغيرة .. ماتفتحش مغارة
-حمزة عاطيه بالضهر وعيونه حمر / وبعدين
-سامى / قلت نردها لمكانها .. ركبتها فالسيارة وشممتها صنه .. فاقت .. لكن مش هلبا قاعدة دايخة .. وصلتها للجامعه .. نزلتها قدام الباب البرانى .. ياودبك مشيت القدام ولفيت من الكوبري ورجعت شفت زحما ودوشه .. درست على جنب قلت نشوف .. قالو بنت ضربتها سيارة وطاحت .. شفتها لقيتها هيا هربت
تلفتله حمزة / يعنى اختى ماتت شريفه
-سامى / والله ماقرب منها واحد
-حمزة ينادى / محمووود … يا محمود
سامى يرعش باللى فيه
-خش محمود يجرى / نعم يا فندى
-حمزة / ارفعه للشباب يجهزوهولى .. هانى جايه
-محمود / حاضر يا فندى
وقام سامى هوا وواحد ثانى … كروه لى غرفه ثانيه … ومشالله حمزة …عطاه طريحة نباش القبور .. قريب قتله
الموضوع هدا حكاه حمزة لة هند بس .. وخدى منها وعد انها ماتحكيه لى حد حتى حتى لو كانو بنات اختها …
وبعد ثلاثه ايام وهوا يغصور فى سامى .. حكم عليه انه ينحبس سنه مابين ماروح هوا من المانيا.. مايبيش تطلع دوة على اخته بعده .. فضل انه ايأجل الحكايه سنه لان حالة هند المرضيه اهم توة
وكتب فالتقرير ( شاب يؤدى دور ادمن قروب نسأئي ويطلب من العضوات صورهن لاجل التهديد بعد دلك .. ومنتحل شخصيه عرافه ( شباحة ) ويجرى بالبنات )
___________________________________________
_
يوم الخميس …
لبست هند الفيلو … ماعزمتش وحدة من صاحباتها .. ولا فتحت اغنية تفرج عالفلب …كله حزن وبكى وخلاص
خواتها كلهم ونساوين خوتها غادى ماعدا صالحة …
قيس المغرب اتصل حمزة بي هند / هاا شنو جاهزة
-هند تمسح فدموعها / تعالى
بالفعل جاها حمزة …ركبت معاه قدام خوتها وخواتها وصغارهم … امها تبكى بس ..ورفعها
مشو لى فندق…
فالطريق …
-هند / حمزة
-حمزة / عيونه
-هند / لا نبى عرس ولا كلاكسات ولا فرحة .. نبى حاجه وحدة
-حمزة / شنهيا
-هند / نبى نصور انا وياك بس
– حمزة / يا سلام .. غالى والطلب رخيص.. شنو كل يوم احنا منتزوجو .. نفوتو على اول مصوراتى
-هند / لا انا عندى مصورة …غير تحشمت نجيبها قدام امى والبنات صايرة فينا حالة نبكو …
-حمزة / باهى جيبيها
-هند ابتسمت / شكرا
قامت تليفونها واتصلت / الو..قتلك.. تعالينا للفندق .. اهو كلمت راجلى وقالى عادى
-المصورة / انتى وصلتى
-هند / لا مزال
-المصورة / خلاص لما تركبى لى غرفتك كلمينى .. انا فى الصالة اللى فى جنبه .. اهو طالعه منمشى غادى ممكن نوصل قبلك.. نصوركم فيسع وانروح
-هند / تمام
وصكرت الخط …
-حمزة / قصدك صاحبتك
-هند / لا لقيتها صفحة فى النت
-حمزة مسك يدها / نحبك
ابتسمت هند …
وصلو للفندق …خشو للاسانسير وهند لابسه كاب فوق الفيلو
وصلو لى غرفتهم …
خشت هند وقعدت واقفه فى وسط الغرفه .. و حمزة خش طول حول دجاكته .. وتلفتلها
– مسك يدها / نورتى حياتى يا عروس
-هند ترعش / لحظه بس تجى المصوراتيه
-حمزة/ يا همى هم منها هامصوراتيه وينها
-هند حاطه تليفونها فى اودانها / اهو نكلم فيها ..
مشت هند على جهه تكلم فيها …
وشرين تليفون حمزة … شاف الرقم لقاه خالد ولد خو هند يتصل …
رد عليه / الو
-خالد / شنطه هند الصغيرة قعدت فى سيارتى .. اهو وليت للفندق تعالة خودها
-حمزة / هى ..
صكر حمزة مكالمته وصكرت هند مكالمتها …
-هند / اهو بتركب المصورة
-حمزة / وانا شووووية بس ننزل نجيبلك شنطك من سيارة خالد ولد خوك ونجى
-هند / اووو نسيتها
-حمزة / هى شووويا ونجى
خدى دجاكته لبسها وطلع من الغرفه …وصكر الباب وراه
خدى الاسانسير ونزل … فتح الاسانسير خش فبه … نزل تحت … فتح الاسانسير وبيطلع … لقى بنت واقفه تراجى فى الاسانسير …
هوا مشى …والبنت قعدت تشبحله لانها تعرفه وشايفاته زمان … صكرت الاسانسير وركبت للدور اللى فيه هند .. ومشت للغرفه وطقت الباب .. فتحت هند الباب .. سلمت عليها
-هند / بالله سامحينى اختى سميرة قلقتك عقاب الليل
-سميرة/ لاااا ماهناك قلق …كنت نصور فى عرس فالصالة اللى جنب الفندق ..
-سميرة / سبحان الله حاسه كأنى نعرفك ..
-هند / بلحقه .. مش عارفه بالك اتلاقينا فى مكان
-سميرة / راجلك وين
-هند / نزل توة شوى وراكب
-سميرة / ماتقوليش انتى مرت حمزة
-هند مبتسمه / بالزبط انا مرت حمزة … تعرفيه !؟
-سميرة / انتى اللى كنتى راقدة فالمستشفى المدة اللى فاتت .. وقالنا هادى خطيبتى
-هند فرحت / بالزبط هيا انا
-سميرة / انا الممرضه المشرفه ليلتها فالمستشفى ..
وقفت تجيب فى شنطه الكاميرا وحطتها عالطاولة / والله الا راجل.. هلبا زيه يتخلو على خطيباتهم..لكن هوا رجل والرجال قليل
-هند مبتسمه ومش مركزة/ ربي يحفظه ليا
-سميرة فتحت شنطه الكاميرا واطلع فالعدة / ياروحى عليه هاديكة الليله لما قالوله عالورم .. مات وناض حى من جديد
-هند / ورم !!
-سميرة انخلعت / حيه عليا … قصدك قاعد مش مقايلك
وقفت هند وعطتها بالضهر وهيا ترعش مش فاهمه شى / لا اكيدة مقايلى
هند دماغها ستك وتخمم/ معقولة حمزة فيه ورم وماقاليش
-هند صوتها يرعش /و من امتى هوا عارف ..
-سميرة / من يومت اللى جيتى للمستشفى دايخة
هند عيونها دمعو / بس بما انك دكتورة لو ممكن نسألك ادا كان خطير والا لا .. ووين مكانه بالزبط انا مفهمتش لما قالى
-سميرة خافت تصدمها / والله مانعرف مدى خطورته لانه تقريبا كيف بادى الورم .. ومكانه فى مرخرة الراس من الجهه اليسرى .. ورا الادن بالزبط
هند خدت صدمة حياتها وعصرها قلبها على حمزة كيف انه مريض
-وقفت سميرة قدامها / اسمعى وخيتى .. احنا زمان قرينا باتولوجى فى التمريض .. وقرينا ان لما يكون الانسان صابر وراضى بي قضاء الله .. المفروض نشجعوه واكثر ونشدو على ازره …
ساوت قاعدة الكاميرا/ اوقفى نصورك بروحك ترا …
هند ماخاطرهاش تتلفتلها .. ساوت سميرة الكاميرة على
وجه هند وخدتلها صوروة
-هند بحزن / احنا غدوة ماشيين لى المانيا
-سميرة / كويس .. العلاج غادى مش زى العلاج هنايا .. غادى احسن بهلبا الحق خاصا فى الاورام .. بس لازم اثقلى لبسك وتهتمى غادى صقع
-هند / اكيدة .. بس بنهتم بيه هوا اكثر
-سميرة تركب فى كاميرا ثانيه / اكيدة الورم يبي الاهتمام
هند قعمزت عالكرسى رجليها معش حملوها من الصدمه ..
جت سميرة قعمزت عالكرسى اللى مقابلها / لكن بجديات ماشاءالله تبارك الرحمن عينى ما ضرك .. اول مرة نلقى حالة مصابه بالمرض وصابرة هالصبر هدا كله
هند صوته هرب وتشبحلها مستوعبتش الجملة كويس لانها نزلت عليها زى القنبلة
-سميرة / والله نحييك انك صابرة ونحيي زوجك انه اتخد قرار الزواج وبيسافر بيك و بيعالجك برة.. بارك الله فيه
هند فهمت ان الورم عندها هيا مش عند حمزة … صابتها حالة من الخوف والدعر وبدت ترعش
-هند / لو سمحتى اختى لمى الحاجات
-سميرة / ليش بس
-هند / معليش تعبت وطارت النية من التصوير
-سميرة / غير خلى يجى زوجك و
-قصت عليها هند / لو سمحت لميهم
-سميرة زبطتها انزعجت / باهى براحتك
بدت سميرة تلم فى الكاميرات والحاجات وهيا ايديها يرعشو
-سميرة / وخيتى
-هند مغمضه عيونها / لو سمحتى ..
لمت سميرة باقى حاجاتها وطلعت من الغرفه .. مشت طول للاسانسير فتحاته وخشت .. وانفتح الاسانسير اللى جنبه
وطلع منه حمزة شاد شنطه ومشى لى غرفته هوا وهند
فتح الغرفه وخش / السلام عليكم …
خش حط الشنطه / مافيهم من هدرزة صغار خوتك .. انا نبى نركب وهما شادينها لوك لوك
تلفت لى هند لقاها عاطياته بالضهر / خيرك ماترديش
مشى وقف قدامها لقاها تبكى
-حمزة/ خيرك
-هند / انا مانبيش شفقه من حد .. ولا طلبت منك تتزوجنى
-حمزة انصدم وحس انها عرفت / خيرك شن فى
-هند / انت مش ملزوم تاخد وحدة مريضه وعندها كانسر..
وتجرى بيها وتعالجها .. انا الحمدلله عندى خوت
-حمزة / حبيبتى اسمعينى
-هند عيونها معبيات دموع / ليش ماقلتليش ..
مسك يدها ..دفتها / لو سمحت انهى هالمهزلة وردنى لى امى عالاقل هيا تعرف كيف تعانينى
حمزة واقف يشبحلها ومصدوم .. مش مجهز نفسه للموقف هدا توة
-مشت جنب الباب وعيونها دموع/ هيا …هات الشنطة
_________________________________________
تمت ….. ويتبع
زعما هند بتروح لى امها ولا بتسافر معاه ….
نحبكم ❤❤