رواية ابتزاز بقلمى زهور جمال الدين
#ابتزاز
بقلم زهور جمال الدين?
?الحلقه 13 ?
“حقيقيه ممزوجه بالخيال”
_
-حمزة / باهى شن تبى
-حياة/ نخش دار النوم نجهزلك حوايجك
-حمزة / مدامك وصلتى وخشيتى ..تفضلى
خشت حياة لى دار النوم .. وشاحها طاح عالارض .. تخلط بي حوايج حمزة المسخات اللى حولهم
حمزة وقف قدام باب الغرفه
-حياة/ خش خيرك
خش حمزة وصكر الباب وراه ….
حياة واقفه قدام الدولاب / قنينه الغرفه ولا
-حمزة مربع ايديه / ايه قنينه
-حياة / قداش رقدت فيها مرة مع مرتك
-حمزة / على طول .. هدا مكانى انا وياها
– غمزتله/ ماتفهمنيش غلط عاااد .. انا نقصدلك النوم
-حمزة / انا نوم
-حياة / ماتقعدش تستغبى عليا عاااد
-حمزة/ انتى عندك علم انى ضابط
-حياة/ بلحق.. لا لا ماعنديش علم الحق
-حمزة / وانتى عارفه الضابط مايحبش تكصير الكرايم
-حياة/ مفهمتكش
-حمزة حاط يده عالسبته اللى فى سرواله / تو نفهمك انا كيف …
طلع السبته من مكانها وطاح فيها ضرب قريب قتلها..
-حمزة / يا مسخة تخشى لى حوش راجل وتصكرى وراك الباب .. تحسابى روحك بتغرينى .. ريتى هالمنضر
يضرب فيها بالسبته وهيا تعيط …
شدلها فمها / صكرى فمك يا مسخه يا وقحة ..
وقامها لوحها فى الصالة / اطلعى من الحوش ريته تطلع روحك
طلعت حياة تجرى … عرفت ان مافيش فايدة منه
___________________________________________
_
.
.
.
.
بعد عشرة ايام
هند كملت العشرة ايام فى المستشفى ..وحمزة شبه مقيم معاها … تتألم من راسها هلبا .. وهوا ماسك يدها ويشجع فيها … فوزى وفدوى ايجو يزورو .. لكن حياة معش جت نهائى
-هند / مانقدرش ناكل
-حمزة / على خاطرى حبيبتى .. بيش تنوضى صحيحة .. مازلت نبيك ونبى نديرو عيلة وصغيويرة .. اهو الحمدلله الدكتور مطمنا
-هند عيونها تعبو دموع /كلامك هوا اللى عاطينى امل فى الحياة .. مش عارفه كيف كنت بنعيش من غيرك
-حمزة / ربي ياخد من عمرى ويعطيك
طق الباب .. مشى حمزة فتحه .. لقى المترجم واقف ..
خش لى هند / شويه بس حبيبتى نكلم المترجم ونجيك
-هند تتكلم بصعوبه / باهى
طلع حمزة وقف عالمترجم
-المترجم / رح يعطو ل هند خروج
-حمزة / بالسرعه هادى .. مش فى كيماوى بيديروهولها
-المترجم / الحمدلله حالتها احسن من غيرها .. الاخت هند كان عندها اورام سرطانيه صغيرة ..تم استأصالها .. العشرة ايام يلى قضتهم بعد العمليه كان عندها كورس مضاد وانتهى
-حمزة/ والكيماوى .. كيف .. بيردوها ثانى للمستشفى
-المترجم /الكيماوى يعطى بشكلين على حسب الورم وحجمه
… اما فى الوريد او على هيئة اقراص حبوب تؤكل عن طريق الفم
-حمزة منتبه/ باهى
-المترجم / هند رح تاخد اقراص التيموزولاميد … اقراص بتنعطى فى الفم ..مارح ينعطى الها بالوريد ..تاخدهم فى البيت تحت رعايتك واهتمامك
-حمزة / اكيد
-المترجم / الكيماوى عنده اعراض جانبيه من ضمنها القئ والشعور بالغثيان وسقوط الشعر .. فلو حسيت بى هادى الاشياء ماتستغرب
-حمزة / ربي يسهل ويستر
__________________________________________
_
فى حوش مفيدة ..
فضانيه خالد وسحر .. مفيدة نادت عزوزتها بايته عندها من الليله اللى قبلها .. ونادت حماواتها ومرت عم راجلها … وجتها امها وناديه من الصبح بيش يعاونوها فى الطياب
فاطمه ام مفيدة مقعمزة تهدرز على مريم عزوزة مفيدة
-مريم / هوا شن يخدم ولد ولدك مش جاته هالبعثه
-فاطمه / هوا يخدم فى المصرف .. محصلهاله بوه الخدمه ..
-مريم / معناها حتى السفرة حصلهاله بوه
-فاطمه / وين نعلم انى يا وخيتى ..الاسبوع اللى فات قالت امه طلعتله بعته برة
ناديه شادة التليفون وتتكلم على تركينه
-نادية/ كلميها توة يا صالحة .. والله تعول وخانبها قلبها منك
ماهو جيتك امس وحكيتلك وعدرتيها عاد
-صالحة / والله يا ناديه ماواجعنى خاطرى منها حتى شويه
.. لكن تشبحى فى حالى .. انا فى باب انبارك للناس توة
-ناديه / ياوخيتى على خاطرى .. راهى اطيب وعقلها مش معاها .. تقولى اكيدة صالحة زعلانه منى ..ماهو ماقلتلهاش انى قلتلك
-صالحة / يا ناديه قوليلها والله مانى زعلانه .. جانا صهيب امس وتعدر .. وجى مختار خوى وعيي يتعدر .. وكلمتنى هيا وتعدرت ..كلهم قلنالهم اللى مات الله يرحمه والدنيا مابتوقف علي حد ..
-ناديه / ومع هدا كلميها .. على خاطرى
-صالحة / ياوخيتى قداش تشدى فى الحاجه .. اعطيهالى
-ناديه / لا كلميها على رقمها
-صالحة / لا حول ولا قوة الا بالله … صكرى خلى نكلمها
صكرو الخط واتصلت صالحة بي اختها مفيدة
تليفون مفيدة بدى يشرين …
-عمتك مريم / يامفيدة.. مفيدة
-مفيدة من داخل/ نعم يا عمتى
-عمتك مريم / تليفونك يشرين
جت مفيدة للصالة/ هدا اكيدة صهيب موصياته يزيدنى كسكسى …
مشت لى تليفونها قاماته لقت صالحة تتصل ..
شبحت لى امها / هادى صالحة يااام
-فاطمه / الحمدلله اهى كلماتك …
-مريم تحسابه فى عركه بينهم ?/ هما خيرهم
-فاطمه / لا لا ماهناك شى .. غير مفيدة خافت تكون صالحة زعلانه منها … خاطر وفاة نرمين مافاتش عليها هلبا
مفيدة خشت للممر متع المطبخ وهيا تتكلم فى التلفيون
-مفيدة تبكى/ والله ياوخيتى كنت حايسه ودمعتى فعيونى خايفه يوجعك خاطرك منى
-صالحة/ والله والله مافى حتى درة زعل من حياتى .. وربي يكمل عليها بالخير بنيتك ويهنيها
-مفيدة / انشاءالله مانفقدك ياوخيتى .. ويديمك تاج فوق راسى
-صالحة / ربي يحفظككم
تكلمو شوى بالتليفون .. وبعدها صكرو الخط .. ردت مفيدة تليفونها لى مكانه … تشبح فى امها وعزوزتها يهدرزو
-فاطمه / والله شدت فيا وداد نجى معاهم بعتالى.. لكن فالصبح ماقدرتش نراجى للعشيه ..فز خاطرى قلت لى ناديه تفوت عليا
-مريم/ زمان سواقتك ديما هند .. الله لا تغيبها
-فاطمه / ربي يسعدها ويهنيها بنيتى وين ماكانت
-مريم / تكلم فيكم
-فاطمه / الحق ليها مدة عشرة ايام ولا اسبوعين ماكلمتناش
قالت ماشيين لى منطقه مافيهاش تغطيه
-مريم / انشاءالله تروحلكم بخير وهنا
-فاطمه / اامين
ناديه ومفيدة ايطيبو .. وجتهم ريمة حماة مفيدة كملت معاهم الطياب وعاونتهم …
وقيس الساعه 2 الضهر ..
وصل احمد ولد خوها مختار .. جايب معاه امه وعفاف مرت عمه وخالاته الزوز … وجوهم رجاله مختار وخوه ونساباته
وقريب 4 رجاله …
غدوهم كسكسى بالبصلة .. وتفاهمو عالعرس .. داروه بعد شهر بالتمام
_________________________________________
_
فى الشارع
حمزة روح بي هند من المستشفى بالتاكسى … وصلو قدام العمارة.. وقفو فى الشارع لقو فوزى واقف قدامها فى سيارته …
نزل من السيارة وسلم عليهم وحمد بي سلامة هند …
حمزة دخل هند للعمارة .. وفوزى قعد ينزل فى حاجات هند ودواياتها من التاكسى …
خشو هند وحمزة للشقه … قعمزها عالصالون .. طق فوزى الباب ..
-حمزة / خش الباب مفتوح
-فوزى / السلام عليكم
-حمزة وهند / وعليكم السلام
-فوزى / تفضلو حاجاتكم
-حمزة / وين العويلة
-فوزى/ والله شن منقوللكم ..العويلة فى المستسفى
-حمزة / خيرها .. الف سلامه عليها
-هند تتكلم بصعوبه / انشاءالله لاباس خيرها فدوى
-فوزى/دلع نساوين وخلاص..رفعتها بدير تغديه ماتاكلش بكل
-هند / حياة معاها
-فوزى / ايه معاها
-هند / ربي يحفظهالك هيا والبيبي
-فوزى / اامين
وتلفت لى حمزة / اعطينى الحوايج نحطهم فى الغسالة قبل مانطلع
-حمزة/لا والله عادى مافى مشكلة .. تو نمصمصهم حتى بايديا
-فوزى / مش معقولة كل ماناخد منك الحوايج لازم اديرلى هالموشح
هند ابتسمت
-فوزى / يقيس فى غلاه
-حمزة / تمووت فالتعب يا فوزى من يوم مانغرفك
-هند / حوايجى خليهم توة لين نفرزهم .. وتو تجى فدوى ونعطيهملها
” تحشمت انه يشوف ملابسها الداخليه ”
-فوزى / تمام .. هات حوايجك انت يا حمزة
-حمزة / خلى نجيبهم من الدار ..
خش للدار لقاهم ملمومات على تركينه .. قامهم .. وطلعهم عطاهم لى فوزى
-هند / غير حطهم فى كيسه
-حمزة يضحك/ منين منلقاها الكيسة توة .. ارفعهم حتى هكى
-فوزى يضحك / هدا باير منين يعرف النظام
خدى الحوايج وطلع / هيا نستادنكم .. والحمدلله على سلامتك مرة ثانيه يا ابله هند
-هند وحمزة / الله يسلمك
طلع فوزى من عندهم وصكر الباب .. وفتح باب شقته
..وخش للحمام طول .. فتح الغسالة ورمى فيها الحوايج متع حمزة ..
و مشى للطاولة قدام الحمام بيش يجيب الصابون.. انتبه لى حاجه فى الحوايج … رجع فتح الغسالة … لقى وشاح اخته حياة مع حوايج حمزة …
شعلت فيه النار شاد الوشاح ويخمم/ هدا وشاح اختى حياة
انا متاكد …. شن يدير مع ملابس حمزة الداخليه .. معقولة!!
حمزة يخون فيا … ومع من … مع اختى …
قعد حايس فى روحه ماعارف كيف يدير ولا كيف يتصرف
____________________________________________
_
فى شقه حمزة …
هند مقعمزة عالكرسى … وحمزة واقف فى جنبها
-حمزة / تخشى دارك حبيبتى تستريحى
-هند مبتسمه / ايه عادى
قامها بين ايده ….
-هند / بالك رزينه عليك بنتعبك
-حمزة / انتى ضعفتى شن قعد فيك ..
وباسها على شفايفها / محلاك ..
حطت يديها حوالين رقبته وحشت راسها
-حمزة / قاعدة تحبينى ولا خلاص
-هند تضحك / خلاص عينك
-قرب من ودنها / نحبك ..
-هند قريبه من ودنه / وانا نحبك …
دخلها للدار .. حطها عالسرير .. وهما الزوز يشبحو لى بعضهم
حط يدها على شعرها ويحرك فيه / محلاك
-هند / بلاش توة حبيبى ..
-حمزة باستغراب / ليش
-هند / انا ناخد فى علاج ونخاف …
-حمزة / خيرك سكتى … كملى .. خايفاته ينتقلى ولا شنو ..
انت كبيرة ومتعلمه وعارفه ان المرض هدا ماينتقلش
-هند / تعالة اخضنى ..
اتكى حمزة عالسرير ومد رجليه وخداها فى حضنه
-هند صوتها مغصوص / انت مش مجبور
-حمزة / مش مجبور نبوسك ونرقد معاك قصدك
-هند / حمزة ما اتاعبنيش .. انت فاهمنى ..
-قام راسها وشبحلها / شفتينى توة شن قلتلك ..المرض هدا ماينتقلش .. كان نبى ماقلتهاش الجملة ولا .. وقعدت نتلبد ونتعدر .. لكن انا قلتلك هكى من اول لحظه ..بيش نكونو صريحين مع بعض .. هادى حياة كاملة ونبى نعيشها معاك ماتحرمينى من شى
-هند حشت راسها فى صدره / وينها الحياة الكاملةة.. هوا اللى يجيه المرض هدا يعيش
-حمزة / ايه
-هند/ منو تعرفه عاش
-حمزة/ انتى …
وصارت لحظه صمت بيناتهم … حضنو فيها بعض وبدو يبكو الزوز …
-حمزة / ربي ياخد من عمرى ويعطيك
-هند / ربي يخليك ليا .. انا عايشه عشانك انت وبس …
-حمزة / نحبك يا بنت .. بالله عليك ماتبعدى عليا
-هند / ولا انت تبعد عليا …
ومنغير مايحسو .. بدو الزوز يبوسو فى بعض ..
-حمزة مرقدها على يده ويشبحلها / لو تعبانه حبيبتى بلاش
-هند / لا مش تعبانه.. اصلا انا معاك ننسى كل تعبى
-حمزة يضحك / امالا ليش متعبتينى معاك من بكرى وانا نترجا
-هند تضحك / نحبك
-حمزة / وانا نموووت فيك .. ربي يحفظك ليا
. وقعدو فى وضع رومنسى اكثر من ساعه.. نست فيه هند كل الآمها
” نص العلاج حالة المريض النفسيه .. فرحه او حزنه ايأثر ”
___________________________________________
_
فى حوش مفيدة
-مفيدة/ باهى كيف يا راجل الناس شن بتقول علينا .. خيمه فم الباب شنو من قلت الصالات ولا من قلت فلوس بوها
-وقف الطاهر ويعيط/ توة تفكرتى الناس وشن بيقولو عليك .. وين كان كلام الناس لما كنتى طالقه بنتك ومش عارفتها وين حاطه راسها
-مفيدة / يا راجل الضغط وجانى.وكانا بتقعد هكى معاملتك حتى السكر بيجينى .. مش معقولة المعاملة هادى .. البنت انا بس امها .. انت مش بوها
-الطاهر/ انا نخدن ونصرف وانتى عينك عالصغار فالحوش..
من يوم مانعرفو والدنيا صارت الام هيا اللى اتبع بناتها مش الاب هوا اللى يجرى ويدور
-مفيدة / توة كيف نمشى نشوف الصالة ولا شنو
-الطاهر/ قلتلك خيمه فم باب الحوش وهلبا فيها …
خدى مفاتح سيارته من الطاولة …
وتلفتلها/ واسمعى …من توة نقولك العشى كسكسى ولا رشته بالبصلة ..باهى فيا كانا نعطيتك حق للطباخة .. ولا شمرى على يديك وطيبي …
مشى للممر لبس كندرته وشبحلها / وحوش خوك قوليلهم مانبيش قفة .. يلفوها بي فراشيه ويرفعوها يفكونى من وجهها … ياريتها ماتت
وطلع وقربع الباب
سحر واقفه فى الدروج وتسمع فيهم … قلبها وجعها من كلام بوها … لانها لتوة مش مقدرة حجم المصيبه اللى دايرتها لى بوها وامها …
نزلت من الدروج / شن قالك عالصالة.. والله الخيمه قدام الحوش مانى مناديه عليها صاحباتى
-مفيدة/ بالله صكرى فمك..انتى مازال عندك فم وتتشرطى
انتى احمدى ربي انه ما دفنكش بالحيي
-سحر/ اسمعى يا ماما .. اللى درته انستر .. والولد الحمدلله طلع كويس وبياخدنى… يعنى انتو المفروض تحمدو ربي وماتتبطروش بالنعمه ان الولد مارخاش بيا
-مفيدة / الولد اللى جايا تتجعدى عليا بيه انه حل المشكلة متاعك وبياخدك .. بوه حالف على امه بالطلاق بيش خداك
معناها هوا على خاطر شكون واخدك .. على خاطر امه .. ولعلمك مسيفين عليه وواخدين منه جوازه خايفينه يديرلك عملة يوم الحفلة ويهرب ويخليك تندبي قدام الناس
-مفيدة تعيط / غادة … يا غادة .. تعالى ارفعيها من قدامى راهى بتجيبلى الجلطه
-سحر/ اهو منمشى منغير ماتجى السيدة غادة .. ماهو اللى يطلب حقه فى الايام هادى يطلع غالط
-مفيدة تبكى / يااااربي انا شن درت بيش تعاقبنى هكى
” فرخات صغار يضحكو عليهم ويلوحوهم … ايه فرخات .. امالا كانها مش فرخة طايشه .. يقدر ولد يزلبحها …لما يقولك تعالى نمشو لى شقه صاحبي .. قوليله خوى يدور ..خلى نبعتله اختك لى شقته بالك تعجبه ويصير النصيب.. وشوفى وجهه كيف يتغير .. وكان يلقى يريشك …يعنى انتى عادى .. لكن اخته شرفه لا … تى ماهو فيقى يا حمارة يلى ماشيه فى الحرام ..راهو فوقك ربي وبيحاسبك وبيطلعلك فصغارك
.. ولعلمكم الزانى يزنى بيه ولو فى سور بيته .. يعنى انشالله يجو زوز فى جنانك ويديرو الرديله المهم ان العقاب واصلك واصلك يا غزالة”
____________________________________________
_
.
.
.
بعد اسبوع
فى حوش حمزة …
حمزة وهند متكيين فى دار النوم …
-حمزة / خوديها الحبه حبيبتى
-هند تبكى/ عدبتنى .. معش نقدرها
-حمزةمتأثر/ هيا مرة فاليوم يا غاليه … وحتاخديها وقت معين بس .. وبعدين خلاص
-هند / باهى خلينى شوى تو ناخدها
-حط حمزة شريط الدوا عالطاولة / حاضر كيف ماتبى
-هند / احضنى ..
اتكى حمزة عالسرير .. وقامها فى حضنه …
شبحت هند للسرير وتبكى/ شوف شعرى
-حمزة / مانبوشى .. نبوك صحيحه بس
-هند / نصه قعد عالمخدة
-حمزة / وغدوة نفس الشى…واللى بعده نفس الشى .. مانبوشى احنا … انا نبيك انتى .. مش شعرك
-هند / كانا مش منك انت … شن نسوى انا
-حمزة / ربي يحفظك ليا …
سكتو الزوز وهند فى حضن حمزة ….
-هند / غريبه .. فدوى من اول يوم جتنى فيه معش ولت ..
خدت حوايجنا مرتين غسلتهم وبعدها معش جت
-حمزة متوقع ان حياة قلبتلهم روسهم / خليهم على راحتهم مانعرفوش ضروفهم احنا .. ومرات مرته تعبانه
-هند / اخته تكرهنى … اكيدة تتمنالى الموت
-حمزة حضنها بقوة / بعيد السو عليك ياغاليه … ربي ياخد من عمرى ويعطيك
-هند حاضناته / ربي يطولى فى عمرك حبيبي
-حمزة بخبث/ هيا ليش تكرهك حياة
-هند / هبال بنات
-حمزة لقاها مستسهلة الموضوع / وشنهوا الهبال هدا
-هند / تعبت حبيبي … حطنى عالسرير
-حمزة / من عيونى يانور عيونى
حطها فى سريرها … تكاها عالمخده .. ونزل باسها …
-هند / حبيبي …خلاص
-حمزة / انتى ناسيه انى عريس ولا شنو
-هند / وانت ناسى انى ناخد فى الكيماوى ولا شنو
-حمزة / شن دخل الكيماوى فى حبى ليك
-هند / نبيش نضرك حبيبي
-حمزة / ايه علينا عاد….تى ماهو قلنالك ماليشى علاقه مع بعض…
-هند / دنبك على جنبك
-حمزة / انا حر فحياتى .. المهم قوليلى خيرها حياة الشياطين هادى
-هند / نحكيلك لكن ماتضايقش
-حمزة اتكى وحط راسها تحت يدها وضمها ليه / احكى
-هند / زمان احنا وحوش فدوى جيران .. خوها كان يبينى وحياة كانت تبيه
-حمزة / باهى وبعدين
-هند / ولا قبلين .. خطبنى ورفضت … وعلى قد مابعتتله حياة ما باش يخطبها… بالرغم هيا كانت بنت عمه
حمزة ياكل فيه لسانه ..يبي يسألها كيف شدوهم فالمربوعه مع بعضهم وكيف منعم ضرب حمزة
-حمزة / وبعدين
-هند/ هلاص هادى كل القصه ..
-حمزة / وانتى ماكنتيش تبيه ..
هند تشبحله
-حمزة / قصدى ليش رفضتيه
-هند / عمرى ماشبحتله ك شخص حنتزوجه يوما ما .. وبعدين بينى وبينك ماكنتش ندير فى علاقات .. خاطر خوى منعم كان واعر وكان صعب انى ندير اى شى من وراه
-حمزة لقاها فرصه/ باهى ماشافاش منعم ..كنهدا راهو ضربه
-هند/ ضربه .. عطاه طريحه قريب قتله فالشارع
-حمزة / وليش
-هند / الغبى كتبلى رساله وعطاها لى سلمى بنت خوى قاللها اعطيها لى عمتك هند
-حمزة / ايه وبعدين
-هند / سلمى جت تجرى .. بوها فالسقيفه واقف …شاف الورقه ..سأل سلمى منين … سلمها وقتها صغيرة قالت لى بوها عطاهالى طارق مش نعطيها لى عمتى هند
-حمزة / طربق عليكم
-هند / انا حاشانى من اول يوم خوى منعم عارف موقفى وانى مانبيشى .. قول طربق عليه هوا .. مشاله قدام حوشهم وطاح يضرب فيه قريب قتله
-حمزة / وعمك طارق طبعا كلوله كبده منغير مايرد ويضرب..
يقولك بالك مزال فى فرصه نتودد
-هند تضحك / الله اعلم … المهم انه ضربه
-حمزة قعمز/ مدامكم تضربو فصغار الناس لازم تاكليها الحبه .. بيش نوريك حتى انا
-هند / حبيبي خليها شوى
-حمزة / خلاص عاد .. اسمعى كلامى
وعطاها الحبه … وقعد جنبها لين رقدت … وطلع للصالة .. خدى حوايجهم .. غسلهم بي يده … وعصرهم ونشرهم فى المنشر
لما طلع للبلكونه لقى فوزى واقف فيها … شافه حمزة قام يده قعد يحيي فيه …. لكن فوزى خش دار روحه ماشافاش
معش فيها كيف .. حمزة ركب الدم لى ودانه … طلع من البلكونه مشى للباب .. فتحه وطلع طق على حوش فوزى
__________________________________________
تمت … ويتبع
نحبكم ❤