رواية ابتزاز بقلمى زهور جمال الدين

#ابتزاز

بقلم زهور جمال الدين ?
?الحلقه 12 ?
“حقيقيه ممزوجه بالخيال”

_

فى المستشفى

فدوى قعمزت عالكرسى وحياة مشتلها تجرى قعمزت جنبهم

تلفت حمزة قعد يشبحلها باشمئزاز….ولكن هدا مايمنعش ان

الغيرة كلت قلبه……هند كان عندها علاقه سابقه وهوا مايعرفش بيها

مشى لى نهايه الممر قعمز عالكرسى الاخير …

ويخمم / كيف بتعرف بي علاقاتها وحكاياتها وانت خديتها

فى يوم وليله..وحتى لما سافرنا مع بعض وقتها كنا

مانتكلموش .. معناها كيف بتحكيلى على حكايتها القديمه ..

تلفت لى فدوى .. لقى ممرضه واقفه قدامها تشرب فيها فى

عصير جوافه …..

سرح مرة ثانيه / لكن معقولة هند تخطف واحد من خطيبته

شن ناقصها بيش ادير هكى وتلقط الدعى

ناض من مكانه حول كندرتخ وطرح السجادة لانه متوضى ..

وكبر بيش يصلى ركعات لله …

طلى ركعتين وسلم وقعد مقعمز يقرا فالقران شوى ..وبعدين

وقف وكبر وصلى … وقعد يكبر ويصلى اكثر من مرة وبعدها خدى كتاب القران وقعد يقرا

___________________________________________

_

فى حوش مختار

مختار ووداد فى دار نومهم

-وداد تخبط فى وجهها/ ياغبارتى .. يانهاراتى السود .. ياضحك الناس عليا

-مختار/ صكرى فمك وانتى تعيطى فوق راسى ..بتلمدى عليا الناس
-وداد صوتها زاد تعلى / خلينى نعيط خلينى نندب خير ماتجينى جلطه …
ووقفت مشت تجرى جهه الباب / وينه هالمسخ هالعافن

-مختار/ تعالى جاى يامراة
مشت وداد تجرى لى دار خالد فتحتها بالقوة .. ومشت تجرى فى خالد طاحت فيه ضرب .. ضربه تجى فى كتفه وضربه فى راسه.. وهوا ساكت

-تضرب فيه لين طاحت تخبط على صدرها / ووه عليا ووه ولدى بيقتلوه.. ياعازتى.. يا قهرتى .. يا عارى وياحشمتى قدام الناس
-انتصار بنتها جت نجرى تقيم فى امها / يا ماما خيرك .. حيه عليا قيم معاى يا خالد …
قاموها الزوز وطلعوها للصاله وهيا تنتش فى شعرها وتخبط على وجهها فقدت الوعى والادراك ..
حطوها عالصالون ..

-خالد / بري جيبي اميه بسرعه
-انتصار/ خيرها امك يا خالد شن جاها طايحه تعيط

مختار فى داره مفعمز عالكرسى وحاط راسه على يده ويسمع فيهم..معش قادر يطلع ويسكتهم رجليه معش حملوه

احمد ومحمد وفرح صغار مختار جو يجرو / خيركم شن فى ..
كانو راقدين خاطر اليوم نطلة ..فاقو مخلوعين يجرو
-فرح تبكى / خيرك يا ماما .. ماما ردى عليا

خالد شاد امه فى حضنه ويبكى .. خلاص انهار لان روحه معلقه فى امه …
-محمد / يااام ماتموتيش …ياااام

-جت انتصار تجرى / حولو خلى نبخ عليها اميه
خدى احمد طاسه اميه وبخ امه
-وداد / اااااه
فاقت …

-خالد / يااام سامحينى .. بالله عليك تسامحينى
-وداد لسانه رزن / يا حليلى على بناويتى اللى بيقعدلى فيهم .. اللى درته يا خالد بتلقاه فيهم

-احمد / شنهوا اللى درته يا خالد .. تى فهمونا واحنا زىالاطرش فى الزفه
-محمد / انتصار خودى اختك وخشى لى داركم
-فرح / مانيش ماشيه .. مانقدرش نسيب ماما

-وداد وعيونها مغمضات / اللى داره ماينحكاش .. يا غبارتى
وياعارى قدام الناس
احمد ومحمد فهمو ام فى حاجه غلط …. سكتو

___________________________________________

_

فى المستشفى

حمزة مقعمز عالكرسى يقرا فى القران بصوت واطى

وحياة تبان من بعيد مقعزة جنب فدوى وتشبح لى حمزة

ياودى الموضوع معش بدى موضوع انتقام من هند ..

لا ..الولد عجبها .. وتحدت نفسها توصله بالباهيه ولا بالخايبه

جت الممرضه ومعاها المترجم

-المترجم / الف الحمدالله على سلامتا .. العمليه خلصت

-مشالها حمزة يجرى/ وهند كيف حالها

-المترجم / كويسه والحمدلله..بس حتبقى فى غرفه الانعاش
ثلاث او اربع ساعات .. لحد ماتفوق المريضه

-فدوى / الف الحمدلله على سلامتها اوخى حمزة .. ياااربي يطول فى عمرها ويعمر عليها يااارب

-حمزة واضح انه فرحان/ الله يبارك فيك ويباركلك

-وتلفت للمترجم / نقدر نشوفها حتى دقيقه وحدة

-المترجم كلم الممرضه وشبح لى حمزة/ تعال ورانا انت بس

-حمزة / نستادنك اختى فدوى .. نشوفها شويا ونجى

-فدوى / ربي يطمنك ويطمنا عليها اوخى .. خود راحتك

مشت الممرضه لى ممر وحمزة والمترجم وراها .. رفعاته لى

غرفه … خش فيها وقعمز على كرسى وقدامه تلفزيون صغير

شووويا وفتج التلفزيون فيه صورة هند بالفيديو …شافها

قلبه انتفض ….

-حمزة / حبيبتى … الف الحمدلله على سلامتك .. وربي يطولى فى عمرك يااارب

هند راقدة ومربطيلها مغمضه عيونها .. وراسه ملفوف

بالشاش …وحاطيلها طوبو فى خشمها وتغديه فى ايديها

شافها قربب 7 دقابق .. وبعدها طفو التلفزيون ورجع حمزة لى مكانه

-حمزة / وراس اوخيتى تنوضى تروحى كانك تبى هند ترتاح

-فدوى فمها ابيض / ماعندى مابندير فيه الحوش..اهو قاعدة

هنايا نراجيها لين تفيق

-حمزة / والله مافى داعى لى قعادك هنايا توة .. انتى كفيتى

ووفيتى … شوى ثانيه تو يجينى فوزى من العمل .. وربي ؤباركلى فيكم الزوز

-حياة/معاه حق.. نوضى يا فدوى روحى .. انتى مريضه وبين روحين …ولازم ترتاحى

-حمزة / زى ماقالتلك .. نوضو روحو الزوز .. وغدوة ارجعو بالتاكيد تلقوها فايقه

-حياة/ لاااا … انا بنوصل فدوى وبنرجعلك

حمزة وفدوى تلفتولها الزوز

-حياة اتزرطت / قصدى ان فوزى بيجى هنايا شوى ثانيه زى ماقلتو .. نتلاقى انا وياه ونروحو

-حمزة / لا لا صحيتى … مرات ترجعى ماتلقينيش هنايا .. وصعب تسأليهم وتعرفى لوغتهم

-حياة / باهى اعطينى رقمك

-حمزة / هيا بالسلامه توة

-فدوى متحشمه من تصرف ناديه / مع السلامه

__________________________________________

_

فى حوش مفيدة

الطاهر يخنق فى سحر لين فرفشت تحته وامه تضرب فيه على ضهره وتعيط

فجأة طقطق الباب.. مشت مفيدة تجرى فتحت.. كائنا من

يكون اللى عالباب .. المهم ينقدها هيا وبنتها .. فتحت الباب

تلاقى قدامه منعم وناديه .. خشو يجرو .. يلقو الطاهر يخنق

فى بنته …

مشاله منعم يجرى يفك فى ايديه من حوالين رقبة سحر وماقدرش …

-دفه لين طاح عالارض / حول يا مسخ

ناديه ومفيدة مشو يجرو لى سحر يقيمو فيها

– الطاهر يتقاعد من طيحته / حول انت يا خامر .. بتخش بينى وبين بنتى

-منعم واقف ويعارك / بتقتل البنيه وبتحط رقبه فى رقبتك
الموضوع حليناه .. وولد خالها بياخدها

مفيدة وسحر بالرغم من تعبانات وماعندهم جهد .. لكن الجملة رنت فى ودانهم … بحركة لا اراديه تلفتو لى منعم وواضح عليهم الفرح

-الطاهر وقف/ ولد خالها … منو ولد خالها..تى اقسم بالله لما نفجركم عيلة كاملة .. ارفع اختك واطلع يا متاعين العار

-منعم / احنا راسنا بادن الله عالى اختى مادارت شى.. وكانك عالعار لاحقك انت .. خاطر بنتك هيا اللى دايراته

-ناديه مشتله تجرى / منعم !!!!

-منعم / ماتسمعيش فيه شن يقول .. يعزر فيا ..

-ناديه / مهما يكون .. احنا جايين انهدو ولا نقيمو فى النار

-الطاهر تلفت لى الدروج متع الدور الثانى وماشى / نهاراتكم السود يا مسخين

-مفيدة تعيط / يا وخى الحقه اجرى … بيجيب الكلاشن .. يا غبارتى الحرفه بيقتلنى انا وبنتى

-منعم راكب يجرى / روحى بيهم لى حوشك ولا حوش امك يا ناديه بسرعه

وبالفعل خدت ناديه اختها وبنت اختها وطلعو من الحوش وهما يرعشو…. يلاقو غادة قدام الباب كيف مروحة من الكورس … ركبوها معاهم ورفتعهم ناديه لى حوشها

__________________________________________

_

فى حوش نادية

مودة تمولج … حست ان فى شى وهيا مش فاهمه راسها من

رجليها .. وبين عيونها راجل عمتها لما اتفاجأ ان سحر كانت

فى المستشفى … مع انه دس استغرابه ودار روحه عارفها

لكن مودة دكيه ومايفوتش عليها … زبطاته …

قامت التليفون واتصلت بي انتصار ينادى مايردش

اتصلت بي سلمى نفس الشى التليفون ايضبح ومفيش حد يرد

اتصلت بي امها نفس الشى متردش ..معش فيها كيف ..

كلمت شهد بنت خالتها صالحة

-مودة / الو
-شهد/ اهلين مودة
-مودة / امك وين

-شهد / الناس اتقول شنحالكم وشنو اخباركم وشنو جديدكم مش طول امك وين
-مودة تحشمت/ ماهو الشحن ببتصكر والضى هارب .. قلت نسألك طول قبل مايتسكر التليفون

-شهد / اهاا
-مودة / باهى امك وين

-شهد / ادير فى شاهى خفيف لى بابا .. تبيها ؟!
-مودة / لا لا..غير قلت نشوفكم بتمشو لى حوش حناى والالا

-شهد / كانا سألتينى طول راهو قلتلك مش ماشيين
-مودة / تى باهى وانتى ادفى .. هيا بالسلامة

-شهد / تشاو
-مودة / ريتى الفصعونه مايطلع منها ولا

___________________________________________

_

الطاهر خش دار النوم يجرى ..ومنعم لحقه لقاه فاتح الدولاب ويطيح فى الحوايج يبي يطلع الكلاشن

-جبده منعم / تعالى جاى ..

طاح طاهر عالسرير ويفرفش يبي ينوض يضرب منعم .. منعم كان اقوا منه جبده لى طرف السرير وطيحه لوطا .. هجم عليه وقعمز على صدره و شده من راسه

-منعم يهز فى راس طاهر/ فوووق من اللى قاعد ادير فيه.. بنتك فى خطر .. انا خالها ولازم نستر عليها كان نطيح فيها ارقاب

-الطاهر انهار وبدى يبكى / حول … حول …

اض منعم من على صدر الطاهر .. وتقاعد مشى قعمز عالصالون وحط وجهه بين ايديه وساكت مصدوم …

-منعم / اسمع يا طاهر .. المشكلة كبيرة وكلنا فيها .. حط الموضوع فى يدى وماليكش علاقه بي شى .. انا خالها والخال والد .. لازم تستر على روحك قبل ماتستر على بنتك

الطاهر بدى يبكى بالصوت زى المراة.. كأن منعم فوقه من ثورة الهيجان اللى هوا فيها .

منعم قدر ان الطاهر موجوع .. الموضوع اكبر من ان عقل يتحمله .. لكن الطاهر طبعه هادى هلبا .. وسخوفى .. قعمز يبكى ومنعم متكى عالشكماجه ويتفرج عليه

بعد لحظات … الطاهر رجعله عقله وعرف ان لابد من حل المشكلة

-الطاهر يمسح فدموعه / منو من صغار خالها

-منعم / اول شى هدى روحك وصلى عالنبى وبعتالى ساهل
الطاهر / عليه الصلاة والسلام .. الله يلعنها واطتلى راسى .. ياريتها ماتت يوم اللى جابتها امها..ولا كبرت ودارتلى العار

-منعم / حتى انا عندى بنات وحاس بيك.. هدى روحك واهم شى نفكرو فيه كيف نسترو عالبنيه بس ج

-الطاهر / بنتى اديرلى مصيبه زى هادى لا تتقرا لا تتورا .. كيف مزال بنقابل خوتى وخواتى واهلى وجيرانى ..

-منعم / والبنت من سمع بيها .. الكلام مدرق مابيناتنا .. تتزوج وتنستر… قولت جوها ناس وعطيتها

الطاهر يبكى /غير قولى بس منو من صغار خالها اللى دارلى هالعملة

-منعم / خالد ولد مختار

-الطاهر / المسخ …الواطى.. والله لما نبعتله صهيب يطرشقه برصاصتين فى راسه

-منعم / يموت خالد وينحبس صهيب … ويقعدو صغار مختار يغلو يبو ياخدو الثار ويقتلو حد منكم .. والعيلة تتفركس والفضيحة تقعد على كل لسان .. هدا اللى تبيه انت

الطاهر ساكت

-منعم / نكلم فيك .. هدا اللى تبيه

-الطاهر/باهى دبرنى يا منعم شن ندير …

-منعم / ايوووه قلتلى شن ندير..الاسبوع الجاى نجو انا ومختار نخطبوها .. ونجيبو معانا كدا شخص ونديرو العرس بعد عشرة ايام .. قولت الولد بيسافر

-الطاهر/ ولد خوك مانملاش ايدى منه…

-منعم / انا مالى ايدى منه ومتاكد بياخدها

-الطاهر / وهوا الراجل ياخد وحدة لعب بيها .. بالله حتى انت قداش فاضى ..

-منعم / مختار هدد ولده .. وقاله اقسم بالله كان ماتاخد سحر .. امك طالق بالثلاثه

-الطاهر/ ااه .. طلق مرته

-منعم / اقسم بالله زى مانحكيلك … مانزيد عليك الا النفس
تى هوا حرمها على نفسه .. مش غير طلقها بس

-الطاهر/ باهى امتى بتجونى

-منعم / كلم متاعينك ولمهم .. يوم الخميس نديرو الفضانيه ..

___________________________________________

_

فى حوش ناديه

فتحت ناديه باب حوشها وخشت .. معاها اختها مفيدة وسحر وغادة بنات اختها

-ناديه تكلم فى مختار بالتليفون / وراس اوخى ماترعش روحك .. مفيدة وبنتها اهو جبتهم معاى لى حوشى.. و منعم خليناه عنده بيدير حل

تمت المكالمه … وصكرو الخط

-غادة توشوش فى امها / شن فى يااام .. خيركم فهمينى تعاركتى انتى وبابا

-مفيدة / مافى شى يابنيتى .. ماتوجعيليش قلبي وتزيدينى هم على همى

مودة سمعت الصوت طلعت تجرى تلاقى خالتها وبنتها

-مودة / شن فى

-ناديه / مافى شى ..خالتك وبناتها جايين يهدرزو عندنا

-مودة/ كيف ماشى شى يا ماما .. انا …

قصت عليها اناديه / قلتلك مافى شى .. خودى بنات خالتك ارفعيهم لى غرفتك.. وخلو سحر تستريح ماحد يكلمها

وشبحت ناديه لى سحر وفنصت فيها/شحر مافيش شى باهى
-سحر/ باهى يا خالتى

-مودة / خيرك تلقنى فيها يا ماما .. انا والله ماكنت بنقصقصها
-نادية / باهى ارفعى بنت خالتك وبري .. .

خشت سحر ومودة للدار .. وغادة وراهم مافاهمةةشى… وقعمزت ناديه جنب مفيدة تهدى فيها… باتت ليلتها عند اختها نادية .. وثانى يوم روحت لى حوشها … وخالت سحر عندهم

__________________________________________

_

بعد ثلاثه ايام

هند فاقت من ثانى … لكن ماخلوش حمزة يخشلها يشبحها

يشوف فيها من هداكة التلفزيون الصغير وخلاص .. ثلاثه

ايام ماروحش للحوش بايت فى المستشفى …

ثالث يوم اتصل بي فوزى / اهلين فوزى كيف الحال

-فوزى / اهلين حمزة …كيف حالك توة

-حمزة / الحمدلله .. شنو خشيتو لى دكتور النساء

-فوزى / مزال اهو نراجو فى الدور …عقبالك انت ووخيتى هند بعد تنوض بالسلامه تشرشحك على الحمل ودكاترة النساء

-حمزة / غير ربي ينوضهالى بالسلامه .. جونا صغار ولا لا ماتفرقش عندى .. ماحد مات منغيرهم

-فوزى / والنعم بالله

-حمزة / قالك نبى مفتاح الحوش .. منروح ندوش .. كيف الراى

-فوزى / مافيش مشكلة .. اختى حياة خليناها فالحوش.. تو نكلمها تمدهولك
-حمزة / حياة ?

وبالفعل روح للحوش .. وطق على حوش فوزى .. فتحت حياة

-حمزة / ترا مفتاح الحوش …
-حياة / وخيرك مستعجل

-حمزة / عندى ماندير .. هاتى مفتاح الحوش

حطت حياة يدها داخل صدرها .. وطلعتله المفتاح ومدتهوله

-حياة / هاك تفضل
-حمزة / اقسم برب العباد ماتتحشمى.. لكن الله غالب مانيش فاضى توة….

حياة واقفه وتضحك

___________________________________________

مفيدةروحت لى حوشها من ثانى يوم .. وخلت سحر وغادة

عند خالتهم ناديه … ويشاء القدر ان خدمه صهيب تعطلت

يومين فى زليتن … وثالث يوم روح لى طرابلس وحكتله امه عالخطبه

-صهيب / شنو الخطبه هادى اللى فى يوم وليله

-مفيدة / ماهو قلتلك يا وليدى ماكانش خاطر عليهم ..لما ولدهم طلعتله السفرة طول خمموله فى الماخدة

-صهيب/و خيره خالد ماكلمنيش

-مفيدة/ ماهو يا وليدى مش الولد اللى خطب .. امه هيا اللى دورت وخطبت .. وامس بس استقرو على سحر

-صهيب/ شنو ههيا حادى بادى

-مفيدة / ماهو امه هيا اللى تختار .. والعرض عندها هلبا

-صهيب/ ياودى خطبة يوم وليله هادى مش خاشتلى راس

-مفيدة /هكى صار يا اوليدى

-صهيب/ وبوى خيره مريض .. سلمت عليه يده زى النار .

-مفيدة / مافيه شى .. غير استبرد شوى

-صهيب/ وشن رايه فى موضوع الخطبه

-مفيدة / هوا موافق .. لكن قال الراى عند صهيب .. واللى بيديره ماشى

-صهيب/ انا شن مندير.. كانك انتى تبى حوش خوك وعارفتهم يصلحو بي بنتك اعطيهم

-مفيدة / سلم وليدى ديما مهنينى

” الولايا ?… يديروه ويتكموه ويساووه”

___________________________________________

_

فى حوش حمزة

حمزة فتح الباب وخش … وهوا يسب فى خاطره .. على قلت ربايه حياة …

حط تليفونه والمفتاح وساعته عالطاولة اللى فالصالة
وخش لى دار النوم فتح الدولاب طلع ملابسه الداخليه

وحطهم عالسرير… حول السوريه والتيشرت الدخلانى ولوحهم عالارض ….

طلع من الدار سمع باب الحوش انفتح … خشت حياة

-حمزة / بسم الله الرحمن الرحيم .. انتى كيف خشيتى هنايا

-طيحت حياة وشاحها على كتافها وقامت يدها / بالمفتاح

-حمزة / وانتى منين جبتيه

-حياة/ درت نسخة منه لما كان عندنا ?.. عطاك خوى فوزى الاصل وخليت النسخه عندى

حمزة هدى نفسه خايف يعيط يجيبوله الجيران الشرطه ..

صكرت حياة باب الحوش وخشت …

-حمزة / شن تبى
-حياة / نبى نتعرف عليك اكثر

-حمزة / لكن انا توة مش فاضى

-حياة/ علاش مش فاضى ..اهو روحت بدوش وبتغير حوايجك .. معناها عندك وقت

-حمزة / باهى شن تبى

-حياة/ نخش دار النوم نجهزلك حوايجك
-حمزة / وكانا روح خوك شن بيقول علينا

-حياة/ دورهم بعد ساعه .. معناها يوصلو هنايا بعد ساعتين
وتحركت قربت منه / تبى نخش لى دارك ولا ماتبيش

-حمزة / مدامك وصلتى وخشيتى ..تفضلى

خشت حياة لى دار النوم .. وشاحها طاح عالارض .. تخلط بي حوايج حمزة المسخات اللى حولهم

حمزة وقف قدام باب الغرفه

-حياة/ خش خيرك

خش حمزة وصكر الباب وراه

__________________________________________

تمت …. ويتبع

وسعت السطور بناءً على طلب متابعه قالت حابه تقرا بس السطور صغيرة

نحبكم

 

error: