رواية ابتزاز بقلمى زهور جمال الدين
#ابتزاز
بقلم زهور جمال الدين?
?الحلقه العاشرة?
“حقيقيه ممزوجه بالخيال”
لايك قبل ماتقري ?
_
يوم الثلاثاء فى المستشفى
حوش نادية قريب هلبا من المستشفى … وصلت ناديه فيسع وخشت تجرى .. مافيش فى بالها الا ان صهيب ولد مفيدة دار حادث … خشت للمستشفى تتصل بي مفيدة متردش .. عاودت الاتصال مرة ثانيه ردت عليها مراة
-ناديه / هدا تليفون مفيدة ولا لا
-المراة / اهو اختك جنبى .. تعبانه شوى فقالتلى هاك ردى على اختى
-ناديه / هيا وين توة
-المراة / احنا فى قسم النساء .. اسألى اى ممرضه تو ادلك
-ناديه / قسم النساء !! .. باهى اهو جايتك نعرفه
-المراة/ تمام .. وصكرت الخط
طلعت الممرضه …
الممرضه / وين ام سحر
-مراة مقعمزة / اهيا
-الممرضه / جبتو الحاجات
-مفيدة عيونها معبيات دموع / لا لا
-الممرضه / استعجلى يا اختى .. ولا كلمى راجلها يجيبهم
لان قدامها حالة بس
وتلفتت خشت للغرفه وصكرت الباب وراها ..
-مراة مقعمزة/يا وخيتى خيرك صايرة فيك حالة .. هيا بكرة
-مراة ثانيه / مازالت صغيرة .. سيورها تحمل ثانى
مفيدة بتعيط ومش قادرة …
خشت نادية للممر تنادى بصوت واطى / مفيدة .
تلفتتلها مفيدة .. وقفت ومشتلها تجرى شدتها من يدها وطلعتها من الممر بسرعه قريب طاحت ناديه
كملة الممر بالكامل … وطلعو لى صالة على جنب خشو من الممر لين كملوه لقو صالة صغيرة فاضيه .. المهم مفيدة يا نارى تلاجى زى المحروقه قريب اطير تجرى وخلاص ..
خشو للصالة الصغيرة الفاضيه .. وقفو
-ناديه / يا مفيدة خيرك …شن صايرلك
-مفيدة بدت تخبط على وجهها وتنقز / ووه عليا وووه .. بنتى سحر حامل … بنتى حامل
-شدتها نادية / صكرى فمك … بالشوى لايسمعنا حد …
قعمزتها بالسيف عالكرسى /كيف حامل … ومن سكون يا غبارة سودة .. وينها توة شادينها لداخل ولا شنو
-مفيدة حاطه يديها على وجهها / حالة اجهاض قالولى قولى لى راجلها يجى ويجيب الحاجات اللازمه
-قعمزت ناديه عالصالون وتخبط على رجليها / يا فضيحة ويا غبارة سودة على روسنا
_________________________________________
_
فى المانيا
هند وحمزة سافرو الجمعه الصبح من ليبيا .. والسبت ارتاحو والاحد مشو للمستشفى عاينو..قالولهم بعد عشرة ايام عمليه
هند .. اللى هوا بيكون يوم اربعاء …
ويوم الثلاثاء دخلها حمزة للمستشفى .. بترقد فيه بيش ثانى يوم يديرولها العمليه …
رقدوها فى غرفه بروحها .. فيها فرش ارضى وستار عالشباك
.. ودولاب عالجنب .. سرير وجنبه كوميدينو فيه ثلاجه لو تبى تحط فيها حاجه .. وفيها حمام داخلى
-هند راقدة عالسرير لابسه قفطان قطن ابيض فيه ورد لونه بينك … تتألم / قوللهم يعطونى مسكن
-اتكى جنبها عالسرير وحضنها / ياعمرى .. خلاص هانت .. تحملى الليله على خاطرى .. وغدوة يستأصلوه هالخبيث .. صدق من سماه خبيث
-هند/ ااااه راسى
-حمزة / لانك تاخدى فى دوا منغير ماكلة… هدا علاش دايرلك الم فى راسك
-نزلو دموعها / راسى يوجع
-حمزة حضنها بقوة / ربي ياخد من عمرى ويعطيك
طق الباب .. ساوت هند حجابها .. و مشى حمزة فتح الباب لقاه صاحبه فوزى وفدوى زوجته … خشت فدوى لى هند .. ووقف فوزى حياها من فم الباب وطلع قعد هوا وحمزة برة
-حمزة / والله مانى لايم عليكم بالزيارة يا فوزى ..عارفك عندك قراية وخدمه
-فوزى / هند اوخيتنا .. وانت اوخينا يا حمزة شن تقول .. وبعدين انا اليوم خديت ادن خاطر منمشى للمطار نستقبل اختى.. جايه بتقعد عندى اسبوعين
-حمزة / اهاا .. ربي يوصلها بالسلامه
-فوزى / بالرغم هيا وفدوى من لما صغيرين مايتفاهموش .. مش عارف شن بيفوت هالسبوعين
-حمزة / قصدك انت وفدوى اقارب
-فوزى/ فدوى بنت عمى خو بوى .. خيرك مش حضرت العرس
-حمزة/ مشيت يوم الغدى بس .. تدكر نفس اليوم سافرت انا والجماعه للجنوب
فوزى / صحيح … لكن تصدق الغرفه اللى مرقدين فيها هند ممتازة .. كأنها جناح
-حمزة / مانكدبش عليك … حولت ملفها لى ملفات علاج الجرحى
-فوزى / باهى كويس احسن مادرت .. لان على قد ماتدفع ومستحيل تلحق
-حمزة/هيا اللجنه لاغيه ضم اى مرضى ليبيين هنايا .. ماعدا مرضى الاورام..لما لقيتها من حقها تتعالج على حساب الدولة
كلمتهم وضفت اسمها
-فوزى / علاج بس ولا حتى السكن
-حمزة / لا علاج بس .. حتى الدوا على حسابنا
-فوزى / ربي يعاونك ويشفيها يا صاحبي
قعدو قريب نص ساعه .. وبعدها مشو للمطار بيستقبلو اخته حياة … جايه زيارة لى خوها
_________________________________________
_
فى المستشفى …
نادية دخلت اختها مفيدة للممرضه ..قاسولها الضغط لقوه 200 /100 …
-الممرضه/ لازم اتخليها توة هنايا تحت الملاحظه وبنحطلها حبة تحت اللسان .. وضربتلها يبرة مهدئ
-مفيدة مغمضه عيونها من كثر مالضغط شايط/ لاااا .. ماتخلينيش هنايا … خلينى نمشى نشوف مصيبتى
-الدكتورة خدت نادية على جهه / اختك عندها مشكلة
-نادية معش عرفت شن تقول / غير الدوة بينى وبينك يا دكتورة … راجلها يبي يتزوج عليها .. شوى رقالها الضغط
-الدكتورة / باهى مش مشكلة اختى …لازم نحطولها حبة ضغط تحت اللسان توة.. ولازم تقعد تحت الملاحظه لين ينزل ضغطها
-نادية / بالكوتقدرى تعطيها منوم يا دكتورة
-الدكتورة / المهدئ اللى اعطتهولها البنت ح ينومها توة اكيد
-نادية / ربي يبارك فيكم يادكتورة .. خلى نمشى انا شوية بس عندى ماندير فى قسم النساء وتو نجيها
-الدكتورة / تمام
-مشت نادية للممرضه / اختى نعطيك رقمى .. اول ماتفيق كلمينى
-مدت الممرضه تليفونها / اكتبى رقمك
كتبت ناديه رقمها ودارت تشريينه لى تليفونها.. وخدت تليفون مفيدة …. واتصلت بي بنتها غادة فالحوش
-غادة / الو ماما
-ناديه / انا خالتك …
-غادة/ اهلا خالتى امالا وين ماما
-ناديه /ماما مع سحر لداخل .. لقوها واكلة حبوب متع ريجيم وجعولها بطنها .. والدكتورة قالت لازم انديرولها غسيل معدة … قالتلك امك ردى بالك اتقولى لى بابا.. قالت قوليله انهم طالعين معاى انا نشري فى صالون
-غادة/ باهى يا خالتى تو نقوله هكى لما يروح ويسألنى على ماما.. قتلك كان هيا قريبه عليك نبى نكلمها
-نادية /لا لا هيا مع سحر لداخل والممرضات مصكرات الباب
.. وتليفونها قعد معاى هيا قالتلى نقولك … واسمعى راهو تليفونها قريب يطفى شحنه
-غادة / باهى كانا لقيته مقفل تو نكلمك انتى
-نادية / باهى .. فى امان الله
وخدت تليفون اختها وصكراتهة… وركبت لى قسم النساء.. خدت ورقه بالمواد الناقصه … وطلعت مشت للصيدليه شرتهم .. ورجعت للمستشفى طقت عالممرضات وعطتهملهم
وقعمزت عالكرسى ..
وفى خاطرها / وينك ياهند الله لا تغيبك .. لو كنتى موجودة راهو هدا كله تجرى عليه انتى توة
وطلعت تليفونها اتصلت بي راجلها / اهلين عزيز .. ممكن نتأخر شوى .. طالعه انا ومفيدة منشري الصالون للمربوعه اللى قلتلك عليه اولامس
________________________________________
_
فى المطار
فوزى وفدوى واقفين ايراجو فى اللى نازلين من الطيارة
-فوزى / هوينا حياة جايا من الباب اللى منغادى
-فدوى / ايه شفتها …
وقعدو ايأشرولها بايديهم … وهيا اتأشرلهم ..
وصلتهم وسلمو عليها … خدو شناطيها وطلعو ركبو فالسيارة متوجهين للحوش
-فدوى / كيف حال عمى وعمتى
-حياة / الحمدلله كويسين … يسلمو عليكم
-فوزى / وصيتها عالبسيسه .. بعتتهالى
-حياة/ اكيدة بعتتهالك .. وباعتتلك عرم حاجات
-فوزى / ربي يحفظهملى اميمتى وبوى
وصلو للحوش … حطو الغدى وتغدو … خشو يغسلو فالماعين .. وفوزى يتكلم فالصالة
-فوزى / صار اكدلكم الدكتور ان العمليه غدوة … ربي يحفظهالك يا حمزة .. وتنوضلك على خير وسلامه .. باهى روح كول حاجه وارجعلها .. بتبات … بتبات غادى .. غدوة اول مانروح من العمل نجيك طول
صكر المكالمه .. وخدى مفتاحه وطلع
-فوزى / تو نجى …
-فدوى من المطبخ / باهى
-حياة فى جنبها / منو اللى يكلم فيه حمزة ويقوله العمليه غدوة
-فدوى تلخبط / صاحب حمزة جايب مرته يعالج فيها .. عندها ورم فالدماغ بيديرولها استئصال
-حياة / وخيره لون وجهك تغير
-شبحتلها فدوى / انتى بتعرفيها اليوم ولا غدوة
-حياة / مفهمتكش
-نادية / المريضه صاحبتى هند
-حياة / منو صاحبتك هند …
وفتحت عيونها / هنددددد … ماتقوليش هند اللى
-فدوى / ايه نفسها هند
-حياة علت صوتها / شفتى شن صارلها … هدا كله من دعاى عليها… تستاهل .. انشاءالله السرطان ينتشر فى جسمها كله
-فدوى رعشت مع بعضها/ ووك عليا رعشتينى.. المرض هدا لا توديه لى حبيب ولا لعدو
-حياة / ريتى .. يا داير يا لاقى .. خطافت الرجالة هادى .. قدام عيونك خطفتى منى خوك طارق زمان … وفالاخير توفى لا خداها لا خدانى
-فدوى / انتى توة ضيفه عندى ومانبيش يصير بينى وبينك اى خلاف ..
-حياة زادت علت صوتها/ لا قولى … بالك انا نكدب كدبينى
-فدوى / انتى عارفه ان هند عمرها ماحبت طارق ولا كلماته
.. زى ماكنتى عارفه ان طارق عمره ماحبك ولا كلمك بيش تخطفه منه
-حياة / انتى شن قاعدة تقولى .. ادافعى عليها .. لكن هوينا ربي انتقم منها وعجل بي موتها
-فدوى / الشماته مش فالموت يا حياة عيب عليك .. ولعلمك بيش يبدا اسمها خطفت حاجه من حد … لازم الحد هدا يكون يملك الحاجه .. طارق عمره ماحبك ولا بدى ملكك بيش تخطفه هيا منك
انفتح باب الحوش .. خش فوزى لقى الوجوه مقلوبه
فوزى / خيركم !!؟
__________________________________________
_
فى المستشفى …
طلعت الممرضه لحقتها ناديه …
-ناديه / وخيتى شن صار فى حالة سحر
-الممرضه / اما هيا فيهم
-ناديه / البنية الصغيرة
-الممرضه / زربطها .. انتى شن تقربيلها
-نادية / انا خالتها
-الممرضه/ خيركم لا عاركتو اختكم ولا قلتولها بنتك صغيرة
معقولة اجهاض فالعمر هدا
-ناديه عيونها تعبو دموع / الله غالب يا وخيتى النصيب
-الممرضه/ المهم الدكتورة قالت ماتحتاجش رسكمينتو ..
تنضيف عادى وخلاص الجنين عمره اسابيع ..ممكن خمس اسابيع بس
-ناديه / باهى ربي يطمنك ياوخيتى .. نقدر نخشلها
-الممرضه / شووويا .. نص ساعه ويركبوها للقسم
-نادية / قصدك بتبات هنايا
-الممرضه / والله مندرى .. الممرضات اللى فالقسم فوق تو يقولولك ..
-ناديه / باهى مشكورة
مشت الممرضه .. قامت ناديه التليفون واتصلت
-ناديه/ الو
-الممرضه / ايووة
-ناديه / شنو فاقت مفيدة
-الممرضه/ لا والله مازال مافاقت
-ناديه / بالله اول ماتفيق كلمينى
-الممرضه/ اطمنى اختى ماهو قلتلك تو نكلمك
-ناديه / باهى مشكورة ..
وصكرو الخط …
-تلفتت الممرضه للممرضه اللى جنبها/ يانارى اختها قداش خايفه عليها
-الممرضه الثانيه / هيا خيرها ضغطها عالى وصايرلها هكى
-الممرضة / قالو راجلها بياخد عليها
_________________________________________
_
فى غرفه هند …
خشت الممرضه حولت التغديه من يد هند .. وكلمت حمزة بالانجليزى .. فهم منها ان المريضه خلاص معش بيديرولها شى… تصيم من الساعه 8 المغرب .. لان عمليتها غدوة الساعه 8 …
طلعت الممرضه … ومشى حمزة اتكى ع السرير مع هند
… .مد يده ورقدها عليها …حولها حجابها .. وحط يده على قصتها يلعب بيها
-هند / برة كول حاجه
-حمزة / مش حناكل لين انتى تاكلى
-هند / انا مانبيش كرهت الماكلة ..
-تلفتلها حمزة ولفتها ليه / تتوحمى
-هند ابتسمت / تو انت راجل شن عرفك فى الوحم والكلام هدا
حط يده تحت راسها ونزل جسمها كله عالسرير قرب منها .. قعدو راقدين عالسرير متقابلين عيونهم قراب من بعض
-حمزة / محلاك
-هند / ماجاوبتنيش من قالك عالوحم .. كنت متزوج
-حمزة / طبعا لا … صحابى هما اللى يحكولى على نساوينهم كيف يكرهوهم وكيف يكرهو الماكلة وهكى
-هند / لكن هادى خونه .. كيف يقعد الواحد يحكى على مرته وتصرفاتها فالحمل فالحوش..اول مايشوفوها صحابه يقعدو يتخايلو فاللى قالهولهم كله عليها
-حمزة / صح كلامك..نوعدك لو توحمتى وكرهتينى مستحيل
نحكى عليك لصحابى
هند سكتت وحشت راسها فى رقبته
-حمزة / خيرك سكتى … قاعدة ماتبينيش
-قامت راسها وشبحتله / هوا اللى يجيه ورم يقعد عايش فالدنيا ..ويحمل ويجيه صغار
-حمزة تقاعد وقعمز / لاااااا ردى بالك تقولى هكى ..خلى ايمانك بي ربي كبيرر… ياما من ناس عاشو .. لعلمك نص علاج اى مرض هواالحاله النفسيه للمريض
هند تشبحله وساكته
-حمزة / شوفى توة لما حضنا بعضنا وهدرزنا …شفتى كيف وقف الم راسك .. ماقلتيش راسى يوجع .. وماتقوليليش من التغديه..صدقينى لانك حسيتى بالدفى فى حضنى ونسيتى كل الم
-هند لاحظت / صح .. الم راسى وقف
رجع اتكى جنبها وحط يده على كتافه وقرب راسها على صدره …. حضنها وايديه فى شعرها
-حمزة / لعلمك اللى قاعد ندير فيه كله حب .. انا مانعرفكش من زمان بيش تقولى انت عطفت عليا وهكى .. لو منحبكش حنانى عليك استحالة يوصل للزواج
-قامت راسها / تحبنى
حط صبعه ع شفايفها يحرك فيهم/ نحبك هلبا…فوق ماتتصورى .. نتمنى مانفارقكش دقيقه …
هيا منسجمه وتشبحله
زاد صبعه الثانى ويحرك فى شفايفها / لعلمك انتى انسانه كلك رقه وتنحبي…. عيونك … وصوتك …. كلك مغريه
هند ابتسمت … قرب منها حمزة وباسها بوسه خفيفه على شفايفها .. كأنه يبي يشوف ردت فعلها موافقه والا لا ..
..ابتسمت… قرب اكثرر.. غمضت عيونها … نزل عليها يبوس فيها وهيا منسجمه ومش معارضه ..
-حمزة / تحبينى ..
-هند / وكيف مانحبكش وانت غامرنى بحنانك
-حمزة / ربي ياخد من عمرى ويعطيك
هند تشبحله ومبتسمه
حط يديه على كتافها .. رقدها على ضهرها عالسرير .. ونزل عليها يبوس فيها اكثر واكثر .. حط يده على بطمه السوريه بيفتحها
-هند / لاااا انتحشم
-حط يده عالبطمه وفتحها / انتى مرتى …
دخل يده تحت قفطان القطن / ومن حقى نحط يدى وين مايعجبنى ..
-هند مبتسمه / احنا فالمستشفى
-حول يده وقرب من وجهها وحط انفه على انفها / تحبينى
-هند مبتسمه / هلبا …
-يبوس فيها / انا خلاص راهو .. مش قادر نبعد عليك اكثر
-هند تدلع / حبيبى خلاص احنا فالمستشفى بالك حد يخش علينا توة
نزل من السرير .. مشى للباب .. صكره بالمفتاح … ورجع للسرير .. وقف حول الماليا الخارجيه اللى لابسها .. وحول السوريه يفتح فيها بالبطمه …
-هند / اهفت يا مجنون …مش وقته
-حط السوريه عالكرسى وحول التيشرت / معش قادر
جى للسرير ..قعد يبوس فيها ..حول الغطا … وتهنت العروس
____________________________________________
_
بعد ساعه
ركبت ناديه للدور اللى فيه سحر .. وهيا راكبه شرين تليفونها .. شافت لقاته عزيز راجلها يتصل
-نادية / الو
-عزيز / وينك لتوة مخليتنا بلا غدى
-نادية / وينها مودة خيرها ماطيبتلكمش اى حاجه
-عزيز / مودة علمتيها انتى الطياب بيش اطيبلنا ..
-ناديه / ياراجل خيرك تعيط .. يعنى كانا قعدت يوم انا مهناش هكى يصير فيكم
-عزيز / يعنى توة بتروحى ولا مازلتى
-نادية / انا فى عين زارة وانت تعرف الطريق كيف زحمه يبيلى ساعه ثانيه او ساعه ونص بيش نوصل
-عزيز / وانتى شن مرفعك لى عين زارة .. ماعجبوكش المحلات اللى هنايا
-نادية / توة هدا اللى صار
-عزيز / خلى نعبى على روحى ونمشى نجيب غدى من برة وانتى اقعدى دورى
-ناديه / اهو فالطريق مروحه علاش العياط
-عزيز / لا لا حتى كان عندك نيه تباتى عادى خودى راحتك
-ناديه / يا راجل
-قص عليها/ هيا بالسلامه
وصكر الخط …
ركبت نادية لى بنت اختها .. خشت الغرفه .. لقت معاها خمسة نساوين راقدات عالسراير.. فتحت الستار وخشت جنب السرير…
-سحر لما شافتها بدت ترعش وتبكى/ خالتى …
-ناديه / اششششش
-سحر/ وين ماما
خشت الممرضه تحول فى الكنيولة من يد سحر ..وسحر تبكى …
وتلفتت لى نادية / الدكتورة بتكتبلها خروج بعد ساعه
-نادية / وليش هكى مستعجلين ..بالك تصير مضاعفات للحالة
-الممرضه/ لا حالتها كويسه غير تاخد المضاد … مش محتاجه حتى رسكمينو .. ماتخافيش عليها ..
وتلفتت لى سحر / معش تبكى حبيبتى مازلتى صغيرة تو ربي يعوضك غيره قريب انشاءالله
وتلفتت لى ناديه / وين راجلها !؟
-ناديه / مسافر
-الممرضه / انتى امها
-ناديه / خالتها ..
جت ممرضه ثانيه / اهيا ورقه الخروج …
خدتها ناديه ….
ناديه شاغلتها اختها مفيدة .. وشاغلتها سحر بنت اختها خايفتها تهرب …
طلعت خارج الغرفه وكلمت الممرضه .. وقالتلها ان مفيدة تبيلها ساعه ثانيه عالاقل بيش تفيق
-خشت لى سحر / هيا نوضى
-سحر ترعش / وين بترفعينى
-ناديه تبيش تشبحلها / ماتخافيش بنروح بيك لى حوشى
-سحر / ماما وين
-ناديه متعصبه معش تشبح فى شى / صكرى فمك … ومعش تنشدى على حد… مادخلكش فيها وين .. ونوضى سقدى
-سحر / مش قادرة انوض
مدت ناديه يدها وقاعدها / ساوى حجابك وسقدى هى
طلعت ناديه سحر من المستشفى .. نزلتها تحت … وطلعتها برة .. ركبتها فالسيارة ومشت بيها لى حوشها .. حوش نادية قريب ولهدا وصلو فيسع
خشو للحوش … ناديه تنادى / مودة … مودة
-طلعت مودة من دارها / نعم ماما ..
شافت سحر نزلت تجرى / سحر خيرك
-ناديه / البسى عباية بسرعه بيش تمشى معاى للمستشفى ناخد سيارة خالتك ونوصلها بيها لى حوشها وانتى روحتى بي سيارتى
-مودة / مستشفى شن فى خيركم يا سحر
-ناديه متعصبه / قلتلك ماتسأليش .. دخلى بنت خالتك لى دارك والبسى عبايه
-مودة / انا مش صغيرة يا ماما قوليلى شن فى
-نادية / خالتك مفيدة وسحر دارو حادث .. ومايبوش يقولو .. ارتحتى
-مودة / الف سلامه عليكم يا سحورة .. تعالى خشى لى دارى
ودخلت مودة لى دارها .. ولبست عبايه وطلعت مع امها
ركبو السيارة
-نادية / لا تجى على حال بنت خالتك .. ولا تسأليها .. ولا ليك علاقه بيها مفهوم
-مودة / حاضر يا ماما
وصلو للمستشفى .. نزلت ناديه وركبت مودة فمكانها
-مودة/ وانتى كيف بتروحى
-ناديه / تو يوصلنى صهيب ولد خالتك
-مودة / باهى
ولفت بالسيارة وروحت
خشت ناديه لى مفيدة … استنتها شوى لين فاقت .. وطلعتها بتروح بيها
فالطريق
-نادية / معش تعاندى .. خليها عندى انا احسن .. قولت بتقرا مع مودة
-مفيدة / انتى تعرفى صهيب ولدى مايخليش فخواته يباتو برة بكل
-نادية / تو نكلمه انا
-مفيدة تبكى / لازم تعرفيلى اللى دارلى هالمصيبه منهوا
-نادية / تو نغصورها انا الليله ونفهم منها
-مفيدة / باهى
وصلت مفيدة لى حوشها وروحت هيا للحوش … غصورت سحر .. تبى منو دار العملة وسحر راقيه الازرق تبيش تقول
لما كلتلها كبدها بالسئلة …. اعترفت وقالتلها ان خالد افندى هوا صاحب العملة ?
__________________________________________
_
فى غرفه هند
حمزة وهند غارقين فالعسل … راقدين مقابلين بعض عالسرير .. هوا فردى .. حمزة نصه فالهوا قريب يطيخ
هند حاشيه راسها فى صدره / غطينى .. صقعت
خدى حمظة الغطى وحطه على ضهرها
-هند?/تو كانا مش هبال معقولة شى زى هدا فى المستشفى
-حمزة / خديتى عقلى
-هند / نحبك …
-باسها / وانت نموووت فيك .. انتى روحى
-هند / بالك غدوة مانطلعش من العمليه .. نبى نقولك انى بجد حبيتك اكثر من نفسى
-حمزة / بدينا فالنكد عاد
-حشت راسها فى رقبته/ هدا الحق
-حط ايده على راسها وضمها / الاعمار بايد الله مش بيدك انتى
-هند / والنعم بالله
-شبحلها وضحك / هى نوضى بندوشو
-هند / توة شن منلبس هى .. والحوايج اللى فالشنطه الصغيرة عابيه منلبسهم غدوة بعد العمليه
-حمزة / اولا لو تحبي الليله نجيبلك عشر قفاطين قطن ثانيات ماعنديش مانع ..ولو تبى نزيدك ملابس داخليه .. وبعدين تقدرى حتى تردى حوايجك .. احنا شن درنالهم من اول لحظه لوحناهم عالارض
-ضرباته على كتفه / سخيف …
-حمزة / اسمعى مندوشو مع بعض راهو
-هند/ امالا تحسابنى مانتحشمش .. انا توة متغطيه وميته بالحشمه
-حمزة حاضنها ويضحك / يسلملى اللى متحشم منى.. هيا سقدى بيش نروح للشقه ندوش ونغير ونجيك نقرو قران مع بعض
-هند مبتسمه وواضح عليها السعادة/ حاضر
“جميع الامراض نص العلاج فيهم تستمد من حالة المريض النفسيه ”
__________________________________________
_
ثانى يوم
الساعه 8 ونص دخلو هند للعمليه .. ومن الاول بلغوهم انها
ح تقعد من 5 الى 8 ساعات …
حمزة واقف بروحه يراجى فيها … لان فوزى ومرته بيجو بعد العصر
اما فى حوش ناديه
لبست ناديه ملابسها من الساعه 8 ونص
طلعت من الحوش مشت للعمل وقعت وخدت ادن وطلعت لامر هام جدا….
بعد ساعه كانت فى حوش امها
فتحت بالمفتاح وخشت لان كل وحدة من البنات عندها مفتاح … حاولت انها تخلى وجهها طبيعى
-ناديه / صباح الخير يااام
-فاطمه / اهلين ناديه بنيتى .. قعمزى اشربي معاى قهوة
-ناديه / لا والله مستعجله يااام .. جايبه شيك لى منعم نبيه يعطيه لى صاحبه … هوا قاعد ولا طلع
-فاطمه / والله مندرى عليه لكن بقولى لا .. كانك اتصلتى بيه راهو قالك هوا وين
-ناديه / اتصلت بي ارقامه الزوز مقفلات .. لكن تقريبا شفت سيارته برة
-فاطمه/ خلاص معناها قاعد
-ناديه / نستادنك يااام ..
خشت للدروج … ركبت للدور الثانى … طقت على الباب ..
فتحتلها عفاف … سلمت عليها .. ولاحظت عفاف ان وجه ناديه متغير
-عفاف / تفضلى يا نديوة
-ناديه / منعم قاعد
-عفاف / ايه قاعد هوينا فالصالة يشرب فى قهوته تفضلى
خشت ناديه مع عفاف من الممر
-ناديه / الصغار وين
-عفاف / كلهم طلعو .. اللى فالمدرسه واللى فالجامعه
وصلو لى منعم
-منعم / اهلين نديوة صباح الخير
-ناديه/ صباح النور
-منعم لاحظها / انشاء الله خير يا نادية خيرك وجهك مقلوب
وتلفت لى عفاف/ ديريلها قهوة
-ناديه / لا لا والله ماخاطرى حتى فالعسل
-منعم / امالا خيرك ادوى
ناديه ساكته
-عفاف حست ان وجودها غلط / امالا انا خلى نشوف عمتى لوطا … دارت فطورها ولا مزال
-ناديه / امى قلتلها انى جايبه شيك لى منعم ومنطلع .. لو سألاتك قوليلها ان منعم هوا اللى شدنى يبينى
-عفاف / حاضر
وطلعت وصكرت الباب وراها
-منعم / شن فى ياناديه
-ناديه انهارت / مصيبه يا منعم … مصيبه …
كلم خوك مختار توووووة يجينى هنايا عندك
-منعم / الصلاة عالنبى …شن في بس
-ناديه / عليه الصلاة والسلام…ناديه توة
بالفعل منعم كلم خوه مختار .. وقاله ان ناديه عنده ولامر ضرورى لازم ينزل عنده توة توة
ممكن سبعه دقايق ونزل مختار .. خش وسلم قعمز وهوا مخلوع شن فى
-ناديه / احنا الثلاثه وخيين ومافيناش حد برانى ولا
-مختار / ادوى طيحتى قلبي شن فى
-ناديه / سحر بنت مفيدة كانت حامل واجهضت امس
-خوتها الزوز فى صوت واحد / اااه
-مختار وقف / انتى شن تقولى .. ومنهوا الكلب اللى دار العملة هادى
-غمضت ناديه عيونها / ولدك خالد…
الاولاد الزوز فاتحين عيونهم … وناديه ساكته تراجى فى ردت الفعل
___________________________________________
تمت …. ويتبع
زعما شن موقف مختار ووداد وخالد من الموضوع
حمزة ” ربي ياخد من عمرى ويعطيك ” محلاها الجملة❤
نحبكككم ❤