رواية ابتزاز بقلمى زهور جمال الدين

#ابتزاز

بقلم زهور جمال الدين?
?الحلقة الخامسة ?
” حقيقية ”

_

فى حوش صالحة

هند فتحت الباب وتلفتت تاخد فى الصفرة لانها توقعت ان حمزة باعت فرخ صغير …
قامت الصفرة وتلفتت للباب … تلاقى حمزة واقف …
مدتله الصفرة .. خداها منه
-حمزة / يسلمو يدياتك تعبتك معاى ❤
-هند متحشمه ومبتسمه / لااا عادى مفيش مشكلة ?
-حمزة / ربي يحفظك …
وماسك الصفرة من جهه وهيا من جيهه وواقف يشبحلها
-هند تحشمت هلبا / فى حاجه
-حمزة ?/ بأدن الله مافى الا سلامتك ❤?
-هند / نبي نقولك موضوع
-خدى السفرة وبعد شوى من الباب/ قولى
-هند / منقدرش نتكلم هنايا .. الموضوع يطول شرحه
-حمزة / نكلمك فالليل
هند كيف بتتكلم .. وقفت وراها وحدة شنووووووو …تكلمها فالليلل
هند تلفتت مخلوعه .. تلقاها صفاء بنت عمتهم …
-حمزة غمز لى هند / صحيتى عالقهوة … ومشى
هند تبى تهرب بأى طريقه من الموقف ?
-صفاء/ تعالى لو سمحتى اوقفى .. انتى تكلمى فى حمزة?
هند ساكته
-صفاء بدت تبكى / لعلمك حمزة خطيبي
-هند تفاجئت / اهاا هوا اسمه حمزة… ربي يعقد عسلكم ..
-صفاء تبكى / كيف يناديك انتى اديريله قهوة وماينادينيش انا…كيييف
-هند بحدر/ حبيبتى نقصى صوتك.. وبعدين اشرف ولداختى هوا اللى طلب منى نديرله قهوة هوا وصحابه .. وبالصدفة خوه جى وعطيتهاله .. هادى كل القصة
-صفاء تمسح فدموعها / سمعته بودانى يقولك نكلمك فالليل
-هند / لااا حبيبتى.. انتى بس سمعتى اخر كلمه .. لو سمعتيه
من البداية راك سمعتيه يقول قالك اشرف بنكلمك فالليل لانه يبي عشى لصحابه فهمتى ..
-صفاء/ يعنى اشرف اللى بيكلمك مش حمزة
-هند / ايوووه بالزبط
-صفاء/ كانا هكى باهى …سامحينى غلطت فيك وعيطت
-هند / لاااا عادى
وطلعت هند من المبطخ تضحك.. حستها عبيطه شوى
مشت قعمزت جنب بنات خواتها وتخمم.. معقولة الشخصيه هادى كلها يخطب هادى.. نهار احرش
-عمتك فاطمه / هند .. ياهند
-تلفتتلها هند / نعم يااام
-فاطمه مدتلها عشرة جنى/ هاك جيبيلى بندول من الصيدليه
-هند / عندى فلوس تو نمشى نجيبلك ونجى توة
___________________________________________

_

فى قراج الرجالة …

حمزة مد لى ولد عمه الصفرة قعد يمد فالقهوة .. وجى هوا قعمز عالكرسى …
ويخمم / زعما شن تبينى .. شن سمعت …
مدله ولد عمه الصفرة خدى منها فنجان قهوة
-ورجع يخمم / اول مرة نشوفها عن قرب هكى .. صراحة محلااااها .. ومحلى ضحكتها وخجلها …

عمك محمد بوهم ينادى / يا وليد .. وليد
وليد فى نهايه القراج شبحله وغير وجهه للجهه الثانيه ..
وقف اشرف / نعم يا بوى …
وشبح لى وليد شبحة بايخة ومشى لى بوه …
وقف حمزة مشى لى بوه واشرف ..
-حمزة/ نعم يا بوى شن تبى نديرولك
-عمك محمد عيونه مدمعات / ناديهولى يا حمزة مدامه مديرك فندى سعيد هنايا بالك يعاركه .. تشبح فيها اهى تكركر كل يوم
-حمزة / يا بوى مديري شن دخله .. هدا موضوع عائلي ماينجبدش قدامه
-محمد / برة جيبه وتعالة مندرى على روحى يصبح عليا صبح ولا لا
-اشرف/ ربي يطول فى عمرك يابوى
مشى حمزة لى وليد / ترا شويا يا وليد
-تلفتله وليد وشبح للجماعه اللى معاه / عن ادنكم شووويا ياشباب
وقف مشى جهه حمزة .. ومشو عالجنب ..لحقهم اشرف
-حمزة/ اسسسسس ماحد يتكلم لين نبعدو عالجراج
مشو جيهه حوشهم عالجنب خاطر الخيمه حولوها وحوشهم جاى اخر حوش فالشارع
-حمزة/يا حمار مش تسمع فى بوك ايضبح عليك قدام الناس
ولا ..خيرك مارديتش عليه
-وليد /تو اديرو فالحولة ولا شنو .. كلكم عافين موقفى .. من اول يوم قلتله لما يقولى علاش طلق امى نكلمه ونحطه على راسى من فوق
-اشرف/ معقولة اكثر من عشرين سنه وانت قاعد قلبك اسود
.. على قد ماترجت فيك امى وانت شى زى الحجر
-وليد/اولا انا ماكلمتكش انت يا فرخ….ثانيا امك طلعها من الموضوع ماليهاش علاقه
-اشرف/ انا خوك يا مسخ .. مش فرخ
-حمزة /تى صكر فمك انت وياه..خيرنا هكى من دون العباد ..
احنا خوت ولا عدوين
-اشرف/ ماتسمعش فيه يا حمزة .. بوك مريض وهوا اللى يجرى وراه ويصالح فيه وخوك الحقد مالى قلبه
-حمزة / ومن امتى وليد خوى انا بس.. تى ماهو خوك حتى انت.. اخرلك مرة تقولى خوك
-اشرف/ من وقت ماكبرت وعرفت انه معادى بوه على خاطر ماضى ..طاح من عينى … لعلمك هدا يعتبر ابن عاق ومش حيشوف الجنه
هجم وليد على اشرف / انا عاق يا خامر …
وعطاه بونيه على عينه … اشرف ردله البونيه وضربه على خده .. جاهم حمزة بسرعه ايحز
هند كيف طالعه من الحوش بتجيب لى امها البندول .. مشت على جنب الحوش لى سيارتها … تفاجئت بالصوت والضرب
اشرف يضرب وليد ضربه يدفه لتالى مشى خطوات للورا من حرارة الضربة يطيح على ضهره وتحته هند…
هند كانت واقفة لما نضرب وليد انحدف لتالى خطوات جى طايح عليها يانارى اطبقت تحته?..وراسها ضرب حاشية المرشبيدى …. اغمى عليها …
جوها حمزة واشرف يجرو …
-اشرف/ خالتى …خالتى …

حمزة مش قادر يبين قدامهم انه يعرفها بالرغم كانت عنده
نية يحضنها ويقيمها بين ايديه يطير بيها للمستشفى
-وليد / اااه جنبى
-اشرف/ تى حول وانت زى البلوكة البنت قتلتها
-حمزة / نوض فيسع ارفعها للمستشفى
قامها اشرف بين ايديه وهيا مغمى عليها .. ركبها سيارته وطلع يجرى .. ووراه حمزة بسيارته وجنبه وليد ..

__________________________________________

_

فى حوش صالحة ..

سحر ومودة وانتصار مقعمزين مع بعض

-مودة / انا منغير ولاد الكلية مانوقف على حد تعرفونى حتى ولاد الكليات الثانية مستحيل
-انتصار/ لاااازم تدكرى .. شخص وقف عليك وكلمتيه
-سحر/ هيا قالتلك وقفتى عليه العام هدا ولا العام اللى فات
-مودة/ والله مندرى .. لكن فهمت انه وقف عليا العام هدا
-انتصار/ نقوللكم حاجه يابنات وماتخافوش
-البنات / قولى
-انتصار/ انا حاسة ان نرمين انقتلت ماماتتش موته طبيعيه
-سحر/ لا لا لا .. ابعدى الشيطان عنك ..فى تقرير الطبيب الشرعى مكتوب اصطدام بي سيارة ..وانتى تقري فى التقنية واكيدة عندك المعلومه ان تقرير الطبيب الشرعى هوا الصحيح والاكيد
-انتصار / مش عارفه
-مودة / امالا منو اللى مشت معاه يابنات
-انتصار/ ماتت ومات سرها معاها
-سحر/ المهم انها ماتت موته شريفه.. وامها تاخد فى عزاها وراسها عالى .. الباقى كله زايد
-مودة/ صدقتى
-سحر/ وين سلمى
-انتصار/ بتعطى لى حناى امية
-مودة / غريبه ..وين هند
-انتصار/ تقريبا مشت تجيبلها فى بندول

__________________________________________

_

فى مستشفى الخضرا

درس اشرف وبعده بشوى درس حمزة .. ونزلو يجرو ..
وليد مشى طول جاب باريلا ( سرير) .. ولحقه ممرض
-اشرف نزل خالته وهيا مزال مغمى عليها وحطها عالسرير وتلفت لى وليد يوشوشله / اسمع .. قول دايرين حادث .. مش تقول انت طحت عليها
-حمزة يشبح لى هند ومزال مش قادر يقربها / يابهايم .. مدامكم مش طايقين فى بعض هكى ..علاش هالمشاكل اللى دايرنهالى
الممرض من بعيد/ غطيلها وجهها وكتافها بيش ندخلها
قرب منها اشرف وغطاها / هى.. ارفع ..
الممرض فى بداية السرير واشرف فى نهاية دخلو هند لى جهه الاسعاف
-الممرضه دخلت هند فالستار وصكراته / خيركم حادث
-اشرف يشبح لى خوته / احنا حادث .. لكن خالتى ترا فى شنو زلقت وطاحت ..
-حمزة معش قدر يشد نفسه / بالله نادى عالدكتور فيسع ياسستر
-الممرضه / حاضر ..بس يجى واحد منكم معاى يعطينى اسمها وعنوانها وشن صيلته بيها
-اشرف/تو نجى معاك انا …
لحقها شوى ورجعلهم
-جت ممرضه ثانيه / لو سمحتو اطلعو من جيهه الستاير الدكتور بيمر عالمرضى
-الثلاثه / حاضر..
طلع اشرف ووليد .. وحمزة يشبحلها مش طايب على خاطره يطلع …
طلعتهم الدكتورة من ممر الاسعاف اللى فيه الستاير ..لى برة قعمزو عالكراسى …
-حمزة / كلم خوتها
-اشرف/ لا لا ماعندى علاش نشغل فى خوتها .. اهو شوى يشمموها كحول وتنوض ونروح بيها .. علاش الشهدرة
-وليد / انا والله متحشم .. عملة كان البنت تجى فيها اعاقه
.. راهو طحت عليها بكامل قوتى
-اشرف/ مفيس داعى تتحشم .. لو صارلها شى نعطوهالك
-وليد / وليا الشرف ?
-حمزة حمق/ مش وقت بصارةوتلكليك .. اللى يشوفكم قبل شوى مايشوفكمش توة
-اشرف/وليد خوى واكبر منى..والعين ماتعلاش على الحاجب
-حمزة / ياريته من بكرى الكلام هدا .. راهو ماصارش اللى صار وهند مانضربتش
وليد واشرف شبحوله
-وليد / قصدك تعرف اسمها
-حمزة تلخبط / اشرف بكرى قالنا هادى خالتى هند
-اشرف/ انا قلتلكم انها خالتى بس .. لكن تقريبا ماقلتش ان اسمها هند
-حمزة / يعنى نكدب انا
-اشرف / لا حاشاك .. يجوز انى دكرت اسمها
طلعت الممرضه / وينهم اللى مع حالة هند
وقف حمزة اول واحد ومشالها يجرى ولحقوه خوته الزوز
-الممرضه/ الحالة بتقعد فالمستشفى .. الدكتور دارلها دخول لانه على قد ماحاول معاها ماستاقضتش .. الباين ان جتها ضربه عالشق الايسر من تحت مسببتلها الغيبوبة .. لازم تقعد تحت الملاحظه اليوم ومع المحاولة حتفيق بادن الله
-وليد حط يديه على راسه/ لا حول ولا قوة الا بالله
-حمزة/ نقدرو نطلعوها لى عيادة يا سستر
– الممرضة/ على راحتكم اوخى .. لكن ننصحك المستشفى العام امكانياته احسن من العيادات .. ولعلمك كل يوم تجينا اكثر من حالة محولينهم من غادى … عن ادنكم

قعمزو الاولاد الثلاثه وهما مخلوعين
-حمزة / كلم خوالك بسرعه
-اشرف/ خالى مختار مريض وراقد فالمستشفى .. خلى نكلم خالى منعم
وبالفعل كلم اشرف خاله منعم وخبره انه هند انضربت جنب حوشهم وجابها للمستشفى وطبعا وصاه ان مايقول لى حد
-اشرف/ رد بالك تطلع منك ياخالى .. تعالة انت بس لانها مرات شويا ثانية تفيق
-منعم انشغل/ لا لا ولمن بنقول عاد.. غير خليك جنب خالتك لين نوصل

___________________________________________

_

بعد ساعه ……

الممر اللى قدام حجرة هند معبي.. امها .. خواتها مفيدة ونادية .. بنات خواتها وخوتها .. نساوين خوتها .. المهم العيلة كلها فزعت
حمزة واقف بعيد عليهم .. مولع دخان ويدخن ويبي يصطاد و كيف يخشلها ..

جتهم الممرضه / وين امها
-فاطمه تبكى/ انا اميمتها يابنيتى.. خلينى نخشلها فوفدفعاا بنيتى
-الممرضه / قالك الدكتور تقدرى تخشى لى بنتك .
انتى وشخص واحد بس
-نادية / تعالى ندخلك للغرفه يااام
-منعم/ حتى انا بنخش معاك ..
البنات على تركينه دايرات دوشة / حتى احنا نبو نخشو
-الممرضه/ لو سمحتو يابنات منغير دوشه .. غدوة تتحسن حالتها واتخشو تشوفوها كلكم ..
هدا كله وحمزة واقف من بعيد يترقب

بعد ربع ساعه .. الممرضه طلبت من الجميع انهم يغادرو المستشفى .. عشان سلامه المرضى.. وبالفعل روحة
_________________________________________

_

مع الساعه 11 ليلا …

حمزة واقف فى الصالة متع الدور الارضى فالمستشفى . … ويراقب ..بالك حد من خوت هند قاعد..
لما تأكد ان مافى حد .. ركب للدور السابع االلى راقدة فيه هند… كلم الاستعلامات رفضو انهم يدخلو ….طلعلهم بطاقة الشخصيه متع مكان العمل .. لما شافوها قريب وقفو داروله تحيه..وطبعا بدون اى مانع وافقو .. ودخلوه للغرفه هند طول

خش حمزة لقاها راقدة وعيونها مغمصه ..
قعمز عالكرسى اللى جنب سريرها .. قرب منها ..
-مسك يدها / هند … هند …
حط يده على خدها / هند فيقى منغير دلع عاد … هنودة
انفتح الباب منغير مايحس حمزة بيه .. ممرضه تبى تخش تغيرلها الغطاء .. قعدت واقفه .. معجبه بي حنان حمزة على هند ..تحسابه راجلها
-قر/ب حمزة يد هند وباسها/ انسجمت معاك هلبا .. ردى بالك تمشى وتخلينى ..
صكرت الممرضه الباب وطلعت .. ومشت تجرى للممرضات
-الممرضه/ حيه كان تشوفو راجلها كيف يحاول انه يفيقها .. وكيف ماسك يدها ويبوس فيها …. ياحليلى عالرومنسيه
-ممرضه ثانيه/ زعما قاله الدكتور !!
-الممرضه/ والله مندرى قاله ولا مزال
??????

___________________________________________

تمت …. ويتبع

زعما شنهوا الشى اللى بيقوله الدكتور
نحبكم❤