رواية ابتزاز بقلمى زهور جمال الدين

#ابتزاز

بقلم زهور جمال الدين?
?الحلقه الثالثه ? ” حقيقيه ”

_

فى حوش صالحة …

مفيدة اخت صالحة تنادى/ سحر .. ياسحر
-سحر من الغرفه الدخلانيه / نعم ماما
-مفيدة / تعالى
-طلعت سحر مشت لى امها / نعم
-مفيدة / خشى اغسلى ماعين الفطوى مع البنات ووتى روحك انتى واختك بتروحو
-سحر / ااه.. علاش منروحو .. هوينا مودة بنت خالتى نادية قاعدة وبنت خوالى قاعدين
-مفيدة / انتى ماليكش علاقة بحد..خلاص اربعه ايام وانتى مسيبه جامعتك .. وتى روحك انتى واختك بوكم قريب ايجيكم
-سحر / وانتى
-مفيدة / انا قاعدة تو نروح بعد غدوة …
-سحر تطنفر / باهى

ومشت للمطبخ لقت مودة ادير فى سندوتش لى خوها منير
-سحر / ماما قالتلى روحى انتى وغادة للحوش
-مودة / شورهم متفقين .. حتى انا ماما قالتلى روحى انتى وحنين
–سحر / حسك ريحتينى ..مدامه حتى انتو بتروحو
-مودة / حتى انتصار قالت بيروحو وامهم بتقعد
-سحر/ حتى احنا ماما بتقعد
-مودة / حتى ماما قالت بتقعد ..
وتلفتت / شيماء بالله عليك اتصلى بي خوك عبدو يجى يرفع الشاهى وفطور خوى منير
-شيماء / تو نتصل بي مفيد يجى يرفعهم
-مودة / باهى
طلعت شيماء تنادى فى خوها مفيد بيش يرفع الفطور
-سحر مقعمزة عالكرسى / مطيبها شيماء .. قداش تسخف
-مودة ضحكت/وعلاش تسخف..قصدى عاديه زيها زى الناس
-سحر/ تحكيلى عليها نرمين قالت بوها مريض بالربو ودواه غالى ياخدو فيه غير من جماعه الاحسان
-مودة/ الله يرحمها نرمين ويوسع عليها.. ماتت ومات سرها معاها
-سحر / اسسسسس نقصى صوتك
خشت اتتصار للمطبخ / اسمعو .. شكلها صفاء بنت عمتهم تحب حمزة خو نرمين الكبير
-سحر / وكيف عرفتى
-انتصار/ هوينها لداخل تحكى لى بنت خالتها قالتلها اعطينى طريقه نلفت نضره
-مودة / وانتى استرقتى السمع كالعادة
-انتصار/ طبعا ?
-سحر/ قداش خاطرى نشوف شكولهم .. تصدقو عمرى ماشفتهم
-انتصار/ ولا حتى احنا شفناهم
-مودة / لاحظتو ان مفيش ولا صورة ليهم معلقه
-مودة / ولا حتى صورة لى غيرهم .. شكلهم مايحبوش ايعلقو صورهم حوش خالتى

__________________________________________

_

فى المدرسه

-صلاح / باهى وينه خطيبك .. نبى نشوفه بيش نسيبك فى حالك
-هند / اهو تو نكلمه يجى توة كانه فاضى

خش حمزة/ السلام عليكم
-هند مصدومه هيا عمك صلاح / صباح النور
-حمزة / حتى لو مش فاضى نفضى نفسى ونجى
-صلاح / قصدك انت خطيبها
-حمزة/ ايه انا …ولا مش عاجبك
-صلاح / لا لا عاجبنى … وانشاءالله تتهنو
طلع صلاح من المكتب..اما هند مش عارفه تضحك لا تزعل
-حمزة / صباح الخير
-هند / صباح النور
-حط يديه فى جيوب البنطلون / شن رايك فى الكدبه
-هند ?/ ماكانش فى داعى ليها
-حمزة / اهاا .. انتى تحبيه
-هند?/ طبعا لا
-حمزة / امالا ليش تعقدتى ومفيش داعى وجو .. حسيتك ماتبيش تقولى قدام مديرك انك مخطوبه
-هند / ليش دوينا هلبا فالموضوع .. خلاص فوته
-حط يده فى جيب دجاكة / باهى خلاص فوتناه ..
طلع ضرف صغير / تفضلى
-خداته هند / قصدك طلعتها الشفرة
-حمزة / اطبعا …

خدت هند الضرف وفتحاته وطلعت الشفرة منه
-حمزة / ماتبيش تشربينا قهوة
-هند / لا ولو .. نشربك اكيد … تفضل
-مشى حمزة للكرسى اللى مقابل مكتبها وقعمز / شكرا

طلعت هند من الباب .. نادت المراة اللى ماسكة المقصف ووصتها على فنجانين قهوة ورجعت للغرفه .. قعمزت على كرسيها .. وخدت تليفونها وفتحاته من الخلف
-حمزة / بتركبيها
-هند / اكيد
-حمزة / ديري فى حسابك ان مرات امها تتصل بالرقم وتلقاه ايضبح.. حتصير دوشة
-هند / نفتحه شوى ونصكره
-حمزة / انا غير كان نعرف شن بديري بيها الشفرة .. بتغيري رمز الفيس والانستغرام مثلا
-هند حست انه دكى وصعب تفوت عليه اى حاجه / لاااا وانا ليش منغيرهم ..
-حمزة / مش عارف …
وتلفتلها / الشفرة لى بنت اختك ..معناها تقدرى تتصرفى فيها زى ماتبى
طق الباب …خشت امراة متع المقصف .. حطت فنجانين وطلعت
-حمزة خدى الفنجان / ماشاءالله القهوة سريعه عندكم
-هند / عمتى ضاوية ماشاءالله يدها سريعه .. على فكرة هيا جارتكم
-حط الفنجان / جارتنا!!.. جارتنا وين
-هند / جارتكم فى حوشكم ..هيا جارة صالحة اختى
-حمزة / اهاا .. انا الحق الجيران مانعرفهمش .. بعد طلعت من الاعدادى مشيت لى بنغازى قريت فى الكلية العسكريه ..
بوى واختك بعدها حولو للحوش اهوا هدا علاش مانعرفهمش
-هند / ليش تقول اختك .. صالحة تحبكم وعمرها ماقالت كلمة سو فيكم
-حمزة / ومن قالك اننا نكرهوها
-هند / لااا حاشاكم .. بس حسيت من كلامك ان
-حمزة / احساسك غلط .. وعلى فكرة كلمتى ماتنزلش الوطا عند خوتى …ورائي هوا الماشى .. والراى اللى قلتهولك هوا رايهم بالزبط
-هند / ربي يحفظكم لبعض ..
وينفتخ الباب لين انخبط عالحيط

__________________________________________

_

فى الوفاة

البنات مشو للصالة لان صوت صالحة وصل لعندهم
-فاطمه حناهم / يابنيتى ليش تعدبي فيها

-صالحة / يابنيتى وين مشيتى .. يا عوالة امك علاش مشيتى وخليتيها .. من بيدير لى بوك الشاهى فالعصر.. من بيقولى قعمزى يا ماما تو نسقى انا الغدى انتى تعبتى
-نادية/ يا صالحة هدا حرام عليك.. هدا كفر بقضاء الله
-مريم جارتها ام شيماء/ يا صالحة عيب اللى اديري فيه بنتك ليها خمسة ايام مدفونه .. الصبر ..
-صالحة حاطة يدها على صدرها /خلوووونى ماحد يسكتنى
..بنتى نارها اهنى مزال ماطفتش
-مفيدة / غير جيبولنا مالقى اميه نبخوها بيه
-مريم / هدا الفيسبوم ولا شن اسمه وشن يدير من عمايل
مودة وسحر شبحو لى بعضهم …
-زهرة جارتها / فيسبوم شنو اللى تحكى عليه يا مريم
-مريم / وين ندرى عليهم .. حاجة تطلعلهم فالتليفون
-الحاجة زينب / التستور والبركة .. شنهوا اللى يطلعلهم
-صالحة / يا بينى يا بنيتى اللى خوتك يدللو فيك وكل واحد فيهم يشريلك تليفون شكل
-فاطمه / بتسكتى ولا والله مانى بايتتلك فيه الليله
-صالحة / لمن بتمشى وبتخلينى يمى ..نهون عليك .. كيف تقولى هكى
-مفيدة جنبها / كلنا قاعدين معاك يا خوتى ومن عنده بال يروح ويخليك
وتلفتت للبنات / هاتولنا اميه خيركم

_________________________________________
_

فى المدرسه

انفتح باب غرفه هند بالقوة .. تلفتو الزوز مخلوعين يلقوه الاستاد صلاح
-صلاح / عندك شغل يا ابلة هند ماكش فاضية
-وقف حمزة فاتحة عيونه / خيرك قربعت الباب
-صلاح / ماقربعتاش الريح فتحه ..وبعدين هدا مكان عمل مش مكان لقائآت …
هند واقفه تشبحلهم ومتحشمه من حمزة ..
حمزة قرب من صلاح .. وبحركة سريعه طلع مسدس من من تحت دجاكته مالخلف وشده بيديه الزوز ووجهه لى صلاح ..
-صلاح يرعش/ شن ادير .. شن ادير يا مهبول
-حمزة فتح تأمينه المسدس تشك تشك / تشاهد على روحك
-صلاح / يا ابلة هند كلميه ..من بكرى مخليكم على راحتكم
-هند لفت من ورا المكتب ومشت وقف جنب حمزة / اهدا .. شن ادير .. بتحط رقبه فى رقبتك
-حمزة يشبح لى صلاح / من زمان يقربع عليك فى الباب ولا هادى اول مرة
-صلاح يرعش/ والله اول مرة .. قوليله يا ابله هند .. والله ماعمرى درتلها حاجه زى هادى
-هند/ والله اول مرة يديرها ..خلاص صلى عالنبى ونزل المسدس
-قرب حمزة من صلاح وشده من رقبه خنقه وقرب المسدس لى خده / اسمع يا ولد الحرام .. المرة هادى وقفتلك فيها هيا وقالتلى سيبه …
وزاد عصر على رقبته / لكن اديرها مرة ثانيه ورحمه امى ماتبدا جنازتك الا فى نفس اليوم
-صلاح صوته مخنوق/ حااا ضر .. حاضر
طلق حمزة ايديه الزوز منه / امسخ
طلع صلاح هرب يجرى مشى لى مكتبه ..
هند / توةليش ادير هكى واطلع المسدس.. المرة هادى ربي ستر والممر طلع فاضى .. لو واقفه اى مدرسة وشافت الموقف شن بتقول عليا
-حمزة فتح تأمينه المسدس ورده فالبنطلون وراه / بيقولو خطيبك وايدافع عليك
-هند / نحكى بجد انا
-حمزة / يعنى تبينى نشوفه يقلل من قيمتك قدامى ونسكت
-هند / لا ديرلى فضيحة خير
-حمزة / ربي ما يجيب فضايح .. المهم الشفرة عندك ..هى سلام توة
-هند / مشكور ومع السلامه
طلع حمزة وقعمزت هيا تركب فى الشفرة فى جهازها

________________________________________

_

العشيه ..

مشت هند للوفاة مالقتش بنات اختها وخوتها … بالرغم ماسمعتش اى دوشه فالحوش فى حياش خوتها .. شوره البنات من تعبهم رقدو طول اول ماخشو لحياشهم ..

هند مقعمزة على تركينه وشاده تليفونها وفاتحة الفيس ..
حطت رقم نرمين وكتبت هل نسيت كلمه السر ..كتبت نعم
.بعتوله رمز على شفرة نرمين كتباته…وكتبولها غيرالباسورد
طبعا هيا على طول غيرت باسورد البروفايل ..طول انفتحلها
كان يهمها الماسنجر اكثر من اى حاجه

فتحت الماسنجر متع نرمين .. وبدت تركب فى الرسايل فوق تقرا في الاسماء اللى كلمتهم كلهم ..
اخر رسالة لقتها .. مبعوته من نرمين لى شخص اسمه الخيل الاصيل ..
كاتبتله “رد على تليفونك يابلوة اهوا حولت الحضر من بروفايل الحقيرة نرمين “…
الرسالة مبعوته امبارح فالليل .. ونرمين متوفيه ليها خمسه ايام .. يعنى اكيد مش نرمين اللى باعتتها .. حست انها ممكن تكون شدت بدايه الخيط …
الشخص اللى اسمه الخيل الاصيل راد عليها ” دخول حجرة الميته يعتبر تعدى على حرمتها .. وبروفايلها يعتبر حجرة من حجرها ”
-ماسنجر نرمين ” ووك عليا رعشتنى .. بالسلامه منصكره دارى ظلام ”
-الخيل الاصيل ” غير تعالى ”
ولكن المحادثه لهنايا ووقفت … هند عرفت ان تليفون بنت اختها عند بنت مش راجل .. طول خطر عليها حمزة لازم تبلغه .. لكن قبلها لازم تمسح كل رسايل نرمين مع الاولاد ولازم تصكر عليهم البروفايل

خشت عالاعدادات … وبعدها عالامان ..بتخش عالجلسات متع البروفايل بتصكرهم
-شهد بنت صالحة / خالتى .. تبيك حناى
-هند صكرت التليفون / اهو منشيلها هى
حطت تليفونها فى جيبها ووقفت مشت لى امها …
-هند /نعم ياام
-فاطمه / ترا دوريلى الحجر اللى نتوضا بيه معش لقيته .. المغرب قريب ايأدن
-هند / بتروحى الليله ولا بتقعدى
-فاطمه / وين منروح بالله وانتى تشوفى فالدنيا زحمه
شرين تليفون هند .. شافت المتصل لقاته حمزة .. صكرت صوت المكالمه وحطت التليفون فى جيبها ..
-هند / انا مشددين عليا فالمدرسه منروح بعتالى وغدوة نرجع
-فاطمه / الحوش من فيه
شرين تليفون هند مرة ثانيه .. شافت لقاته حمزة كلمها ثانى
نفس الشى ماردتش .. ومشت ادور فى الفراشات على الحجر متع امها

__________________________________________

–
فى قراج عبدالسلام جار حوش محمد

مستفين كراسى جنب بعض … مقعمزين عليهم الرجالة
حمزة مقعمز عالكرسى ويشبح لى تليفونه ويخمم / خيرها ماتردش ..زعما زعلت من الموقف اللى صار الصبح مع مديرها … زعما تحبه .. لا لا سمعتها تقوله خلينى فى حالى

مدوله سفرة الشاهى / تفضل
-خدى طاسه شاهى ويخمم.. حتى انت حركتك متع الصبح بايخة ..معقولة اطلع مسدس واترعشها … وانت كيف تعرفت عليها الاسبوع هدا…

خوه وليد واقف فم الباب / حمزة … حمزة
-حمزة تلفتله/ نعم
-وليد / فندى سعيد القائد متعك يبان نازلة من سيارته شكله جاى يعزى
وقف حمزة / ااه
ومشى بخطوات سريعه لى للباب وطلع منه مشى للسيارة لقاها بالفعل لى فندى سعيد … سلم عليه .. وعزى سعيد حمزة .. ودخله الكراسى جنب بوه
-عمك محمد / زارتنا البركة فندى سعيد
-سعيد/ اللع يباركلك فى عمرك واهلك ومالك
-حمزة / امتى روحتو
-حافظ / كنت خارج طرابلس يا فندى
-سعيد / مزبوط كنا خارج طرابلس .. وصلنا امس فالليل الساعه 2
-حمزة / الله يبارك فى اعماركم يا فندى
-سعيد / الشباب قالولى اليوم الصبح
-حمزة / صاحب واجب يافندى
وشرين تليفونه .. شاف الرقم لقاها هند هيا المتصله …صكر عليها … هيا ماشفتش المشغول ..تحساب المكالمه انفصلت
عاودتله ثانى .. وصكر عليها ..فهمت انه مشغول

_________________________________________

_

فالليل

هند مقعمزة فى سريرها وتبكى … بروفايل بنت اختها حيّر عليها …ياودى البنت توجع ..
ماسكة الماسنجر تبع نرمين وتخش على كل رسايل الشباب .. بعد ماتقراهم وتتاكد ان مافيش شبه تحدف الرسالة وادير حضر للشاب اللى كانت تدوى معاه بنت اختها
شرين تليفونها .. حمزة هوا المتصل … ردت طول

-هند / الوو
-حمزة / مساء الخير
-هند / مساء النور
-حمزة / انشاءالله مفيش ازعاج من مكالمتى توة
-هند / لا عادة .. قاعدة الساعه 10
-حمزة / بكرى ماقدرتش انرد عليك خاطر كان معاى رئيسى فالعمل
-هند / انا عاوتلك لانى ماقدرتس انرد عليك لما اتصلت انت كنت مع امى
-حمزة / ربي يحفضها ويطول فى عمرها
-هند / تسلم
-حمزة / هاا شن جديدك .. فتحتيه البروفايل ولا مزال
-هند اتفاجئت / بروفايل شنو
-حمزة / انتى راك اتكلمى فى ضابط مايفوت عليه شى
-هند / ايه فتحت
-حمزة/ باهى حلو لقيتى حاجه
-هند / لقيت رسالة وحدة انا شاكة فيها .. انبعتت من بروفايل نرمين يعد ماتوفت بايام
-حمزة / باهى كويس .. غدوة نجيك للمدرسة انشوفها
-هند / لااا المدرسة فكنى منها .. تو ندبرو مكان نتلاقو فيه نوريك البروفايل .. لكن توة خلى نصكر عليهم قبل
-حمزة / كيف بتصكرى عليهم
-هند / فى حاجه اسمها اغلاق كل الجلسات … بنصكر اى مكان مفتوح منه البروفايل ماعدا تليفونى
-حمزة / لاااا ردى بالك …خليهولهم مفتوح .. احنا نبو نوصلولهم
-هند/ باهى لو حاولو ايشوهولها سمعتها
-حمزة / كانهم بي شوهولها سمعتها راهو شوهوها من اول ماحصلو عالبروفايل
-هند / يعنى نخليهم
-حمزة / طبعا
تليفون هند 6
-حمزة حمق/ منو يكلم فيك تعقاب الليل
-شافت هند الرقم لقاته مودة بنت اختها / هادى بنت اختى
مدامها كلمتنى فالليل معناها اكيدة تبى حاجة مهمه
-حمزة / باهى نخليكم براحتكم .. اهو نراجى فيك
فتحت هند الخط على مودة / الو
-مؤدة/ اهلين هند
-هند / اهلا مودة
-مودة / منحكيلك حاجه مهمة سمعتها اليوم .. لازم انشوفك
-هند تحسابها سمعت بيها فاتحة بروفايل نرمين/ شن فى احكى حتى فالتليفون
-مودة / تمام نجيب السماعه ونجى نحكيلك

________________________________________

تمت …. ويتبع

زعما مودة شن بتحكى لى خالتها … وهل كويس انهم خلو البروفايل مفتوح عند الكل ولا النفروض سكروه .. الحلقه الجاية نشوفو