رواية ابتزاز بقلمى زهور جمال الدين

#ابتزاز

بقلم زهور جمال الدين?
?الحلقه الثانيه ?

_

امال جارت صالحة وصلها خبر وفاة نيرمين .. خاطر ولد خوها يخدم ممرض فى مستشفى الحوادث…وزبط حمزة لما خبروه … طول اتصل بي عمته وخبرها بى موت بنت جارتها
.. من لنا سمعت وهيا صاير فيها .. بكت ولناتها صغيرات ايسكتو فيها مافاهمين شى .. معش طاقها صبر.. مشت طقت على جارتها عزوز كبيرة يقولولها زهرة .. خبرتها بالخبارة السودة .. طلعو مشو لى حوش الحاجه زينب.. لمدو بعضهم ومشو لى حوش صالحة يشوفو فيها سمعت ولا لا

خشت امال وعمتك زهرة جارتهم وعمتك زينب .. لما خشو لقو صالحة اتسيق فى الممر لابيها ولا عليها .. سلمو عليها وقعمزو فى الصالة
-صالحة / اهلين وسهلين بيكم .. وووين وين قداش لينا معش تلاقينا …
النساوين ساكتات ..
-صالحة لاحظت ان فى حاجه / خيركم يا جماعه الخير وجوهكم سودة
-امال كامدة دمعتها / وين عمى محمد
-صالحة قعمزت ورجليها يرعشو/ خيره محمد اللطف .. الساعة عشرة طلع
-عمتك زهرة خدتها الثورة / ياناس علاش ادرقو عليها .. علاش تكدبو
-صالحة تعيط / خيركم من مات
-امال بدت تبكى / مش هكى يا عمتى زهرة
-زهرة / صكرو افامكم الكل .. انا نقوللها
-صالحة بدت تعيط / ياوخياتى قولولى سن نورونى
-زهرة / نرمين بنتك ضربتها سيارة وتوفت
-صالحة / ووووه عليا وووه بنتى

_________________________________________

_

فى المستشفى ..

زوز رجالة شادين حمزة من ايديه .. وهوا يفك فى روحه يبي يضرب الممرض ..
-الممرض خايف لابد وراهم/ ياخوى انا قلتلك اوامر المستشفى ماجبتش شى من عندى
-حمزة يعيط ويدف فيهم / تى حولو .. انا تقولى ماتخشش تشوف اختك يا خامر
-الممرض ايلقى فى ايديه/ ياناس فهموه ان انا مالياش علاقه
-حمزة / ورحمة امى فقبرها كان نشدك بين ايديا لما ناكلك يامسخ
-جت الدكتورة كبيرة شوى فااعمر / شن فى .. ليش العراك هدا كله
-واحد واقف/ الاخ يبي يشوف اخته والممرض منعه
-الدكتورة متلفته للممرض/ مش من حقك تمنعه ..
وتلفتت لى حمزة / تفضل خوى شوف اختك …
فك حمزة يديه منهم ومشى جهه الدكتورة .. فات من جنب الممرض شبحله شبحة قوية خلاه يرعش ومشى
-حمزة يبيش جماعه الجامعه يتكلمو على عرض اخته/ شن طلع فى تقرير الوفاة يادكتورة
-الدكتورة / ضربة قوية عالراس.. نتيجة صدمه السيارة
-الجميع / الله يرحمها
-حمزة صوته مغصوص / وين الغرفه يا دكتورة بيش نشوفها
-الدكتورة / تعالة وراى …
وخش حمزة لى غرفة اللى فيها اخته .. لقى عيونها مغمضات
وجهها مافبه شى كأنها راقده .. حول الغطا من جهه راسها شوى لقى ضربه قوية على راسها من جهه اليمين ..
وفى خاطره الف سؤال..وين كانت مالقيتهاش فى محاضرتها
..شن علاقتها بالبنت اللى كلمتنى..منو الناس اللى رفعوها ولا مشت معاهم بارادتها …
-الممرض وراه كتبه على كتفه/ وحد الله يا خوى
-نزلت دمعه من حمزة / لا اله الا الله
وطلعوه وصكرو الباب وراه

________________________________________

_

فى حوش صالحة الدنيا انقلبت والجيران خشت والتليفونات بدت تخبط .. حوش سلف صالحة جو يجرو لما سمعو الخبر وحمواتها الزوز وخواتها بدو يخشو بالوحدة وامها وخوتها وصغارهم … ياودى البكى حار والاصوت فوق فوق .. حتى العاقلة فيهم قريب تهبل … البنية معاهم امس مافيها شى واليوم يقولو ماتت كيف ..
بنات خالاتها وخوالها قريب يهبلو … كيف ماتت ومنهوا اللى ضربها وهرب
والنساوين اللى توشوش واللى تحكى كيف سمعت واللى مسخفتها واللى تقول يانارى راس زوز بنات اشتاقت وحدة

الشباب برة ينصبو فى الخيمه .. خوها اشرف على تركينه يبكى .. وحافظ خاش للشارع يدرس فى سيارته سمع العياط نزل يجرى وكل مرة يخش حد من خوتها .. وبوها جى من اول مرة

صالحة مقعمزة تبكى وتعدد .. وامها واختها هند مقعزين جنبها يصبرو فيها
-هند تبكى / هدا كفر يا صالحة .. وحدى الله وقولى الله يرحمها
-صالحة / ياحليلى بنيتى .. ياحليلى صغيرة .. ياحليلى مافرحتش بالدنيا
-شهد بنتها تبكى فى حجرها / اختى نرمين ماتت يااام
وخواتها كل وحدة فى تركينه مش حاسة بالناس تبكى وخلاص مش مصدقين ان بنت اختهم ماتت

-ولد صغير فالباب / عمتى صالحة يبيك ولدك حمزة
هند قامت راسها وانتبهت … وانتبهت اكثر ان تليفونها قعد فالشحن فالحوش لانها جت من المستشفى طول ..
-صالحة / وباش بنوضله والله مافيا رجلين
شهد بنتها وقفت ومشت تجرى لى خوها فم الباب .. لكن هما كانو فى الدار ماشافتش شكله ..هيا شايفاته فالصور فى تليفون نرمين لكن ماتزبطاش عالواقع ..
وراها بنت مقعمزة تهمز فى بنت ثانيه / صفاء .. ياسرك بكى .. نوضى حمزة قدام الباب ..
-صفاء/ ااه .. حمزة … حولى خلى نمشيله
ناضت وقفت رفستهم كلهم ومشتله تجرى ..
تلفتت هند وراها لقت حماة اختها صالحة .. عرفتها بنت عمتهم .. خواتها يعرفوهم لكن هيا لا

ونوضو صالحة بالسيف رفعوها لى حمزة .. عزاها وقاللها ان الجنازة غدوة .. لو تحب يرفعها تشوف بنتها…طبعا هيا ماصدقت خشت هيا وشهد بيش تلبس عبايتها وتمشى معاه
خشت ترفع فى روحها بالسيف شادينها جاراتها ..
دخلتها اختها هند لبستها عبايتها وهيا تبكى حالة لكن صابرة اكثر من خواتها ..
طلعتها برة بيش تمشى هيا وشهد ..
عمتك فاطمه اضبح / يا هند بري مع اختك ماتخليهاش بروحها
هندانحرجت قدام الناس ماتبيش ترد امها / حاضر ياام
صفاء / اهو تو نمشى معاها انا مرت خالى
قرصتها امها …

طلعو وهند تخمم كيف بدير ماتقدرش تركب مع الولد برانى
نادت اشرف جى عزى امه هوا وباقى خوته حتى اللى من بوه …
وقالتله هند انها تبى تمشى معاه .. ركبو صالحة وبنتها وحماتها الكبيرة مع حمزة .. وهند مع اشرف ومشو للمستشفى
________________________________________

_

فالطريق ….

شرين تليفون حمزة … لقاه الفندى فوزى … رد عليه
-حمزة / الو
-فوزى مش سامع بالوفاة / اهلين سيد حمزة
-حمزة / مشغول .. اعطينى اللى عندك فيسع مشغول
-فوزى / اسم صاحبة الشفرة هند صالح ..اللقب عبدالسميع ..
وعندى حتى صورتها
-حمزة / ابعتها عالفايبر
-فوزى / تم
-حمزة / مع السلامه …

وصلو للمستشفى .. نزلت صالحة وشهد يبكو .. ووراهم هند وفوزية حماة صالحة يبكو .. خشو جهه ثلاجة الموتى .. كلهم بدو رجليهم يصفقو ..
-العامل / لحظه بس خليكم هنايا .. يحطو فى مرحوم وتو يفتحو
-حمزة / بادن الله …
اشرف مقعمز جنب امه ويبكى على قوة شخصيته لكنه انهار
الموت حارة وربي مايضوقها لى حد …

حمزة واقف يخمم مش منتبه لى حد .. منو هند هادى .. وشنو علاقتها بي نرمين …
وقفت ممرضه من بعيد / هند .. ياهند
-هند تلفتت/ ليلى
قربت منها ليلى وحضتها وهند تبكى / خيرك واقفه هنايا انشاءالله خير
حمزة يتفرج عالموقف ويرن فى ودنه اسم هند .. هند صالح .. ومرت بوه صالحة صالح عبدالسميع …
وفى خاطره / كيف ماربطش الاسم ببعضه .. نفس الاسم واللقب مطابقات
ويشبحلها / ااه هيا .. هياا اللى اتصلت بيا يومها … لكن معقولة خالتها عندها يد فى قتلها ..
ويخمم / قتلها !!!… انت شاك انها انقتلت ولا كيف ..

جت ليلى تعزى فى صالحة اللى حالتها حالة حتى شاربتها مش مساويه ..

انفتح الباب/ تفضلو خشو .. لكن لو سمحتو منغير عياط ودوشه …
-مشت صالحة بسرعه ووراها اشرف / باااهى
-الشاب متع الباب/ لا لا صعب تخشو كلكم
-فوزيه حماتها / هادىامها وهادى اختها وانا عمتها وهادى خالتها وهادو خوتها .. كيف مانخشوش
-الشاب/ صعب كلكم … قسمو بعضكم
-صالحة/ سلم وليدى حول خلينى نشوفها
-اشرف/ خلى النساوين يخشو واحنا بعتالى ساهل
-الشاب/ لااا لازم معاهم راجل.. خشو انتو الثلاثه على شهد وصالحة وفوزية .. وانت على اشرف .. والباقى يقعدو برة
-هند/ باهى غير خشو انتو توة..
خشو مع بعضهم وصكرو الباب … وقعدو حمزة وهند بروحهم برة مايسمعوش فى الغرفه لداخل لان الصوت مكتوم
قرب منها حمزة … وهيا تشبحله لين رعشت

__________________________________________

_

حمزة قرب من هند وهيا ترعش

-حمزة/ وين تليفونك
-هند ترعش حساته زبطها / خيره تليفونى مفهمتش
-حمزة / تليفونك خيرك صكرتيه لما كلمتينى .. ولا شحنه تم
-هنددايرة الحولة / انت على شنو تتكلم .. ومكالمة شنو
-حمزة / مش انتى بكرى كلمتينى يا هند صالح عبدالسميع
-هند وخرت خطوة / انا لتوة مش فاهمه على شنو تتكلم
-حمزة / جو الاستعباط فوتيه …منو الجهه اللى تهدد فى اختى نرمين .. والصبح حكيتيلى عليها
-هند / اناااااا….
-حمزة / اصبري ماكملتش كلامى
-هند تشبحله وخافت
-حمزة / انتى مشتركة معاهم … ولا غير زبطيهم ..ولا درتيلى تمويه الصبح
-هند / ضم فمك واحترم نفسك … كيف تتهمنى نشترك مع مجموعه ونقتل بنت اختى
-حمزة / اولا تكلمى باهى .. ثانيا مش اول مرة نحققو فى جريمه قتل ويطلع حد من العيلة مشترك فيها ..وبعدين كيف عرفتى انهم مجموعه .. بالك هما شخص واحد
-هند / تو انت درتها جريمه .. مش قلتو ضربتها سيارة
-حمزة / ومن قالك ضربتها سيارة .. فيسع ماوصلك تقرير الوفاة
-هند / هما قالو فى العزى مش انا قلت
-حمزة / باهى شن رايك عشان طولة لسانك هادى حنطلب تشريح الجثه قبل الدفن
-هند / الاخت اختك .. ودير اللى يعجبك .. وانا ماليا علاقه بشى … هادى بنت اختى … تفهم شن معناها …
-حمزة بنضرة هزوة / شن معناها
-هند / معناها بنتى اللى مش ممكن انأديها …
تلفت حمزة وولع دخان/ غدوة يطلع تقرير التشريح وبعدها لكل حادث حديث

طلع اشرف / خالتى تعالى كان تبى تخشى
هزت بى راسها / لا
-اشرف/ تمام على راحتك …

وركبو كلهم السيارات وروحو للوفاة

__________________________________________

_

فى الليل فى الوفاة …

البنات سحر وانتصار وسلمى ومودة فاقو شوى من عياطهم وهدو .. مقعمزين مع بعضهم ويبكو ..

-سلمى / زعما حق ماتت بى حادث.. ولا هادوكا الجماعه اللى يهددو فيها دارو حاجه
-مودة / اسسسس نقصى صوتك .. الناس تسمع .. منو الناس هادو اللى تحكى عليهم ..موضوع ومات فمكانه
-سحر/ لكن هند تعرف بالموضوع وصدقونى مش ح تسكت
-اتتصار/ مش ح تسكت لو قالولها نرمين انقتلت .. لكن البنت ماتت بي حادث .. خلاص ربي يرحمها
-مودة/ وبروفايلها كيف يصير فيه..منو منكم عندها الباسورد
-سلمى/ كلنا عندنا باسوردات بعضنا .. السناب والفيسبوك
-سحر/ كلمه الفيس معش حد ينطقها قدامى .. انا تشآئمت منها …
تليفون مودة بدى يشرين ماسنجر .. اتفاجئت بيه قدام الناس انها نست تصكر نت الشفرة
-انتصار/ شكون
-مودة دارت تليفونها صامت/ الفاسد سيف
-سحر/ خير بلاه يتصل
-قامت مودة تليفونها / غير اسكتو
فتحاته وقرت الرسايل …
-سيف/ حاق نرمين ماتت… ردى عليا … ردى .. الو
-كتبتله رسالة / ” من نرمين ؟!”
-سيف/ منغير تسهويك .. نحكى على نرمين بنت خالتك .. انا عارفكم بنات الخالة
-مودة عيونها دموع / ” وانت من قالك ان نرمين توفت ”
-سيف/ ” كل صاحباتها منزليلها مناشير فى صفحتها ”
صكرت مودة تليفونها مستغربه وشبحتلهم
-انتصار / خيرك
-مودة /فى حد فاتح بروفايل نرمين ولاعب فيه .. للن المناشير متع الاصدقاء عندها ماينزلوش الا بى موافقتها هيا
وتوة سيف قالى ان صاحباتها منزليلها مناشير تعزية
-قامت سلمى تليفونها / ترا نشوف
فتحت نت الشفرة وخشت على بروفايل نرمين لقت بالفعل كل المناشير مقبولة ونازلة فى صفحتها
-سلمى ?/ نهار احرش … صح كل المناشير مقبولة
-مودة/ معناها يا حد لعب فى الاعدادات .. يا اما حد فاتحه توة وقاعد يقرا فى المناشير ويقبل

_________________________________________

_

فى الصالة …

هند مقعمزة جنب اختها ناديه وسرحانه / معقولة يتهمنى بي قتل بنت اختى !!… هيا ماتت بي حادث سيارة يعنى قضاء وقدر ..
وتخمم/ والله مايتحشم ولا عنده اخلاق.. قليل الادب يحساب روحه حاجه كبيرة ..
-نادية نخصتها / تنادى فيك امى
-فاقت من سرحانها / ااه
وقفت ومشت لى امها / نعم يااام
-فاطمه / يبرة السكر ماجبتهاش .. ووقتها فات
-هند/ اوووو.. نسيتها شوفى العملة
-فاطمه / معدورة يابنيتى …بري جيبيهالى من الحوش
-هند / توة الساعه 9 ونص..ليل ومتأخر .. تو نقول لى واحد من ولاد مختار يمشو يجيبوها
-فاطمه / لاااا .. بوقى مانحبش من يمسه …دهب خواتك عندى فى دارى ..والختم متاعى حتى هوا .. وماعندى ثقه فى حد ..
-هند / باهى هاتى المفتاح ..
وعطتها المفتاح … وساوت وشاحها وخدت مفتاحها من شنطتها اللى فى الدولاب الدخلانى..وطلعت
تمشى بالتخفى ماتبى حد يشوفها..وصلت سيارتها.. فتحتها
..وركبت فيها .. وخرت ومشت طول ..
وهيا طالعه من شارع اختها فات جنبها حمزة بسيارته كيف خاش للوفاة … شافها ..زبطها .. دور ومشى وراها ..
وصلت هيا لى حوشهم ..نزلت من سيارتها وخشت للحوش

_________________________________________

_

فى شارع حوش هند

حمزة واقف يراجى فيها برة … انفتح باب الحوش طلعت هند منه … مشالها يجرى
-حمزة / لو سمحتى نبيك دقيقه
-هند رعشت/ حول واحترم نفسك
-حمزة وجهه احمر وواضح متعصب/ اكيدة مالحقتكش بيش نتغزل فى جمال حضرتك .. بالتاكيد لحقتك بيش نوريك حاجه مهمه
-هند ترعش/ ورينى هى
-حمزة / افتحى باب الجنان .. منحبش نجيب لبنات الناس الدوة
-تلفتت هند تفتح فالباب/ يعنى هكى مش حتجيبلى الدوة …
خشت هند وخش وراها حمزة ورد الباب ..

-هند/ تفضل
-حمزة / ممكن ماتعرفيش انى ضابط
-هند / لا سامعه انك تخدم ضابط
-حمزة/ بكرى بعد ماحطيت عمتى صالحة فالحوش مشيت لى مكتبى.. وقدمت بلاغ بالقضيه .. وطلبت تشريح جثة مستعجل
-هند باهتمام/ وشن طلعلك
-حمزة?/ الباين ان نرمين كانت بتتعرض لى سرقه اعضاء .. يابياخدو وحدة من كلاويها او كبد او الله اعلم
-هند انهارت / ااه … اااه شن تقول انت ..
-حمزة / اللى سمعتيه .. وماديريلناش عياط قدام الناس توة
-هند / يعنى بالفعل اللى كانو وراها عصابة ..
تلفتتله / لكن انت كيف عرفت انها كانت بتتعرض للشى هدا
-حمزة / درت تشريح للجثة .. وطلعت مستنشقه بنج مخدر قوى متع عمليات بس .. ويدها زرقه من جهه الوريد الباين انهم واخدين منها تحليل
-هند بدت تبكى / يا حليلى على بنت اختى وعالرعايش اللى تعرضتلهم …
-حمزة متعصب / توة العصابة هادو نبيهم ونبى اساميهم ولازم تساعدينى
-هند / بنساعدك امالا شنو..لكن السرقه هادى علاش هيا بالدات تعرضتلها … وكيف حصلو عليها ووصلولها
-حمزة / الباين ان العميلة كانت بتندارلها امس فى نفس اليوم .والباين لما ماصارش زبطو انها شبحتهم وعرفتهم فجابوها للطريق وضربوها بالسيارة بيش تبان حادث سير
-هند تبكى / انا خلاص راهو قلبي انعصر
-حمزة / توة لازم تساعدينى وتجيبيلى بداية الخيط
-هند / انا نساعدك باللى نقدر عليه … وبالمعلومات اللى نعرفها ومستحيلة نسكت

-حمزة / قبل كل شى .. جاوبينى على سؤالى ..انتى ليش كلمتينى
-هند / هيا حكتلى وقالتلى ان فى ناس يتابعو فيها ويهددو فيها بصورها … ف نصحتها انها تقول لى حد من خوتها ويفضل تقول للكبيرر
-حمزة / وهيا اللى قالتلك تخبرينى
-هند / انا اقترحت اسمك.. مالاول خافت .. وبعدين وافقت
-حمزة / معناها احنا الاثنين لازم نخدلوهاش .. ولازم نطلعو الاشخاص اللى دارولها هالعملة .. ورقمى عندك لو وصلاتك اى معلومه
-هند / وانا معاك …يدى بيدك ..وحنخلى بنات اختى يعطونا اى معلومه تهمنا هما يعرفوها
-حمزة / تمام .. اطلعى قدامى بيش نمشى وراك
-هند / قبل مانطلع .. منسئلك .. يعنى اتأجل الدفن غدوة
-حمزة / اكيدة لا .. لان تقرير الوفاة قاعد حادث .. انا تقرير الطبيب الشرعى اللى عطوهولى دسيته.. وقلته ليك انتى بس
-هند / باهى انك نبهتنى
-حمزة/ لااااا ردى بالك…
وتلفت للباب / هيا اطلعى
-هند / تمام

__________________________________________

–
رابع يوم الوفاة …

البنات وهند مقعمزين مع بعضهم يحكو

-هند / من غدوة كل وحدة تمشى لى جامعتها
-انتصار/ تصدقى ياهند .. البنات اللى جو عزونا ..قالونا ان الجامعه كلها حزينه .. وماعندهمش حديث الا وفاة نرمين
-هند / الله يرحمها ويحسن اليها
-سحر/مودة شن صار مع سيف …سألتيه
-هند تلفتت لى مودة / شن بتسأليه.. ومنو سيف
-مودة/ هدا واحد كان يكلم فيا انا ونرمين
-هند / اييييه
-مودة/ مش عارفه ليش حاسة انه عنده يد فاللي صار مع نرمين
-هند/ يا مودة .. راهو ان بعض الظن اثم
-مودة / لكن انا متاكدة
-سلمى / نرمين ماتت بي حادث ….كيف يعنى ممكن يكون هوا ضاربها وهارب
-انتصار/ شكلكم تتفرجو على افلام الاكشن هلبا انتو
-سحر/ اللى حايرة فيه انا منو فاتح بروفايل نرمين …زعما لما صار الحادث طاح منها وهوا مفتوح منغير باسورد
-مودة / هيا نرمين دايرة لكل برنامج قفل بروحه .. يعنى حتى لو انفتح التليفون من برة صعب يفتحو برنامج الفيس
-هند / فهونى بااشوى انتو شن تدوو
-انتصار/ منشورات الاصدقاء عند نرمين ماينزلوش فى صفحتها الا بى موافقتها هيا
-هند / باهى
-سحر / لكن توة كل المناشير تنزل…معناها فى حد يوافق عليهم
-هند / منو فيكم عندها باسورد بروفايلها
-سلمى / كلنا عندنا بروفايلات بعض
-هند / خلاص وحدة منكم تغير الرقم السري من الايميل او رقم التليفون
-سحر/ الايميل متعها اللى فاتحة بيه الفيس مانعرفوش رقمه السري لانه مفتوح فى تليفونها
-هند / باهى غيروه من التليفون
-انتصار/ تليفونها راح من يومها .. والشفرة مانقدروش نحرقوها ..لانها باسم خوها حمزة
-هند / ساهلة هادى تو نكلم خوها حمزة يحرق الشفرة ويجيبلى وحدة بدلها
-مودة / تقدرى!؟
-هند / اكيدة نقدر

ثانى يوم بعتت لى حمزة رسالة ” لو سمحت نبى نحرق شفرة نرمين ونطلع وحدة ثانية عليها وقالتلى صالحة انها باسمك
-بعتلها حمزة رسالة” انشاءالله خير ..ليش تبى اطلعيهاى”
-هند ” نطلعها ونخليها عندى بالك يتصل بيها حد ويساعدنا نفهمو شى
-حمزة ” تمام غدوة نجببهالك ”
-هند” غدوة منمشى للمدرسه جيبهالى غادى”
حمزة” ابعتيلى نعتت المدرسه”
وقعدت هند تكتب فى رسالة توصف فى المدرسة االى تقري فيها

” هيا طبعا ماتبيش تقوله عشان الفيس… تخافه يطلعها ويشبح فيس اخته ويلاقى رسايل منها مع ولاد ”

________________________________________

_

ثانى يوم

وصل حمزة للمدرسة … ووقف سأل الابلات على مكتب استادة هند وقالوله فالدور الثانى عاليمين … ركب للمكتب هند متع الاخصائية اللى فالمدرسة .. وقف يسمع فى نقاش حاد

-هند / لو سمحت استاد صلاح ممكن تطلع برة لانى زى ماحكيتلك انخطبت
-صلاح / ليش تنخطبى وانتى عارفه انى نتمنى التراب اللى تمشى عليه .. مستحيل حتلاقى انسان يحبك زينى ولا يقدرك زينى ولا يدللك زينى انا
-هند / اووووف مش معقولة هكى
-صلاح / باهى وينه خطيبك .. نبى نشوفه بيش نسيبك نصدقك فى حالك
-هند / اهو تو نكلمه يجى توة كانه فاضى

خش حمزة/ السلام عليكم
-هند مصدومه هيا وعمك صلاح / صباح النور
-حمزة / حتى لو مش فاضى نفضى نفسى ونجى
-صلاح / قصدك انت خطيبها
-حمزة/ ايه انا …ولا مش عاجبك
-صلاح / لا لا عاجبنى … وانشاءالله تتهنو

طلع صلاح من المكتب … اما هند
مش عارفه تضحك لا تزعل

________________________________________

تمت …ويتبع

نحبككككم