جمعنا القدر للكاتبة | خلود شلابي

الحلقة 8
امالي منال مروحين وهي روحت معاهم في الطريق تمنت انها قعدت مع نجوى …مسكينة نجوى تفكرت منال كل الحكي الي حكتهولها عن زوجها …بوها وقف سلم علي شباب في الشارع من ضمنهم ايمن الي حياها براسه ..وكرهت منال الجبل وقررت انها مسحيل مازال تمشي مرة اخري للجبل …سوزان شهادة ثانوية عامة لاول مرة تقرا بجد وخشت دورات وناوية علي معدل يدخلها هندسة اتصالات …اما منال بمجرد روحت من الجبل قدمت في شركة نفطية وبعد مدة جتها الموافقة …بت دوام من الساعة 8 الصبح الي 2 الظهر خدمتها مكتبية عجبتها الوظيفة وانسجمت في الخدمة وتعرفت علي زميلات ….وعلي ماكان ايمن مالك تفكيرها علي ما بدت تنساه …..في المكتب معاها زميلة اسمها رحاب بنوتة جدابة وحديثها ممتع ومعلوماتها دسمة ومخطوبة ومرحة وكل يوم تحكي علي خطيبها وعمايلها معاه ….تقربت من منال حتي صبحو صديقات …رحاب عندها سيارة مع الوقت بدت تروح بمنال معاها….وقت الي استلمت منال اول مرتب قررت تحتفل مع الزميلات في المكتب ومع عيلتها في الحوش …كلمت رحاب وجابوا الحاجات ودارو حفلة صغيرة …وفي طريق المرواح للحوش سيارة رحاب وقفت وماعرفتش خيرها
رحاب : نتصل علي (مصطفي ) يروحنا
منال : لالا خلي انكلم بابا
اتصلت بس بوها قال مش في المدينة طالع
رحاب : خلي نتصل علي خوي وامري لله والله مانبي انكلمه ….اتصلت علي خوها الي قاللها استنوني في السيارة …عشر دقايق وصوت كلاكس وراهم
رحاب : اهو جي هيا منال
ونلوا البنات صوت الشاب : الهاربة ؟
انصدمت منال وهي تشبح ووقفت ونزل محمود من السيارة مد يده يسلم علي منال ويحكي مع رحاب : هيا عرفيني علي صديقتك
تكلمت رحاب وهي مضايقة : منال هدا محمود خوي …محمود هادي منال …هيا سقدنا …..
محمود يضحك بصوت عالي : اهلا منال
منال : الديب ؟ الله علي الدنيا قداش صغيرة وسلمت عليه
رحاب مستغربة : حويته عليكم تعرفو بعض ؟
فتحت رحاب الباب الامامي للسيارة بس محمود اسرع صكره : ثؤثؤثؤ هدا كرسي منال …واشار لمنال الي ركبت بعد اصرار من محمود
رحاب مصدومة : نهارك احرف ماتحكيش من وين تعرفو بعض
محمود : هههههههه ماتحكيش خليها تموت بغيضها …..
منال وضعها بينهم غريب ..هادي اول مرة تشبح محمود في الضي ….لحية مهملة وشعر طويل وضحكة جدابة والخال الي عند الحاجب محليه ….لابس جيبوتي جيشي وعنده حركة جميلة يمسح في شعره بيده …هو طويييل وضخم وجنبه رحاب ومنال ضايعات …وركبت منال السيارة وتفكرت الي صار معاها وضحكت ورحاب مصرة تعرف وطول الطريق تبي تعرف
محمود : هيا وين حوشكم ؟
منال : ههههههههههههههههههههه من قبل هيا اماليك وين ؟
محمود : ههههههههههههه خبريني شن صار مع الحادث ولد عمك كان الي مداير الحادث ؟
منال : رحمة الله عليه مات
محمود : لاحول ولا قوة الا بالله عظم الله اجركم
وسال محمود عنه وحكت منال عليه وعلي زوجته ولحظات وصلت حوشهم
منال : مرة تانية الف شكر للديب
رحاب : غدوة بتحكي كيف تعرفتي علي الديب
محمود : تحكيلها نقتلك ..يلا سلام …..
سبحان مسخر الاسباب كيف طلع محمود في طريقها من تاني ….وفي الصبح في الشركة اول ماوصلت استلمتها رحاب : هيا احكي خبريني
منال : شن بنخبرك ؟
رحاب : من وين تعرفي الديب ؟
وحكت منال قصتها ورحاب ير مصدقة
رحاب : تضحكي عليا انت ؟
منال : والله هدا الي صار واسالي خوك …وقت الي روحني القينا زحمة في حوش عمي وهدا الحادث الي يسال عليه
وعجبها رحاب الحكي الي قالتهولها منال وفي وقت المرواح علي اساس روحوا علي رجليهم لانه سيارة رحاب في الورشة ….بس لاقاهم محمود في الطريق وركبوا ونفس الي صار الكرسي الامامي لمنال
محمود : تعرفي من ليلة الي ركبتي هني قررت انه ماحد يقعد في مكانك والي الان ماحد غيرك قعمز في الكرسي
كلام محمود اثر في منال …هو محمود حلو لدرجة ان منال استكتراته علي نفسها …معقولة منال الاكثر من عادية تلفت انتباه عملاق زي محمود ؟ …هي ماتعرفش عليه غير انه يكون محمود وخو رحاب صديقتها …وحتي رحاب ماتعرفش عليها شيئ غير انها مخطوبة …يعني عمرها ما مشتلهم في حوشهم …هي علي طبيعتها بنت عادية جدا صح لبسها راقي شويتين …وتحس وضعها متريح …واصلا منال عمرها ما فكرت في وضع رحاب …في الطريق
رحاب تحكي : منولا اليوم روحي عندنا
منال : لالالا مانقدرش
رحاب : غير صفي النية واخذه حاجات بنوريهالك
منال : مستحيل ..اصلا اني ماعادش نقدر نروح معاكم
محمود : علاش ؟
منال : وضعي هكي غلط وبابا مايعرفش وعبدو خوي مش بالساهل يفوتهالي مابني علي باطل فهو باطل
رحاب : اني بننزل معاك وناخذ كلمة من امك ومن بوك
منال : عادي جربي
وصلوا الحوش ونزلوا البنات ومحمود في السيارة وفعلا بوها كان مروح وحتي خوها رحاب شاورت امها وبوها وحتي خوها ووافقوا غيرت منال حوايجها وطلعوا..ومشت مع رحاب ….وصلوا لبوابة تفتح تلقائيا وجنااااان كله ورد وعشب ..وشجر ليمون وفيه ناحية نافورة …منال حست انها خاشة لدنيا غير الدنيا …حست ان الي خارج اسوار القصر مايعلموش الدنيا شن فيها …ونزلت رحاب ومنال ومحمود لف بالسيارة في اتجاه اخر ….هاذا مش حوش ولا صور عادي فيه درجيحة وفيه بيسين وفيه بنات ماعرفتهمش منال ولا كلمتهم رحاب …اما محمود خش من باب اخر الباين لانها وقت خشت القاته قدامهم ….باب الحوش اول مرة تشبح زيه …قدامه فيه تمثال نمر علي اليمين واخر عي الشمال ….الباب مفتوح وواضح كل شيئ من الداخل …المكان نظييييف جدا كانه جديد …خشت لصالون اسود وكرسي طويل …الاتجاه الاخر حجرة اكل طاولة بيض اء من العاج وبوفيه من العاج علي الطاولة باقة ورد احمر طبيعي …هاذي من مصطفي ..رحاب وهي فرحانة وتشم الباقة …..كل شيئ في الحوش يدل علي ترف في المعيشة ….هي نص ساعة وكل العيلة علي طاولة الاكل ومنال ورحاب في حجرة رحاب ….عبارة عن دار بحمام بورسلين اسود ودار فارهة سوداء …كل شيئ فيها اسود
منال : علاش هكي كله اسود ؟
رحاب : لانه الاسود يليق بي علي قولة مستغانمي …يلا يلا الغذي جاهز
ونزلوا ….علي طاولة الاكل محمود و3 بنات ووبوها وامها واتنين اولاد في عمر المراهقة توام ….
رحاب : بابا ماما وباقي العيلة نعرفكم بصديقتي الرائعة جدا منال
بوها يشبه محمود جدا بس مع شيب ووقار ولبس محترم جدا …امها ليدي صغيرة يعني …little lady انيقة ويبدو ان عشرتها سهلة …اما البنات الثلاتة فكانت وحدة اختها رؤى وصديقاتها …استاذنوا وطلعن ماتغذوش معاهم ..التوام خوتها سامر وساهر في التاني تانوي …..
بوها : شرفتينا يابنتي تفضلي ….شوية وبوها استاذن وطلع والتوام كذلك
منال : شن هالعيلة الغريبة كلهم ماتغذوش شن قصتهم ؟ اما منال ومحمود ورحاب وامهم يهدرزوا وفتحوا اكثر من موضوع
امهم : محمود شن صار في الجبل ؟
محمود : مفااااجئة وطلع مفتاح من جيبه
رحاب :شن : كملتوا ؟
ومن غدوة ماشيين غادي
رحاب : اخيييرا منال تمشي معانا ؟
منال : للجبل مستحيل قررت اني مانمشيش بكل ….
بعد الغذي رحاب عطت فرصة لمحمود ومنال باش يحكوا
رحاب : منال محمود مش من النوع الي يحكي مع بنات اول مرة نشبحه فرحان واكيده انت السبب …رحاب ومنال سمعوا محمود ينادي
رحاب : هيا شطورة خلينا ننزلوا في الجنان
وفي الجنان الي صاير زي جنة الفردوس مقعمزين يهدرزوا ورحاب مشت ادير في القهوة
محمود : منال احكيلي شن كنتي اديري ليلتها في الجبل
منال : بصراحة كنت متكنطية ومشيت ونسيت روحي لحد ما صار الي صار ..احكيلي انت شن ادير في حياتك ؟
محمود : غير اني الديب متاع الجبل اني قريت قانون
منال : يعني انت توا محامي ؟
محمود : ثؤثؤثؤ ابدا ا……اني عمري حاليا 36 سنة ورحاب 25 …ماينفعش نكون طالب في عمري هاذا ومانحبش القانون بس خشيت ترضية للوالد …
منال : شن كان في خاطرك تقرا ؟
محمود : مش عارف ماعنديش حاجة معينة بس نحب التصوير ….والموسيقي اوووو الرسم
منال : بس هني كله مش ناجح
محمود : مش النجاح الاهم الرضى …وقت تكوني راضية عن خدمتك وعن شخصيتك وردود افعالك تكسبي تقة الناس وهذا مفتاح النجاح ….وقت منال قربت من محمود لقت شخصية متفهمة وواعية ومنطق تحليلي بسيط وحلو …ومنهج متسامح …..حست انها ممكن تحب محمود ببساطة …في العشية جت رؤى وصديقاتها وامهم والتوام ورحاب ومنال ومحمود جاب العود وبدي يعزف …..الجو اكثر من خيالي …اغاني جميلة ونغمات حلوة
رحاب : محمود غني ثرات سوري او عراقي ….
وعزف محمود اغنية عبد الحليم حافظ ..اهواك ……لحد مافات المغرب وحست منال انها تاخرت …تمنت ان الليلة تطول ..بس لابقاء للاجمل …الجميل لا يبقي طويلا ……..وروحت منال ……يتبع
—
??