جمعنا القدر للكاتبة | خلود شلابي

حلقة#3
ماتت منال من الرعب وماعرفتش شن ادير والا وين تهرب وصاحب الضي بدي يتبع فيها نادت امل بصوت واطي وهي خاشة ناحية الجنان بس الشخص صاحب الضي وقف قدامها وجبدها من ذراعها وهي طلعت صوت بس هو مسك فمها وطلعها : ويييين ماشية هبلا انت خاشة لجنان مليان افاعي ؟….انصدمت منال من الشخص الي قدامها …معقولة هاذا مترصدني
منال : انت ؟
ايمن : شن اديري هني في الليل وبروحك ؟
منال خافت تخذل امل ماحبتش تعترف انها مع امل استردت شجاعتها وردت بهدوء زي عادتها : ايه بروحي
ايمن : ومش خايفة ؟
منال : لا عادي
ايمن : شن اديري بروحك هني ؟
منال تخترع في كذبة : فيه حاجة ضاعت مني هني وجاية ندور عليها …عادي هي مش مهمة …وبدت ماشية بتروح بس ايمن وقفها
ايمن : وين ماشية تعالي هني …لو مش مهمة ماجيتيش ادوري عليها في الليل
منال : مش ليل مغرب
ايمن هو ليل عشاء مش مغرب عموما انت من وين جاية للعرس ؟
منال : اكيد طبعا بما انك تعرف المنطقة فانك تعرف بناتهم واني مش منهم
منال بدت فظة في معاملتها مع ايمن ممكن طريقة تتفادى بيها غروره
ايمن : وشن قالولك عليا مصلح اجتماعي والا خدمتي ضمان ….
فرحت ان الدنيا ظلام وما يشبحش في تعابير وجهها
ايمن : اترثي فضولي من وين انت ؟
منال حبت انها تقعد الغامضة في حياته : ممكن ما نحكيش ؟بس انت شن ادير هني ؟ وعلاش جاي وراي ؟
ايمن : عليك غرور من الي قالك جاي وراك ؟ اصلا اوقات الليل وخصوصا في الخريف انحبها ….احمد بكري خبرني انهم شبحو حنش هني قلت نشوف بالك نلقاه
منال : وانت علاش ادور في الحنش هاذا ؟
ايمن : ايييه قصة لانه الناس تطلع بغنمها ومرات يلدغ اي شخص ….حكو شوية
ايمن : تعالي معاي
منال بهلع : وين ؟
ايمن بس تعالي مانحبش نوقف تعالي نتمشو
منال خاطرها بس تفكر في امل ؟ وين تحسابنا ههههههه بوادي الغزلان ؟
ايمن : هههههههههههههههههههههه لا هاذا حفرة صيد الليل
منال : هههههههههههه ……..ومن جمال ضحكة ايمن وجوه الحلو مشت معاه بدون تفكير وقالت امل توا يروح بيها صديقها المهم بدت تلف معاه المنطقة سهول والجو بدي يحلو منال في اللحظة هاذي مستعدة تنسي حتي اسمها ايمن عكس ما توقعت وعكس ما تخيلت حست قداش يحب المكان وقداش مرتبط روحيا بيه ويحكي عليه كانه يحكي عن حبيبته ….وطولوا في الحكي منال انتبهت للوقت وقالت لازم نروح …وامتي قربوا للحوش اختفت في الظلام وايمن من جمال حضورها نسي يسالها عن اسمها ….بس كان متاكد انه حيلاقيها وقت اخر ……منال من جمال الحدث نست حتي امل الي لاقتها متكنطية وعيونها شرارة
امل : وين كنتي قريب متت من الرعب عليك
منال : اصلا شبحت حد جاي شوية روحت
امل : وين روحتي واني ليا ساعة مروحة وانت مش قاعدة
منال : ماهو غلطت في الطريق عادي عادي المهم درتي الي في بالك احكيلي شن صار معاك
امل حكتلها عن الي صار وقالت غدوة الفجر بتلاقيه في نفس المكان …وفكرت منال في نفس الطريقة وممكن تلاقي ايمن غادي مش حكي علي تعبان ممكن غدوة يدوره ويلاقيها وبدت منال تنسج فالاحلام .
كل الوقت ومنال مشغولة بالموعد وكانت مجهزة نفسها وحتي شن بتلبس بس وقت الجد منال خافت وترددت وحاولت تغير راي امل
منال :امل فوتي القصة
امل : لا منال انت وعدتيني
منال : يا مجنونة لو حد يكشفك شن يصير معاك ؟
امل : واشكون الي بيكشفني ؟
منال : مانعرفش اي شخص ممكن يتبعنا ويشبحك معاه
وامل تقنع في منال حتي وافقت منال ….منال ماتعرفش الا المساعدة حتي لو كانت مساعدة سلبية وطلعو في عتمات الليل …الوقت فجر والضو مازال ما طلعش …نسمات الخريف رائعة والجو منعش ومعطر بريحة السنابل الذهبية …اجواء رهيبة ..سحرية…مرعبة …مغامرة ….اجواء تماما زي الافلام الابيض واسود …منال حست نفسها بطلة لفيلم من افلام فاتن حمامة او زبيدة تروث …وعيشت نفسها في رواية بطلها احمد مظهر …او رشدي اباضة …منال من يومها متيمة بجيل الخمسينات وكانت تتمني تعيش ايامهم …جيل الشعراء والفنانين …واليوم وهي مابين السنابل تخيلت نفسها احدي بطلات الافلام ….وصلوا الجنان …ومنال عجبها جدا ..شجر لوز وزيتون وكرموس …وفيه كروووم عنب وفيه احجار علي هيئة كراسي منحوتة ومخدومة بشكل تحفة …الجنان كبير وهذا اصل تسميته بالجنان الكبير وفروع الشجر نازل الي الارض ومصكر الجنان لدرجة ان الي يخش داخل الجنان ماحد يشبحه ……بدي الضي يعم المكان الشيئ الي خلا منال تخش داخل الجنان ….شبحت اسامة ….شكله ووجهه طفولي استغربت منال من امل كيف تربط نفسها بشخص علي الاقل يلزمه 10 سنوات باش يصبح ناضج …..تلفتت في الجنان …وخذلها قلبها وبدت تفكر في ايمن …وطلعت من الجنان وجهت عيونها علي الجهات الاربعة ممكن يكون موجود …وسط تفكيرها سمعت خطوات علي القش وقفت نبضات قلبها من الفرحة اشكون غيره ممكن يجي هني وفي الوقت هاذا ؟بس ظنها خاب وقت القت ان احمد الصغير هو الي يمشي ….
منال : انت ؟
احمد: انت شن اديري هني ؟ماتقوليش حتي اليوم ضايعة ؟
منال : هههههههههههه لالا مش ضايعة انت شن ادير هني ووين اصحابك ؟
احمد : مداير افخاخ وهما يديرو في دوشة يفسدو عليا
منال : وممكن خوك يجي وراك ؟
احمد : ممكن بس هو ماشي يساعد عيلة عمامي في حصد الشعير
وعرفت منال ان ايمن مارح يجي حزنت بس تقبلت الفكرة : احسن هكي
ومشي احمد وخلاها وسط افكارها …خشت الجنان واتكت علي الشجرة ونعست …..لحظات وحست بحركة جنبها …..قفزت القت ايمن جنبها وقفت ونفضت روحها
ايمن باستغراب :انت شن قصتك يابنت ؟راقدة هني ؟
منال : لالالا ماتفهمش غلط
ايمن : شن الي مانفهماش ؟ البارح ادوري في حاجة رايحة منك واليوم من الفجر هني ؟ فهميني ؟
منال : وانت اصلا علاش شادها في جرتي ؟
ايمن : يا بنتي انت الي في ارضي هذا الجنان متاعي شن اديري فيه هني ؟
وهما يحكوا طلعت امل ماسكة يد اسامة وفصلتها بسرعة وقت شبحت ايمن
ايمن : اوكيي توا فهمت القصة ..

ايمن : اوكيي توا فهمت القصة …امل خلي العرس يمشي علي خير تربحي
امل : ايمن كيف حالك ؟
ايمن : روحي والله والله ….اعوذ باللله من الشيطان الرجيم يا بنتي تربحي امشي للحوش
اسامة بيحكي بس سكته ايمن ….وامل تناقش
امل : ايمن انت اكثر واحد …وسكتها ايمن
ايمن : اكثر زفت يعرفك ومع ذلك روحي وخلي عرس خالك يمشي علي خير كنا مستريحين من جيتك …..
امل ومنال اسقدو وروحوا وكل الطريق امل متكنطية وتعارك وتهدد ومنال مش فاهمة حاجة …امل خشت الحوش ومنال لاقت سوزان وطلعو جميع وفي الطريق سوزان حكت لمنال قصة امل الي كل العيلة تعرفها وان بوها حالف يمين انه امل ماتتزوج اسامة ….وتلاقو مع ايمن الي وقف يحكي مع سوزان كانه يعرفها من وقت …وعيونه علي منال الي لابسة قونة سماوي طويلة وبلوزة بيج واكمامها ملفوفة حتي المرفق ووشاح مخلي شعرها متناثر علي وجهها وزايدها جاذبية ….واستاذن ايمن وكمل طريقه وسوزان : وااااو شبحتي قداش رهيب بس عيبه انه يحب الجبل ومايبيش يطلع منه …وعيبه الاكبر انه خاطب ……….يتبع