جمعنا القدر للكاتبة | خلود شلابي

الحلقة 11
جابت منال القهوة ..وضعها في حوش ايمن غريب بس هي مرتاحة جدا وكانه فعلا حوشها …الدار دافية جدا وبما انه بوها مستريح فمعناها هي بتاخذ راحتها عالاخر ….الرجالة رفعوا القهوة في الاستراحة متاع الحوش الي مسقفة بالعصي جو صقع جدا بس جماله يستاهل وشرب القهوة في مكان خيالي حاجة متنتساش …منال وقت تكون في الجبل تعيش كل اللحظات …منال تراقب في مجرى المطر وكانه نهر صغير يفيض خير ….الاحجار مغسولة بماء المطر وتلمع تحت الضيئ الي طالع من روشن الدار …..ورغم الصقع بس اصروا علي التقعميز برا …ولع ايمن نار صغيرة …تمنت منال اللحظات تدوم الي الابد ….وتمنت انه مافيش حاجة اسمها اختيار وفي السيارة قررت انها لازم ترفض الاتنين محمود وايمن ……بدت منال الدوام ولاقت رحاب الي حكتلها عن رحلتها للجبل مع محمود وخطيبها والعيلة وانهم باتوا غادي ….وقت بتروح جاها خوها عبدو اما رحاب فروحت بسيارتها ……اسبوع وهي ماحكتش مع رحاب عن حاجة اسمها محمود …والغريبة انه رحاب ماجابتش سيرة …..حكت منال لرحاب عن الجبل وعن اعمامها وحتي علي امل …..حكت عن ايمن وعن نجوى وعن الجنان وعن الحوش وعن راائحة القهوة في الجبل ….
رحاب : منال محمود يبي يكلمك فون
منال : اوكي عادي اهلا بيه …..رحاب نسقت الطريقة وعطتها الرقم وخلت محمود يتصل …الباين حتى محمود مش قادر يتخذ قرار ….وحكت منال مع محمود شكلا غير محمود الاول …فيه حاجة مختلفة ….او ممكن هي الي متغيرة بدون ماتحس …المكالمة ما استغرقتش اكثر من 20 دقيقة ..لاول مرة منال توقف عاجزة عن فتح موضوع مع احدهم ….صكرت التليفون وجاها مسج غريب يقول (مستحيل ايمن يفرط في ماضي بالساهل ) وعرفت المسج من نادية الي وقت اتصلت منال ماردتش …وخذت رقم ايمن من بوها …اتصلت بس الشبكة رديئة جدا وماوصلتش لحل وقعدت علي اعصابها …
سوزان : تعرفي لو منك قهرة فيها نوافق ونمشيها خطوبة …بعد يومين من التفكير العميق والجاد ومناقشات مع عبدو قررت توافق علي ايمن وبدل ما يبلغه بوها قالت اني الي بنرد عليه …بس كيف والاتصالات غير ممكنة استنت ليوم الاحد لانه هذا اليوم من الصبح الي المغرب ايمن في المدينة …..واتصلت
ايمن باين مشغول لانه فتح وماردش
منال : ايمن
ايمن : الناس تسلم ياعبيطة اهلا بيك
منال : تجي اليوم عندنا ؟ عازماتك علي الغذي
ايمن : قولي متت من جوعي …صحيتي بس والله مشغول
منال : معقولة تكسر بخاطري ؟
ايمن : والله غير مرة
منال : باهي تعال العشية ياسيدي انضيفك قهوة
ايمن : مممممم اغراءات وربي يستر
العشية جهزت منال الجو وهيئت نفسها وخلت عبدو معاها دعم وجي ايمن
جابوا القهوة بحضور امها وسوزان وعبدوا في المربوعة وسط اماليها منال خبرت ايمن موافقتها
منال : ايمن اني موافقة علي الزواج
واندهش ايمن وكانه مش متوقع الخبر لانه في باله انتهي وقت الرد
ايمن سكت وانصدم وماردش بس لحظات رن تليفونه طلعه من الموقف البايخ …واستاذن ايمن وطلع هي ربع ساعة واتصل بمنال
ايمن : منال سامحيني فعلا انصدمت وماتوقعتش ردك
منال : عادي اهو توا عندك علم
ايمن : توا ما ينفعش …لانه صار فيه برنامج اخر
منال : ايمن معقولة تردهالي ؟ ترفضني ؟
ايمن : لالا والله مش هكي بس من يوم الي في الحوش وماحكيتيش قلت خلاص ردك واضح
منال : خطبت نادية ؟ لعلمك هي بعتتلي مسج
يسمع وساكت
الباين شكلها باعتاته تقهر فيا شكرا ليك وليها
ايمن : منال مازال ماصار شيئ …
بس منال حست بنار وانغاضت جدا من ايمن ومن الغبية نادية …..في الحالات الي هكي منال ماتخليش تارها بايت وقررت تبعث مسج لنادية
( لو كنتي ماضيه اني الحاضر والمستقبل ولو حبك ما سيبكش )
منال حست بروحها استعجلت في كتابة المسج وتمنت ان المسج مايمشيش بس سبحان الله الشيئ الي ماتبيشي يصير يصير،،، كل الوقت والتغطية في الجبل تعبانة بس توا المسج مشي طول،،،، وندمت وفي خاطرها إنها نزلت من قيمتها كمنال وهي الي كل عمرها معتدة بشخصيتها،،، بس حصل المقصود،،، وشافت إن أيمن من حقها،،، مش هو الي قال انه حدسه يقول انها ليه،،،، قررت منال إنها ماتتنازلش على حقها في أيمن،،،، تاني يوم رحاب مامشتش الشركة وشكلها مريضة وحست من الغلط إنها ماتمشيش وتسأل عليها،،،، والعشية وصلها عبدو عند رحاب حطها وطلع وفي الفيلا مافيه حد غير رحاب في السرير وشغالة،،، ركبت منال وبعد نص ساعة جت أمها،،، حكوا وفتحوا اكثر من موضوع وقصة واتصل خطيبها وهو مسافر،،، وروحت منال جاها بوها،،، تاني يوم وهى مروحة من الخدمة لاقت محمود هى شبحاته بس هو ماشبحهاش كان لاهي مع وحدة في السيارة وواخذه نفس الكرسي الأمامي،،،
منال :عليك منافق،،،، ومشت وماخلاتاش يشبحها،،، بس قالت الحمد لله الي بانت حقيقته،،،،، وقت الي وصلت القت أيمن عندهم بس حاولت تتعامل مع الوضع بطريقة عادية،،،، بس بوها كلمها وخشت سلمت عليهم
بوها :أيمن يبي يكلمك في موضوع
وقعدت واقفة وساكتة
أيمن :قعمزي
قعمزت بدون ماتفتح فمها بكلمة وطلع بوها وخلاهم
أيمن :توقعتك اكبر من هكي،،،
منال :وأني انصدمت فيك
أيمن :منال مش من حقك تلعبي بمصائر الناس
منال :اااه بس هي من حقها صح؟
أيمن :إنت في نظرك فيه وجه مقارنة بينكم؟
منال: انت غريب جاي من الجبل وحااالتك حااااااااالة وتكشخ وتعارك بس لأني رديت على مسج بعتاته قبلي
أيمن :جاااي من الجبل ياعبيطة على خاطر هاذا،،، وطلع خاتم خطوبة لبسهالها،،، موقف جميل وبحضور عيلتها،،، وشبحت للدبلة على إنها أجمل خاتم تلبسه،،،،، ومع كل الفرحة جهزوا الغذي،،، أيمن رسميا خطيبها ولو كان وقت الخطوبة غير مناسب،،، لأول مرة تحس بطعم الانتصار،، وبدت تفكر في ناديا،،، إذا ايمن ماشبحهاش،،، اشكون خبره على المسج،،،، وبعد روح أيمن بدت تفكر جدا في علاقته بناديا اكثر من قبل،…..يتبع