الحلقه 1 (المقدمه)

مآب:خشت للمطعم والدموع في عيونها وسارحه وقفت دقايق ودموعها ينزلو وعيونها يتفحصو في المكان لين قربت منه وقعمزت ?
مروان:ياعمري كله انتي خيرك
مآب:والحزن في عيونها …امي يامروان امي ?مش مصدقه اني خلاص بنفقدها حتا هيا معش رح يقعدلي حد ?
مروان:تي فهميني يابنت خيرك
مآب:تبي عمليه مستعجله ع الكلاوي بس منقدرش ع المبلغ شعور صااااااعب تشوف يلي تحبه يتعذب وانت مش قادر ادير ولا شي
مروان:شد يد مآب ..اهدي فلوس العمليه كم ؟
مآب:سبعه الاف ?المشكله ضرووري ندفعهم اليوم لان بكرا العمليه ياااااربي ساعدني
مروان:خليك مقعمزه تو نجيك
مآب:هزت بي راسها بمعنى موافقه ودموعها موقفوش
مروان:طلع يدير في مكالمات واستغرق قريب ساعه ونص ورجع لي مآب
مآب:بيبي لازم نروح ع الاقل نكون مع ماما في اخر لحضاتها
مروان:بعيد الشر هاتي شنطك
مآب:هاك حبيبي بس ليش
مروان:حط فيها الفلوس …بكرا امك ادير عمليتها وانشاء الله تنوض امورها تمام ياقلبي
مآب:حطت يدها ع فمها من الصدمه ?وتبكي ياعمررري انت ?ربي يخليك لياا
مروان:ولا يحرمني منك شنو تبي نوصلك
مآب:لا اختي بتخطم عليا
مروان:اوكي ياعمري انا عندي شغل ديري بالك ع روحك
مآب:انشاء الله حبيبي صحيت مقصرتش
مروان:اشش مفيش بينا ها الكلام اسكتي
مآب:?
مروان:سلام …وطلع
مآب:مسحت دموعها …ها بيبي
ماريا:قداش خذيتي
مآب:سبعه الاف خير من وجها
ماريا:اوكي اطلعي بسرعه
مآب:يلا جايا

ميسون:اخيراااا مآب نبي اللبسه يلي واعدتيني بيها
مآب:به وانتي ديمه مخفوقه تغذيتو
وعد:اكيد امالا بنستنوك
مآب:من وين الفلوس
ماريا:وعد نزلت لي راجل دارت دموع قتله نسيت فلوسي في الحوش ومعنديش باش نروح عطاها وخذي رقمها ع اساس بتكلمه تردله الفلوس
مآب:يعيش وياكل غيرها???

مآب:الواضح انكم مش فاهمين شي ?تعالو نعرفكم انا اسمي مآب (م أ ب )اسمي غريب شويه مواليد 98واختي ماريا95وميسون96وعد تكون بنت خالتي الله يرحمها يتيمه وبابا تكفل بيها قبل مايموت  طبعا عيلتنا صغيييره ماما ربي يخليها ❤️وماريا وميسون ووعد بس بابا توفى الله يرحمه وعمات معنديش عندي عم واحد عايش برا منعلمش بيه حي ولا ميت خوال عندي خال وخاله ومتوفيين نسكنو وسط طرابلس ومعروفين بي الاخلاق والعلم والكل يحبنا ويعطف علينا لان معندناش راجل في الحوش ويتامه وهما لو يعرفو الحقيقه ينجلطو وجهنا بريئ وال4جمااال بس ورا الجمال كاااارثه  طبعا انا مآب اول منبديت في النصب وبعدها كونت عصابتي خواتي وبنت خالتي وشوية عصابات ولاد من طرابلس نزبطهم

وعد:لون بشرتها حنطيه وشعرها قصير واسوود عيونها كبار بنيات جسمها متناسق اكثر وحده حنونه مرات خوافه بس ادير في شغلات تصدم فينا
ماريا وميسون:يشبهو بعض هلبا في ناس تسحابهم توأم مواصفاتهم طوال شويه بشرتهم بيضه شعرهم نصف ضهرهم لونه بني غامق ودبدوبات شويه اي شي عندهم عادي ميخافوش من ولا حاجه وديمه مع بعض جمالهم وملامحهم حاده
مآب:جسمها يهببل بيضه وعيونها كبار وشعرها طويل عندها عيون بررررريئه وجذابه وهيا اكتر وحده ادير في نصبات قويه لان عندها وجه طفولي ومستحيل حد يشك فيها جريئه هلبااا

     ✨روايات بنووتة الشيخ✨

طقققققطططقق طقققق

عبد الله:??انشاء الله خير جاي جاي …..هوا انت?
مجد:لابس توته ومشفشف…عمي وين إياد?
عبد الله:خش داخل تلقاه في الحمام
مجد:خش يجري

قربع قربع قربع
إياد:منووو
مجد:عزراائيل
إياد:خليني نغسل الشامبو ونلبس وتعالا خوذ روحي منبيش نطلع عريان قدام الناس ?
مجد:ياتاااافه يا حيوان يازباله ياكناسه ياحقير منو قطع دين ام الشحن اممممس???
إياد:بالله جايني من القطعه لا هنايا ع صباحات ربي ع خاطر شحن ؟
مجد:اي والله ماني طالع لين نعجنك طريحه
إياد:بلخميره ولا بدحي?
مجد:والله لما نوريك
إياد:صوره ولا فيديو?
مجد:إيااااااااد???

طق طق طق
عبد الله :واكيد قبل منفتح الباب الفرخ معتصم باش تكمل الشله
معتصم:صباح الخير عمي ?
عبد الله:هوا يلي يشوف وجهكم يشوف الخير خش تلقاهم فوق وصوتكم منبيش نسمعه
معتصم:عادي تسمع صوت خطواتي ?…ومشينا خطوه خطوه علي طريق حبنا
عبد الله:حدف معتصم بلمخده …تف ع ها الاشكال تافه طبعا رح يصاحب الاشكال التافها يلي زيه

معتصم:خيرك مقعمز قدام الحمام
إياد:يستنا في دوره
مجد:ضم فمك انت واطلع
معتصم:هي شنو صارلكم من المشي؟
مجد:لا والله تشوف فيا طارح تشوف في شعري مساوي ؟
معتصم:لا بس الحمد الله لابس ساتر جسمك وعندك شعر مش صلعه ديمه احمد ربك
إياد:شكلك كنت مقعمز مع بوك ?
معتصم:لا غير نقنع فيه ضرووري نمشو يا زوء
إياد:فتح الباب ويجي مجد يطيح فيه بي شبشب الحمام طاف طاف طاف طاف ومعتصم يساوي في روحه ع المرايه

اياد:ااااه خلاص كملت
مجد:ااااي كملت توا اقلب وجهك طلعلي لبسه من دولابك
اياد:باجماعه والله معاد فهمت الزح هادا حوشي ولا حوشكم ولا حوشهم ولا حوشه ولا حوشها
مجد:هياااا
اياد:تي به الزح

تعالو نعرفكم طبعا كلهم نفس المواليد 92وصحاب مش اقارب مع بعض من سنه 6ابتدائي لدرجة عادي جدا يخشو لحوش حد منهم من دون ميطق ع الباب

معتصم:متوسط الطول عيونه كبار شعره ولحيته ع البني عند2خوات متزوجات واخ اصغر منه وماشيه فيه كلمة يازوء يعني (ياذوق)ويقول فيها ديمه
مجد:ديمه متبهدل في حياته لاكن بايعها الدنيا واغلا حاجه عنده في حياته تالفونه وسمعاته وشحنه يخدم في شركة متع اغذيه مواصفاته شعره ولحيته ع الاسود وعيونه ع الاسود حتا هما طويل ❤️حواجبه احلا من حواجبي وضحكته تجنن عنده زوز خوت واخت وحده متزوجه
إياد:طبعا هادا القنبله مواصفاته طوويل ولحيته وشعره كثييفه وع الاسود وشخصيته زي يلي في الهيبه ملامحه جديات لاكن دمه يهبببل خفيف عيونه كبااار ياويلي لونهم اخضر وبشرته حنطيه امه مدرسة رياضيات وعنده اخت وحده قاعده مش متزوجه
وطبعا ال3رغم تفاهتهم عندهم في الجو يلي مش مزبوط يعني خطف متاجره في الممنوع وحجات زي هكي …يتبع