رواية نِــسمة

 

متابعة ممتعة ?

الحلقة الآولى ❤?

نسمة .. شن صار !
سيرين.. كلمته وحكيتله ?، قتله في ناس بيخطبوني خش ف عقله وقالي الاسبوع الجاي بنجي نخطب
نسمة.. مشت عليه ؟ ?مايمشوا الا بالعين الحمرا ?صنف منيل يختي ?
سيرين.. انتي وخططك واك ???
نسمة.. طيح سعدك انتي وياه 5 سنين علاقة ولاقدم لاوخر خلي مدامه يحبك يدير حاجة رسمية ?

امهم > .. يابناااات ، تعالو خالتكم نورية وبناتها جوو

نسمة.. واااكك معنديش ليهم خلوق بكككل????

سيرين.. اكيد يوسف جي معاهم ?
نسمة.. زعماا ???نوضي نوضي ?

وناضو سيرين ونسمه مع بعض ، هما الزوز كانو اكتر من خوات لبعض ? وكل وحدة فيهم مستعدة تدير اي حاجة ع خاطر سعادة اختها ?

سيرين اكبر من نسمه ب سنه وشوية عمرها 25 متزوجتش لحد توا متخرجة من البشري وزي ماتعرفوا ??

ونسمة اخر سنة ف فنون واعلام وتموت ف حاجة اسمها رسم ، ❤

المووهم ،

طلعوا …..

ومشت سيرين للمطبخ تحط الشاهي وطلعت نسمة تسلم ،،

نسمة.. اهليين خوييلة كيف الحال !
نورية .. بخير يابنتي بخير كيف حالك انتي وشن مدايرة ف قرايتك ؟
نسمة.. بخيير الحمدلله ،، وتلفتت للبنات اهلين فطوومة كيف الحال ،، ضعفتي يافرخة ??
فاطمة .. ايااا هههههههههه رفعتيلي معنوياتي الله يربحك ??? كان تشوفي يوسف خوي فلماشية والجاية يغنيلي جاء الفيل جاء الفيل ?????
نسمة .. ????? لالا معنداش حق دبدوبتنا عاد ، وينه هوا مجاش !
وخش يوسف.. معقولة منجيش ? متكملش من غيري اللمة ??
نسمة.. نعليا م الوواتق??? عاش من شافك ياراجل ،

وتجيه ام نسمة من تالي وتعكفه ع رقبته ??

ام نسمة “هالة” .. مش قتلكك يافرخ انت اخطم عليا الاسبوع الي فات باش نعطيك الصواني لامك فلعزومة !
يوسف.. ايااه ياخالتي والله العظيم نسيت ? وهيا ماخلت فيا عقل فهالعزومة بديت زي المرمطون ماشي جاي كداش مني حتى اني ??? رقبتي مشت ??
نسمة.. بشوية عالولد يام ??

وهني خشت سيرين بالسفرة ،، علاش ضرباته هوا ولا انتي ??
نسمة … بصوت واطي وتفنيصة ? اشي الكلبة ??
سيرين.. شجو سيفو ?? كنه لحيتك طالقها تهيج.. تقول داعش ?
يوسف.. شيانه شيانه ?
سيرين .. لا بالك حاجة تانية ??
يوسف.. حاجة تانية زي كيف ??
سيرين.. دونت نو ?شخص او شخصة قتلك خليها ???

هال يوسف ياحنه شبيب عمره 28 سنه ?
مش كبير هلبا ??

نقشه هادي و وجهه بشوش ويحب الضحك والبصارة ❤

يخدم هندسة نفط واغلب الوقت مش فلحوش ، شبه متربي ف حوش خالته مع نسمه وسيرين ؛ سيرين تعتبر فيه زي خوها بس نسمة العكس ? القلب ومايهوى ياكبدي ?
بس مقتلاش ولا في اي حاجة بيناتهم ولا تعرف بشن يحس ناحيتها ،، يعني شبه من طرف واحد بس ….

عنده زوز خوات بنات فاطمه 19 سنه ونوران 22 سنه

المهم >>

سلمت ع نوران و قعمزو يهدرزو كلهم ومشي يوسف قعمز يهدرز مع راجل خالته ” بو نسمة وسيرين ? ”

سيرين.. خيرك قالبة وجهك ؟
نسمة .. شي ؛ بنوض نرسم شوية فلجنان
سيرين.. اوكي

وناضت نسمه دارت نسكافي ☕ وحطت ع طاولة الجنان بجنب النافورة والريح تخبط فيها وتطير ف شعرها ❤ وقعدت ترسم ،،
كانت الساعة جو 7 ونص العشية ،،

ومابين ماهي ترسم سمعت صوت حد وراها ،، تلفتت لقاته يوسف..

نسمة .. يوسف ؟ خلعتني ههههه
يوسف .. انتي مخلوعة من ربي ? وتل كرسي بجبنها وقعمز ، ف شن ترسمي ؟
نسمة.. اهو .. شخبط شخابيط
يوسف.. لخبط لخابيط ?
نسمة.. مسك الالوان ورسم علحيط ?
يوسف.. هههههههههه لا خليها الي بيسمع كلمه اهلو ??? خيرك طلعتي مقعمزتيش معانا
نسمة.. نغميت الحوش ضغط ، نحب نقعمز فلهواء
يوسف.. هههههه اي الجو حلو ،
نسمة.. اي ??
يوسف .. نسمة ؟
نسمة وهي ترسم ،، اه
يوسف.. نبي نقولك ع حاجة ،،
نسمة قامت راسها وشبحتله وقلبها قعد دق دق دق دق دق ?،، شن في ؟ ان شاء الله خير ??

وكيف بيتكلم طبت عليهم سيرين ??

سيرين.. سيفوو اسسفة بس نبي نسمة ضروري ضروري ضروري ????
يوسف..هههههه ولا يهمك ؛ خلاص نحكو بعدين .. باهي ؟.. هي تشاو
نسمة.. ماشي .. سلامات
وناض هوا وقعمزت سيرين مكانه .. شن بيقولك ??
نسمة.. مه انتي زي البلي جيتي قصيني ??? اشبح شن كان بيقوولي ??
سيرين .. تييي توا يدويلك بعدين المهم ساامح
نسمة.. خير دعوته التاني مصارلاش ؟ ?
سيرين.. لا بس يبي يجي الخميس الجاي لانه ماشي لندن شهرين عنده شغل ومدابيه نلبسو محابس قبل لايمشي
نسمة.. عليييك عملة الخميس ! وحني اليوم الاحد نهار حرف وبابا مزال مكلمنااشي ??? !
سيرين.. تصرفيلي والنبي ?????
نسمة.. الهم شن بنديرلك امي كان سمعت جايين الخميس بديرلك زكرة ،، هلبا الخميس سيرين
سيرين.. ?? وبابا راسه كاسح .. تعالي نوضي معاي نكلموه ؟
نسمة.. صلي عالنبي كان قالك منين تعرفيه شن بتردي!?
سيرين.. واااك باهي شن ندير ??
نسمة .. استني نحكو ليوسف?؟ نقولوله هوا يكلم بابا .. يقوله صاحبه ولا الي هوا
سيرين.. زعما؟ ???
نسمة.. نوضي معاي ?

وناضو مع بعض وكان يوسف مقعمز فلجنان من الجيهة التانية ويتكلم في التليفون ،،

سيرين .. استني يكمل به ونمشوله :/
نسمة .. ياودي تحركي معاي?

ومشو جيهته وكيف بتكلمه نسمة >>

يوسف.. خلاص حبيبتي توا اول مانستف اموري نجي نكلم بوك ،، اي اي اسبوعين بس❤ .. ههههه ماشي ديري بالك ع روحك … حتى اني❤ سلام ❤

وتلفتت سيرين لنسمة من الصدمة معاش قدرت تحكي ولا حرف وعيونها تعبو دموع ومقدرتش تتكلم .. وحطت ايدها ع كتفها ومسحتلها دموعها ?

بعدين يوسف انتبه ان في حد وراه وتلفت ،، اه انتو ? شن ديرو هني! من امتى واقفين هني؟

سيرين ناضت تقلد ف شكله وهوا يتكلم ?.. من لما خلاس حبيبتي اول مانستف اوموري بنجي ونكلم البابا ????
يوسف.. ???? مفيش كيف نرقع يعني ??
سيرين.. من امتى ياروميو ????
يوسف.. جو سنتين هكي ?
سيرين.. اشششيه ?? لنقنه كنا راقدين ع ودانا ياسيموو ?? وتلفتت لنسمة لقتها ساكتة وتحاول تضحك معاهم ،،?
يوسف.. نسومة ؟ خيرك في حاجة ؟
نسمة.. لالا كويسة ❤ وشدت روحها وقالت ، جينا نحكو معاك ف موضوع لو معندكش مانع ?
يوسف.. عيوني ليكم ?? شبيكم ?
نسمة..سيرين جيبي الكرسي جاي تبي تقعميزة ?

وتلو زوز كراسي وقعمزو بجبنه وبدت تدوي نسمة بهدوء ،،

“سيرين كانت تكلم ف واحد ليها 5 سنين .. ويحبو بعض كداش ليهم غير ربي مسخرش يجي يخطبها من قبل صارتله شوية ظروف ، وتوا يبي يجي ويخطبها ..

يوسف .. وبه وين المشكلة ؟
نسمة.. المشكلة انه يبي يجيب اهله الخميس الجاي وحني نبو نحكو لبابا بس تخاف يقولها منين جبتيه تحصل فيها .. وانت تعرف عمك محمد كيف يشد فحاجة
يوسف.. وتبوني نقول ان الولد صاحبي
سيرين.. وراسك الا مافي منك 2 يانصة??
يوسف.. هههههههه شن اسمه الولد
سيرين ..سامح كمال ***
يوسف..سامح ؟؟ اللقب زي الي سامعه قبل ..
نسمة.. تعرفهم ?
يوسف.. هدا الي ماليه مالكين لشركة انماء !! حوش ال****
سيرين.. ايييييييي تعرفهم !!!؟؟!
يوسف.. تي نعرف خوه صهيب بس الي شاد رئيس مجلس ادارة الشركة ، عيلة ماشاء الله الحق ، معرفة سطحية لاكن
سيرين.. بالله ☻☻ قصدك معبيين ؟? اول مرة نعرف
نسمة .. ماشاء الله ، ربي يدوم عليهم.. المهم نبوك تكلم بابا
يوسف.. معندكش مشكلة ، لاكن عرفت تختار الست ?طاحت واقفة ? عقبالك نسومة ?
نسمة.. هههههه سلمك
سيرين.. تي وحق ربي مفيييييش منك زوز هيييي ?????? تييييي نحبكك ??????
يوسف.. نموت فيكك ?????
نسمة.. شن السخافة هادي انوض ؟ ?
يوسف..??? لالا خليك انتي شوية نبيك ?
سيرين.. خلاص كملو هدرزتكم ولحقيني نسمة ،، سموحتي يرن خ نرد عليه ?❤
نسمة.. نوضي شبشبي لاحقك ???
يوسف .. ???? وحتى اني المدام تستنى فيا ?❤❤?

وتتلفتله نسمة وتشوفله شبحة وهو يضحك ومش واخد باله ؛ مفاقتش الا لما فنصت فيها سيرين

سيرين.. هي نتلاقو سيفو ..
يوسف.. هههههه ماشي هي سلام

وقعدو يوسف ونسمة بروحهم ..

نسمة .. ف شن كنت تبي تحكي ؟
يوسف ……..

توا نولولهم بعدين خ نمشي بيكم لل other side ??

في حوش عمكم كمال ??

او فيلا بالاصح ??

طبعا عيلتهم كبيرة بكل ماشاء الله ❤

سامح هدا الي يبي يخطب نسرين الاخ الوسطاني .. عمره 26 سنه بيحضر الماجستير ف ادارة الاعمال ف لندن ….

عنده زوز اكبر منه صهيب وعمار ،،

عمار اكبرهم متجوز وعنده 3 صغار عمره 36 سنه ..
مرته سهام حرفة صرفة ياكبدي ?

ضكتورة ? عمرها 32 سنه ? وجها يقطع الخميرة م العيش و حشيشتها تفشك ع خلق ربي ??

ع عكس عمار كان طيب بكل ويحب الخير للكل ،

صهيب .. اكثرهم عقلا واكترهم دماراً ?
مش عقلا قصدي عاقل غير دماغه ارهابي و يوزن بلاد بس ?

عمره 28 سنه زي ماعرفتو منهم غادي رئيس مجلس ادارة شركة انماء وبوهم اكتر واحد عابي عليه لان الشركة شبه ورث العيلة تعتبر ،، و وقته كله فلشغل

عندهم زوز بنات تواما مرح وفرح ???
توأم الشر ? عمرهم 20 سنه ?

وسماح 24 سنه مخطوبة ?❤?

ومهند 22 سنه ?

وشخصيتاتهم توا تعرفوهم فلمسلسل منبيش نكتر عليكم اكتر باش متتلخبطوش خ نمشو نشوفو شن صاير >>

كانو مقعمزين كلهم فلمربوعة يهدرزو مع المغرب هكي …

صهيب .. يام جعان ?حطيلي ناكل بنطيح ع وجهي
امه.. العفو نهارك كله فلخدمة مش تاكل اي حاجة باش يبدا عندك حيل ؟!
صهيب .. اهو بدينا -_-
مهند.. تي الدلع هدا مش محصلين ربعه حني احمد ربك ?

ويجيه شبشب يهيج من اخر الصالة لوجهه ??

بوه.. تعلم الاحترام لنعلقك من رجليك فلسقف ?
مهند.. طغيان انتم وحق ربي ? توا تشوفو غير نخدم ونستقل بس ??

وناض من بحداهم ??

وهوا طالع ع خشت عمته شكرية … >> ??

مهند.. اووو عميمة ، خشي خششي .. شن الجو !
شكرية وهيا داهشة .. الحمدلله ياولدي غير خود مني الشكاير هاذم ودخلهم لامك ..
مهند.. ماشي هاتي عليك ..تفضلي خشي كلهم داخل

وهني خشت روان بنتها …

روان.. هالووو .. قلعاوية شجو ?
مهند.. قلعاوية تحصل ف رقبتك يابعيدة??
روان.. ??? تيك ات ايزي ياعزيزي ?
مهند .. ههههههههه خشي وانتي درتيها عكسة علباب امك شربت حتى الشاهي ?
روان..ههههههه وين صهيب ؟
مهند..حبيب القلب يتسمسم الداخل ?
روان “ضرباته ع كتفه” .. تحشم ??

وخشو الداخل مهند حط الحاجات وطلع وروان سلمت عليهم وقعمزت بحدا امها..

مرح وفرح فلمطبخ ?..

مرح.. اشي قعمزت تقول ضيفة ? مستنية نجيبولها العالة لعندها ولا كيف -_-
فرح.. مرركها الزفت ، شدي شدي خ نمشي نعزقلها كلمتين بكشي تتحشم ع وجها ودير حاجة ..
مرح.. تي قعمزي مديريلناش العار

وهني خشت عليهم سماح .. ف من تقرموا ??
مرح.. ف السوسة وامها ???
سماح.. تحشمو عمتكم ? كنها جاية اليوم تقول ناقة طايحة ف باسطي قبل لاتجي ؟? اللاي مدارتش هكي ف بياني ?
فرح .. سبا خوك ياحنه عاجباته ، وهي كان تغسل وجها تطلع تشبه لعبسي ولد جيرانا

مرح وسماح ??????
سماح.. رسمي في شبه ???

وهدت عليهم سهام مرت خوهم ?
الحرفة هاديك زبطوها ؟?

سهام..مش عيب عليكم الدوة هادي ؟!؟ قاعدين فرخات مش ناويات تعقلو !

وهما ولا كلمه ،،

سهام…وانتي سماح توا هما فرخات نقولو لاكن انتي كم شهر وتبدي بحوشك مش عيب عليك الدوة هادي ؟؟ يلا كل وحدة تحترم نفسها ودير قدر لروحها خير ،،

وسماح متلفته تستف ف الحلويات وتجز ع سنونها?

سهام .. قلت رباية ….. وطلعت

فرح.. هادي شن تحساب روحها ؟ الزفت منين بنلقوها .. قوية هادي الكنة بدت هي الي تكشخ ع حمواتها ..
مرح.. وهي تقول صاكها اليتريك شعرها ديما واقف?
سماح.. حبيبتها ياكبدي ..كملو انتو حمودي يتصل ?
مرح.. ناعليا ?عطيني نرد اني وراسك صوتنا زي بعض مش هايفرق ??
فرح.. الجفاف وعمايله ???
سماح.. كلبات???? وطلعت تكلمه فلجنان❤

نمشو للمربوعة ?

روان كانت تهدرز مع مرت عمها الي هيا ام الجيش هدا ? وسهام وامها وخشو عليهم البنات بالقهوة والعالة

بعد شوية روان جاها مسج ..

“اطلعي للجنان نستنى فيك …”

روان.. الهم شن يبي هدا توا ،، ومشت قعمزت بحدا سهام ، وهمستلها ، سهومتي …
سهام.. نعم ياروحي
روان.. صهيب يبيني نطلعله برا بالله درقي عليا كان حد دورني ؛ الفرخات مرح وفرح مش هايهنوني ديري بالك يطلعو والنبي ..
سهام.. ماشي امشي فيسع ومتعطليش
روان.. مية مية منوورة ?

وحطت وشاحها ع كتفها وطلعت للجنان لقت صهيب واقف يدخن ويستنى فيها…

روان.. نعم ؟

صهيب لوح السيجارة ومشي شدها من ايدها بلقوية…

صهيب..لياا اسبووع واني زي الكلب نتصل بيك وانتي ولا هني علاش مترديش ؟؟؟؟؟
روان .. ايييدي صهيب حول اييدك ، ونحت ايده منه ،، قتلك تليفوني فااسد وميشرينش خييرك انت متفهمش !

و صهيب طلع تليفونه وشرين علي نقالها وشرين ،، وشبحلها برفعة حاجب ،،

صهيب..وهدا شن اسمه توا ؟؟
روان.. اوووف تي ماهو صلحته قتلك .. انت مولي بني ادم لايطاق ب صراحة .. اسمع الاحسن كل واحد فينا يمشي ف طريقه خير .. لاحب لاسو انت صعب التأقلم معاك

وبتمشي شدها من ايدها …

صهيب…انتي اكيد صايرة حاجة لعقلك صح ؟!

روان.. “من غير ماتشوفله ” لا نتكلم من عقلي ومافيه شي ولو سمحت ارخي ايدي خير ماحد يشوفنا ،،،

<ولفها صهيب ليه وخلاها مقابلاته وشبح لعيونها .. وقاملها قصتها >

صهيب.. تعرفيني نحبك ومنقدرش نعيش منغيرك ولا
روان.. صهيب انت طبعك صعب واني مش هانتحمل الشي هوا معاش عرفت كيف نتعامل معاك .. معقولة ع خاطر منردش عليك هكي اديريلي!! ع شوية وتمدلي كف ؟!

تنهد صهيب واستعود من الشيطان..

صهيب..اني اسف ❤ حقك عليا .. عارفيتيني منتحملش نعيش يوم من غير مانشوف ضحكتك ونسمع صوتك .. نقعد زي المدمن كيف يبعد ع المخدرات ?

وروان ساكته ومتردش عليه …..

صهيب.. سامحتيني ؟
روان.. توا نشوف غير توا لازم نمشي خير مايطبو علينا توأم الشر والهانم التانية
صهيب.. هههههه حرام عليك والله طيبات .. غير لسانهم متبري منهم حبتين ?
روان.. حبتين ؟ ? قول 10 حبات شوال رز بحاله ?.. خ نمشي هي سلام
صهيب.. سلام ، نحبك ❤

و دارتله ب ايدها باي وهيا ماشية وتشوف لتليفونها ..

وصهيب قعمز عالدروج و ولع دخانه وقعد يفكر ..وطلعتله سماح ..

سماح.. امتى تعرف بس انك مش ف بالها بكل ياوخي ? ره والله ماتستاهل تطيح قدرك علي خاطر فرخة زي هيا.. متحبكش افهمها هيا متحبكش !
صهيب.. سماح وراسك فكينا م الدسكة .. انتم متحبوش بعض متخلطيش الامور ب بعضها
سماح.. تي الهمم اختك اني مش وحدة م الشارع !! شن الي بيخليني ندير هكي ! والله العظيم لو متاكدة انها تحبك زي ماتحبها حتى لو ابليس بنتحملها ع خاطرك فلاخير همي نشوف خوي مرتاح ومبسوط ف حياته ويحب وينحب ❤.. حبيبي حتى اني نبي نتريح عليك نبي نشوفك مع وحدة تستاهلك وتقدر حبك وخوفك عليها ❤.. وحدة تريحك مش انت بس تدور كيف تريحها❤.. وحدة لما تضيق بيك اول وحدة تفكر تكلمها وتهون عليك وتنسيك كل مشاكلك❤ .. انت وقتك كله فالشغل وتتعب وهي مش مقدرة الشي هوا فالحة غير امتى تخطب وامتى تتجوزني.. صدقني هادي وحدة جعانه وكل همها الفلوس !!

وصهيب سمع اخر كلمه وجهه بدي احمر وناض بيضربها كف و وقف ف اخر لحظة وايده جمدت ف مكانها …

لانه اول مرة يشوف الخوف هدا ف عيون اخته ? اول مرة يشوف اخته خايفة منه ?

سماح وهي عيونها دموع ومصدومة .. بتضربني ع خاطرها هيا ؟ ?تعرف توا وين تأكدت من كلامي البنت هيا حولاتك لوحش .. لانها لو كانت بنت حلال زي ماتقول ره مقمتش ايدك عليا وبتضربني ع خاطرها ……
اسفة لاني نبي مصلحتك ونشوفك متريح ومتهني.. اسفة ياخوي اسفة ??

وسيباته ومشت تبكي ??

وصهيب مشعارف هوا كيف دار هكي طول عمره هوا وسماح مع بعض وصحاب ومتفرقوش ف حياتهم بكل ❤ ويخاف عليها من الهواء الطاير ويحبها حب اب لبنته مش غير اخت ليه ❤ كيف جي اليوم الي يمد فيه ايده عليها ??

ونزلو دموعه ل اول مرة لانه مشعارف كيف تصرف هكي وهوا عارف انها همها مصلحته ، و لانه حس ان كلامها صح وروان متحباش بنفس الدرجة الي يحبها بيها وعمرها ماحاولت تكون مصدر راحة ليه ع قد ماكانت مصدر تعب قلب و هم ?

بس البني ادم لما يحب يكون زي الاعمى وحتى لو كل شي صار قدامه قلبه بينكره وبيقنعه بلعكس …. لحد مايقتنع العقل بالشي هوا وهادي كانت مشكلته ….
انه يحب روان ??

نرجعوا لنسمة ويوسف >>

نسمة .. ف شن كنت تبي تحكي ؟
يوسف …..

يتبع……..

 

error: