رواية ابتزاز بقلمى زهور جمال الدين

#ابتزاز

بقلم زهور جمال الدين?
?الحلقه السابعه ?
“حقيقية ممزوجه بالخيال”

_

بعد يومين…

سحر وخالد يحكو تليفون
-سحر تبكى / انت لازم تجى تخطبنى يا خالد
-خالد/ تبى باهى النم نفختيلى راسى .. ماهو قلتلك حافظى وانتهبى وانتى تهزى فى راسك
-سحر/ باهى توة الى صار صار ماتقعدش تندبلى … انت مالاول ناوى معاى الزواج ولا .. سواء بعد عامين ولا توة
عمك خلودة ساكت
-سحر/ خالد رد عليا ماتجننيش
-خالد / انا نبيك .. لكن مانكدبش عليك .. صعب توة انى نتخد اى خطوة فالارتباط
-سحر/ ياخالد انا زمان عمرى ماكلمتك على خطبة ولا على زواج .. لكن بعد اللى صار مافيش حل الا نتزوجو
-خالد / نتزوجو!!
-سحر/ طبعا نتزوجو .. عندك حل ثانى
-خالد / الحل الثانى انك تحافظى على نفسك توة .. حتى لوقلتلك نطلعو ارفضى وماتطلعيش معاى .. اعطينى فرصة نستوعب اللى صار وبعتالى ساهل
-سحر/ لكن انا خايفه
– خالد / متخافيش .. وتوة نستادنك عندى موعد
-سحر/ كيف تصكر التليفون وتخلينى قبل مانكملو تفاهم
-خالد / اييييه علينا عاد .. هيا بالسلامه
وصكر الخط … حطت سحر تليفونها عالطاولة وهيا مكسورة الخاطر ..قعدت تخمم فى العملة اللى صارتلها..خدت تليفونها ومشت اتكت على سريرها .. فتحاته …وخشت على قروبهم المفضل .. الفراشات ..
نزلت ستيت?
” ردى بالك تعطى اغلى ماعندك للى يقولك نحبك .. لانه لو يحبك صح كان جى لى حوش اماليك وخطبك مايطلباش منك فالحرام .سمحونى عالستيت لكن تأثرت لان توة بنت كانت تحكيلى فى قصتها وسخفتنى ”
الجملة هادى ديما تقوللها فيها خالتها هند … وبعد اللى صار عرفت ان الكلام حق كتباته فى ستيت ونزلاته …
القروب ناشط واى منشور الكل .. وبدو يعلقو اللى تكتب
” بنت الاصول ما ديرش هكى” واللى تكتب فالتعليق” المضحكة بس ادير هكى ” .. واللى تكتب” مدام عطاته مل شى معش تحلم يتزوجها ”
وهيا تقرا فى كل التعليقات وتبكى …
شرين تليفونها ..شافت لقتها مودة بنت خالتها تتصل ..
-ردت عليها / الو
-مودة / يابنتى وينك يومين ماجيتيش للكليه
-سحر تمسح فدموعها/ قلت لى ماما الكليه دايرة صيانه وقالتنا ماتجوش .. والله ماعندى نيه
-مودة / خيرك تبكى
-سحر انتبهت/ لا لا شى غير ادكرت نرمين
-مودة / الله يرحمها ويغفرلها…. انشاءالله غير مايتلاقوش ماما وخالتى ..كنهد بتقوللها مودة تمشى للكليه
-سحر / انشاءالله مايتلاقوش لانى حتى غدوة ماعتقدش نجى

__________________________________________

_

فى حوش فاطمه …

هند مقعمزة فى دارها .. متكيه فى سريرها وتخمم” انتى بصدق حبيتيه يا هند ولا غير تجاملى فيه… ابتسمت / ماننكرش انه شخصيه وقدع واى بنت تتمناه …
اتكت عالمخدة / وماتنكريش انك حبيتيه من يوم جاك للمدرسه …
وتضحك/ لما طلع هداكة المسدس … وحطه فى وجه مديري .. محلاه هداكة اليوم ..
شرين تليفونها .. شافت الرقم لقتها امها تتصل
-ردت / الو يااام
-عمتك فاطمه / تعالى خوك مختار قريب يوصل طلعوه من المستشفى
-هند/ باهى اهو جايه
نزلت من سريرها غيرت التوته .. ولبست سروال وبلوزة وحطت وشاح على كتافها بالك يجى مع مختار حد من نساباته..
طلعت من دارها ..وصكرت الباب ونزلت …
-هند / ندير شاهى
-فاطمه / ديري
-هند ماشيه للمطبخ/ وداد وين
-فاطمه / تكنس فى حوشها فيسع وبتنزل ..ماتوقعتش مختار بيروح اليوم نحسابوه بيروح غدوة…
-رجعت هند لامها / قصدك مختار بيطلع لى حوشه طول …
-فاطمه / اكيدة
-هند / المفروض يقعد هنايا .. قداش بقعد يركب وينزل كل يوم وهما ماعندهمش مربوعه
-فاطمه / على راحتهم …
مشت هند للمطبخ وحطت البراد عالغاز وتخمم/ من اولامس ماكلمنيش .. غريبه.. باهى كلميه انتى.. لااا مستحيل نتحشم مانقدرش نتصل

بعد ربع ساعه وصل مختار للحوش جابه ولده خالد وخوه منعم .. وفى ساعه تلمدت هاديكة العيلة كلها … حتى خواته وبناتهم جو … ماعدا سحر قالت لى امها عندها امتحان

___________________________________________

–

فى المستشفى …

حمزة مقعمز فالممر يراجى فى الفنى اللى دار لى هند الصورة على راسها …وصل الفنى وسلم على حمزة .. وطلع حمزة الصور وراهمله بيش يفهمه
-الفنى فايز حاط يده على دائرة سودة فى الجمجمه / شفت الحاجة السودة هادى …
-حمزة / ايه
-فايز/ هدا ورم .. كيف بادى فى مؤخرة الرأس
-حمزة/ باهى سامحنى فى هالكلمه بالك التصوير غلط
-فايز / ممكن منقولوش لا .. ديما اهل المريض عندهم امل نطلعو احنا هما الغالطين .. واحنا مادابينا
-حمزة / انا بنطلعها برة
-فايز / امكانياتهم هما اكثر من امكانياتنا احنا .. والتصوير عندهم ادق .. وندعو نقولو انشاءالله نطلعو احنا الغالطين
-حمزة/ انشاءالله غير تسامحنى
-فايز / السماح بيناتنا اوخى وانشاءالله مايطلع فيها شى.. لكن منقولك حاجه .. بعد الطيحة حيرت عالورم .. حتصيرلها مرة مرة دوخة بسيطه .. واستعجل انت بطلوعكم والعلاج
-حمزة/ انشاءالله
طلع حمزة وركب سيارته .. تكى راسه على كرسى السيارة متأثر على هند ..
ويخمم / معقولة بنية زى الورد تنتهى حياتها بالسهولة هادى .. يااااااربي يكون تشخيصهم غلط …
غمض عيونه / كنت نبى نتعرف عليها بالشويا .. نحس بحبها ليا .. باقتناعها بيا .. لكن الله غالب العارض اللى صار خلانى نتخد قرار الخطوبة فى لحظه ..
فتح عيونه / لكن هيا كلها تحصيل حاصل..انا البنت حسيت بيها من يوم اللى شفتها .. وخممت فالزواج منها من اول لحظه …
شبح للمستشفى عالجنب / لكن كنت تبى تتعرف عليها فى سنه وممكن حتى فى سنتين .. لولا حكاية مرضها..
ولع سيارته وتوجه لى حوشهم

___________________________________________

_

فى حوش فاطمه ..

-مفيدة / الحمدلله يا وخى غير طلعت لا سو لا سوية
-مختار يمسح فدموعه بالكلينكس/ وجعتى صالحة مكسورة على بنتها
-نادية/ مشيتلها يامختار
-منعم / طبعا امالا شنو .. رفعناه عزى اخته وراجل اخته وبعدين روحنا
-عفاف / احسن مادرتو
-فاطمه تمسح فدموعها /انكسرت بنيتى بعد ماشتاقت بنيتها
-منعم / كل حى وجهه للموت… معش تبكى يااام راك تحرقى فيها
-فاطمه / عارفاته كل حى وجهه للموت .. لكن وجعتنى بنيتى صغيرة ومارت شى مالدنيا
-عفاف توشوش/ وداد .. نبى نقولك حاجه
-وداد / قولى
-عفاف / تو نقولك بعتالى .. اليومين اللى فاتو ماتلاقيناش بكل ..
-وداد/ تمام حتى بعتالى
طق باب الحوش
-منعم : نوضى هى شكله ترا من جى
-فاطمه / نوضينى يا ناديه
مشتلها نادية تنوض فيها ودخلتها لداخل …
فاطمه/ مفيدة عاونى هند فالعشى
-وداد / اهو بنخش انا نوتى معاها الصفر

____________________________________________

_

فى حوش صالحة ….

صالحة تبكى وتمسح فدموعها …
-حمزة /سامحينى يا عمتى .. و بالك تحسابينى يا عمتى مش واجعتنى اختى .. لكن اليوم بلغونى وقالولى ان السفر الاحد الجاى
-صالحة / مسامح يا وليدى .. انا واجعتنى غير هند .. معقولة لا ادير عرس كبير ولا ادير صاله..نعرفها على خاطر نرمين تحزن عام
-حمزة / غير كانها بدير عرس وصالة..نسافر ونخليها تلحقنى
حتى بعد شهرين ولا ثلاثه .. لكن عارفه مش حديره
-صالحة/ كانك على هند يازين ماخترت .. العقالة والفكر الراكز والفلاحة .. وربي يهنيك يا وليدى ..
-حمزة / انتى عاملتينى معاملة الام لى ولدها .. طيبتيلى .. غسلتيلى حوايجى .. ماكانش عندك فرق بينى وبين اشرف.. وانا مانبيش نتزوج وانتى زعلانه منى وخاطرك مكسور .. انا نبى نتزوج وانتى راضيه
-صالحة / راضيه عليك دنيا واخرة .. ووالله كان مش اختك متوفيه رانى درتلك عرس تحكى بيه الناس
-قام يدها وباسها / كأنك درتيهولى وزيادة ..
-صالحة تبكى / ربي يحفظك ياوليدى
-حمزة / خلاص نعبى عليك تكلمى بوى
-صالحة / بعتالى فالليل غير يروح للحوش بأدن الله نقوله
-باس على راسها / ربي يحفظك ويطول فى عمرك

____________________________________________

_

فى حوش فاطمه ..

هند طلعت من المطبخ وخلت عفاف ووداد بروحهم
-وداد / شن كنتى بتحكيلى بكرى
-عفاف / تعالى للجنان …
طلعت وداد ورا عفاف .. قعمزو على كراسى االطاولة االى فالجنان الخلفى
-وداد / حسك شغلتينى
-عفاف / اسمعينى بالشووويا وماتشهدريش نقصى صوتك
-وداد مخلوعه / يا وخيتى خيرك
-عفاف / اليومين اللى فاتو فتحت باب شقتى مننزل لقيت ولدك خالد شاد سحر بنت عمته وترا شن يديرو
-وداد خبطت على رجليها / يا غبارتى شن يديرو
-عفاف وقفت / يديرو فالحرام .. ولا نزيد نوضحلك اكثر
-وداد حطت يديها على راسها / يا حليلى .. ياغبارتى كان تسمع مفيدة لما تقلب الدنيا على راسى
-عفاف / انتى شدى ولدك .. وماعندها علاش بتقلبك مفيدة الدنيا .. لقيتهم من فوف لفوق ماعنده علاش ياخدها
-وداد / لاحظته انا من المدة اللى فاتت .. ولاحظتها البنت تفرفش عليه .. جيت قدامها هيا وامها وقلتلهم ولدى بناخدله برانيه .. ماناخدلاش من العيلة
-عفاف/لعلمك مفيدة مش ملاحظة بنتهاخاطر يومتها قعدت تقولك هكى احسن بيش متصيرش مشاكل بين العائلات
-وداد تخبط / حيه عليا كان مايطلع واصل فالبنيه
-عفاف / انتى المفروض فهمتيه من اول يوم وقلتيله بنت عمتك مانبيهاش
-وداد/ نحسابه مش ملاحظها .. مابيتش نلفت انتباهه ليها .. اللى عمره ماشبحلها ولا كلمها قدامنا
-عفاف / هادى خطط بينه وبينها
-وداد / والله لما نوريه .. غير خلى نركبو فوق
خشت ناديه للمطبخ / هند
-عفاف / اهو احنا مقعمزات هنايا يا ناديه
وتلفتت لى وداد / غيري الدوة وافردى وجهك تو تلاحظك

___________________________________________

_

ثانى يوم فالجامعه ….

تمت المحاضرة والبنات فى اللى لمت مدكراتها وطلعت وفى اللى مزال …
مودة مقعمزة اتخطط عالعناوين الرئيسيه فى مدكرتها وبتلمها وبتطلع
جتها منال تجرى / نوضى بسرعه يا مودة
-مودة / خيرك يا منال شن فى
-خدت منال مدكرة مودة / هاتى شنطك وتعالى
طلعت منال تجرى ووراها مودة … مشو على جنب مبنى الكليه منال تجرى ومودة وراها
-مودة / خيرك شن فى
-تلفتتلها منال / نقصى صوتك …
وتلفتت عاليمين / شفتى الولد اللى واقف عالسيارة الكحلة ولابس نضارات ..
-تلفتتله مودة / ايه شفته خيره
-منال/ هدا هوا اللى ركبت معاه نرمين يومها
-مودة / اه ه ه
-منال / اول شى اديريه ركزى عليه لما كلمك زمان شن يبي منك ..لانى متاكدة انه هوا نفسه كلمك
-مودة / انا اول شى ناخد رقم سيارته
-منال/مكن خانبها..لانه المرة اللى فاتت جى بي سيارة حمرا
-مودة / مهما يكون لازم ناخده رقم السيارة
-منال / باهى اقعدى انتى هنايا بيش تزبطى الولد .. وانا تو نمشى نلف من ورا المبنى ونصور الطارقه
-مودة / تمام …
جت بنت للشاب ووقفت عليه .. البنت اسمها امل ..مودة تعرفها .. لكن شن عرف امل عالشاب هدا وشن علاقتها بيه ..
تشوف فى امل طلعت ضرف من شنطتها واعطتهوله .. عطاها هوا ورقه .. وقعت فيها ..
ادكراته طول مودة / حىىىىىى زبطه .. هدا متع التبرعات المبعوت من قروب الفراشات .. الله اكبر .. منين يعرف نرمين
خدىالولد الضرف والورقه وحطهم فى سيارته كأنه بيمشى
تشجعت مودة ومشتله …
قربت من السيارة / اهلين خوى
-شبحلها الولد / اهلا
-مودة / خيرك نسيتنى .. انا مودة متع التبرعات
-الولد تلخبط/ اهاا عرفتك .. هيا نستادنك
-مودة / خيرك مستعجل اللطف
-الولد / مزال عندى اماكن ثانيه بنلم منها
-مودة / ماعرفتنيش على اسمك
-الولد / اسمى سامى ..
-مودة / عاشت الاسامى .. نستادنك

مشت وخلاته واقف وهوا يشبحلها … ركب سيارته ..مشت هيا لى زوز ولاد واقفين ..
-مودة / نبيل .. كملت ولا مزال
-نبيل / كملت محاضراتى بنروح
-طلال / فى حاجه
-مودة / وراس اوخينى نبيكم تلحقولى الولد اللى فالسيارة الكحلة .. تشوفوه وين ماشى .. ضرووورى لانها مسألة حياة
او موت
-نبيل / تم ..
-طلال / بنمشى معاك
-نبيل / اركب هى
-مودة / غير سقدو لايهرب منكم
-جتها منال / صورتلك رقم الطارقه متعه
-طلال / شنو يابنات شكله الموضوع خطير
-نبيل / اركب هيا
وركبو الشباب الزوز .. وطارو ورا عمك سامى
قامت مودة تليفونها واتصلت / هند نبيك ضرورى وينك
-هند / انا بنروح للحوش .. خيرك شن فى
-مودة / لقيت الولد اللى ركبت معاه نرمين
-هند / الحمدلله .. اهو جاياتك للجامعه
-مودة / تعالى هى

___________________________________________

_

طلعت هند من المدرسه لانه نهاية الدوام ..
قامت تليفونها واتصلت / حمزة انت وين
-حمزة / انا فى الجوازات خيرك
-هند / تعالة نبيك ضرورى
-حمزة / اهو جايك انتى وين
-هند / انا ماشيه للجامعه … تعالة غادى
-حمزة/ وليش ماشيه للجامعه شن فى
-هند / غير تعالة وتو تفهم
-حمزة / اهو لاحقك …

الطريق كلها وهند تخمم كيف بتقول لى حمزة ان اخته قبل ماتموت طلعت مع واحد من الكليه..ماعرفتش كيف بتقولهاله
لكن خلاص لازم تقولها لانهم حصلو الولد
وصلت قبله للجامعه ….

-هند اتصلت بي مودة / انتى وين
-مودة / نشبح فى سيارتك .. خشى طول تو تلقينى جنب الشجرة اللى عاليمين
-هند / اهو جاياتك
وصلت هند لى مودة …ونزلت سلمت عليها وعلى منال .. وحكولها القصه كيف صارت من الاول
-منال / انا نستادنكم هوا هداكه .. لو تأخرت ماما حتنشغل عليا
-مودة / حتى انا ماما بتنشغل .. كلميها يا هند
-هند / تو نكلمها
وتلفتت لى منال / ادنك معاك وسامحينا فى تعبك
-منال / مع السلامه ….
مشت منال وشرين تليفون مودة …ردت
-مودة / ايوة نبيل
-نبيل / وقف فى الهضبه .. شرين على حوش اعطاه ضرف ..
وركب لى سيارته وتوجه لى صلاح الدين
-مودة / وانتو قاعدين وراه
-نبيل / وراه .. لين نزبطلك حوشه
-مودة / تمام وربي يحفظك
شرين تليفون هند .. ولما شافت لقاته حمزة
-ردت عليه / ايوووه
-حمزة / انا فالجامعه .. انتى وين
-هند / انا جنب اول شجرة عاليمين
-حمزة / شفتك .. اهو جايك …
هند بدت ترعش باللى فيها … قرب حمزة منهم .. درس السيارة ..
-مودة / منو هدا يا خالتى
-هند / هدا حمزة خو نرمين
-مودة انخلعت / ومن قاله … وشن جابه …
نزل حمزة من السيارة / السلام عليكم …
-هند / وعليكم السلام
-مودة / نستادنكم انا
-هند / خليك
-مودة / لا لا اهو مقعمزة قريب مش حنبعد …
مشت مودة وخلتهم …
-حمزة / شن فى … وليش ناديتينى هنايا
-قعمزت هند عالكرسى المخصص/ قعمز
-حمزة / انتى مريضه .. فيك شى .. عندك دوخة
-هند / لااا… غير قعمز شوى
-قعمز حمزة / شن فى
-هند / افهمنى بالشوى وما تعيطش عليا
-حمزة / غير قولى بس
-هند / فى ناس شافو نرمين طالعه مع واحد فالسيارة يوم اللى ماتت .. واحنا اليوم عرفناه منهوا
-حمزة وقف ووجه احمر/ نعممممم.. طالعه مع واحد
-هند ترعش/ غير بالشوى تربح بيش تفهمنى
-حمزة / منهوة الشخص هدا
البنات اللى واقفات انتبهو وتلفتولهم
-هند / الناس تشبحلنا خيرك
-جتهم مودة / خيركم ..
وتلفتت لى حمزة / بالشوى اوخى .. الناس تتفرج
-حمزة / عطونى اسمه …الليله نشرب من دمه
-مودة / انا مانعرفاش شكون .. هوا يجى يلم مننا فالتبرعات متع قروب فى الفبسبوك .. تبعت فيه الادمن
-حمزة عاض سنونه / توة هوا وين
-مودة / زوز ولاد يقرو معاى يلاحقو فيه يبو يزبطو حوشه وين
-حمزة / هاتى الرقم ..
طلعت مودة الرقم وعطاته لى حمزة كتبه فى تليفونه …
وتلفت ماشى لى سيارته
-هند / حمزة
تلفتلها لقى وجهها احمر .. رجعلها
-حمزة / ماتخافيش يا هند .. روحى توة للحوش انتى وبنت اختك
-هند / وانت
-حمزة / انا بنكلم الولد ونلحقهم .. امالا علاش ناديتينى
-هند / باهى رد بالك …
-حمزة / اطلعى قدامى لى سيارتك
هند ماشيه وجنبها مودة وحمزة قام تليفونه يتصل ..
-حمزة / جهزلى قوة … وتو نتصل بيكم نقوللكم وين تلحقونى
وصكر التليفون ومشى من جهه روشن هند …
-حمزة / سوقى بالشوى عليك
-هند / باهى
-حمزة / هى وخرى
وخرت هند بالسيارة وطلعت …
مودة / نهار احرش شن هالجمال .. شن هالهيبه
هند ضحكت
-مودة متلفته لى هند / لكن واضح فى شى بينكم صح.. منين تعرفيه
-هند / من مدة قصيرة
-مودة / من مدة قصيرة وخايفين على بعضكم هالخوف هدا كله ?

_________________________________________

_

حمزة ركب سيارته وطلع يجرى قام تليفونه وكلم نبيل
-نبيل / الو
-حمزة / انا من طرف مودة .. ونبى الواطى اللى اتبعو فيه
-نبيل / هوا ليك
-حمزة/ انتو وين توة
-نبيل / احنا جهه كليه الاسنان متع صلاح الدين
-حمزة/ تم هانى جايكم ردو بالكم اضيعوه من ايديكم
-نبيل / مستحيل .. وخلينا على تواصل بالتليفون
-حمزة / تم .. سلام ..

قام تليفونه ثانى واتصل
-حمزة / يا فندى عامر .. قول للقوة تتجه لى صلاح الدين جهه كليه الاسنان

________________________________________

تمت …… ويتبع

زعما غدوة تطلع حقيقه موتت نرمين هل هيا ماتت مقتوله والا ماتت موته طبيعيه …
غدوة نفهمووو

نحبكم ❤