رواية ابتزاز بقلمى زهور جمال الدين
#ابتزاز
بقلم زهور جمال الدين ?
?الحلقه 15 والاخيرة?
“حقيقيه ممزوجه بالخيال”
_
فى حوش حمزة
هند وفدوى فالصالة
-فدوى تبكى / تعودنا عليكم.. ياحليلى كيف منقعد فالغربه بروحى
-هند متأثرة / اهو حتى انتم قريب بتكملو .. شن مازال عام ونص
بيبي جنبهم بدى يعيط …
قاماته فدوى / نضت حبيبي..
-هند / شكله جيعان … رضعيه
-فدوى خداته فى حجرها وتضحك / رقد ثانى
-هند / ربي يحفظهولك …يدلع عليك
-فدوى / ربي يملى حجرك بي وليد… يزين حياتك ويكمل عليكم فرحتكم انتى وحمزة
-هند مبتسمه / حمزة يبي بنوته
-فدوى / ايوووه جيبو بنوته حلوة بيش ناخدها لى وليدى
-هند / ووين بنلقو احسن من ياسين افندى نسيب
-فدوى /كيف بتخبري امك
-هند / هدا اللى دايرة حسابه .. لمابتشوفنى امى كيف بيصير فيها
-فدوى ربي يحفظها ويخفف عليها .. زى ماحفظك وخفف عليك يااارب
-هند / ااامين .. ويحفظلك اميمتك يااارب
-فدوى / ياااارب
-هند وقفت / خلى انشوف الغدى الرجالة قريب يوصلو
-فدوى / حمزة فرحان قريب بيطير قال لى فوزى اول يوم بنوصل فيه لى ليبيا .. بندبح زوز خرفان ونصدقهم على سلامه هند
-هند / ربى يحفظه ليا … لولا لطف ربي بيا ..ولولا حمزة
..وحنيته عليا .. مستحيل كنت نوصل للى انا فيه توة
…الحمدلله
-فدوى / يستاهل الحمد … الموقف اللى صارلك قدامى .. ولما شفت معاملة حمزة ليك … فهمت وايقنت .. ان المريض بالمرض هدا..حالته النفسيه هيا اللى تشفيه.. وهيا اللى ادمره
-هند / اى والله .. نحمد ربي ونشكر فضله على نعمه الزوج الحنون
وخشت للمطبخ بتشوف الغدى .. وانفتح الباب .. خشو فوزى وحمزة ..
-فوزى وحمزة / السلام عليكم
-فدوى / وعليكم السلام
فوزى خش لى ولده طول قامه من حجر امه / ياسينووو
وحمزة خش طول للمطبخ / حبيبتى
– هند واقفه عالطنجرة / روحت يا روحى
-قرب منها وضمها من الخلف / ستاحشتك
-هند / نهار ابيض الناس فالصالة … حول يسمعونا
-حمزة يضحك / اهو حولنا
-تلفتتله / شوى ويجهز الغدى
-حمزة / عندى ليك مفاجئة
-هند ?/ شنو
طلع حمزة تداكر من جيبه / رحلتنا غدوة الفجر
-هند حطت ايديها على خدوده فرحانه / بلحقه .. محلاها المفاجئة .. مش قلتلى الخميس منكونو فى ليبيا
-حمزة حط يديه على يديها / ايه الخميس منكونو فى ليبيا
-هند استغربت / مش قلت غدوة الفجر رحلتنا ..
-حمزة مشى قعمز على كرسى طاولة المطبخ / غدوة رحلتنا لى ايطاليا .. منقعدو فيها اربعه ايام واليوم الخامس اللى هوا الاربعاء فالليل ننزلو فى تركيا..نقعدو ممكن ثلاث ساعات
ونركبو لى ليبيا … نوصلو الصبح بكرى
-هند بدلع/ ليش منقعدو فى ايطاليا .. استاحشت اهلى خلى نروح ليبيا طول
-حمزة / مش من حقنا شهر عسل
-هند / اكيدة من حقنا
-حمزة / خلاص نمشو وندهورو ونستمتعو
-هند / ربي يوصلنا عالخير يااارب …حايرة غير على امى
-حمزة / بالله عليك ماتفكرى فى امر يزعجك توة
-هند / حاضر
حطو الغدى وتغدو هما وصحابهم .. وخبروهم بموضوع السفر فالفجر
وبالفعل ثانى يوم سقدوهم صحابهم للمطار .. سلمو عليهم وركبو الطيارة وسافرو ايطاليا
_________________________________________
_
فى حوش فاطمه
-فاطمه / سمعك الخبر الزين يا بنيتى .. من قالك هند بتروح
-صالحة/امبارح كلمنا حمزة …قال كيف وصلو ايطاليا.. وقال الخميس بيوصلو طرابلس …
-فاطمه / ربي يحفظلى بنيتى ويوصلهالى بالف خير
-صالحة / كلموكم حتى انتو .. لكن مارديتيش عالارضى والموبايل
-فاطمه / اسكتى ساكته بالله .. وين فرزته التليفون انا
-صالحة / خيرك اللطق
-فاطمه / نزلتلى بنت اختك تجرى .. هداكة يجرى وراها بيضربها لبدت وراى
-صالحة / نهار ابيض .. وداد وين
-فاطمه / وداد خالها داير زردة لى بنته متخرجه .. رفعت بناويتها ومشت والولاد مهناش .. شوره استفرد بيها وعطاها على راسها.. قريب قتلها ..نزلتلى كلها مخبشه
-صالحة / لاه عليهم يرعشوك فى هداكه الليل .. اقسم بالله بنت اختى ماقرصتها امها كويس لما كانت صغيرة
-فاطمه/والله ماخلو فيا عظم صحيح …
-صالحة / حتى هوا والله مايتحشم يشد بنت الناس وهاتك يا ضرب .. يحسابها رجوليه ..
-فاطمه / حتى انا طاحو من عينى ..وماخدته فيها ماعرفتها عناد .. ولا شن قصتهم .. قالو بيشافر وبعدين دورة طلع قاعد فالبلاد
-صالحة تبى تسكر الموضوع/ ياودى راهو الزواج نصيب من عند ربي
-فاطمه / ربي يهديهم لبعض
نزلت سحر من الدروج تك تك تك
-سحر / السلام عليكم .. اهلين خالتى
-صالحة فوق النفس خاطر مش طايقه فى امها / اهلين سحر كيف حالك..
-سحر / الحمد لله
وتلفتت لى حناها باست على راسها / سامحينى يا حناى رعشتك
-فاطمه / ربي يهديكم وتحطو عقولكم فى روسكم
-سحر / اليوم الصبح درت تحليل طلعت حامل .. شورنى نتوحم ومش متحكمه فى تصرفاتى
-حناها / كل شى بالبركه يابنيتى?
-صالحة / مش كأنى سمعت بيك راميه قبل شهر بس ?
___________________________________________
_
فى ايطاليا
هند اول ماوصلت تعبت شوى من تعب الطريق …قعدو يوم كامل فىالفندق ماطلعوش …
ثانى يوم …
هند وحمزة راقديت عالسرير …. هند راقدة على ضهرها .. وحمزة راقد جنبها ويشبحلها …
-حمزة / توة احسن حبيبتى
-هند شادة نص ليمه قارصه وتشم فيها / احسن الحمدلله
-حمزة / وصيت على شربه الثعبان … غير توصل وناكلوها مع بعضنا
-هند / قلتلك مش واكلتها
-حمزة/ وعلى خاطر حبيبك
-هند / انت ليش ادير معايا هكى
-حمزة / باهى تحبينى ولا لا
-هند / نحبك ومش واكلتها
-حمزة / باهى نديرو حل وسط ..ادوقيها .. لو عجابتك ناكلوها .. لو ما عجباتكش مش حنغصب عليك
-هند / باهى
سكتو .. وتلفت حمزة للجهه اليسار يخمم وخلاها وراه ..
هند وجعتها .. حست ببعده… لكن مابتش اديرها زعلة .. حبت تاخد موقف …
تلفتتله .. نقزاته .. ومشت رقدت قدامه فى المكان الصغيرون اللى قدامه …
حمزة يشبحلها وساكت
– قربت منه وحطت وجهها قدام وجهه وباساته/ زعلت
-حمزة عجباته اللقطه و لقاها فرصه بيش تسايره / ايه
-هند / باهى سايرنى
-حمزة / اكثر من هكى
-حضناته وباست على خده / باهى تو ناكلها .. غير ارضى يا همى
-حضنها / نكدب عليك ..انا مانزعلش منك
-هند حاضناته / عارفه
-حمزة / باهى تحبينى
-هند / ايه نحبك .. وتعلقت بيك هلبا … لدرجه انى حاسه كأنك بوى .. او خوى .. نتعامل معاك بكل راحة كأنى نعرفك من زمان
-حمزة / مدامك تحبينى اسمعى كلامى..نبيك تاخدى علاجك
.. نبى نعيش معاك طول عمرى
-هند مبتسمه / متوقعنى نموت
-حضنها / معش تقولى هكى .. ربي ياخد من عمرى ويعطيك
-هند / نحبك هلبا ..
قعدو حاضنين بعضهم شوى .. وحطت هند يدها بتنوض ..
مسكها حمزة / وين ماشيه
-هند / منرجع لمكانى
-قام رجله وحطها على فخدتها / لااااا …يعنى جايه قدامى وحاضنتنى وتبوسى فيا وتبى تنوضى بالساهل
وبحركه سريعه تحرك خلاها تحته وهوا فوقها
-هند تضحك / يا حليلى شربه الثعابين قريب توصل
-حمزة يبوس فيها من رقبتها / قالى بتقعد ساعه ونص بيش يجيبوهالنا
هند حاطه يديها حوالين رقبته وتضحك / حمزة .. بطل .. الدكتورة قالى ماتحمليش
حط صبعه على فمها / اششش.. تو نعرف انا كيف نتصرف
___________________________________________
_
فى تركيا
فاتو هادوكا الاربعه ايام فى ايطاليا يهبلووو … خامس يوم ركبو الطيارة مشو لى تركيا .. قعدو فى المطار .. هند تعبت عليه هلبا .. اكثر من 16 ساعه بين المطارات هلبا عليها وهيا كيف مكملة كيماوى …
ركبو الطيارة … وصلو مطار معيتيقه ……
حمزة شادة هند من يدها وهيا متكيه راسها على كتفه .. رافعها بيقعمزها عالكراسى .. . هلبا ناس لفت نضرهم المنضر وعرفوها مريضه
-شاب ليبي / اى مساعدة خونا
-حمزة يمشى فيها / صحيت خوى منور
مشى الشاب وخلاهم
قعمزها عالكرسى… جتهم مراة شادة عيل صغير يمشى فل يدها / اختى نعاونك فى حاجه
هند بابتسامه صعبه / صحيتى وخيتى بارك الله فيك
” محلانا الليبيين قداش نوقفو مع بعض فى المطارات ”
مشى حمزة يجيب فى الشناطى … خدى شناطيهم ومشالها خداها من يدها طلعها من الصالة لى برة وقعد يوقف فى تاكسى .. هيا مستغربه وين خوته لكن ماعندهاش جهد تتكلم
ركبو التاكسى رفعهم للفندق الكبير….. وهند مستغربه ..
خدو منهم شناطيهم.. وركبو للغرفه
سلبت هند كندرتها ووشاحها / خيرنا جينا هنايا … مش منروحو لحوشكم
-حمزة/ انتى تعبانه هلبا .. والاختلاط والنفس حيتعبوك هلبا
-هند / انا حاطه كمامه طول السفرة … نقعد بيها حتى فى حوشكم
-حمزة / تو معقولة بتقعدى بيها قدام اختك وبوى وخوتى .. وبعدين انتى واضح عليك تعبانه هلبا ومش قادرة تتكلمى كيف بتسايريهم
-هند / عادى .. ندوى شوى ونستريح شوى
-حمزة / وانا شن لازنى على هدا كله .. خلينى انا نعرف كيف نتصرف … من الصبح كلمت وليد وقلتله ان الطيارة اتأجلت
– هند / لكن امى تراجى .. لما كلمتها اليوم قلتلها اننا مروحين
-حمزة / اكيدة عمتى صالحة كلمتها وقالتلها ان الطيارة اتأجلت
-هند اتكت عالسرير/ تصدق.. احسن مادرت .. والله ماقادرة نقيم راسى
-حمزة / اصلا من لما شفت تعبتى فى ايطاليا اول ماوصلنا .. توقعت انك حتى اليوم بتتعبى
” وهوا فالاصل توقع ان لما بيشوفوها حيصير عياط وبكى يحبطها .. فكر انها تواجه الاحباط هدا وهيا صحيحة خير ماتواجهه وهيا تعبانه ”
-هند متكيه وتشبحله / لكن هلبا هكى .. حق الارض اللى بعتها كله صرفته
-جى قعمز جنبها / فداك كل فلوسى وارضيا وحياتى ..
-هند / لكن كنا عابيين عليها مش نشرو شقه عالاقل
-حمزة/ ورث امى كل واحد فينا خدى زوز اراضى .. وحدة اهو بعتها … والثانيه قعدة
__________________________________________
_
ثانى يوم العشيه
هند تساوى فى حجابها بيمشو لى حوش شيبانيها ..
…وحمزة يتكلم فى التليفون
-حمزة / لا نبيها اليوم ..الليله بنبات فيها بادن الله .. كم.. لااا نقصلى شوى.. باهى 35 الليله كويس .. خلاص امالا وتيها وقيس الساعه 11 فالليل نجو ناخدو منك المفتاح
مع السلامه……..وانهى المكالمه
-هند / قصدك منأجرو حوش
-حمزة / وين بنبات غادى فى حوش بوى .. ماعندهمش غرفه يعطوهالنا
-هند / زى ماتحب… لكن اهو فاتح شفرتك انت .. كانا يكلم حد من خوتك يلقاك فى ليبيا
-حمزة يضحك / لعلمك انا عندى 12 شفرة … شى يعرفوه اهلى وشى مايعرفوشى
-هند / انا منعرفهم كلهم راهو
-حمزة باس على شفايفها / انتى روحى .. اكيدة بتعرفى كل شى عليا
طلعو مشو لى حوش بوه … حمزة حط شفرته و كلم وليد .. تعدرله انه يكلم فيه خارج التغطيه .. هدا علاش خدى تاكسى
وصلو حوش بوه …
-حمزة تلفت لى هند / انتى طبعا متوقعه انهم بيتفاجئو ..
هزت هند راسها بمعنى عارفه
-حمزة/ نبيك هند القوية اللى انا اعجبت بيها .. مانبيش اى انهيار منك
نزلو لى حوش صالحه …
-هند وحمزة / السلام عليكم ..
-شهد / يااام .. خوى حمزة روح..
طلعت صالحة من الكوجينه / اهلين بالعرسان …يا هلا
ومشتلهم بتسلم عليهم … وياكبدى صالحة لما شافت اختها هادوكا الحواجب مهناش .. وهاداكه الوشاح واضح ماتحته شى غير الطاقيه اللى يحطو فيها تحته .. انهارت
-صالحه حضنت هند / يا حليلى على وخيتى … يا وخيتى شن صارلك .. شن جاك .. ووه عليا خيرك ضاربه الكيماوى … يا غبارتى ..
حمزة يشد فيها من اليمين .. وشهد بنتها من اليسار
حمزة تكنطى قريب مات يشبح لى هند / اطلعى.. اطلعى
-هند / غير وسع بالك
خش عمك محمد / اهلين بنيتى
هند شبحتله وبابتسامه خفيفه / اهلين عمى محمد
وتلفتت لى شهد / شهودة .. تعالى سلمى
مشتلها شهد وهيا تبكى / اهلين خالتى
محمد مشى لى صالحة عفس على رجلها ينخص فيها/ بتسكرى فمك انت ولا شنو
-صالحة تصفق فى ايديها / احنا خيرنا .. شن جانا من دون العباد .. عليتنا كلها تفركست
-حمزة بحزم / عمتى صالحه .. عندك خمسه دقايق .. يا بتسكتى .. يا امااقسم بالله انى طالعه ماعاد جاى
-صالحة تساعد فى روحها بتوقف / وين بترفعها بس .. وين
ومشت لى اختها زادت حضنتها وسلمت عليها كويس وسألتها
.. وحكت هند حكايتها كلها .. اللى قالاته مش حقيقي فيها انها انصابت فى المانيا …بينما هيا انصابت فى ليبيا
جوها سلافها واشرف ولد اختها وحمدو لها بالسلامه .. واتأسفو عاللى صار لى مرت خوهم .. بعد قريب ساعتين ..
ناضو صالحة وشهد ومحمد .. بيرفعو حمزة وهند لى حوش امها .. خافت ان امها تسمع قبل ماتشوف هند ويصيرلها شى
ولما وصلو دارت عمتك فاطمه مناحه.. وعلى قولت ليش ماقالولهاش .. خواتها ناديه ومفيدة اتأثرو حالة .. خشة للكوجينه وهاتك يا بكى .. اما خوتها ونساوين خوتها وصغارهم نفس الشى بكو وتأسفو لى حالتها .. واتفاجئت هند بي زواج سحر وخالد
فالليل مشو روحو حوشهم اللى اجره حمزة
اليوم اللى بعده طول مشى لى مكان عمله .. وسأل عاللى اسمه سامى متع قضيه مقتل اخته .. قالوله انه مات بي جرعه هيروين زايدة .. ترا من عطاهاله فالحبس
وبعد اسبوعين لقى حمزة حوش كويس للاجار جهه حوش بوه.. اجره وشرى دار نوم ومطبخ ولوازم
__________________________________
_
بعد سبعه شهور
هند طلعت حامل … فرحت قريب طارت
-هند / يا دكتورة حكيتلك انى واخدة جرع كيماوى .. منسئلك هدا مايأثرش عالجنين ..
-الدكتورة / هوا فى خطوات بتتبعيها بيش تحافظى عالجنين .. وبأدن الله مايصيرله شى .. وانشاءالله توصلى بالسالم
طلعو هند وحمزة فرحانين .. قعمزو عالكراسى لبرة .. يتفرجو على صورة الجنين اللى دارتهالهم الدكتورة
-هند فرحانه / زعما بنيه ولا ولد
-حمزة / اللى يجى من ربي باهى …
شبحلها يضحك / لكن ياريتها تجينا بنيه
-هند مبتسمه / اى حاجه منك بنحبها .. لانها بتربطنى
بيك اكثر
-حمزة / ربي يحفظك ليا …
روحو لى حوش بوه .. بلغوهم بي الخبر ..
خش وليد جايب لحم معاه / الف مبروك وكل شى بالبركه
-صالحة / علاش جايب يا وليدى.. حمزة جاب لحم وخضرة
-وليد / معليشى اهو نشاركو الشعب افراحها
وتلفت لى اشرف / نوض جيب حلويات وانت ماد وجهك
-اشرف / كانك سكتت راك حجيت كيف بنوض منجيب تورته
-حمزة يضحك / تورته مرة وحدة
-وليد يشبحله / مبروك يا ابو العيال .. مبروك يا ام العيال
-حمزة يضحك فرحان ان هند حالتها كويسه / الله يبارك فيك والعقبالك …
هند تسمع فيهم فى الدار الدخلانيه وتضحك …
-صالحة / كان نعرف كيف عرفتو وليد واشرف
-اشرف/ اداعه الاخبار اللى معاك شن وضيفتها امالا
-شهد تضحك / الحق فيا انا اللى قلتلكم
-وليد / اصلا ماتقدرش تخلى فرصه زى هادى تفوتها
طيبو العشى هاديكه الليله .. وثانى يوم الصبح مشت لى امها رفعت معاها لحم وفرحتها بالخبر
____________________________________________
_
فى حوش مختار …
سحر راقدة على ضهرها فسريرها .. بطنها قدامها … ممكن فى الشهر السابع ولا اكثر … وخالد راقد فى جنبها فاتح تليفونه عالماسنجر …
سحر كانت فى نوم عميق …بعد شويا فاقت … تشبح لى
خالد شن يكتب فى … لقاته يكلم فى بنت .. يقوللها منين تبيه العشى
وترنها عيطه / خاااالد
-تلفتلها / خيرك رعشتينى الزفت
-سحر مش قادرة تتقاعد / وتحل فى فمك وتعيط يا مسخ .. منهيا هادى اللى تتكلم معاها ….. منهيا
-خالد / رتاج .. صاحبتى الجديدة .. ونتلاقى انا وياها كل يوم … وتبينى نجيبلها عشى .. ونسأل فيها منين تبيه .. عندك اى اسئلة ثانيه
-سحر قعمزت عالسرير/ وتقول فيها فى وجهى يا حقير ..
-خالد / عجبك هكى مرحبتين..ماعجبكش الباب ايفوت جمل
-سحر/ والله لما نحرش خالى
-خالد ياخد فى دجاكته / اسمعى .. عندى مكالمه شوى ثانيه .. ماتقعديش تفددى فيا بالانتظار
-سحر/ وين حبك ليا زمان .. وين وعودك ليا ان ماحد يخش حياتك غيري
-خالد / ماكدبتش عليك زمان .. كنتى بنت ناس وبيتيه ونويت معاك الحلال .. كنت نقولك مستحيل حد يخش حياتى غيرك .. مستحيل نخليك لى غيري .. لكن مع اول لمسه يد خش لى قلبي الشك .. واول ماطلبت منك بوسة طحتى طول … عرفتك اى كلام .. كارتى والواحد يضيع بيك وقته بس… لولا حلف بوى على امى بالطلاق.. اقسم بالله حوشى ماتخشيه
-سحر/ انا بنت عمتك كيف ادير معاى هكى ..كيف اديرنى للتسليه
-خالد/ لاناى لا امى ولا اختى.. ولا حتكونى فيوم ضحك الناس عليا
-سحر / ربي ينتقم منك
-خالد / حطى فى دماغك حاجه .. ان اللى فى بطنك لو جى بنت منعطيها لى امى تربيها .. لانى ماعنديش ثقه فربايتك بيش نخلى تربيلى بنتى
-سحر/ ربي ياخدك ونفتك منك
-خالد / هيا تشاو
___________________________________________
.
.
.
.
.
بعد اربعه شهور
حمزة متكى عالصالون الصغير وهند عالصالون الكبير
واضح على وجهها تعبانه .. الدكتورة طلبت منها لا تتحرك ولا تجهد روحها .. ولا يمسها راجلها طول فترة الحمل
-حمزة / شن جو البروفايل الجديد
-هند / قصدك متع قروب محاربات السرطان
-حمزة / اكيد … شن جوه تفاعلت معاكم الناس ولا شنو
-هند / اكيدة .. ماشاءالله عالتفاعل فى قروبنا وفى القروبات الثانيه .. لمينا هلبا تبرعات حق ابر الكيماوى للناس اللى معندهاش
-حمزة / باهى حلو
-هند / وتكلمت انا عالزوج وقداش يكون دوره مهم فى وضع مريض الورم
وحطت يدها على راسها / ااااه .. الم راسى مايبيش يوقف
-حمزة / خيرك حبيبتى
-هند/ مافى شى حبيبي.. يقولو الحمل يدوخ الراس .. مفروض خديت بندول
-حمزة / انتى شن بديري بيه البندول فكك منه
-هند / حتى انا فايتاته
-حمزة / تعرفى فحص متع كل سته شهور مفروض اليوم
-هند / اهو تشوف حالتى .. لكن شن رايك نمشو نديرو كشف مبدئي
-حمزة / سألت .. وقالولى جيبها .. لكن مش حيعرفو يوصفو مدى استقرار الحاله الا بالصورة
-هند / والصورة توة مستحيلة مع الحمل
-حمزة / ربي كريم ومدامه فرحنا مش حيتخلى علينا
-هند / والنعم بالله
.
.
.
.
.
بعد ثلاثه شهور …
جابت هند وهيا فالسابع بنوته زى القمر .. دارولها عمليه .. ورقدو البنت فى الحضانه لانها ناقصه شهرين
-نادية / شن بتسموها
-صالحة / كانا عليا انا نبيهم يسموها نرمين .. بيش يقعد اسمها فى الحوش .. لكن هما على راحتهم
-نادية / زعما مش مطلعينها حتى اليوم .. اهو ليها ثلاثه ايام وهدا الرابع
-صالحه / عيادت يحبو يلهفو .. وعلى شنو خايفين
جى حمزة للممر لقى صالحة وناديه مقعمزات
-حمزة / خيركم مقعمزين هنايا.. تفضلو خشو لداخل للغرفه
-صالحه / الممرضه تغيرلها
-حمزة / ماشاءالله عنايتهم كويسه
-ناديه / شن سميتوها البنيه
-حمزة شبح للممر وابتسم / سجلتها هند
-نادية / هيا هند وامها هند
-صالحة / العيل اللى ينزل قالك مالاول ينزل اسمه معاه.. مبروك عليها الاسم هنودة
-ناديه / مبروك عليها
-حمزة / زعما مش مطلعينها حتى اليوم … عمامها بيهبلو يبو يشوفوها
-صالحه / اي والله .. عمامها الثلاثه.. كل واحد شرى حاجه وهما ياخدو ويبضعو
.
.
.
عاشر يوم …
روحت هند لى حوش صالحة .. دارولها عقيقه كبيرة …
وبعد عشرين يوم دارت هند صاله وصدرت بالبدلة الكبيرة
قبل ماتخش حمزة معاها فى الغرفه الخارجيه وخايف عليها
-حمزة/ لا ماتشديهاش بى يدك .. تخافى اطيح منك
العاملة واقفه معاهم / عندنا كروسه لو تحبي نجيبهالك
-هند / ايه جيبيهالى
طلعت العاملة …
شدتها ناديه / بتخش ولا مزال ..شن يديرو لداخل
-العاملة / بنجيبلها الكروسه .. لو تحبي خشيلها
-ناديه / مانقدرش نخشلها وجهى مكيج ..
مشت ناديه جهه الباب
عمتك فاطمه مقعمزة فى مكان استقبال الناس / اختك وين
-ناديه / اهى بتجى غير بيجيبولها كروسه ادخل هند الصغيرة فيها
-فاطمه / ايه احسن ماتقعد قايمتها بي يدها بتعبها
دارو حفله بالزمزامات والكيكات والعشى القنين
.
.
.
.
بعد يومين
-هند / وهند لمن بنخليها .. صالحة اختى ماشيه تعزى
-حمزة / نحطوها عند اختك ناديه .. المهم انا خديت موعد ولازم غدوة الصبح تمشيله
-هند / حاضر …..
-حمزة / هنودة … حبيبة بابا
-هند تشبح فيهم ومبتسمه/ ترا مدلى ترمس المية
مد حمزة يده عطاهولها
-هند / تمنيت نرضعها طبيعى
-حمزة / سيورك تحملى وتجيبي وترضعى انشاءالله
-هند / ياااارب
_________________________________________
_
ثانى يوم
حطو هند الصغيرة عند مودة بنت ناديه ومشو للعيادة .. وياريتهم مامشو …
-الدكتور / خوى انتم وين كنتو راقدين .. مقارنه مع صور المانيه .. واضح ان الورم رجع بحجم اكبر .. وضرورى من استئصاله .. وضرورى من الكيماوى بعده
حمزة هربت عليه .. معش يشوف فى شى … ماتكلمش حتى كلمه .. حده طلع وخدى هند من يدها ومشو للسيارة
-هند تبكى/ خيرك .. الورم رجع
-حمزة / لااا..
-هند / امالا شنو
-حمزة / تعاركت معاه خاطر بعتنى لى دكتور فى صبراته ..
وانا قلتله بعيد
-هند / عادى حبيبي خيرك .. نمشو توة مدامه مودة ماعندهاش جامعه
-حمزة / هدا اللى بيصير خلى نتوكلو
وطلعو طول توجهو لى صبراته … خشو للقسم ..لى دكتور معين … المشكلة ان مكتب الدكتور هدا قريب من ممر المرضى اللى ياخدو فى الكيماوى
حمزة وهند مقعمزين عالكراسى ويسمعو فى واحد يعيط / ياااربي خود امانتك … ياااربي رانى معش متحمل …تعبت بوى وامى معاى قعدو ماشيين جايين ودفعو اللى فوقهم واللى تحتهم …
هند بدت يدها ترعش
وهوا يعيط / ياااربي خود امانتك ..
وواحد ثانى ينين / اااه … اااه
المهظ دارو الصورة وروحو …..
.
.
.
بعد اسبوع …
حوش هند معبى .. يسقدو فيها .. الفجر بتسافر تركيا المانيه .. كلم فوزىايأجرله نفس الشقه
-فوزى متأثر/ معقولةةةةة.. قصدك رجعلها الورم ثانى
-حمزة / امالا ليش اسمه الخبيث .. لانه يخدع فى بنادم .. يحساب روحه تهنى منه .. يلقاه مباغته وراجع بقوة اكبر من الاولى
.
.
.
.هند توصى على بنتها / صالحة .. بنتى فى رقبتك سواء روحت ولا ماروحتش
-صالحة تبكى / توة علاش الكلام هدا يا هند .. هوينا مشيتى المرة الاولى وروحتى لا سو لا سوية
امها مقابلتها تبكى وكان لاقيه تعيط تلم ليبيا كلها
-ناديه تبكى وتهمس/ ياااربي وخيتى .. ياربي اشبح فيها
-هند / وانتو يا نادية ومفيدة .. صالخة صارلها اى ضرف بنتى عند وحدة منكم
مفيدة تبكى وخلاص .. تلمدو عليها المواجع كلها ..
ومودة وسحر وسلمى وانتصار يابسات فى مكاناتهم ودموعهم زى المطر من اثر الصدمه
اما مختار ومنعم وصغار خوتها يبكو فوق فوق قدام التريس
.
.
.
.
ثانى يوم …
سقدوها خواتها وهما بوس وسلام حار وبكى .. وامها صار فيها ما صار وهيا تسقد فى بنتها
ركبو مشو لى تونس .. وعلى قد ماشدو فيه خوته ان واحد منهم يمشى معاه رفض .. قاللهم اصلا الشنغن صعب انهم يحصلوها.. هوا وهند كانت عندهم اصلا
وصلو المانيا..
حمزة رفعها طول للمستشفى اللى كانت فيه .. الدكتور دارلها دخول وقررلها عمليه
-هند / وصيتك بنتى يا حمزة ..
-حمزة يبكى / انتى بتسكتى ولا كيف .. سايرناك ..كلمناك بالباهيه وانتى شى دماغك مصكر زى هالحيط …قلنالك الدكتور قال حالتك عاديه .. عمليه وكيماوى وبتروحى
-فدوى جنب هند تبكى/ شن صايرلك ياهند .. المرة الاولى كنتى قويه وشجاعه.. علاش اديري هكى لى راجلك قطعتيه بالعرق
-فوزى فى جنب حمزة / مش هكى يا حمزة هدى خلوقك
تلفت حمزة لى هند لقاها تشبحله … مشالها وعلى طول حضنها وقعدو يبكو …
-فوزى شبح لى فدوى / هيا
طلعو فوزى وفدوى وخلوهم حاضنين بعض ويبكو …
فالممر
-فوزى / مسكين حمزة
-فدوى / خيره المرة هادى متغير ومنهار
-فوزى يمسح فدموعه / الدكتور مش عاطى امل .. قاله اتأخرتو هلبا.. حتى العمليه مشكوك يصير منها
-فدوى بدت تبكى وشاده فمها ماتبيش اطلع صوتها / مش معقولة … وووه عليا ووه
-فوزى / هدا علاش هند زبطت ان المرة هادى الامر غير .. لانها قرتها فى وجه حمزة
.
.
.
.
بعد خمسه ايام
قيس ادان المغرب
حمزة من اول يوم شبه مقيم مع هند فى دارها ….
-هند تبكى / حلقى جاف
-حمزة / نجيبلك ليمه قارصه حبيبي
-هند / جيب
طلع حمزة فيسع كلم المترجم بيش يطلبله ليمونه قارصه .. وخش للغرفه .. مايبيش يفارقها دقيقه ..
قعمز جنبها حضنها / خيرها العمليه اجلوها
-حمزة يتعدر/ تقريبا الدكتورمسافر
-هند بهدوء/ ربي يجيبه سالم …
شبحتله ووجهها هيا شاحب حالة/ قاعد تحبنى
-حمزة بدى يبكى /ربي ياخد من عمرى ويعطيك
-هند / منقولك كلام واسمعنى للاخير .. منغير ماتقاطعنى
-حمزة/ قلتلك منغير ماتقاطعنى
رقدها عالسرير ورقد جنبها وضمها لى حضنه …
-هند تبكى / كانا متت .. نبيك تتزوج .. وتعمر على روحك
-حمزة / ياهند
-هند / انا تعبانه ..بالله عليك ماتقاطعنى
ضمها ليه وسكت
-هند / نبى ندير لى بنتى خوت .. مانبيهاش تقعد بروحها ..
وكانا ربي خدي امانته اعطيها لى اختى صالحه .. لو صارلها ضرف خودها انت
-حمزة يبكى / ياهند خلاص راك قطعتيتى
-هند / حبيبي بنتى شاغلتنى لمن بنخليها
-شبحلها ويبكى/ وانا مش شاغلك .. لمن بتخلينى .. من بنحب … مع منو بنضحك .. منو اللى بنبصر عليها .. منو اللى بنفضفضلها باللى فى قلبي .. تربحى ماتخلينيش
انفتح الباب .. خشت الممرضه جايبه ليمه قارصه مقصوصه نصين …
خدى حمزة نص وعصره على شفايف هند .. نزلت لى حلقها
هند / اااه … ريقى كان جاف بكل …
.
.
.
بعد نص ساعه ….
ادن العشاء فى تليفون حمزة
-هند / حبيبي جيبلى الرشادة متع الوضوء خلى نصلى
-حمزة / باهى .. حتى انا بنصلى..
صلت هند العشاء .. وصلت حمزة على جنب الغرفه حتى هوا ..
كمل حمزة الصلاة وشبحلها
-هند / ماتبيش تحضنى
-وقف حمزة ومشالها / اكيدة نبى نحضن حبيبتى
خداها بين ايديه رقدها على صدره …
-هند / انحبك
-حمزة / نموووت فيك … ربي ياخد. من عمرى ويعطيك
-هند / احضنى صقعانه
-حمزة يضحك / خيره سنونك يطقطقو
-هند / شوره بتجينى برده
-حمزة / بعيد السو عليك .. تعالى فى حضنى ندفيك …
خداها فى حضنه وهما ساكتين … بس حمزة حس ان هند صقعت …
قاملها راسها / حبيبتى
راسها طاح
-حمزة يرعش مع بعضه ويخض فيها بين ايديه / هند .. هند حبيبتى ردى بالك تموتى … افتحى عيونك …
تعلى صوته / هند … افتحى عيونك .. ماتموتيش
ويبكى بالصوت العالى خشو الممرضات يجرو طلعوه ..
طلع للممر يتلاقى نع فوزى وفدوى جايين بي زورو
كل الليبيين والعرب تلمدو عليه … لانه واضح كام مكسور بروحه حبيبت حياته توفت …
جابها على رجليها روح بيها فى تابوت .. الوفاة ماحد يندرى عليها حد الا مختار ومنعم ووليد … لانها قعدت فى المانيا يومين لين جي موعد الطيارة
وصل بيها ليبيا يوم الخميس.. واول حاجه مسكها حمزة بيده بعد ماوصل طرابلس هيا بنته هند لانه موصى خوه وليد يجيبهاله .. من لما شدها ماتحولتش من حضنه ليلتها كلها وهوا يبكى … ثانى يوم جابو التابوت .. وعرو على وجهها .. شافوها خواتها وبنات خوتها وعويلتها وامها … ومسك حمزة بنته وحط خدها على خد امها وعباهم الزوز بالدموع منغير مايحس.. خدوها منه رفعوها لى صالحة .. ..جنازتها كانت يوم الجمعه ضهرا … ودفنوها وكانو الصلايه عليها هلباااااا . ..
طول الجنازة وحمزة ساكت وخلاص كأنه عايش فى كابوس وبيصحى منه … يتخايل هاديكة السنه اللى عاشوها فى المانيا كانت بي الف سنه … حس انه وحيد بروحه فى الدنيا بعدها
وربي يرحمها ويغفرلها …يقولو انها كانت بنيه طيبه ..قعدت بسيرتها العطرة .. ورحلت بسيرتها العطرة .. على فكرة انا عزيت فيها لانى نعرف اختها ناديه .. يوم الجنازة اهلها قريب يهبلو .. وقالو ان راجلها قريب يهبل …ربي ماعطاشى صبر حتى شويا
نادية ليا فترة ماكلمتهاش ..ومتعرفش انى بديت نكتب اولامس كلمتها وقلتلها انى كتبت قصه اختها هند والبنات … قرت القصه واتأثرت هلبا لدرجه رفعوها للمستشفى … وبعتت معاى كلمه شكر لكل انسانه تابعت القصه واندمجت فيها …
وللعلم كل الاسماء الاصليه مغيرتها وجبت اسماء من عندى
والشكر الجزيل للغاليه Marwa Almabrok على تصوير كل صور الرواية وفيديو اليوم
كل من تابعت معانا الرواية ادير لايك خلى نشوفو كم تابعتها معاها وحدة
وربي يحفظ الجميع
تمت ?
.
.
نحبكم هلبااااا❤