رواية ابتزاز بقلمى زهور جمال الدين

#ابتزاز

بقلم زهور جمال الدين?
?الحلقه 14?
“حقيقيه ممزوجه بالخيال”

_

فى حوش مفيدة

روح صهيب للحوش لقى مفيدة مقعمزة راسها يوجع فيها خاطر كانت تتناقش مع سحر

-صهيب / السلام عليكم
-مفيدة منغير نيه /وعليكم السلام

-صهيب / كلمت مجدى صاحبي عالصالة متع حوش خاله .. .. عالاقل قريبه .. نقصلى 500 دينار وقالى هات التاريخ بس
-مفيدة / ياوليدى تفاهم انت وبوك فى هالمواضيع .. قالى انتى ماتدخليش

-صهيب قعمز جنبها / اسمعى يااام .. مش بتفوتوه عليا .. فيكم حاجه مش مفهومه انتى وبوى ..
-مفيدة فاقت لى نفسها / لااا يا وليدى شن فينا

-صهيب باشمئزاز / ماكمش فرحانين .. واللى نكلمه يبعتنى للثانى .. والبنت وجهها مظلم .. تشوفنى تهرب

-مفيدة عيونها دموعو قريب انفضحت / مافى شى .. بوك مايبيش خالد .. وانا شادة فى ولد خوى .. هدا علاش تلقانا الزوز مش متفاهمين

-صهيب/ باهى مدامه بوى مايبيشى .. خلاص فوتوه
-مفيدة / والفضانيه اللى درناها..والناس اللى عطاهم بوك كلمه

-صهيب/ مش قلتى بوى مش راضى .. خلاص نفوتوه الموضوع … ومش اول بنت تفسخ

-مفيدة بحزم / ولد خوى عطيته بنتى وانا حرة فيها .. بتوقف مع اختك فى عرسها باهى .. ماكش فاضى بلاش … لكن نفسخو من ولد خوى .. استحالة

سكت صهيب ومشى لى داره

__________________________________________

_

فى حوش حمزة

طلع حمزة للبلكونه بينشر الحوايج .. لقى فوزى واقف في

البلكونه متع شقته … شافه حمزة قام يده قعد يحيي فيه

.. لكن فوزى خش دار روحه ماشافاش…معش فيها كيف ..

حمزة ركب الدم لى ودانه … طلع من البلكونه مشى للباب ..

فتحه وطلع طق على حوش فوزى ..فتحت فدوى الباب

-حمزة واضح عليه متكنطى/ مساء الخير
-فدوى/ مساء النور

-حمزة / ناديلى فوزى نبيه.. وماتقوليش مش قاعد لانى شفته فى البلكونه
-فدوى تلخبطت / هوا يصلى

-حمزة / هوا قالك قوليله يصلى !!.. صح ولا … ناديهولى
-فدوى / حاضر… تو نشوفه
وتلفتت بتخش للحوش

-حمزة/ خيرك ماسألتينيش كيف حال هند
-تلفتتله وعيونها معبيات دموع / كيف حاله هند

-حمزة / الحمدلله .. بدت تستجيب للعلاج
-فدوى / ربي يحفظها ويطول فى عمرها يااارب .. ويحفظك ليها طول العمر

-حمزة / ناديهولى
-فدوى / حاضر

وخشت بتنادى فوزى

__________________________________________

_

فى حوش مختار

-وداد/ انا بروحى قاعدة عايشه عند عزوزتى .. كيف تبينى نزيد كنه معاى فالحوش
-خالد / وشن فيها .. زى ما سكنتى انتى عند حناى .. تسكن هيا عندك

-وداد/ زيد الخرا عالنافس
-خالد يشبح للروشن / والله هدا اللى عندى .. الحمدلله انتم من اول يوم درتولى دار بروحى .. واحمد ومحمد فى دار بروحهم ..
تلفت لى امه / نشري موبيليا ونحطها فيها وخلاص

-وداد / ياوليدى ماتجهلش روحك ..هادى مراة متزوجه وعندها راجل … كيف بتخش لى حمام مشترك مع سلافها وشيبانيها…
-خالد / حتى انتى كنتى مراة متزوجه ومع هدا خشيتى حمام مشترك

-وداد / يا همى انتم صغارى …
-خالد وقف / اسمعى يااام.. بيش انأجرلها حوش بروحها هادى بعيدة على سنونها وسنون امها … عارفها عمتى مفيدة هيا اللى تنقرز عليك .. قوليلها ولدى قالى بنسكن بيها فى دارى هنايا فى حوش بوى

-وداد / وكانا سألتنى علاش ماتبيش
-خالد / قوليلها لانى ماعنديش ثقه فى بنتك .. نخاف بنتك تبدا كارتى .. واللى يجى يركب

-وداد وقفت متعصبه / اعود بالله منك ..ومن شيطانك .. اطلع يا مسخ وخلى عرق الحيى بينى وبينك
-خالد / هيا بالسلامه .. العشيه انزلى انتى والبنات لى حوش حناى …بنجيب دار النوم بيركبوها العمال

-وداد / ماتجيبش شى لين تشاور بوك
-خالد / شاورته وقالى غير خودها اللى بيدره باهى

وطلع وصكر الباب وراه وخلى امه تاكل فى بعضها

____________________________________________

_

قدام حوش فوزى

حمزة واقف قدام الباب .. يراجى فى فوزى .. وواضح ان فى نقاش لداخل …

بعد شوى …

طلع فوزى / اهلين حمزة
-حمزة / البس كندرتك واطلع
-فوزى مواطى راسه / باهى.. شوى بس

خش حمزة للحوش كلم هند

-حمزة عيونه حمر / شوى ونجى باهى
-هند انشغلت / خيرك يا حمزة .. فى حاجه

-وقف جنبها وباسها على راسها / ماتخافيش يا غاليه .. غير قلت نحل هالفزورة ونعرف جيرانه خيرهم
-هند / وراس حبيبى ماتتعاركو

-قعمز قدامها عالسرير / خايفه عليا
-حطت يدها على يده / انت روحى ..ومانتحملش اى حد يقولك اى كلمه
-نزل باسها من شفايفها / محلاااااك
هند ابتسمت

طلع حمزة برة .. لقى فوزى واقف يراجى فيه … نزلو مشو على رجليهم للقهوة .. قعمزو على طاولة وطلبو قهوة

-حمزة / قول اللى عندك
-فوزى تلفتله / وشنو اللى عندى

-حمزة / باهى نقول انا
-فوزى تلفت للشارع / قول

-حمزة / هند ليها اسبوع مروحه .. معقولة فدوى تجيها مرة وحدة ..
-فوزى/ صحيح احنا قصرنا معاكم المدة هادى

-حمزة / انا لا طالب منكم عوالة ولا طياب ولا غيره .. انا نبي نعرف خيركم .. شن جاكم .. شن سامعين
فوزى انهار وبدى يبكى
-حمزة / الناس بتنتبهلك … خيرك يا فوزى

-فوزى / احنا كانت صايرة فينا حوسه الله لا توريك
-حمزة / الف سلامه عليكم .. خيركم

-فوزى شبحله / انا متحشم منك .. ومش قادر نوريلك وجهى
-حمزة فهم / خيرك شن فى

-فوزى / علاش ما قلتليش على حياة
-حمزة تلفت للجهه الثاتيه / خيرها حياة

-فوزى متعصب ويواطى فى صوته / انا طلقت مرتى الايام اللى فاتو
-حمزة انصدم / اااه.. طلقت فدوى… ليش

-فوزى / مفيش داعى
-حمزة / لا ادوى .. شن فى

-فوزى / لقيت وشاح اختى حياة فى حوايجك
-حمزة بدى يرعش/ انا يا فوزى اقسم بالله ..

-فوزى / منغير ماتحلف .. انا عرفت الحقيقه كلها
-حمزة/ غير احكيلى كيف صار بيش نفهم

-فوزى / لقيت الوشاح ..خليت فدوى تطلع ..و خشيت لى دار اختى حياة بنكلمها .. قلت ليش نفضحو فى روحنا قدام بنت الناس ..
-حمزة / باهى

-فوزى / قلتلها الوشاح هدا ليك … ردت عليا بدون ماترعش ولا يبان عليها شى .. قالت صح وشاحى .. لكن امس خداته منى فدوى
-حمزة / الوسخه

-فوزى / وين تلقانى عاد .. ناديت فدوى وواجهتها …كلمه منى كلمه منها ضربتها وطلقتها
-حمزة / لا حول ولا قوة الا بالله

-فوزى / ولما رجعلى شهد عقلى .. رجعت للكاميرات متع العمارة وتأكدت من كل شى بنفسى .. واجهتها واعترفت وحكتلى كل شى بالتفصيل
-حمزة / ومرتك

-فوزى / لا فى عصمتى الحمدلله
-حمزة / الحمدلله اننا صحاب وماخشش بينا الشيطان .. كنهدا مايحزها غير الدم ..

-فوزى / انا مااواجعنى شى غير فدوى اللى صار شق بينى وبينها .. وتعاملنا مع بعض تغير.. كنا شخص واحد .. وتوة واخدة منى موقف طول اليوم
-حمزة / ياراجل لز العفن من حوشك

-فوزى/ سفرتها .. ليها يومين مروحه
-حمزة / بس مكانش فى داعى تقاطعنى مدامك عرفت الحقيقه

-فوزى / تحشمت منك ..مهما يكون راهى اختى
-حمزة / باهى فوت الموضوع .. وتعالو نتعشو مع بعضنا اليوم

-فوزى يمسح فى دمعه عينه اليمين / باهى خلاص ما ديرو شى .. تو نقول لى فدوى ادير عشى قنين ونجوكم بعتالى.. بالك هند تقنعها وتصالحنا على بعض
-حمزة / تمام … مرحبتين بيكم

___________________________________________

_

بعد اسبوعين …

هند انتقلت للمستشفى …… حامل ?

-هند تبكى / ليش ايصير معتى هكى يا ربي .. والله ماعمرى ظلمت حد فالدنيا
-حمزة حاط راسها على كتفه وايديه على راسها اللى فيه هلبا دوائر صلع / معليشى حبيبتى …نصيب .. وماتقوليش ليش انا بس .. ماتكفريش بالله واستحمدى

-هند مغمضه عيونها / استغفر الله العظيم من كل دنب عظيم ..الحمدلله على كل حال
-حمزة / احنا اللى غلطنا .. غلط انك تحملى توة وانتى تاخدى فى الكيماوى

-هند / باهى يخلوه ..لو طلع مشوه انا راضيه بيه
-حمزة حضنها/ حبيبتى .. ماتعانديش قضاء الله .. وزى ماحكينا.. لازم الاجهاض يصير برغبتك ورضاك بيش ماتصيرش مضاعفات

-هند / انت ماتبيش صغار منى
-حمزة / انا نبيك انتى .. حتى لو ضحيت بالصغار

-هند حضناته بقوة / ربي يخليك ليا .. مش عارفه كيف بنكافيك على حنيتك وتصرفاتك معاى
-حمزة / ربي ياخد من عمرى ويعطيك

-هند / تحبنى
-حمزة / هلبااااااا

ردها للسرير / شنو نوقع
هند ساكته
-حمزة / مش حندير شى منغير رضاك

-هند / اللى بديره انت باهى
-حمزة / انا بنوقع عالاجهاض
-هند / باهى

غطاها كويس وطلع برة .. جوه فدوى وفوزى يجرو

-فوزى / هااا شن صار
-حمزة / وافقت .. خلى نمشى نوقع بيش يبدو فالاجراءات ..

مشى فالممر / تو نجيكم …

فوزى وفدوى رجعو قعمزو عالكراسى

-فدوى / ربي يهديهم .. كانو صبرو شوى على مسألة الحمل
-فوزى/ الراجل عريس .. يعنى بيحرم روحه

-فدوى / لكن هند تعبانه …وتاخد فى الكيماوى
-فوزى / يعنى بيغتصبها .. بالتاكيد كل شى تم بارادتها .. نقولك عرساااان

-فدوى / مش عرسان .. غير الصبر مهناش
-فوزى/ صدقتى فيها …
قرب منها / واحنا نقدرو نصبرو عليكم ??

اجهضت هند جنينها .. لان الكيماوى خطر عالحمل …
قعدت خمسه ايام فالمستشفى …باعتبار ان حالتها تبى متابغه سادس يوم روحت للحوش .. ورجعت لى رحلة معاناتها مع المرض

____________________________________________

_

يوم الخميس فى حوش مفيدة

دايرين صالة متنقلة قدام الحوش .. ناس مقعمزة عالطاولات
مش كل المعازيم جوهم ..

فى صالة الحوش لداخل .. مفيدة وناديه مقعمزات مع بعض
عالصالون

-مفيدة /اقسم بالله مانزيد عليك غير النفس…حدفو هاديكة الخمسه لاف ومشو…. منها مهرها ودهبها وحريرها والمزين والفيلو .. شن بيديرولى وتشبحى فى الدنيا كيف غاليه زى النار
-نادية / باهى وكيف درتى ..

-مفيدة / بعت حديتى بيش اجرت الفيلو ودفعت للمزين
-ناديه سخفتها اختها / خيره صهيب ماعطاهاش

-مفيدة / صهيب قداش منه دفع العشى والعصير والشوكلاته
..وشرالها جلابيه خلابيه خليجيه ..هداكة حد جهده
-ناديه / والله حتى اوخيك مختار هداكة حد جهده ماتشوفيش روحك عرس بنيه .. هوا عرس ولد ..يبي غدى تريس ويبي دار نوم .. ويبي ويبي …خالد شن عنده ..كله دفعه بوه راهو

-مفيدة / كانا باعت حديدة من حدايدها قولت اعطو المبلغ هدا لى كنتى تأجر بيه الفيلو والمزين شن بيصيرلها
-ناديه / ياسبحان الله .. هدا علاش انا مانشجعش زواج الاقارب .. قبل شهر كنتى صحاب واحباب انتى ووداد .. شوفى توة الكلام تغير بعد تناسبتو

-مفيدة / لا لا .. لا تعادينا لا شى .. غير كلام الحق وجاع
..كانها برانيه راهم ماخلو ما دارلوها .. لكن الله غالب بنت العم وزرة سودة .. وين ماتمسحى فيها مايبانش ولا يطلع للناس
-ناديه / الله غالب نصيبها ..

خشت صبيه لابسه قفطان ومتكمه / مرت عمى .. قالتلك امى اطلعى الناس بدت تجى
-مفيدة / اهو بنجى

تمت الحفله وروحو بالعروس لى دارها

___________________________________________

_

فى حوش صالحة ..

مقعمزين اشرف ووليد وحافظ يهدرزو .. وفى نهايه الصالة مقعمزين شهد وصالحه

-صالحه / ياودى انا مازعلانه من حد
-اشرف/ مهما يكون يااام .. امتى هيا نرمين اللى خالتى دايراته عرس كامل زيطا وزمباليطا

-وليد / ياراجل الناس بضروفها .. ماتعرفش شنو اللى خلاهم يديرو الغرس فيسع هكى
-حافظ / مافيش سبب .. هكى مش حاسبين حد وخلاص

-صالحة / قالو خالد بيسافر
-اشرف / وصدقتيهم يااام

-وليد / وعلاش بيكدبو يا ناس
-حافظ / ياودى فوتو الموضوع توة وخلاص

-وليد / كانكم عالزواج .. حتى حمزة اتزوج
-شهد / حاشاه حمز ..وين العرس اللى داره قري فاتحه وسافر

-صالحة / ولا هيا دارت عرس .. قرو الفاتحه وطلعو
-اشرف/ لكن حوش خالتى …..

-قصت عليه امه / خلاص انهونا الكلام هدا كله … واللى تزوج ربي يهنيه .. واحنا مالايمين على حد

___________________________________________
.
.
.
.
.
.

بعد 3 اشهر …

هند راقدة عالسرير ولابسه طاقيه على راسها .. وحمزة مقعمز مقابلها عالسرير

-حمزة بهدوء / لازم تاكلى حبيبتى
-هند تساوى فى الطاقيه على راسها / والله مانقدر ناكل حاجه .. نفسى مسدودة

-حمزة / انتى حالتك ساءت بعد طاح شعرك
-هند عيونها / لا لا عادى قالى الدكتور تو يرجع يطول

-حط يده عالطاقيه / خلينى نحولها
-نزلو دموعها / لاااا

-حمزة / حبيبتى تعرفينى نحبك ولا ..وتعرفينى مانستغناش عليك ولا.. وتعرفينى نقولك فالحق ..نواجه فيك ومانجاملش
هند تشبحله وساكته

-حمزة / شكلك هدا بيقعد شهور … خلينى نتعود عليه .. ليش حاطه هالطاقيه على راسك وادرقى فى روحك
-هند متفاجئة / علاش تقولى هكى

-قعمز جنبها وحطها على يده ولفتها ليه/ لان هدا الواقع .. انا راجلك وانتى مرتى .. نعيشو مع بعضنا عادى زى ما حنا .. مش ادرقى فى روحك عليا
-هند / معش بتحبنى بعد تشوفنى بلا شعر

-حمزة / اهو نشوف فيك منغير حواجب وقاعد نحبك
-هند / خلينى بالطاقيه … حتى انت مش قالك منى

-حمزة / ولو شفتك منغير شعر كيف منقلق منك ترا
-هند / منعرفش

-قرب وجهها من وجهها وباسها على شفايفها / قصدك معش منرقد معاك لو شفتك منغير شعر .. غير احلمى
-هند ابتسمت / سبحان الله .. كل موضوع يجيبه للموضوع هدا ..

-حمزة / لا لا فالموضوع هدا بالدات عادى …لان بعد يطفى الضى كل النساوين تتساوى ?
-هند / وكانا قعد الضى والع

-حمزة يضحك / شريرة …تى نحبك يا بنت… اضحكى.. ريتى كيف بديتى جريئة وكل مرة تحدفيلى كلمه حلوة
-حط ايديها حوالين رقبته / وانا نحبك يا قلبي .. ومن عاشر القوم اربعين يوما
-حمزة ?/ اصبح منهم

حضنو بعضهم وهما ساكتين …
بعد لحظات …
-حمزة قرب من ودنها / نحولها الطاقيه ..
حشت راسها فى رقبته
-حمزة ضمها ليه بقوة / على خاطرى يا روحى
-هند / على راحتك

حول حمزة الطاقيه من عليها .. هند حشت راسها اكثر فى رقبته

-حط يده على جبهتها يبي يباعدها / غير خلينى نشوفك بس
-هند / لا
-حمزة / هيا حبيبتى عاااد

بعدت هند راسها وشبحت لى حمزة

-حمزة/ الله .. عالجمال
-هند / شفتنى … ارتحت توة
حول حمزة من المخدة وقعمز مقابلها عالسرير/ ايه توة بس ارتحت ..
وحط يده على راسها كله صلعه / هند .. اللى قالك نحبك لازم يكون يحبك بكل اشكالك
-هند / انت ليش تعامل فيا هكى …

حط يده على كتفها وقربها ليه قعمزت قدامه/ لانى بالفعل نحبك … مش كلام وخلاص
-حضناته / يااااربي كيف صار فيا منغيرك …
بعدها وحول تيشيرته من فوق قعد منغير حوايج/ حتى انا نسأل … ياااربي كيف كان بيصير فيا منغيرك

-هند / كل واحد محتاج الثانى ولقاه
-قرب منها/ وانا محتاجلك هلبا .. ونبى نلقاك

ورقدها عالسرير وخلى الضى مفتوح … نزل عليها يبوس فيها …يبي يعطيها ثقتها من نفسها

___________________________________________

.
.
.
.

فى صالة حوش مختار

-مفيدة / ماهو كانا بتقعد معاملته ليها هكى لازم تكلموه .. والله غير خوها قاعد ماسمعش منى .. كنهدا اقسم بالله مايسكت
-وداد / توة انتى هدا كله على شنو يا مفيدة

-مفيدة / معقولة البنت راميه ( اجهاض) .. ليها يومين فى المستشفى مايمشيش يروح بيها
-وداد / يا مفيدة عنده شغل.. حتى انتى ماتقعديش ادققى على كل شى

-مفيدة / شن تقولى يا وداد .. يعنى عندك عادى لما تروحى بيها انتى وخالها من المستشفى .. كيف الناس تتحشم .. كيف كنه مروح بيها شيبانيها رامية
-وداد / احنا عندنا عادى راهو

-مفيدة / هداكة لما نبدا برانيه ومش عارفه اطباعكم وعوايدكم
-مفيدة / انتصار … يا انتصار
-انتصار من المطبخ/ نعم يااام

-مفيدة / هاتى الشاهى لى عمتك
-انتصار/ اهو جايه هى

-مفيدة / ولدك وين بسلامته
-وداد بدت تتصفر وتتخضر/ خالد فى تونس
-مفيدة / معناها حق زى ماقالولى ماشى لى تونس يحضر فى مبارة

-وداد / يا مفيدة .. لما يجونا بناتنا ويعاودولنا دوتهم الخصوصيه مع تريسهم ولا يعاودو دوة شيابينهم الخصوصيه .. المفروض ماندخلوش ونعاركوهم بيش لا يعاودولنا ولا يحكو للناس

-مفيدة / وانتى من شنو خايف وداد .. شن عندك مدسوس ماتبيش الناس تعرفه
-وداد / لا لا والله … ماعندى مدرق .. وخلى تعاود براحتها

وقفت مغيدة / خلى نمشى نشوف بنتى تو راهو ناقصتهت ميه حاجه ..
-وداد ?/ خودى راحتك

_________________________________________
.
.
.
.
.
بعد 4 اشهر

المترجم يحكى لى هند وحمزة / الحالة استاجبت للعلاج والورم ولله الحمد اختفى … عندك اكل حتكونى ممنوعه منه .. وبعض المشاريب .. وعندك توصيه بي بعض الفحوصات الدوريه خلال اشهر … رح يعطوكم ملف الحالة كامل وتتلعو عليه وتفهمو اكثر

-هند / يعنى نقدر نحمل توة ولا مزال ..
تلفت المترجم للدكتور وسأله .. وبعدين تلفت لى هند / بعد شى ست اشهر تقدرى تحملى طبيعى
-حمزة حضنها / الحمد لله ..
وتلفت للمترجم / يعنى نجهزو نفسنا للسفر
-المترجم / طبعا
-هند / بس اخر سؤال
-المترجم / اتفضلى
-هند / شعرى بيرجع يطول
-المترجم / هوا حيكون خفيف جدا .. مش مثل شعرك الاصلى .. بس رح يطول ماتخافى ..

فرحو حمزة وهند ..روحو للشقه وجهزو شناطيهم

___________________________________________

تمت …. ويتبع

لايكاتك يا قلبي .. بطلى تقري وتهربي نشبج فيك راهو ?
لايك +تعليق
الحلقه الجايه هيا الاخيرة …نشوفو شن بيصير فى هند

نحبكم ❤❤❤