رواية أنحراف فوشيكا

انحـراف فوشيـكا ?
بقلم فاطمه سالم..
الحلقة الأولى ?
…….

ريحان: اريام هيا تعالي نلعبو
انا: هي جايه خلي نسأل ماما

…
انا: ماما نبي نلعب

التتفتلي امي بنظره كلها شر: قعمزي واهفتي كيف بنيات وعدي ضمي الحوش

شديت في نهايه فلينتي بخوف وعيوني زغللو:به نضم حوش بس نلعب!

امي بنفاد صبر: تحركي من قداامي

….
مشيت لي دار بابا وماما وحطيت ايديا في وسطي وقعدت نشبح بتمعن حكيت راسي بحيره وقلت: كيف بنبدا ?

طلعت من دار وخشيت بلكونه وخديت مكنسه اليد وحطيتها في دار ورجعت للممر وخديت مكنسه كهربائية وكيسه وقربتها من دار…
وقعدت نمسح وغبره تجي على وجهي لعند نشرق وشعري تعبى تراب ومسحت تراكين وحولت شبابيك عنكبوت وتراب…..وجيت للسرير حولت من عليه الفراش وحولت شوي من لوحات باش نمسح من تحته… وحولت تراب ورفعته حاجر لي على سرير باش نطلع التراب…. وقعدت نلم في تراب ونحط فيه في الشكاره بيديا…. واخيييرا قربت على انتهاء… قعدت نمسح في عرق من جبيني وزدت لبزت روحي بتراب ?وخديت مكنسه كهربائية وولعتها وقعدت نشفط في باقي تراب ومن تراكين ضيقه وهك وبعدين خديت كتانه وبليتها بشوي مايه وقعدت نلمع…… خش باب

بابا: شن ديري يايابنتي

مسحت عرق من على جبيني وتكلمت بتعب: نظف في دار

بابا: صحه سلم بنتي لكن واعر عليك

وشوي وجت ماما…

ماما بعصبيه: حي شن ديري من قالك تقريبها الدار هدي ماقتلكش نظفيها اني!

بابا بنفس نبره: دار هدي مفروض انتي تنظفيها مش بنتك من كثر اهمالك تنظفها….. وعدا بابا….

ماما: تو نوريك يا جيفه شن قربك هاا سبب مشاكل بيني وبين بوك انتي ان شاء الله نترزه فيك ودار هدي تقعد بعدك

خنقتني عبره: ك.. كنت نبي نديرهلك مفاجئه ?

ماما: طيح سعدك ومزالك فرقه معاونتك ليا عدي عفنه تاكل كبدك
….. وطلعت….

…..
لوحت كتانه من ايدي وقعمزت نبكي بكسره خاطر ?…
فيه كسر خاطر مهما تحاول تشرحه بالشكل اللي انت حاسه مش ح تقدر !
موعرها لما تبدا تتفنن وتتخيل بهجه شخص بعد مفاجئه وانت تبدا فرحان اكتر منه وحتى قبل ما يشوفها وبعدين بعد كل تعب هدا يرد رد بارد او تافه…

“- من كسر خاطرً سيُكسر له الله عشرًا ، ومن جبر خاطرًا ، سيجبر له ألفًا فـاصنع ما شئت ? ?”

…
وبكل براءة مسحت دموعي وابتسمت عشان تدكرت كلام ماما قالت لو ضميتي نخليك تلعبي ??

نضت نجري للكوجينه: مااااما

ماما وهي تغسل في ماعين: وميه تعميك خيرك تعيطي غلقه ان شاء الله

دبلت فرحتي وتكلمت بصوت هادي و مكسور: ممشش قتيلي ضمي الحوش نخليك تلعبي

ماما: وشن ضميتي يابعدي خليتيني نتعارك اني وبوك وارتحتي انتي ها ارتحتيي

وتفك طوبو شيشمه بقوه وجتني كيف غوله وفي ايدها غربال وقعدت تضرب فيا لدرجه يأست توقف رقدت على وطا لان كل ما نقاوم هي تتقواه وهي لا رحمه ولا شفقه قعدت تضرب لعند فشت غلها فيا….

….
ومابطلتش بكل قعدت تهزب وتسمع فيا كلام كيف سم وتدعي عليا…. نضت من على فراش ونحس في ظهري يوجع فيا هلبااا ولقيتها حتى ناتشتني في ايدي لدرجه صبت دم…
لقيتها مهناش نسمع فيها تتكلم بلفون قعدت نمشي بشوي وفتحت باب يادوب يطلعني….

ونزلت من دروج وطلعت من حوش نتسحب تسحيب… لاقتني ريحان…

ريحان: خيرك كيف خانب ?

اني: طلعت بالسيف لان ماما تبيش تخليني هي تعالي نمشو لي عمي خليفه يحكيلنا حكايه

قعدنا نجرو واني ولا كأن كانت ماما تضرب فيا ولا شي….

ولقينا عمي خليفه وقعدنا نعيطو يااعمي يااعمي ولقينا كدس صغار اني غرت وجيت قعمزت جنب عمي خليفه….. وقعدت نسمسم في عيوني ونقول عمو ياعمو هي احكيلي ام بسيسي…

بقلم فاطمه سالم ?

خليفه: هههه يا معفنه باش معاش نوض ها طويله خرافه ان بسيسي

انا: دخليش هياا احككيلي

خليفه: به…… خرافة ام بسيسي

قبل العيد بأيّام.. أمّ بسيسي دَزَّت الفار يجيب لها حليب.. وهو جاي في الطريق شرب م الحليب.. ومسح شنيباته..
مسح واحد وخلاّ واحد.. قالت له أم بسيسي:

ـ ليش شربت م الحليب..؟

أنكر.. وحلَف.

قالت له:

ـ آهو الحليب عَلَيْ شنابك يا كَذّاب.. مادام غطَست فيه ما نشربش منّه.
وقطعت ذيله..
قال لها:
ـ عطيني ذوَيلي نلعب عليه يوم العيد قدّام خَوَالي.
قالت:
ـ لا.
قعد يجَّدَّى فيها.. وهي تقول:
ـ لالا.
بعدين قالت له:
ـ إن كان تبِّي ذيلك.. عَدِّي جيب لي حليب م العَنْز.
مشَى للعَنْز.. قال لها:
ـ يا عَنْز عَطيني حليب.. والحليب لامّ بسيسي.. وامّ بسيسي تعطيني ذوَيلي نلعب عليه يوم العيد.
قالت العنز:
ـ عَدِّي جيب لي نبَق م السّدْرة.
مشَى للسّدْرة.. قال لها:
ـ يا سدْرة عَطيني نبَق.. والنّبَق للعَنْز.. والعَنْز تعطيني حليب.. والحليب لامّ بسيسي.. وامّ بسيسي تعطيني
ذوَيلي نلعب عليه يوم العيد.
قالت السّدْرة:
ـ عَدِّي جيب لي سَيل م الوادي.
مشَى للوادي.. قال له:
ـ يا وادي عَطيني سَيل.. والسَّيل للسّدْرة.. والسّدْرة تعطيني نبَق.. والنّبَق للعَنْز.. والعَنْز تعطيني حليب..
والحليب لامّ بسيسي.. وامّ بسيسي تعطيني ذوَيلي نلعب عليه يوم العيد.
قال الوادي:
ـ عَدِّي جيب لي زَغْراتات م النَّجع.
مشَى للنَّجْع.. قال لهم:
ـ يا نَجْع عَطوني زَغْراتات.. والزّغْراتات للوادي.. والوادي يعطيني سَيل.. والسَّيل للسّدْرة.. والسّدْرة تعطيني نبَق..
والنّبَق للعَنْز.. والعَنْز تعطيني حليب.. والحليب لامّ بسيسي.. وامّ بسيسي تعطيني ذوَيلي نلعب عليه يوم العيد.
قال النَّجع:
ـ عَدِّي جيب لي حولي من راعي الغلَم.
مشَى للراعي.. قال له:
ـ يا راعي الغلم عَطيني حوَيلي.. والحوَيلي للنَّجْع.. والنَّجع يعطيني زَغْراتات.. والزّغْراتات للوادي.. والوادي يعطيني سَيل..
والسَّيل للسّدْرة.. والسّدْرة تعطيني نبَق.. والنّبَق للعَنْز.. والعَنْز تعطيني حليب.. والحليب لامّ بسيسي..
وامّ بسيسي تعطيني ذوَيلي نلعب عليه يوم العيد.
قال الراعي:
ـ عَدِّي جِيْب لي عصا م الخَرُّوبة.
مشَى للخرُّوبة.. قال لها:
ـ يا خَرُّوبة عطيني عصا.. والعصا لراعي الغلم.. وراعي الغلم يعطيني حوَيلي.. والحوَيلي للنَّجْع.. والنَّجع يعطيني
زَغْراتات.. والزّغْراتات للوادي.. والوادي يعطيني سَيل.. والسَّيل للسّدْرة.. والسّدْرة تعطيني نبَق.. والنّبَق للعَنْز..
والعَنْز تعطيني حليب.. والحليب لامّ بسيسي.. وامّ بسيسي تعطيني ذوَيلي نلعب عليه يوم العيد.
قالت الخَرُّوبة:
ـ عَدِّي جِيْب لي جرُو م الكلبة.
مشَى للكلبة.. قال لها:
ـ يا كلبة عطيني جرَيو.. والجرَيو للخَرُّوبة.. والخَرُّوبة تعطيني عصا.. والعصا لراعي الغلم.. وراعي الغلم
يعطيني حوَيلي.. والحوَيلي للنَّجْع.. والنَّجع يعطيني زَغْراتات.. والزّغْراتات للوادي.. والوادي يعطيني سَيل..
والسَّيل للسّدْرة.. والسّدْرة تعطيني نبَق.. والنّبَق للعَنْز.. والعَنْز تعطيني حليب.. والحليب لامّ بسيسي.. وامّ بسيسي
تعطيني ذوَيلي نلعب عليه يوم العيد.
قالت الكلبة:
عَدِّي جِيْب لي سلاَ م الفرس.
مشَى للفرس.. وقال لها:
ـ يا فرَس عَطيني سلاَ.. والسّلاَ للكلبة.. والكلبة تعطيني جرَيْو.. والجرَيْو للخَرُّوبة.. والخَرُّوبة تعطيني عصا..
والعصا لراعي الغلم.. وراعي الغلم يعطيني حوَيلي.. والحوَيلي للنَّجْع.. والنَّجع يعطيني زَغْراتات.. والزّغْراتات للوادي..
والوادي يعطيني سَيل.. والسَّيل للسّدْرة.. والسّدْرة تعطيني نبَق.. والنّبَق للعَنْز.. والعَنْز تعطيني حليب.. والحليب
لامّ بسيسي.. وامّ بسيسي تعطيني ذوَيلي نلعب عليه يوم العيد.
قالت الفرس:
ـ عَدِّي جِيْب لي غمْر م الحَصّادة.
مشَى للحَصّادة.. قال لهم:
ـ يا حَصّادة عَطُوني غمْر.. والغمْر للفرَس.. والفرس تعطيني سلاَ.. والسّلاَ للكلبة.. والكلبة تعطيني جرَيْو..
والجرَيْو للخَرُّوبة.. والخَرُّوبة تعطيني عصا.. والعصا لراعي الغلم.. وراعي الغلم يعطيني حوَيلي.. والحوَيلي للنَّجْع..
والنَّجع يعطيني زَغْراتات.. والزّغْراتات للوادي.. والوادي يعطيني سَيل.. والسَّيل للسّدْرة.. والسّدْرة تعطيني نبَق..
والنّبَق للعَنْز.. والعَنْز تعطيني حليب.. والحليب لامّ بسيسي.. وامّ بسيسي تعطيني ذوَيلي نلعب عليه يوم العيد.
الحَصّادة قالوا:
ـ عَدِّي سِنّ لنا المناجل عِنْد الحَدّاد.
مشَى للحَدّاد.. قال له:
ـ يا حَدّاد سِنّ لي المناجل.. والمناجل للحَصّادة.. والحَصّادة يعطوني غمْر.. والغمْر للفرَس.. والفرس تعطيني سلاَ..
والسّلاَ للكلبة.. والكلبة تعطيني جرَيْو.. والجرَيْو للخَرُّوبة.. والخَرُّوبة تعطيني عصا.. والعصا لراعي الغلم..
وراعي الغلم يعطيني حوَيلي.. والحوَيلي للنَّجْع.. والنَّجع يعطيني زَغْراتات.. والزّغْراتات للوادي.. والوادي يعطيني سَيل..
والسَّيل للسّدْرة.. والسّدْرة تعطيني نبَق.. والنّبَق للعَنْز.. والعنز تعطيني حليب.. والحليب لامّ بسيسي.. وامّ بسيسي
تعطيني ذوَيلي نلعب عليه يوم العيد.
قال الحَدّاد:
ـ عَدِّي اقْبِس لي نار م البَيْت.
مشَى للبَيْت.. قال لهم:
ـ يا هَل البَيْت عطوني نار.. والنار للحَدّاد.. والحَدّاد يسنّ لي المناجل.. والمناجل للحَصّادة.. والحَصّادة يعطوني غمْر..
والغمْر للفرَس.. والفرس تعطيني سلاَ.. والسّلاَ للكلبة.. والكلبة تعطيني جرَيْو.. والجرَيْو للخَرُّوبة.. والخَرُّوبة تعطيني
عصا.. والعصا لراعي الغلم.. وراعي الغلم يعطيني حوَيلي.. والحوَيلي للنَّجْع.. والنَّجع يعطيني زَغْراتات..
والزّغْراتات للوادي.. والوادي يعطيني سَيل.. والسَّيل للسّدْرة.. والسّدْرة تعطيني نبَق.. والنّبَق للعَنْز.. والعَنْز
تعطيني حليب.. والحليب لامّ بسيسي.. وامّ بسيسي تعطيني ذوَيلي نلعب عليه يوم العيد.
هَل البَيْت حَنَّوا عليه.. حرام في العيد يبقَى بلا ذيل يلعب عليه.. خَلَّوه يقْبِس نار.. والنار للحَدّاد.. والحَدّاد سنّ له المناجل..
والمناجل للحَصّادة.. والحَصّادة حصدوا غمْر.. والغمْر للفرَس.. والفرس عَطَاته سلاَ.. والسّلاَ للكلبة.. والكلبة
عَطَاته جرَيْو.. والجرَيْو للخَرُّوبة.. والخَرُّوبة عَطَاته عصا.. والعصا لراعي الغلم.. وراعي الغلم عَطَاه حوَيلي..
والحوَيلي للنَّجْع.. والنَّجع عَطَاه زَغْراتات.. والزّغْراتات للوادي.. والوادي عَطَاه سَيل.. والسَّيل للسّدْرة.. والسّدْرة
حَتَّت له نبَق.. والنّبَق للعَنْز.. والعَنْز حلبَت له حليب.. والحليب لامّ بسيسي.. وامّ بسيسي عَطَاته ذوَيلي يلعب
عليه يوم العيد.
ونا جِيْت جاي.. وهم عَدَّوا غادي.. وباتَت الرِّيْح.. باتَت المطر.

وتوته توته وتمت حدوتة حلوه ولا فتفوته

صغار بصوت عالي: حلووه ❤

خليفه: هههه هي يا ولادي وبناتي نوضو هي نصلو العصر جميع “ناض وخدي عكوزه والتفت” هيا نوضو الحقوني

اني: تحكيلنا حكايه اخرى

خليفه: به يامعفنه باه نوضو

وقعدنا نتمشو وكل شوي نسألو في عمي وين يبيعو في حليب ام بسيسي ? لعند وصلنا للجامع وخشينا توضينا وصلينا جماعه ❤

وروحنا قعدنا نلعبو لعند مغرب وخشيت للحوش خايفه لقيت….. يتبع

احكولي رايكم ?