رواية أنحراف فوشيكا

اني: يا سميه بلا هبال ره ح تقتليها هي والعيل بلا هبال عمليه خطيره ولازم تندار قبل موعد ولاده بي 39اسبوع يعني في شهر تامن ولا سابع

سميه: اخطيني بلا فلسفه

وكانت سميه اقوى مني وطيحتني وهجمت على مريضه ومريضه تعيط من الوجع ولسوء الحظ الدكتور تأخر ولما جت بطلع العيل خشت دكتوره نجمه

والصدمه “كانت دكتوره نجمه هي ام اريام ”

نجمه قعدت تشوفلي بي استغراب و صدمه وبعدين شافت سميه ووحشيتها لي بدون ايي تعاطف او مشاعر

نجمه: سممميه حولي غادي شن ديري

حولت سميه ولبست قلافز وطلعت بيبي وخدت مقص وقصت خبل السري وكان البيبي يهبببل بس امه كانت فاقده الوعي ونجمه نادت على ممرضات خدو البيبي يغسلوه وطلعونا وقالو ان مريضه في حاله خطر واني قعدت في غرفه ممرضات شفت دكتور جي لي سميه في الممر وقعدت نسمع فيهم..

دكتور: سميه خيرك هبلتي ولا شن

سميه تبكي: محمد انت عارف منو هدي

دكتور مستغرب: منو

سميه: مرت خليفه

“سميه كانت على علاقه بي شخص اسمه خليفه وكان شخص هدا يحبها وتحبه وعلاقتهم دامت لي سبع سنوات بس في يوم اسبوع عرس لما دارت سميه كشوفات عرفو ان فصيله دمها تطابقش مع خليفه يعني مش ح يجيبو صغار فا سيبها يوم اسبوع عرس… ”

ولما سميه بتبلغ ريسبشن على ان تاخد فلوس شافت خليفه وشافت ملف مريضه وعرفت ان هدي مرته وجت لغرفه عمليات كلها حقد وغل….

…..

دكتور محمد: وهي شن دنبها يا سميه

سميه: محمد خليني في حالي

دكتور محمد: سميه روحي توا توا وتو اني نمسحك من سجل فاهمه ولا ح يعتقلوك لان عارفينك ديما معاي

سميه:….. لارد

محمد شد سميه من كتوفها: شوفيلي هنا مش وقت دموع توا

سميه: ح حاضر محمد خلاص ارخيني

محمد نفض ايديه واني تبعدت عن باب غرفه ممرضات لاني كنت في عتبه باب منبيهمش يعرفو ان سمعتهم…. وقعدت نرعش بجد ما خفى كان اعظم وشوي وخشتلي نجمه….

نجمه: عرفتي توا ليش نقولك ماتجيش ياتاعبه يامريوحه

اني نتفضت وقعدت نرعش

نجمه: اسمعيييني كويس سميه هدي تخطيهااا والا ح نقول انك ليك ايد في كل شي فاهمه ولا

اني: ح حاضر

وعيونها مليانه حقد وكره ليا لعند توا ما نسيتش نظرتها…. وطلعت وصرفقت الباب وراها…

….
واني قعدت في حاله دهول خديت شنطتي وحولت المريول والقلافز وطلعت واني سرحانه في طريق قريب ضربتني سياره… ووصلت للحوش وخديت مفتاح من شنطتي وفتحت الحوش واني نرعش خشيت طول ارتميت على الكنبه واني منهد حيلي…..

علموا ولادكم يعني شنو لمه العيله وصله الرحم مينفعش تزوروا اهلكم وتسيبوا ولادكم في الحوش ولا تقولوا لاهلكم الولاد مع صحابهم … لو متعودوش يعني شنو لمه واهل وصله رحم ح يكونو معندهمش رحمه ولا اصل ولا يبقالهم اي انتماء لاي حد ولا حتي لبيوتهم بعد ما يتجوزوا ح يقعدو فاهمين ان شي هدا عادي وهدا الصح … ولا حتي يبقالهم اي انتماء لامه ولا لابوه ويكبر مايعرفش الا نفسه ومزاجه وهو يبي شنو وح يكون اناني…
والانانيه حقيره وح تعلم شخص كيف يفرح وينتقم على حساب غيره زي ما دارت سمية وزي ما ازدهار انانيه وتحب الخير ليها وبس وزي سعد فكر في نفسه وشن يبي بدون ما يفكر في اريام وام اريام فكرت في نفسها وكيف ح تكون مرتاحه بدون ما تفكر في اريام واهملتها ورغم هك كسرتها ودمرتها من معاملتها….

بقلم فاطمه سالم
……
نرجعو لي روايتنا

…
قعدت مستنده على الكنبه واني مصدومه ومخنوقه بجد تعبت كل ما نبي هبدا صفحه جديده وحياه جديده نزيد ننصدم….. غمضت عيوني بغصه…. فضلت ان نرقد ونهرب من افكار هدي كلها ومن الواقع حتى…..

….
فاتو سبعه ساعات….

نضت المغرب راسي مصدع ومكتئب وريقي ناشف… خديت تليفون لقيت رساله؟؟
ومن رقم فارس!!…. زعما كيف حصل رقمي جديد؟؟
لقيت مكتوب فيها.. “لو مُلئت بِألف عيب, لو كان قُربك سوء, لو رفضك العالم ..
أنا بِك أرغب .! “….

…..
مش عااارفه ليش حسيت بفرحه مش عاارفةه بجد…. يمكن عشان تعبت ونبي كلمه تفرحي بسس
‏شعور الخدلان اللي مر على قلبک اكتر من مرة يقدر يخليک تغير نظرتک لاي شخض ، سواء كان قريب او بعيد
يقدر يخليك تعدم التقة حتى فى اقرب الناس ليک ، يابال شخض جديد يخش حياتک

….
تنهدت وهزيت على روحي وكتبتله….: – كسروني راه وقت قالولي لو يحبك راه ما خلاش عيونك حزينه هكِي

وحطيت تليفون وجيت بنوض اتصل بيا!!…
قعدت متردده ان نرد بس قلت لعند امتى هي ننحب وننجرح…. فتت الموضوع ونضت….
لقيت بابا جاي وراقد خشيت كوجينه درت فاصوليا وكليت منها شوي ومشيت لي داري لقيت تليفوني يرن!!!….
لقيته فارس استغربته خيره مُصر ان نرد!!؟
خديت تليفون وقعدت متردده هل نرد او لا!؟…. قلت نرد خير وبالفعل رديت بس قعدت ساكته….

فارس: اسمعيني

اني:….

فارس: ماشي خليني نتكلم وما تصكريش الخط تمام؟

اني:….

فارس تنهد: حنحكي بشعوري هالمرة ”
عمري ما توقعت أنه نحبك ، ولا حتى تكون ما بينا دوة
بس يوم دوينا ، أرتحت، متخيله هالشيء؟
راحتِي لقيتها في حروفك و كلامك .. راحتي كانت فيك و بيك ، حمدت ربي على كل شيء صار باش عرفتك !
لأنك زي ما قال عبد العزيز لويس؛ خدانِي كلي ، أحسه ظلي ، وهو بالملي ، مثل ما أنا تمنيته!!
أنت جيتني زي ما تمنيت ، زي ما طلبت ، زي ما تخيلت…
جيتيني في وقت كنت محتاجة قلب حنيّن عليا و كان قلبك هالقلب إللي تمنيته ، محتاج حد يحسسني مهم عنده! ، حد ما يملش مني ، حتى لو دوتِي معاه دوة مملة، يكون فاهمني قبل ما يكون حافظني ، يكون عارف لما نضايق شن يفرحني ، حد كلمة نحبك منه! تكون بالدنيا عندي ، لأن نعرفها طالعة بقلب و رب ، مش كلمة يقولها هكي وخلاص ، حد نرتاح بيه ”
وما نرتاحش بلاه .. وأنتي كنتي هالحد ولله الحمد’
أنتي إللي خليتك سر بيني وبين ربي
لأن هو الوحيد إللي نحكيله عليك ونحكيله كيف ما نبيش نخسرك و ندعي أنه يبعد علينا البعد . . أنتي إللي دسيتك على عيون الناس ، لأن عيون الناس ما ترحمش !
بس الله غالب عرفوا حبي ليك ، لما جابوا أسمك فالدوة و الضحكة وقتها فضحتني …. فضحتني وفرحتني لحظه الضحكه ودمرتني عمر …
سعد خش بينا وخرب كل شي… خرب كل شي مخططه كل شي تمنيته كل شي…. اسف اسف اسف… عارف انك مش متقبله تسمعي صوتي…
وعندك الحق في كل شي بتقوليه فشي غلك فيا هزبيني ديري فيا لي تبيه بس تبعديش عليا اكتر ما بعدتي

اني متوتره: بس اني…

فارس قاطعني: مافيش لا بس ولا نبي نسمع حس… “سكت شوي وتنهد “….. اني عارف كل شي صار ومتابعك اول بي اول لحظه بي لحظه كل شي نعرفه ” كـل شــــي “لدالك توا اني بنصكر وح نمهلك وقت تفكري فيه بس مش ” ح نهملك ” ح نبعت كل يوم رساله ليك نطمن فيها عليك وباش تبتسمي

وفعلا اني ابتسمت وصكر الخط وتمنيت ما صكرش الخط…. بس خايفه ابتسامتي ما دومش خايفه هدا كله يكون حلم وفتحت شعر المبروك عثمان ابو درهيبه

يكفي كفا كافي كفا يكفيني
وكيف كيفكم ماكيف كيف عيني
يكفي كفا كفه كفاني كافي
جفاني أمجفيني جفاكم جافي
أحنا بكيفكم متكيفين مكافي
حن الحنين وزايدين حنيني
أمرايف عليا أرياف كيف أريافي
مجنون بيا وناوي علي تجنيني
ولافي الخفا كفي خفية خافي
نطريه وهم يطروا طرا طاريني
أموالف وهما أموالفين أولافي
مددين ونا دين ودينك ديني
أنغالو اللي غالو غلاهم وافي
يابال من غالو غلا أمغاليني
أنا من بلاد العز يا قدافي
أنا بيك رافع رايتي وجبيني
أنا ياسي من بني ياس وافي
أنا ليبي وإماراتي وفلسطيني
ماني عالوطن جاي نبي أنلافي
أنا كويتي أنا قطري وبحريني
سعودي يمني أردني بأهدافي
عراقي عماني موريتاني بيقيني
أنا من هذا المشرق الكبير الدافي
أنا من المغرب العربي عربنتيني
صافي مع اللي صافين مصافي
أنجافي اللي إيجافيني بجفا أمجافيني
وساير علي سيرة مسار أسلافي
علي غايتي مافي فنى يفنيني
ولاتنطفي لاينطفي بمطافي
ومشهابكم يشوي شوي شاويني
أنجدف وتجديفي كسر مجدافي
…
…..
قعدت نفكر هل فعلا فارس مش ح يخليني؟
وقعد الخوف ملازمني…. لعند ما رقدت….
ونضت الصبح على رساله من فارس… ابتسمت ونضت صبح بقرار جديد….
ومشيت لعياده وقعدت مبتعدة على سميه وفي العشيه نمشي لي مزين قعدت محبيتش نسيبه… وقعدت نمشي زياره لي امي واختي في حوش خوالي وخوي وليد تحسن وقعد انسان شخص كويس وبجد زي ما قال الفنان عبد الهادي الحقيق…
ياسعد من عندها #خو
ودزت لخوها ايجيها ..
يركبلها فوق حمراء
ويشق #النواجع عليها ..

وقعدت على موال هدا لمده شهرين….
وطورت علاقتي بي فارس وقعدنا نحكو يوميا… لعند في يوم جي خطبني من بابا وامه ماعندهاش مانع على ولا شي وامه طيبه وحليوه وتنحب وبعد اشهر مشيت اني وفارس باش نبتت لي بتاتي مع اخته عشان عرسي قريب
…. وخلينا اخته تخش لي محل واني وياه قعدنا في حديقه قريب من محل…
…
مقعمزين نهدرزوا .. شبحت لعيونه و سألاته .. :شمعنى إنت؟

فارس شبحلي إستغرب من السؤال: نعم؟

ابتسمت: شمعنى إنت يعني اللي ماقدرتش نبعّد عليك؟ شمعنى إنتَ اللي حسيت معاك أن لكل مشكلة حل و إن لكل ضيق فرج ..
علاش إنتَ بالذات اللي نهرّب من الناس ونجيه؟
علاش إنتَ بس اللي نكون في قمة سعادتي وأني معاه؟
مش أني اللي ماكنتش ثابتة في حياة حد ؟
شمعنى توا ثابتة في حياتك؟ و مش قادرة نخلّيك زي ما خلّيتهم.. ؟

شبحلي بشبحة حس روحه حاجة كبيرة عندي
كان يتمنى إنه يفهّمني او يشرحلي..
ماطلعتش منه ولا كلمة ، لكن نزلت دمعة من عينه حسستني قداش اني كبيرة في حياته

عيوني رقرقو وحضنته :يارب هالحُب طول العمر

فارس: ما تبعديش عني

اني: مستحيل نبعد

اللي يبيك يعرف وين يلقاك
واللي زعلك عنده لسان كان يبي يراضيك
واللي مستاحشك يعرف كيف يجيب رقمك ويوصل فيك ويكلمك ويطمن عليك
لان في وقتنا مافيش شي مستحيل
…………………….
The End
……
وهادي قصه اريام واني كنت معاكم “فاطمه سالم …. كتبت 14 حلقه و 25الف حرف باش قدرت نعبرلكم ونحكيلكم على معاناه اريام وفرحتها المؤقتة وكل شخص وبصمته وتأثير كل شي سوى سلبي او ايجابي وكل موقف وكل حاجه كتبت عليها عبره و نصيحه وحبيت نحكي قصه اريام بطريقه ترضي جميع الاطراف ونحكي فيها من جميع نواحي حكيت فيها كل اسباب كل شخص في روايه وسبب شخصيته وتصرفاته ومشاعره وان شاء الله نالت اعجابكم واكتبولي كومنت يعبر على مدى اعجابك بروايتي وشكرا