جمعنا القدر للكاتبة | خلود شلابي

الحلقة 12
شكوك منال زادت والفكرة الي تنغرس صعب تتحول …وتبي تحكي مع ايمن بس ايمن زي واجهة الزجاج تري من خلاله الاشياء بس ماتقدرش تخترقه ….اسبوع مر علي خطوبة منال وايمن عدد مكالماته محدودة …مرتين …رحاب في العمل زي الي خذت موقف من منال …الحاجة هاذي زعلت منال جدا
منال : رحاب انت مضايقة مني ؟ اني غلطت معاك ؟
رحاب : لا علاش ؟ اشكون قالك زعلانة ؟
منال : شكلك يقول هكي ؟
رحاب : لا والله يامنال بس اموري ملخبطة ….وحكت عن خطيبها والسفر طول وشكوك ….
منال : سبحان الله كلنا نفس القصة
رحاب : محمود عرف بخطوبتك
منال : احسن شن ردة فعله ؟
رحاب : بصدق ؟ عادي قال ربي يهنيهم
منال : قبل الخطوبة لاقيت محمود معاه واحدة في السيارة من قدام وضحك وجو هياجة
رحاب : والله ؟ انت متاكدة ؟
منال : جدا محمود نفسه
وقت بتروح القت ايمن وعبدو يستنوا فيها في السيارة جوهم الاتنين راكب علي بعض كانهم اصحاب من زمان ….منال تراقب في رجال حياتها ..خوها وحبيبها وعجبها منظرهم بس فيه حاجة خلتها تحس بالخسارة مش عارفة علاش
هي منال هكي ماتعرفش تفرح دائما تخترع شيئ ينكد عليها ….في الحوش الغذي جاهز وايمن تغذا عندهم وبما انه مش غريب ولا براني ايمن مرفوع عنه القلم في حوش امالي منال …يجي وقت مايحب مرحب بيه …..بعد الغذي سيبتهم ومابتش تقعد معاهم ….لحد ما ايمن استفقدها
وين منال ؟
كل الوقت ايمن مع عبدو لحد العشية دارت منال قهوة ورفعتهالهم
ايمن : اخيييرا تكرمت علينا منال بزيارة
عبدو : الحق عليك ايمن هي زعلانة اصلا فيه واحد يخطب وما يجيش زيارة لخطيبته اسبوع بحالة …عطينا فرصة نلزوك
ايمن يشبح لمنال …وعبدو خذي قهوته وطلع
ايمن : زعلانة ؟ من اولها ؟
منال : وفعلا زي ماقال عبدو ….الباين اني تحصيل حاصل في حياتك .
ايمن : انت اهم نقطة في حياتي بس جديات كنت مريض وراقد في الفراش …توا اشكون المفروض يزعل ؟
منال : واني وين نندري عليك ؟
ايمن : اني مش زعلان بس التمس لحبيبك عذرا
منال : وبما انك جيت ووضحت ملابسات الموقف الحمد لله علي سلامتك ..
ايمن : تسلمي يا غالية
منال : توا احكيلي شن قصتك مع نادية
ايمن : توا هاذا وقته ؟ اني جاي بنهدرز عليك انت
منال : والله وتروح تلقاها غادي وكل الوقت قدامك لا احكي قصتك قبل
ايمن : قصة شن يامهبولة لافيه قصة ولا رواية
منال : ايمن انت علاش هكي ؟ ماتحبش نحكي عليها
ايمن : انت اهم عندي منها …منولة غيريلي الموضوع تربحي
منال : لازم تحكي قبل
ايمن : ياستي نادية جارتنا من اول ماحولنا للجبل وعلاقتي معاها عادية عمري مافكرت نتزوجها …قالولي تزوجها واني رفضت هاذي كل الحكاية
منال : والمفروض اني نقتنع بكلامك ؟
ايمن : لازم منولة لانه كلامي هو الصح
منال : اوكي خلي ننسى كلامها ومسجاتها ونصدقك بس وعد منك انه كلمتك هي الصدق
ايمن : نوعدك اصلا ماعنديش علاش نكذب ….حكالها ايمن علي السكونة …ايمن هو المسؤول علي امه وخواته ومايقدرش يسكن بعيد عليهم …ومنال : وخدمتي ؟
ايمن : ياعمري انت ليا اني وبس لاخدمة ولا شركة
منال ما اعترضتش لانه وجودها مع ايمن اهم من الخدمة عندها …..وقرروا كل حاجة وعرسهم بعد 3 شهور …..وروح ايمن …نفسيا تقبلت منال كل كلام ايمن …وفرحت بس الفرح لا يدوم جاها مسج اخر من نفس الرقم يقول
دائما فيه حاجز بينكم اسمه نادية …….
وقبل ماتتتخذ منال اي اجراء تفكرت وعد أيمن
سوزان :أصلا لو مكانك نغير رقمي ونريح روحي وخليها تموت بغيضها
امها :اسمعوني اني مش مستريحة للوضع كله كيف بتعيشي معاها في نفس المكان،،، وأني كل الوقت بنقعد نفكر فيك
عبدو :ياودي انتم مزودينها بعد تتزوج هاديكا خلاص غصبا عليها بتسلم بالواقع
سوزان :أصلا إنت غبية المفروض ماوافقتيش،،، يومها قال خلاص وبعدين خطرلا جاب الدبلة والله هاذا انسان متذبذب وماعنداش قرار
عبدو: قولي كلمة طيبة والا اسكتي واصلا نوضي لقرايتك
سوزان: منال مازالت عندك فرصة
أمها: أني ماعجبتنيش قصة الخطوبة كلها،،، لاجت أمه ولا خواته ولا جاب معاه حاجة،،، فيه عادات واعراف تجاوزها بس لأنه ولد عمك
منال: حيرتوني توا خطرلكم تحكوا
عبدو: اسمعي سلم أختي والله عاشرت أيمن راجل بمعنى الكلمة،،، ومستقيم جدا ويخاف من ربي،،، ومع ذلك مازلتي عالبر لو ماتبيشي حني ماليك وبناصروك وكله بالنصيب،،،،،،
بعد يومين حكى أيمن معاها على أساس يجي وهي بتطلع معاه تشري أشياء ناقصة،،،،
المفاجأة إنهم تلاقوا مع نادية في المحلات التجارية،،،،توا المفروض نسكت ونقول صدفة،،، قالت منال من بين أسنانها
أيمن: خلي عندك فيا الثقة
وسلموا عليها،،، منال غريزيا مسكت ذراع أيمن وكأنها بتقول هاذا ملكي وخط أحمر
نادية بانت عليها براءة المتهمة،،، سبحان الله عليها كيف تتلون
نادية :الحمد لله القيتك أيمن بالله نبيك تحكيلي مع الشاب الي في الفترينا
منال :لالا احكي معاه بروحك حني مستعجلين هيا أيمن
أيمن :ماعليشي منال خلي نحكي معاه ونطلعو 5 دقايق ياروحي،،،، رغم انها انغاضت منه الا إنها فرحت بغزله،،،،، طلعت منال ولحقها أيمن
منال: طالما وراك نادية مانعرفش نرتاح معاك
أيمن: طالما الافكار الغبية مازالت في راسك مستحيل تتريحي
منال: أيمن ريحني
أيمن :كيف؟
منال: سيبها عاملها زي البرانية مش لازم تحتك باها أيمن: وين بنهرب هاذي معانا زي واحدة من خواتي منال: أيمن هاذا قراري غير هكي مانعرفش نكمل معاك
أيمن :منال هاذا إسمه عباطة شن دخل نادية في حياتنا،،،؟
منال :مش عباطة انت علاش ماتريحنيش
أيمن :أني وعدتك وانت خلي تقتك في نفسك كبيرة لو نبيها خذيتها ماشيئ جاي في طريقي،،،
منال: عندي تقة فيك بس ما عنديش تقة فيها،،،، إنت قرر أما أني وانت بروحنا او انت في حالك وأني في حالي
أيمن :منال ماتحطينيش تحت قرارات،،، إنت سندي معاك تتغير حياتي،،،
منال :روحني ماصارليش،،،،،، منال اضايقت وخايفة ان أيمن يتخذ قرار غبي،،، وصلوا الحوش وقالت
منال: أيمن لو تحبني ريحني
أيمن: منولة انسى القصة يجي يوم ونادية تتزوج،،،،
منال: بما انك مصر أني مانقدرش انكمل معاك ونزلت على أساس انتهى كل الي بينهم،،، وأيمن ماردش،،،، بس ترجم رده لافعال وبطل يتصل او يجيهم،،،،،،
يتبع??