جمعنا القدر للكاتبة | خلود شلابي

الحلقة 10

روحت منال بس كانت مشاعرها متناقضة بين إنها تختار الديب الي كان واضح معاها وبين كبرياء أيمن القاتل،،،، روعة أيمن في كبريائه،،،، ماينفعش يكون أيمن إلا إذا كان متكابر على كل شيء،،،، ومن الأول أيمن اخترقها بكبره المعتاد ومش من الساهل إنه يتعامل مع أنثى ويشعر إنه بحاجتها،،،، ومحمود الراقي الجنتل،،، المنقرض،،، وفي طريق مرواحهم كانوا الناس روحوا من صلاة الجمعة،،،،، لاقاهم أيمن الي كلم احمد يروح مع البنات وقعد مع منال
أيمن :تعالي نوريك مكان حلو وح يعجبك
منال: اوكي بس مش معطلة
ومشوا في طريق غير،،، أيمن رفعها لمكان عند منال خيالي،،، الجو بدي ينذر بنزول المطر،،، وشمس الصبح كانت خداعة،،،، وصلوا المكان الي كان عبارة عن حوش قديم جداً وأيمن مصينة ومداير أجواء غربية فيه،،، الحوش من الطين والسقف من الخشب وفيه فنار في الجدران،،،، وورد قدامه ونعناع وعطر و(ورد النبي) النرجس الابيض،،،، وياسمينة عربية،،،، ومسك الليل واحواض من اصناف غريبة،،، هاذي مينتا وهاذي برتقوشا وهاذي زعتر بري وهاذي عطره عربية،،، اصناف من الاعشاب العطرية،،،، وطاولة وكراسي وشبه استراحة سقفها من جريد النخل أجواء زي الخيال وشوية بدت المطر وخشوا لحوش جميل جدا من الداخل وكأنها خاشة لماضي…. كل شيئ يحكي قصة حتى زوايا الديار،،، فرش تقليدي في زاوية من دار الجلوس فيه تلفزيون وريسيفر،،،، وفيه جلد خروف أبيض ناصع البياض،،، وفيه كرسي صالون بني طويل بشكل سرير،،،، طاولة عليها ابريق وبطانية ملفوفة بعناية… كل شيئ كان ملفت وغير عادي المطر زاد والأجواء معتمة
صوت المطر زي نغمات موسيقى العشق،،،، وشعور راقي وجميل وله مذاق وهو لذيذ يولد فقط امتى تكون مع أيمن،،،،،
أيمن :شن رايك بنضيفك قهوة من ايديا
منال :هني؟فيه مطبخ
أيمن :طبعا،، مطبخ وحمام تعالي وشوفي وطلوا تحت المطر وخشوا لكوجينا صغيرة بس أنيقة ولو سألوا منال ماطلبتش احسن من هكي،،، ثلاجة،،، غاز،، فرن حجري ورفوف من الاحجار بس مرصعة بالرخام الأبيض الناصع ودار أيمن قهوة عند منال هي أروع قهوة شربتها،،، قعمزوا على كراسي من خشب عادي
منال :اشكون الي مداير المتحف الجميل
أيمن :هاذا كان حوش جدي وأني اهتميت بالموضوع ومن زمان في بالي الفكرة
منال :روووووعة،،، منال تحكي بطريقة البيبي الفرحان بلعبة او شوكلاتة،،،، والمطر زاد من جمال المكان وكأنها شوارع مغسولة بالمطر،،،، روعة أيمن بروعة الأماكن الي هو عايش فيهم،،،،، منال حالياً واقفة في روشن الدار وتتفرج على روعة المطر،،،، استمر المطر ساعة وصوت قطرات المطر وميزاب القصر،،، هاذا في نظر منال قصر،،، وميزاب القصر يفيض خيرا وجعل الشارع سيول،،،، وخيال منال خصب جداً،،،، ووقفت المطر وطلعو في حديقة الورد العطرة،،،، كل حركة كانت تجسد جمال،،، قطرات المطر إلواقفة علي ورقات الاعشاب وعلي ورقات الأزهار إبداع لايصل اليه خيال مبدع،،،
أيمن: فكرتي؟
منال حاليا توا وفي جو المطر والحنين وروعة أيمن وسحر المكان ممكن تقول فكرت ووافقت،،،
منال حاولت تستفيد من وقتها ومن قعدتها مع ايمن …اللحظة هاذي مش للتفكير انما للعيش بسعادة في خيال قد لايدوم ….
منال : انت جبتني هني باش تعرف قراري ؟
ايمن : لا قرارك لو مش نابع من اعماقك مانبيش نعرفه …الي في بالي غير هكي عمري مافكرت نتزوج بالطريقة هاذي خطوبة وتفكير اني مقبول او غير مقبول …منال الي ماتعرفيشي عندي اكثر من 300 طالبة لو نبي بنت وخلاص مش صعب نختار منهن …او كنت ناخذ نادية وخلاص …والباين صعب نتفق لاني تفاجات بطريقة تفكيرك …..ممكن خطئي اني خطبت قبل انكلمك بس كنت ماشي بحدسي وحدسي يقول انك ليا …حتى وقت خطوبتك الاولى كنت متاكد انك مستحيل تكملي معاه ….حاليا صرت في تحدي بين نفسي وموافقتك ….ياترى علاش ممكن توافقي عليا ..مثلا لاني ايمن ؟ فقط بدون زينة ؟ او لاني ايمن استاذ الجامعة بس هاذي انت ماتعرفيهاش …او لانك اشفقتي عليا او لاني ولد عمك …..بصدق كل هاذا مايهمنيش …..الاهم لو ماحبيتيش ايمن …معناها انسي اني جيتكم او كلمتك …وصدقيني ماتخيلتكش الا معاي غير هكي مانبيش نشبحك ولا نبي نوقف في طريقك
منال تفاجات بحكي ايمن وتفكرت خطبة محمود يعني لو ايمن تتسربلا معلومة عن محمود ممكن يخرب الدنيا …شن الفرق بين انه يكون ايمن ولد عمها وخلاص وتسمع باخباره من بعيد وبين انه يكون حياتها …..؟؟؟ شن الفرق ؟…وقت يكون ايمن تنسى محمود ولا وجود اي اثر ليه تاثرت بكل كلمة حكاها ايمن هي فعلا زي ماقال لو مش حب يجمع بينهم علاش الواحد يتزوج ؟
ايمن : هيا يستنوا فينا علي الغذي ….منال كل الطريق ساكتة وافكار ترفعها وتجيبها …حاليا اي كلمة ممكن تقولها يفسرها ايمن نوع من الصدقة او الشفقة ..وايمن اكبر من انه يقبل شفقة من اي حد ….وقررت تشبح للشيئ الجميل الي مخليها تتمنى ايمن …والشيئ الي شادها ناحية محمود
ممكن لانه محمود جديد ؟ جديد بمعنى اول مرة تحتك بشخص زيه او ممكن جاذبيته قاهرة ……
منال : ايمن ؟
ايمن شبح يستفسر بدون كلمة
منال : علاش ماتبيش تحكي عن علاقتك بنادية
ايمن : لانها باختصار شيئ خاص …الموضوع خذي اكثر من حقه
روحت منال عند عمها ميلاد واصلا هما مروحين الصبح …اذان الفجر وصوت المطر …صلت منال وطلعت قدام الحوش وتمنت تكون في حوش الحديقة …الدنيا صقع وبوها وقف معاها وهو يشبح بعيد
بوها : تتمني ان الزمن يتوقف
منال : فعلا …حكت منال لبوها عن الحوش …وقرر انه يمشيلا وركبت منال السيارة مع بوها …الحوش مش بعيد هلبا وصلو ونزلو المطر خفت فيه علي جانب الحوش داليا تلمع تحت المطر وضي جاي من الروشن …وصوت قران وعرفت انه ايمن داخل بمجرد ماسمع صوت السيارة طلع …لاول مرة تشبح ايمن غريب شعره مش مرتب ولابس سورية بس فوقها (عبي )(واحدة تقول شن العبي نقتلها ) عبي بيضاء ورحب بيهم
منال متحشمة من جيتها وواضح ان ايمن عرف انها هي الي حاكية لبوها علي الحوش وعموما هو مش سر ….بضحكة قالت : نديرلكم قهوة شن رايكم ؟
ايمن : ياريييييييت
وبوها : تعملي معروف وخشوا الدار الجو دافيئ وحميم وهي مشت للكوجينا مازالت الدنيا معتمة من السحب وجهزت منال القهوة الي ريحتها تجيب من اخر الدنيا ….يتبع