روايات عربية
أخر الأخبار

لست لقيطه |للكاتبة امل احمد سلوم

#لست_لقيطه
#الجزء_الاول
#بقلمي_امل☆ ╚══════ღღ══════╝

ماذنبي يا امي ؟!
اتعلمين بحالي ؟! اتدرين ما جرى لي ؟!
عشت اياما تحت شمس حارقه وبطن خاويه و دموع جارحه ليس لي معين غير انيني

ماذنبي ؟!
عندما فقدت عقلك للذة ساعه كنت تمارسين الحب مع ابي ؟!
ماذنبي تحملين بي و تنجبيني و تتركينني في العراء ؟!
لست لقيطه ….
انا الحب الذي تخلى عنه عشيقان عند منتصف الوعد و تركني وحيده ع رصيف المعاناة…
انا الوعد الذي قطعه نصف رجل …
و صدقته انثى ناقصه عقل مراهقه :
انا ثمرة نزوة اخطات الحساب :
انا ضحيه علاقه تنازلت امي عن شرفها لمن غلف لها المكر بالامل
فصدقت بغباء انها بحضن رجل لن يخون
وعدها بأن يرفع الجبال عنها …
لرجل يرفض رفع سماعه هاتفه بعد ان تحسس نبضات قلبي تركها في منتصف الطريق …
ليركض و بمعنى اخر يلهث وراء اخرى عرت له عن ساقها:
لست لقيطه …ان الحب الذي تركتموه خلفكم ع الرصيف :
ساكبر يا امي يوما و ساكون فتاة منبوذه لا يتقبلها المجتمع
وكل ذلك ليس ذنبي
أمي … أبي .. أحفظو هذا التاريخ جيداً لأنني .. جئت إلى هذا العالم أبحث عن حضن أمي .. وحضن أبي .. ولكنني انصدمت أنني كنت في بطن أمي 9 أشهر وها هي تتركني بعد ولادتي … الغريب أيضاً أنني لم أجد ذلك المسمى أبي … أين أنتم … ولمن تركتموني وحيداً … لمن ؟؟؟ لحرارة الشمس … أم لكلاب الشارع تنهش لحمي … أجهشت بالبكاء كثيراً إلى أن تغير لون جسدي الشيء الوحيد الذي كنتم تفكرون فيه .. المتعة سويا .. ثم تركتموني وحيدة أدفع ثمنها … لماذا يا أمي … لماذا يا أبي …. لو أكرمتموني عند بيتاً من بيوت الله … لطف الله ورحمته شاءت أن أعيش
أمي … أنتي لستي أمي ولا تعرفين معنى الأمومة . أبي … أنت لست رجلاً بل حاصد شهوة . ( الحيوانات لا ترمي صغارها ) تركتموني وتركتو لي أجمل لقب ( لقيطه ) هل تشعرون بالفخر الآن ؟؟؟ هنا وضعتموني بين كرتون لأنني عار عليكم ( ولكن ) سأكون خصمكم يوم تجتمع الخصوم ???????

☆ ╚══════ღღ══════╝

في يوم من ايام الشتاء البارده كان خالد يمشي مسرعا تحت المطر يغطي رأسه خوفا من البلل علت من بين الارصفة بكاء طفلة ملقاة بكرتون تشكو القدر…

خالد : من وين جاي هالصوت ؟؟ لك والله كأنه صوت بيبي صغير

بيقرب من مكب النفايات والصوت عم يعلا اكتر ويوضح اكتر واكتر

خالد بصدمه : لا اله إلا الله ? هي طفله حديثة الولاده ومزتوته بالحاويه… حسبي الله ونعم الوكيل?

قرب لعندها ومد ايديه المرتجفه وحمل الطفله من الكرتونه يلي كانت فيها… كانت متل العصفور عم ترجف من البرد وودم المخاض بعدو عالق فيها مانشف
شلح جاكيته ولفها فيه وحملها بين ايديه وهو عم يركض فيها عالبيت

قبل مابلش احداث القصه خلوني عرفكم ع خالد
خالد اكبر واحد ب اخوانه عمرو 30 سنه عندو اخ واحد واختين صالح 25 سنه وخاطب واسيل 22 سنه وخاطبه واخر العنقود سوسن 18 سنه هالسنه عندها بكالوريا(توجيهي) … تزوج بنت خالته جنان زواج تقليدي بعمرو ماحس تجاهها بالحب واللي بيربطو فيها ابنه كرم يلي اجا بعد خمس سنوات من زواجه
ابوه متوفي وامه عايشه وكلهم ساكنين سوا بنفس البيت
خالد شاب مكافح بس الحياه معاكسه معه ورغم هيك الفشل ماقدر يتسلل لقلبه ودائما بيحب يساعد الغير ويوقف مع المحتاج… . اخته سوسن بتشبهه كتير بالشكل والصفات بعكس صالح وريماس يلي كانو بيكرهو الضيف وزوادته معه
نرجع للقصه يلي رح توضحلكم تفاصيل اكتر

☆ ╚══════ღღ══════╝

ام خالد : كأنه اخوكي تأخر
سوسن : هلأ بيجي امي
ام خالد : الله يسوقو بالسلامه والله قلبي غليان عليه
سوسن : لك والله مرته مو خايفه عليه قدك اهدي ماما هلأ بيوصل وبتطمني عليه
ام خالد : ليش مرته رح تخاف عليه اكتر من امه… لك هاد بكري وفرحة عمري
سوسن : احم احم نحن هنا
ام خالد : لك والله كلكن غاليين على قلبي بسـ
سوسن : بس هاد بكري وفرحة عمري وسندي وكل شي بالدنيا خلص حفظتها امي
ام خالد : بس ولي مكيوده وقومي علقي ع ابريق الشاي هلأ بيرجع اخوكي نشفان من البرد ولي عقلبي
سوسن : وليش الخانوم ما تقوم تحضرلو الشاي شو جوزناه لحتى انتم نخدمه نحنا
ام خالد : تضربي انتي ويلي بيطلب منك شي انا قايمه اعلق ع ابريق الشاي
سوسن : لا ومية يمين مابتقومي ام خالد عم امزح ? معك ولوووو

قطع حديثهم صوت الباب انفتح بسرعه واتسكر وخالد عم ينده لامو وكان صوتو مرعوب

ام خالد : انا هون امي خير نشالله شو في شبك
سوسن : شو هاد يلي لافه بجاكيتك اخي

وقف خالد قبال امه واخته وفتح جاكيته يلي كانت الطفلة ملفوفه فيه

ام خالد بصدمه وهي عم تضرب ع صدرها : ولييييي شوووو هاد
سوسن : اخييي من وين جايب هالبنت وشو قصتها
خالد: جيبلي شي دافي غطي فيه البنت
سوسن : لك مين هي
خالد بعصبيه : لك تحررركي البنت رح تموت من البرد

ركضت سوسن لغرفتها ورجعت وهي حامله شرشف قطني تقيل تناول خالد الشرشف بسرعه ولف البنت وحضنها لصدرو وقعد قبال موقد الحطب ليدفيها
ام خالد : يا ابني فهمني شو القصه ومين هالبنت وليش هيك منظرها
سوسن : كأنها حديثة ولاده حتى الدم بعدو عالق فيها
ام خالد وهي حاطه ايدها عتمها ومبحلقه عيونها : لك لتكون !!!
خالد وهو عم يطلع بوجه البنت ونزلت منه دمعه : لايروح تفكيرك لبعيد امي هالبنت لقيتها بكرتونه ومزتوته بالحاويه?
سوسن : بنت حرااااااااام ?
ام خالد : استغفر الله العظيم… وما عرفت مين اهلا
خالد : لا… . كانت عم تبكي وترجف من البرد وانا ما بعرف كيف حملتها وماشفت حالي الا عم اركض فيها عالبيت
سوسن : لازم تتخلص منها لك اخي لك هي بنت حرام?
خالد : ليش هيه اختارت تكون بنت حرام ?
ام خالد : عطيني ياها ابني

اخدت ام خالد البنت وضمتها لصدرها وهرت دمعتها على وجهها

ــ الله لايسامح امك وابوكي يلي مابيخافو الله?
سوسن : احسن شي نحطا عشي باب جامع والله رح يجينا منها وجع راس?

رفع خالد اصبعو بوجه سوسن وكز ع اسنانه وهو بيحكي

خالد : هالبنت مابتطلع من عالبيت الا على جثتي وهي اخر مره بتحكي عنها بنت حرام فهمتي?
سوسن : ايه فــ فهمت اخي?
ام خالد : روحي سخني شوية مي لحممها شوفي كيف الدم عالق فيها لك حتى الحبل السري مقطوع غلط
سوسن : يالله رايحه
جهزو للبيبيه حمام وغسلوها ولفوها بشرشف نظيف

سوسن : شوفي ما احلا هالوش امي ?
ام خالد : متل الملاك تقبر قلبي?
سوسن : كيف ام بتسخى ترمي ضناها ماعم افهم
ام خالد : في ناس مافي بقلوبن رحمه بنتي وبيفكرو حالهم بس يتخلصو من الطفل رح ينمحى عارهم
سوسن : الله لا يوفق لا امها ولا ابوها ?
ام خالد : امين يارب…. وينك بنتي جيبلي شوية مي وسكر لطعميها لحتى يوقف المطر ويروح اخوكي يجيب رضاعه وحليب
سوسن : حاضر امي وفتلت حالها لتروح تعمل متل ماطلبت امها وفجأه وقفت وهي عم تحك راسها

ام هال : شبك تنحتي روحي اعملي متل ماحكيتلك

سوسن : مممممممم طيب ليش المي والسكر وعنا بالبيت مرضعه

ام خالد : قولتك جنان بتقبل ترضعها

رفعت سوسن كتافها بحيره : مممممم مابعرف منجرب

ام خالد : هلأ خلينا نقيتها بشوية مي وسكر وبس تفيق حنان بنسألها ازا بتوافق

سوسن : ماشي رايحه حضرهم

♡♬♡هناك قلوب طيبة تجعل حياتنا مزهرة وهناك قلوب من قسوتها نتمنى لو لم نصادف اصحابها ،.. ~?

☆ ╚══════ღღ══════╝

على صوت بكا الطفله طلعت جنان من غرفتها بشعرها المنكوش وبيجامتها يلي لو بتعرف طريق المحكمه لاشتكت عليها

جنان : شو في ليش اصواتكم طالعه كأني سمعت صوت طفل بيبكي واطلعت لحماتها يلي كانت مشغوله وعم اطعمي البيبيه مي وسكر لمين هاد الولد يلي حاملتيه مرت عمي

خالد: هي بنت مو ولد

جنان : اي حاصلو بنت مين يعني وشو جابا لهون

ام خالد : بعدين بخبرك قصتها بس واللي يخليلك كرم تعي رضعيها خطي البنت ميته جوع

جنان : رضع مين ؟؟ لك مييييين هييييييي فهموووووني

خالد : هي بنت لقيتها مزتوته بالشارع

جنان : بنت حرااااام ?.. وبتحول نظرها لحماتها… بدك ياني رضع بنت حرام يامرت عمي وتسير اخت كرم كمان ?

خالد : اي شو فيها رضعيها والك الاجر لك جنان… هالطفله ماختارت قدرها ومو زنبها انه ابوها مو رجل وامها متجرده من الاحساس

ضيقت عيونها وحطت ايدها عخصرها : لتكون متجوز عليي وجايبلي بنتك ربيلك ياها يابعدي?

خالد : لاحول ولاقوة إلا بالله…… امي انا طالع جيب رضاعه وحليب للبنت بدك شي تاني

ام خالد : اي ابني جيب معك فوط لاطفال حديثي الولاده

خالد : تمام… . وفتل حالو ليطلع بس جنان صرخت فيه وعيونها بتقدح شرار

جنان : على ووووووووووين رايح يا بعدي هلأ هلأ بدي اعرف مين الحيوانه يلي تجوزتا عليي?

خالد : روحي من وجهي جنان بلا ما ابتلي فيكي ?

جنان : لا رعبتني والله هاد فوق مانك غلطان جاي كمان تتقاوا عليي ?

خالد : بعمرك مابتتغيري… . وبيحمل حاله وبيطلع من البيت

كانت علاقة خالد وجنان سيئه نوعا ما دائما مشاكل وصوتهم طالع بسبب اهمال جنان وتصرفاتها الغير مسؤولة… اطلقوا مره ورجعها كرمال امه وبعد ماخلفت كرم حكا الدكتور انه صعب تحمل مره تانيه لان جنان كانت بتعاني من مشاكل بالرحم

☆ ╚══════ღღ══════╝

قربت جنان لعند مرت عمها وبلشت تبكي

جنان : شفتي يامرت عمي هي اخرتها يتجوز عليي لك انا بشو قصرت معه?

سوسن بقلبها : ;;لك ليش شو بتساويلو تضربي من بين النسوان? “”

ام خالد : يابنتي حكي جوزك مزبوط وانا ب ايدي غسلتا من دم الخلاص

جنان : يعني مانو متجوز عليي?

سوسن : مو لحتى يقدرلك بالاول?

جنان : شو تفضلتي ست سوسن?

سوسن : ولاشي انا فايته عالمطبخ سخن الاكل لحتى يرجع اخي ولي عقلبي بيكون جوعان وماعندو مره تخدمه… وحملت حالها وفاتت عالمطبخ

لوت جنان تمها وماعجبها الحكي : سامعه مرت عمي بنتك شو عم تحكي?

ام خالد : يابنتي برضايي عليكي حاولي غيري من نفسك شوي .. شوفي حالتك ولا مره وراها عر ولاد لك انتي ماعندك الا كرم ربي يحميه ليش مهمله بحالك وجوزك

جنان : والله انا بهتم فيه وبكرم وبشغل البيت ومابلحق رتب حالي شو ساوي مرت عمي ابنك مابيعجبو العجب

ام خالد : تعي بنتي قربي شوفي هالوش شو حلو برضاي عليكي رضعيها وحني عليها… كرمالي يامو

حكت راسها شوي وهي بتفكر… . هلأ ازا رضعتها خالد رح ينبسط مني ومابيعود زعلان ممممم?…… . حاضر مرت عمي تكرم عينك?

ام خالد : الله يرضى عليكي بنتي

قامت جنان لغرفتها جابتلها كم قطعة تياب من تياب جود يلي صغرت عليه ولبستها ياهم وبعدا ضمتا لصدرا وبقيت ترضع فيها لحتى شبعت

رجع خالد عالبيت وهو حامل الاغراض اللازمه وبس شاف جنان حاضنه البنت وعم ترضعها حط الكياس من ايدو وقرب عليها وقعد حدها باسها من كتفها وهو بيطلع فيها نظرة اعجاب عالشي يلي عملته

جنان بخجل : شبك عم تطلع فيي هيك شو اول مره بتشوفني ?

خالد : بصراحه حاسس حالي اول مره بشوفك

جنان : رضيان عني ابن عمي

خالد : انا دايما رضيان عنك جنان لاني بعرف جواكي انسانه طيبه بعكس شخصية العسكري يلي متقمصيتها

جنان : هاد يلي طلع معك يعني انا عسكري?

سوسن : شبك جعفر اخي عم يمزح معك?

جنان : التهي بحالك انتي وماتداخلي بيني وبين جوزي حبيبي

سوسن : هالله هالله شو كل هاد لاااا الهيئه هالبنت وشها خير على هالبيت

ام خالد : ان شاء الله بنتي

خالد : يعني موافقه تبقى عنا ونربيها امي

ام خالد : والله ازا جنان بتوافق انا ماعندي اي مانع اساسا بنكسب فيها اجر وثواب عند رب العباد

خالد : شو قلتي جنان موافقه ؟؟

جنان : بس بشرط

سوسن : بلشنا ?

خالد : اسكتي سوسن .. اي جنو شو شرطك

جنان : انا بسميها

خالد : تكرمي سميها الاسم يلي بتحبيه

ام خالد : الله يرضى عليكي بنتي…… صحيح ابني شو بالنسبه لنسبها ؟؟

خالد : رح سجلا على اسمي امي وبعد ماترضع من جنان خمس رضعات مشبعات بتصير جنان امها وكرم اخوها وانا ابوها وانتي ستها بالشرع والدين وبتربى وكأنها وحده من منا

سوسن : احممممم

خالد : اي نسيت وسوسن عمها ?

الكل : ههههههههه ????

ام خالد : طيب شو رح تعمل مع اخوانك اسيل وصالح

خالد : ماحدا الو علاقه بقراراتي اعتقد اني هون الكبير

ام خالد : طول بالك ابني اكيد بس يعرفوا قصة هالبنت رح يتعاطفوا معها

خالد :ان شاء الله امي… .. اي جنونتي شو حابه تسميها للبيبيه

جنان : وتين ❤

ام خالد : شو حلو هالاسم

سوسن : والله وطلعتي مزوئه لك مرت اخي

جنان : اي لكان شو مفكره انتي

خالد : على بركة الله معناها من بكرى رح زبط كلشي بالاحوال المدنية وطالع لوتين شهادة ميلاد

حملت سوسن وتين بحب وهي بتهمسلا

لك اهلــين وسهلـين ب احلا وتـين والله… . الله يبعتلك ايام حلوه متل وشك الملائكي
…………………… ♡

✿♬لن تتوقف الحياة على أشخاص خذلونا فدائما يعوضنا الله بمن هم أفضل.♬✿
☆ ╚══════ღღ══════╝

#يتبع
(◕‿◕✿)

تقييم المستخدمون: 3.85 ( 4 أصوات)

1 2 3 4 5 6 7الصفحة التالية

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى
error:
إغلاق
إغلاق