روايات ليبية
أخر الأخبار

جمعنا القدر للكاتبة | خلود شلابي

جميع الحقوق محفوظة

…… رواية جمعنا القدر…

الحلقة#1 ،،،،
هاذي قصة منال،،، منال بنوتة طلعت من كلية العلوم قسم الجيولوجيا،،،،،
منال واحدة من صف فيه 70 شاب 10 بنات فقط،،،، ورغم الكم الهائل من الشباب الا انها لم تلفت انتباه أي واحد فيهم،،،،، هي عادية مش جميلة ومش بشعة،،،، مش طويلة مميزة ولا قصيرة،،،،، كل شيئ فيها عادي،،، مش ذكية ولا غبية متوسطة في كل شيئ،،،،،، بس الي يميزها انها هاااادئة جدا لدرجة النسيان،، من كثر ماهي هادئة ممكن الي جنبها ينسو وجودها،،،، رغم انها لو تكلمت عندها صوت رقيق وجميل ويلفت في انتباه الجميع لانها امتي تتكلم زي البيبي،،، منال او منولة كيف ماالعيلة كلها تناديها منولة دلوعة بطريقة عفوية تلقائية من السماء،،، يعني مش دلوعة عيلة او بابا او ماما او جدها او حناها،،،،،، هي شخصيتها هكي دلوعة،،،،،، ورغم هاذا كانو الخطاب طابور علي بابهم مش علي خاطرها ولكن على خاطر اختها سوزان الجميلة الهيفا الطويييلة البيضاء صاحبة العيون العسلية والي شكل عارضات الازياء وعلي من ترضى سوزان رغم انها مازالت في الثانوي،،،،، أما منال عمره ماواحد جي وخطبها،،،،، خلفية عيلتهم من الجبل (البر) وكانو امتي صغار يمشو ديما حوش جدهم بس بعد وقت ماتت جداهم والحقها الجد ووبطلو يمشوا،،،، وقت الي كانو يحبو يمشو غادي وكان فيه عيلة اعمامهم وبنات عمامهم الي توا تزوجو معظمهم وحتى لو مشو مارح يعرفو حد فيهم،،،،، كانت هدى بنت عمها وصديقتها،،، وأسماء الجميلة،،، وعيشة،،، ومصطفى،،، وعصام وعلاء،، احيانا وقت يتفكرو في مشياتهم يذكرو اساميهم لحد مايوم جي لحوشهم عمها الكبير ميلاد الي بيعزمهم على عرس ولده الوحيد محمد والي خاطب بنت عمه سناء،،،،،،، الوقت صيف وكل العيلة فرحانة بالعزيمة،،،، وخاطرهم يمشو،،، وكل فرد يجهز في روحه طبعا الجميلة سوزان شرت الف حاجة،، هادوم للنوم هادوم ليوم الزفة هادوم لطلعات البرا،،، اما منولة فكانت عايشة قصة خيالية،،،، ياترى ح تنسجم والا لا؟ ،،، ياترى ح يتفكروها والا لا؟ ،،،،، الوضع مغرى،،،، وهما قررو يمشو قبل اسبوع العرس طبعا عرسهم غير عن هني،،،، واصلا يبو ياخذو راحتهم مع بنات عمهم وعماتهم الي ماقطعوهمش ويجوهم كل فترة وفترة،،
يوم الخميس الصبح طلعوا من حوشهم البنات 4 وخوهم الصغير يزن الي ممكن أول مرة يمشي سوزان غاااالت في لبستها،،، اما منال فلبست قونة طويلة سوداء وبلوزة صفراء ووشاح مغطي شعرها بالكامل وحذاء ارضي،،،،هيام اختهم في التاسع شكلها قريب من سوزان وممكن تصير أحلى لابسة سروال جينز أزرق وبلوزة طويلة الي الركبة وسبيدرو بينك،،، ووشاح ازرق طالع مع بشرتها البيضاء،،، ونيروز الصغيرة في الصف السادس،،،، وامهم السيدة زينب،،، وصلوا المكان موخر والجو سخونة بس مشغلين تكيييف المرسيدس،،،،أجواء الطريق حلوة ويزن يسأل عن كل حاجة،،، هو ونيروز،،، اما الليدي سوزان فرقدت كل الطريق،،، وهيام ومنولة يحكوا مع بعض،،،، وصلوا وكان عمهم يستنو فيهم على الغذي،،،، الله علي العائلات الرائعة،،، وعلي الذكريات الجميلة تماما كما كانت منذ زمن تغييرات بسيطة مازال الشارع ضيق ومازال احجار طريق (بيستا) والكون مضاء جدا،،،، وصلوا بعد الظهر بساعات والا العصر وكل الطريق وسوزان راقدة،،،صح صيف وشمس قريبة من الارض بس كان الجو الحار حلو جدا،،،، استقبلوهم بحرارة المشتاق ومش زي ما تصورت منولة لانهم عرفوهم وعشر سنوات مش هلبا،،،،الحوش جديد غير الحوش الي يعرفوه قبل نظيف جدا وستائر وجلسات حتى نيروز قالت هاذا زي حياشينا نحساب حياش الجبل يختلفو علينا،،، وبسرعة انسجمو البنات مع العيلة وعماتهم قراب من بعضهم في السكونة جو بعد العصر واجتمعو قدام الحوش والبنات دارو الشاهي والقهوة وزميتا وحلويات وجبنة وزبدة ومرات عمهم مدايرة (خبزة الفرن) التقليدية،،،، وزحمة القعدة والمعارف هلبا وازواج عماتهم وأولادهم شباب،،، وولاد عم بوهم،،، فيهم عم بوها اسمه خليفة عمره في 70 بس صحته زي ناس 50 جميل الوجه والباين مهتم بنفسه متزوج اتنين بس الباين إنه رجل حكيم وعاقل وكلهم يحتكمو عنده،،،، ومن بين الجميع الي مجتمعين كان فيه شخص غييييييير الجميع ومنولة ماعرفاتاش رغم ذكرياتها المتزاحمة الا انه غير موجود فيها،،،،، شخص واتق في نفسه وماليء مكانته،،وعارف انه كلمته مسموعة واراءه موخوذ بيها عرفه بوها ولفت موضوع بالهم يحكو فيه البنات يراقبو طبعا مش قاعدين معاهم،،، الشخص الغريب روح والليل ليل وقت العشي،،، تعشوا والبنات دارو جو،،،، هذا كله وسوزان محط أنظار الي يجي وطبعا هي عارفة نفسها بس مع ذلك كانت مقضية وقت حلو،،،، وقت النوم قعدو برا الحوش مع عمامهم وطولو في السهر،،،،، وتجرات منولة وسألت بوها على الشخص الغريب
منولة جنب بوها الي تحبه مووووت وهو كذلك مسميها منولتي،،،
منولة :بابا اشكون الي كان جنبك بكريكا وكنت مندمج معاه
بوها :هاذا يا ستي أيمن ولد المرحوم عمك فتحي
منولة :ااااه عرفته ايه صح لاني اني نعرف عمي فتحي باش نعرف ولده ايمن
بوها ؛هههههههههه يابنتي وين تعرفيه ايمن هاذا كان مش هني وجي بعد بوه توفى وسكن هو واخواته وأمه في أرضهم،،، وربا خوته وهو المسؤول عليهم،،،، وحكالها بوها عليه،،،،، وهي حسب حكى بوها عجبها بكل تفاصيله،،……يتبع
تفاعلكم حبيباتي ?? وشكرا ليكم

تقييم المستخدمون: 3.25 ( 9 أصوات)

1 2 3 4 5 6 7 8 9 10 11 12 13 14 15 16الصفحة التالية

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى
error:
إغلاق
إغلاق