نوفيلا الصياد

الحلقه(2)

احمد بغضب..هتجوزك يا دانا سواء برضاكى او غصب عنك وتركها وهم ليذهب
دانا ..استنى انت مش كل شويه تقول كلمتين وتهرب بطل هروب شويه
التفت احمد اليها 
احمد..هروب ايه انا بمشي لانى لو رديت على كلامك التافه ردى مش هيعجبك ابدا
دانا بغضب..انا كلامى تافه
احمد باستفزاز..اه تافه اوى كمان
دانا..شكرا يا حضره الضابط بس عايزاك تبقى تيجى تقعد مع العريس وتقولى رايك وهمت لتذهب الا ان يد قويه منعتها
احمد وهو يغلى من الغضب ..لو كررتى الكلام ده تانى هتندمى اوى يا دانا
دانا ..بهدوء عكس المها من يده القويه التى تمسك ذراعها ..عايز تتجوزنى ليه
احمد ببرود..مزاجى
دانا بحزن..مزاجك !!
احمد..اه مزاجى ولا انتى كنتى عايزه تسمعى حاجه تانيه
دينا بغضب ونفضت يدها منه بعنف..لا شكرا كفايه اللى سمعته وتركته وهى تجاهد دموعها حتى لاتسقط امامه ويرى ضعفها
تنهد بغضب بعد رحيلها
كانت دينا واقفه وسمعت ما حدث
دينا..وربنا انت غبى
احمد..ايه ده يا دينا احترمى نفسك
دينا..اه غبى وهتضيعها من ايدك
احمد بغضب..دينا انا مش ناقصك
دينا..خلاص يا احمد بس ممكن طلب
احمد ..عايزه ايه
دينا..الدكتور الرخم صاحبك قالى انه هو هيسقطنى
احمد باستغراب..ليه عملتى ايه
دينا ببراءه مصطنعه..ولا حاجه كنت بشتم فيه لما خبطنى وعلى صوته عليا
احمد..نعم يختى شتمتيه وعاوزاه ميسقطكيش
دينا..هو اللى شايف نفسه على الفاضى وبعدين مغرور اوى انا مش عارفه انت مصاحب الاشكال دى ازاى ده قاطعها احمد
احمد بنفاذ صبر..بسسسسس خلاص هكلمه حاجه تانى
دينا ..تشكر يا ذوق
احمد بدهشه..يا بت انتى فى تربيه يعنى كلامك منمق مش كده
دينا..يا عم روح منمق ايه وتركته وذهبت
احمد ..لا حول ولا قوه الا بالله
نوران..مالك يا حبيبي
احمد..بنتك هتجننى ودانا زعلت ومشيت
نوران..عملتلها ايه تانى
جاء على صوتهم سليم
سليم..اكيد قالها كلمتين دبش من بتوعه ما انتى عارفاه
نوران..ايه اللى حصل
تنهد احمد وقص لهم ما حدث
سليم..وربنا البت دى خسارة فيك
نوران..ليه كده يا احمد
احمد ..اعمل ايه بس اقولها بحبك من دلوقتى انا عايز اقولها لما تكون على ذمتى
سليم..طيب خليك مستنى لما تبقى على ذمه حد تانى
احمد بغضب ..ده انا كنت اولع فيها
نوران..يا ابنى خد خطوة صح وكلمها دانا عنيده
احمد..ربنا يسهل

فى منزل دانا
دخلت دانا المنزل ورات امها جالسه فركضت اليها واحتضنتها
دريه بقلق..مالك يا حبيبتى
دانا..مفيش يا ماما
دريه..انتى قابلتى احمد
دانا بغضب..متجبيش سيرته قدامى تانى لو سمحتى وقلت لحضرتك قوليله طلبه مرفوض واصلا انا واحد زميلى متقدملى وانا موافقه عليه
دريه بحزن..بس انتى بتحبى احمد ليه العند ده
دانا ..خلاص يا ماما انا مبحبش احمد ولا بحب حد تانى الموضوع ده انتهى وانا موافقه على ايهاب زميلى
دريه..ماشي يا دانا اللى يريحك اعمليه
دانا..عن اذنك يا ماما عايزه ارتاح شويه وتركتها وذهبت
اخرجت دريه هاتفها واتصلت على احمد
دريه ..الو ايوه يا زفت انت عملت ايه تانى للبت
احمد……..
دريه..والله انتى اغبى واحد شفته فى حياتى
احمد………..
دريه.. طيب دلوقتى.زميلها فى الشغل متقدملها وهى موافقه ومصممه هتعمل انت ايه انا لو هيا صممت مش هقدر اعمل حاجه تانى دى حياتها وهيا حرة
احمد…………
دريه..احترم نفسك يابن نوران ومتشتمش ايه لسانك عايز يتقص منه سلام دلوقتى وانا هشوف ايه اللى هقدر اعمله
اما دانا دخلت الى غرفتها وانهارت فى البكاء
رن هاتفها وكان زميل لها فى العمل
دانا..الو
ايهاب..اذيك يا انسه دانا يا ترى فكرتى فى اللى قلته ليكى
دانا بعدم تفكير..موافقه يا بشمهندس تقدر تيجى انا هقول لاونكل سليم لان زى ما حضرتك عارف بابا متوفى
ايهاب بسعاده..طيب اقدر اجى امته
دانا بحزن..هاخد ميعاد واقولك عن اذنك مضطرة اقفل
خرجت دانا الى امها
دانا..ماما انا قلت لايهاب انى موافقه بس قلتله انى هقول لاونكل سليم الاول وهو اللى يحدد ميعاد
دريه بحزن..ماشي يا دانا طالما ده هيريحك اعمليه
دانا..شكرا يا ماما انك بتدعمينى فى قراراتى

فى كليه التربيه
كانت دينا مع رفيقاتها فى المدرج تنتظر الدكتور فارس ليلقى محاضرته
دخل فارس بهيبته المعهوده وبدا الشرح ولاحظ ان دينا تتكلم
فارس..انسه دينا بره
دينا..ليه
فارس..مزاجى بقى قلت بره
دينا..على فكرة يا دكتور ده مش اسلوب واذا كان على المحاضره تولع مش عايزاها وتركته وذهبت
فارس فى نفسه..اعوذ بالله دى دينا البنت الهاديه الرقيقه دى قلبت دراكولا بس على مين والله لاربيكى بس لما تبقى فى بيتى مهو انا مفضلش مستنى البت اللى حبيتها واسيبها علشان لسانها هقصهولك يا حياتى

فى منزل سليم
حضرت دانا لتاخذ من سليم ميعاد ليقابل ايهاب
سليم..خير يا دانا فى ايه
اخذت نفس عميق ثم تحدثت وكان احمد ينتظر هو الاخر ليعرف ما بها
دانا..فى واحد زميلى فى الشغل متقدملى وانا موافقه وعايز ييجى يقابل حضرتك ويقرا الفاتحه
احمد..خليه يجى ونقرا الفاتحه بس على روحه ان شاء الله
لم تعير دانا كلامه اى اهتمام ووجهت كلامها الى سليم
دانا..اقوله يجى امته يا اونكل
سليم وهو ينظر لابنه بخبث..قوليله يجى النهارده الساعه 8وهقابله فى شقه والدتك وهاجى انا ونوران
دانا..يا ريت تيته منى تحضر هيا كمان
سليم..حاضر هقولها
احمد..وانا كمان هاجى
نظرت دانا اليه بقلق..بصفتك ايه
احمد ..بصفتى اخوكى انا اتقدمتلك وانتى رفضتى خلاص يبقى انتى زى دينا اختى بالضبط وطالما سعادتك مع الواد ده انا كمان هكون سعيد علشانك
دانا بشك..اكيد احنا دلوقتى اخوات وانا كمان بعتبرك اخويا بالضبط
نوران..دانا تعالى عايزه اتكلم معاكى شويه
دخلت دانا مع نوران احدى الغرف ليتحدثا
نوران..انتى بجد موافقه تتجوزى اللى اسمه ايهاب ده
دانا بحزن..اه موافقه يا طنط
نوران..متاكده ولا بتغيظى احمد
دانا..لا يا طنط احمد خلاص صفحه واتقفلت وانا مش مستعده اتجوز واحد مش بيبادلنى نفس شعورى
نوران..وانتى بتبادلى ايهاب نفس شعوره يا دانا
صمتت دانا ولم ترد
نوران..سكتى ليه يا دانا اتكلمى كلامى صح مش كده صدقينى احمد بيحبك هو بنفسه قالى كده
دانا..اشمعنا انتوا بس اللى شايفين حبه ليا وانا ليه مش شايفه الحب ده ليه مش حاسه بيه احمد بيحب يعاندنى بس يا طنط مش بيحبنى زى ما بحبه اتمنى انك تحضري عن اذنك
جلست نوران بعد ذهاب دانا تتنهد بحزن على تلك الفتاه
نوران..عنيده اوى وهتضيعى نفسك

فى كليه التربيه
كانت دينا تجلس مع صديقتها رحيق
رحيق..ايه اللى عملتيه ده يا دينا فى حد يقول لدكتور الماده كده
دينا بغضب..اه فى انا وبعدين ده دكتور شايف نفسه على الفاضى وفرحان بلمه البنات حواليه
كان دكتور فارس يمشى بجانب المكان التى تجلس فيه دينا وسمعها
فارس..انتى بنت قليله الادب ومش محترمه واللى عملتيه معايا مش هيعدى بالساهل يا انسه وانا ليا كلام تانى مع اخوكى
دينا بغضب..انا قليله الادب ومش محترمه يا دكتور اونطه ملكش لزمه فرحان بشويه الشعر اللى بيطيروا مع الهوا
فارس بغضب وامسكها من ذراعها ..اتلمى يا بت انتى احسنلك بدل ما اندمك على اليوم اللى شفتينى فيه
نفضت دينا يدها منه بغضب
دينا..الزم حدودك احسنلك بدل ما اخليك تندم انت
فارس..ماشي هنشوف مين اللى هيندم وتركها وذهب
رحيق..الله يخرب بيتك فى حد يعمل كده انتى كده ساقطه رسمى مفيش كلام
دينا..ميهمنيش
رحيق..مالك يا دينا انا اول مرة اشوفك كده
دينا ..علشان مفيش حد قبل كده عمل اللى عمله معايا فارس ده المهم عملتى ايه مع دكتور يوسف
رحيق..اخر مرة شفته لما انتى كنتى معايا
دينا..يعنى ناويه على ايه
رحيق بحزن..ناويه اعيش حياتى لنفسي مش لحد تانى ويوسف خلاص صفحه واتقفلت
دينا..بلاش تكدبى على نفسك انتى لسه بتحبيه
رحيق بدموع..اه بحبه بس هو كسر قلبى
دينا..هو كمان معذور سامحيه يا رحيق وعيشي حياتك
رحيق ..طب انتى كمان بتحبى فارس بتعاندى معاه ليه بقى
دينا…اسكتى الله يخرب بيتك لحد يسمعك
رحيق..بتحبيه ولا لا
دينا..ده لما كنا صغيرين وزعلت اوى لما سافر وفضلت متاثره بيه فترة طويله بس ده كان هبل عيال
رحيق..عليا انا ده انتى لما شفتيه واقف مع رحاب وكانت واقفه عاديه بتساله على حاجه عينك كانت هتطلع عليه وعليها وكان نفسك تجبيها من شعرها
دينا..اسكتى يا رحيق
رحيق..سيبى نفسك وعيشي حياتك وسيبك من العند ده
دينا..قولى الكلام ده لنفسك
رحيق..تمام نحاول انا وانتى ونشوف هترسي على ايه
دينا..تمام ثوانى وراجعه
رحيق..رايحه فين يا مصيبه
دينا..رايحه الحمام افضحينى بقى

ذهبت دينا الى الحمام واثناء رجوعها مرة اخرى وجدت يوسف ينادى عليها
يوسف..انسه دينا ممكن اتكلم معاكى شويه
دينا..اتفضل يا دكتور
يوسف..انا عايز رحيق تسامحنى ومش عارف اعمل ايه ممكن تكلميها شويه رحيق بتحبك وبتسمع كلامك
دينا..انا فعلا اتكلمت معاها وهيا وعدتنى تحاول
يوسف بفرحه..بجد شكرا انا مش عارف اعملك ايه اطلبى اى حاجه
دينا بخبث.. اى حاجه اى حاجه
يوسف..اطلبى يا انسه وانا اوعدك هنفذ
دينا..تقول لدكتور فارس يخف عليا شويه مستقصدنى وعايز يسقطنى
يوسف..انتى عملتى ايه
قصت له دينا ما حدث
يوسف بدهشه..ده المفروض يولع فيكى مش يسقطك بس اوعدك هتكلم معاه
دينا بابتسامه.. متشكرة اوى يا دكتور
اما فارس كان يشاهدهم من بعيد واشتعل فتيل الغيره لديه عندما راها تتحدث مع يوسف وتضحك معه
فارس بوعيد..مبقاش فارس لو مربتكيش من الاول يا دينا

فى المساء بمنزل سليم

سليم..يالا يا نوران هنتاخر
منى..يعنى انت موافق واحمد هيسيب دانا تتجوز حد غيره
سليم..مش عارف يا ماما احمد مش فاهمه خالص ودانا عنيده
منى..ربنا يستر
سليم..يا رب يالا بقى يا نوران
نوران..يالا يا حبيبي

كان احمد يتحدث مع والده دانا على الهاتف
احمد..ينفع اللى بنتك بتعمله ده
والده دانا……….
احمد ..يبقى متزعليش من اللى هعمله
والده دانا………
احمد……..
دريه………..
احمد..كويس انك موافقه تسلميلى يا حماتى يا رب مع السلامه
اغلق احمد الهاتف وابتسم بانتصار
احمد..ده انتى هتشوفى مواهب يا دانا

فى منزل دانا
حضر ايهاب مع والدته واخته لرؤيه دانا وكذلك سليم ونوران ومنى واحمد واتفقوا على كل شيء
ايهاب..طيب تمام كده نقرا الفاتحه بقى
احمد..على ايه
ايهاب..ازاى مش فاهم
احمد ..اصل العروسه مينفعش تتجوزك
ايهاب ..مينفعش ليه
توترت دانا لما يفعله احمد وكذلك الجميع
احمد ..مينفعش وخلاص
سليم..فى ايه يا احمد
احمد ..فى ان دانا تبقى مراتى
فى احد المطاعم كان يجلس فارس مع يوسف يتناقشون فى بعض الامور
يوسف..بقولك ايه خف على دينا شويه مش كده
فارس بحده..هو انت ايه اللى عرفك
يوسف بلا مبالاه ..مفيش هيا اللى قالتلى
فارس بتساؤل..وهيا تقولك ليه انت فى بينكوا حاجه
يوسف بخبث..وافرض فى بتسال ليه
فارس بحده ..مفيش انا ماشي وتركه وذهب
يوسف بضحك..ههههه شكلك وقعت يا فارس تستاهل دينا هيا اللى هتربيك
رجع فارس منزله ولا يكاد يري امامه من شده الغضب
فارس..يعنى فى حاجه بينها وبين يوسف ماشي يا دينا
دخل عليه فهد
فهد..مالك يا فارس فيك ايه
فارس بخفوت..مفيش يا بابا
فهد..مش عليا فيك ايه
فارس..قلتلك مفيش يا بابا
فهد..طيب براحتك لما تكون حابب تتكلم انا موجود
فارس..معلش يا بابا انا تعبان ومش قادر اتكلم بس اكيد هحكيلك
فهد..ماشي يا حبيبي

فى منزل والده دانا
احمد..دانا تبقى مراتى
ايهاب بغضب..مراتك ازاى
احمد بسخريه..زى السكر فى الشاى
ايهاب ..انتى اكتر واحده مش محترمه عرفتها انتى وا
لم يكمل كلامه لان احمد لكمه فى وجهه جعلت انفه وفمه ينزفان وامسكه من ملابسه
احمد بفحيح..قسما بالله لو قلت حاجه عليها تانى لادفنك مكانك
والده ايهاب..يالا يبنى نمشي من هنا دى طلعت واحده مش كويسه واخذت ابنها وذهبت
سليم بعصبيه..دى اخرة تربيتى فيك بتتجوزها من ورانا
احمد..انا متجوزتهاش انا قلت كده بس علشان يمشي هو وامه من هنا
نوران..كده يا احمد حرام عليك انت كده دمرت سمعتها
يبنى
احمد..اللى هيقول علي
لم يكمل كلامه بسبب دانا
دانا ببكاء..انت كده فاكر انى هقبل اتجوزك بعد اللى عملته ده ايهاب دلوقتى هيبوظ سمعتى فى الشركه حرام عليك سيبنى فى حالى بقى انا بكرهك
احمد..لا يا دانا مش هسيبك انتى ليا انا
دانا..نجوم السما اقربلك منى
والده دانا..معدش ينفع يا دانا خلاص انتى لازم تتجوزى احمد ودلوقتى قبل ما سيرتك تبقى على كل لسان
دانا بصدمه..ايه الكلام ده يا ماما
دريه..اللى لازم يحصل يا دانا حكايه العند دى خلاص معدتش تنفع لو سمحت يا استاذ سليم اطلب الماذون واتنين شهود
دانا بغضب..خلاص قررتوا عنى انا عمرى مهتجوز احمد ولو اخر يوم فى عمرى
دريه..قلتلك خلاص يا دانا الموضوع انتهى لو سمحت يا استاذ سليم اعمل اللى قلتلك عليه
سليم..متضغطيش عليها يا مدام دريه
دانا موجهه حديثها لاحمد..ساكت ليه مش عايز تقول حاجه
احمد..هقول ايه كفايه انى هتجوزك دلوقتى
دانا بغضب..انت احقر واحد شفته فى حياتى انا ندمانه انى عرفت واحد زيك
احمد بغضب..هربيكى على اللى قلتيه ده بس لما تبقى فى بيتى
نوران ..تعالى يا دانا عايز اتكلم معاكى شويه وانتى كمان يا دريه انتى وماما تعالوا
دخلوا مع دانا احدى الغرف ليتحدثوا معها
اما سليم اتصل بفهد وطلب منه احضار الماذون وان يحضر هو وفارس من اجل الشهود على عقد الزواج
انهى المكالمه ونظر الى احمد باقتضاب
سليم..عجبك اللى انت عملته ده تدمر سمعتها علشان تتجوزها هو ده اللى ربيتك عليه
احمد..اعمل ايه يعنى مكنش ينفع غير كده وهيا كانت مصممه تتجوز الزفت اللى اسمه ايهاب وبعدين دانا بتحبنى وهتسامحنى
سليم بغضب..انت مجنون فاكر بعد اللى عملته ده هيا هتفضل تحبك دى مش هتبقى طايقه تبص فى وشك بعد اللى حصل
احمد بحنق..كفايه بقى يا بابا
سليم..بكرة تندم على تهورك ده

اما فى الغرفه
دريه..معلش يا دانا انا عملت كده علشان مصلحتك انتى عارفه انى بخاف علبكى
دانا ببكاء..بس هو مش بيحبنى ودمر سمعتى ايهاب هيقول للشركه كلها اللى حصل وهتفضح وسط زمايلى بعد ما كان الكل بيحترمنى
نوران..لا والله يا دانا احمد بيحبك
منى..اه يا دانا بيحبك بس هو اللى دماغه نشفه
دانا..بطلوا تقولوا انه بيحبنى هو مبيحبش غير نفسه بس احمد اكتر واحد انانى شفته فى حياتى
قاطع حديثهم مجىء الماذون
تم عقد القران ورحل فهد وفارس وغادر سليم ونوران ومنى
احمد..عايز اتكلم معاكى شويه
دانا..وانا مش عايزه اتكلم وتركته وذهبت الى غرفتها
احمد بغضب..عجبك كده يا حماتى
دريه
دريه..يا شيخ اتلهى بقى انت ليك حق تضايق لانها دخلت الاوضه وسابتك روح روح بدل مضربك يابن نوران
احمد..ايه يا حماتى مش كفايه عليا بنتك هتبقى انتى وهيا
دريه..روح نام دانا مش هتطلع من الاوضه لغايه الصبح
احمد..ماشي تمام هجيلها بكرة

فى الصباح
استعدت دانا للذهاب الى الشركه وهى داخلها متوترة بشده
دخلت الشركه ووجدت كل من يقابلها ينظر لها باحتقار فعلمت ان ايهاب لم يترك احدا بالشركه الا وقال له
جلست على مكتبها واتت لها سكرتيره المدير تخبرها ان مدير الشركه يريدها
ذهبت دانا اليه
دانا..خير يا فندم حضرتك طلبتنى
المدير بجديه..انسه دانا احنا هنا شركه خاصه واهم حاجه عندنا مصلحه الشركه ولازم الموظفين تكون سمعتهم كويسه
دانا بتوتر..هو انا حصل منى اى حاجه يا فندم
المدير..انسه دانا انتى خلاص مينفعش تفضلى فى الشركه اكتر من كده واكيد انتى عارفه ليه وانا المفروض ارفدك بس احتراما ليك واللى قدمتيه فى الشركه ياريت تقدمى استقالتك
دانا..يا فندم انا
قاطع حديثها واردف..لازم الاستقاله تكون على مكتبى النهارده اتفضلى
خرجت دانا من المكتب وهى غاضبه بشده وكتبت الاستقاله وارسلتها الى المدير وخرجت من الشركه غاضبه متوجهه الى منزل سليم

فى كليه التربيه
حضر فارس الى دينا وكانت تجلس مع رحيق
فارس بغضب..ايه اللى انتى عملتيه ده
دينا بتساؤل ..عملت ايه
فارس بحده..انتى ازاى تروحى لدكتور يوسف وتقوليله يخلينى اخف عليكى شويه
دينا..وانت مالك
امسك فارس ذراعها بغضب واردف..انا عمرى ما شفت واحده زيك بتغلط وتعاند فى الغلط انتى ايه
نفضت يدها منه بغضب ولم تجبه دينا سوى بصفعه نزلت على وجهه
دينا بغضب ..اوعى تتجرا وتلمسنى تانى انت فاهم
نظر لها فارس والشرر يتطاير من عينيه

اما فى منزل سليم
كان سليم يجلس مع احمد يتناقشان فى العمل وسمعوا صوت دق عنيف على الباب
فتحت نوران الباب ووجدتها دانا ويبدو عليها الغضب الشديد
نوران بقلق..مالك يا دانا
دانا..احمد فين يا طنط
احمد..عايزه ايه يا دانا
تجاوزت دانا نوران ووقففت امامه وامسكته من ملابسه
دانا بغضب وصوت عالى ..انت واحد ندل وواطى انت احقر انسان انا شفته فى حياتى انا بكرهك طلقنى انا مستحيل اتجوز واحد حقير زيك
صمت سليم ونوران وكانوا متوترين من رد فعل احمد
لم يجيبها احمد سوى بصفعه مدويه نزلت على وجنتها ومن شده الصفعه نزفت شفاهها واوقعتها ارضا

يا ترى ايه اللى هيحصل
توقعاتكم؟؟؟
بقلم/شيماء رضوان