عشقي لكِ كالمحيط – سارة المجيد

#عشقي_لكِ_كالمحيط للكاتبة سارة المجيد

#بارت7

ومن رحت للمستشفى حتى اخذ نتيجة التحاليل مال رونق انصدمت قريت التقرير وعرفت بيها مرض سرطان الثدي ….. ولازم اسويلها رنين حتى اشوف منتشر بجسمها لو لا …. اتأذيت حيل وانقهرت ع رونق شنو حيكون ردت فعلها … لان اني لازم انطيها خبر حتى نبدي بالعلاج ونسويلها عملية الاستأصال …..
رجعت للبيت واني مهدود حيلي من الصدمة …. دخلت وشفت رونق دتنظف …. كتلها تعالي عوفي كولشي ولتعبين نفسج بعد

رونق … من دخل احمد حسيت اكو شي واكيد التحاليل طلعت ايجابية … كتله شبيك احمد شكو احجي ..

احمد … رونق ماعرف شلون اكولج ….. بس هل خبر ميصير ينضم عليج لازم تعرفين بي ..

رونق .. احمد احجي لتخاف اني مؤمنه بقضاء الله وقدره اذا طلع بيه ذاك المرض كول ?

احمد … هففففف اسف والله جنت اتمنى تطلع التحاليل مو نفس الي متصورها ….. بس لتخافين ان شاءالله نكدر نعالجج واعرضج ع امهر الاطباء حتى لو اضطريت اسفرج بره صدكي ماتأخر …

رونق … لتواسيني احمد انت تعرف هل مرض قاتل صاحبة وماله علاج … كتلك اني مؤمنه واتقبلت قدري لتخلي بالك …

احمد … ام سيف لتئيسن من رحمة الله تره ربج موجود … ان شاءالله تتعالجين تطيبين وتصيرين زينه ..

رونق … الله كريم

وره كم يوم حظرت اوراقي ورحت للمستشفى مال ابو لينا …. وصلت للعنوان …. شفتها المستشفى ماشاءالله ضخمة وكبيرة …. شنو هل صدفه المستشفى جانت لعلاج السرطان …. يعني اكدر اجيب رونق هنا تتعالج يارب ان شاءالله تتشافه هنا………. ودخلت للمستشفى رحت ع الاستعلامات حجيت ويه الموضف وسئلته وين غرفة الدكتور محمد ابو قائد مدير المستشفى …..
دلاني عليها دكيت الباب وطبيت ….. جان كاعد وره المكتب

احمد … السلام عليكم دكتور ..

ابو قائد … وعليكم السلام ابني … شلونك شلون صحته لينا حجتلي ع الصدفه الي صارت وياكم وطلعتوا زملاء بنفس الجامعة ههههه

احمد …. ههههه اي والله دكتور صدفة عجيبة جانت … وهيه الي كلتلي ع شغلة التعيين بالمستشفى

ابو قائد … اهاا اي اي اتفضل اكعد ليش واكف … وين السيفي مالتك انطينيا

احمد … هذا دكتور اتفضل …. اخذ السيفي مالتي وكلي عوفه يمي اقراه وباجر ان شاءالله اردلك خبر عود ….
كتله ماشي دكتور ان شاءالله يله اترخص اني مع السلامة …

ابو قائد … وين ابني اكعد بعدنه ماضيفناك …. شنو تشرب جاي لو كهوة …

احمد … لا دكتور اشكرك ع الجايات ان شاءالله لان عندي موعد بعد شوية اترخص اني ….
وطلعت واتصلت ع لينا وكتلها ع لقائي ويه ابوها وحجيتلها كل التفاصيل ….

لينا … الحمدلله حبيبي ان شاءالله موفق ياربي …. باجر انتظرك مو متجي ?? ..

احمد … ههههه لا ولج شلون ما اجي غير امووت لو ماشوفج ..

لينا .. عفية ياروحي وعمري ? …

رجعت للبيت وحجيتلها لرونق كتلها راح اشتغل بمستشفى وان شاءالله هناك نبدي علاجج لان مستشفى ضخمة وكبيرة …..

رونق … اشكرك لاهتماك … ان شاءالله خير ..

احمد .. صعدت لغرفتي واتمددت شوية ونمت كعدت العصر … طلعت رحت للكوفي يم اصدقائي…… وبقينه نسولف ونلعب دومنه وراها رحت للمطعم اخذت عشه ورجعت للبيت ….. فتحت الباب شفت رونق واكعه بالكاع ومغمى عليها ….. ركضت عليها وكمت اصحي بيها متحجي شلتها وديتها لغرفتها وراها صحت كالت ااااخ جسمي كله يوجعني ? …..

احمد … شبيج رونق ليش واكعه بالكاع ..

رونق … الوجع زاد عليه كمت اتلوه من وراه ودخت ووكعت …..

احمد … بس اصبري كم يوم وان شاءالله احجزلج غرفة هناك ونبلش العلاج …

رونق … ان شاءالله

كمت حضرت العشه وحطيته وكتلها لرونق يله كومي ع الواهس نتعشه اني وياج …. اكلنه وكملنه وصعدت لغرفتي نمت .. كعدت الصبح رحت ع رونق اطمأنيت عليها وطلعت ….
رحت للكلية جانت المحاظرة بادية ولينا كاعدة بالقسم ….. اني اشرتلها حروح للكافتريا … هزت راسها كالت اوك ….
خلصت محاظراتها واجتي للكافتريا …. كعدنه ع الميز وطلبنه عصير … متحملت جريت ايدها ولزمتها………. كتلها ماتحمل ع ابعدج دبريني شسوي

لينا … فاجئني احمد بتصرفه من لزم ايدي وانوب باسها … بهل لحظه جان نفس الطالب الي ذب حجاية عليه جان يصورنه ومندري …..
اني استحيت من الطلاب سحبت ايدي كتله احمد لتنسه نفسك احنه بوسط الكلية ….

احمد … اسف والله نسيت نفسي ولج متعرفين انتي شنو بالنسبة الي ولج عشقي الج مستحيل ينوصف ….. تكدرين تكولين مثل المحيط لا اله بداية ولا اله نهاية … وعميق الى ابعد حد ….. صدكيني اريدج تكوني حلالي وبين احظاني ??

لينا … فدووة اروحلك حبيبي وهنيالي بيك وبحبك …… اصبر الله كريم ان شاءالله اصير حلالك وصدك ماخلي غيرك يلمسني لو اموت …

احمد … يابنت گلبي والله ?

ثاني يوم الصبح اتصل عليه ابو لينا وكلي تعال للمستشفى هسه اذا تكدر …..
وراساً بدلت وطلعت …. وصلت للمستشفى ودخلت لغرفة ابو لينا دكيت الباب وكلي اتفضل ….
كعدت وكلي من اليوم انت تم تعيينك بقسم التحليلات المرضية وتكدر تباشر شوكت متحب ….. كتله ممنون دكتور وان شاءالله اكون عند حسن ظنكم …

ابو لينا … ان شاءالله ابني … روح ويه دكتور سمير خلي يدليك ع القسم وانت هم اذا تحب تتطلع ع باقي المستشفى بعد براحتك …..

احمد … اي دكتور ان شاءالله يله اترخص …

ابو لينا .. اتفضل .

احمد … افتريت بالمستشفى وبكل طوابقها ردت اعرف شنو اقسامهم وترتيبهم حتى اجيب رونق تتعالج هنا …… ورحت لقسمي وبديت اباشر بشغلي ….. انتهى الدوام العصر …. قفلت المختبر وطلعت …
وصلت للبيت .. كتلها رونق حظري نفسج باجر ان شاءالله اخذج اسويلج رنين بالمستشفى اريد اشوف المرض لاسامح الله اخاف منتشر بالجسم …….وهم اعرضج ع دكتور محمد هذا متخصص بعلاج هذا المرض ……

رونق …. ان شاءالله احمد …. بس ماريد اتعبك تره ادري ماكو امل … وادري ايامي معدودة بهل دنيا ??

احمد … اشششش شبيج رونق ليش متشائمة انتي افتهمي بابه … مرضج اله علاج انتي بس اتفائلي وكولي يا الله … تره اهم شي حالتج النفسية تكون ممتازة حتى تكدرين تجتازين هل مرض …

رونق … ياااااا الله

ثاني يوم الصبح كعدت اني ورونق ورحنه للمستشفى … وشافت مكان شغلي باركتلي هواي واتشكرتها ….. ومشيت وياها بكل الخطوات …. دخلوها بغرفة الرنين …..
وبين ما جنه انريد انسويلها الفحص بهل اثناء دخل …..

يتبع ….

#سارة?