روايه هتلر للكاتبه:اروى الطاهر المسلاتي

#هتلر 5 ?

نور:ركبت لي غرفة فاطمه …قعدت ادور في التالفون لين لقاته خذاته وجت بتطلع لاكن نصدمت لما لقت مروان قدامها شهقت ومن الصدمه قعدت متجمده في مكانها بدون اي حركه

مروان:مساء الخير
نور:تنزل في قفطانها بتوتر….اءء انا فاطمه بعتتني عشان تالفونها و…
مروان:عارف اي

___________________

في السياره:-
فراس:يتكلم بهدوء…توا بننزل زي الناس نطق زي الناس ونطلب من اهل الحوش بهدوء نور ناخذوها ونطلعو بكل هدوء
مالك:خبط ع باب السياره بقوه
فراس:هتلررر…. زي محكينا بهدوووء منبوش فضايح وكلام الناس عليها
مالك:انزل جيبها خير منخش في وصتهم ونجبدها من شعرها ?
فراس:اهداا اصلا من الصبح نشم في ريحة دم انا
مالك:انزززل فراس
فراس:نزل من السياره يساوي في جاكيته….ربي يستر ع ها الليله

___________________

مروان:متخافيش انا كنت فايت من هنايه وشفتك صدفه منسحابش المعازيم يركبو فوق
نور:هيا طلبت مني نركب مش انا والله م……
مروان:ضحك….به خلاص مفيش داعي للحلف
نور:سكتت
مروان:عموما فرصه حلوه زيك ❤️كنت ناوي نحكي معاك اصلا من لما نجي نروح بي فاطمه من المدرسه
نور:متوتره وتبي تنزل وتخليه بس كان واقف ع مدخل الباب
مروان:ياريت لو نحصل وسيله نحكي معاك بيها عندي موضوع مهم
نور:انا نبي ننزل
مروان:والله متخافي منبي شي غير شي يخلينا علي تواصل بس
نور:خدت نفس من التوتر وحسن بشوية خوف لما مروان خش الدار
نور:انا اءءء انا ما
منى:نوووور ?
مروان:بسم الله
منى:مني المعفن هاذا ….المهم نوووور حني في مصيبه بكرا الجنازه اقسم بالله?
مروان:طلع وسيبهم
نور:طيحتيلي قلبي
منى:مالك وراجلي واقفين برا ?
نور:لما سمعت اسم مالك قلبها طااااح ومعش قدرت حتى توقف
منى:اطلع في العبايات….البسي بسرعه قبل ميخشو يديرولنا فضيحه تحكي عليها المدرسه كلها وبرستيجي يضيع?
نور:تلبس في عبايتها وهيا تحت تأثير الصدمه
منى:نزلت وماسكا في يد نور
نور:وقفي منى انتي خليك هنايا دبري اي حد يروح بيك متروحيش معاي
منى:لا يانويرتي ع الاقل تلقي من يعيط معاك لما هتلر يضربك
نور:وجها اصفررر…..منى بالله عليك خليك هنايا تو نحكي معاك
منى:خذت نفس….كان مسك ديري روحك توفيتي واقعدي شهدي باش يخاف
نور:طلعت رجليها ويديها يرعشو ومش قادره تتنفس من الخوف
فراس:تفضلي نورنا لي السياره
نور:فمها جاف….معصب صح؟
فراس:ضحك …..وتيت حتى خيمة العزاء
نور:بلعت ريقها وركبت في السياره من تالي وصوت دقات قلبها طااالع من الخوف
مالك:ولع السياره ويجرررررى ….دمه يخلي وكاتم في نفسه وساكت
ونور طووول الطريق تشهد وتقرا في قرآن

?رِوايـَــــاتْ بـــــَــــنـــو تــِةْ الشــِـــيـــــــخْ?
?أَروى الطــَـــاهـــــِرْ المــــســـلاتـــــــــي?

منى:مقعمزه في العيد ميلاد ….عين والله عين كله من لون شعري طالع قنين حسبي الله فيهم به قالو مشاء الله ع الاقل عيون الناس مترحمش

مالك:درس السياره بي قوه لين نور لصقت في الكرسي القدامي …نزل مالك من السياره فتح الباب وماسك نور من يدها جبدها ويمشي ونور وراه حاسه يدها بتتكسر ومعندهاش وجه حتى باش تقوله اطلقني ??‍♂️
مالك:خش بيها الحوش وسكر الباب
فراس:كل الاعصاب هاذي والله ما ادير حاجه قدام الفرخه نعرف انا
مالك:خش الصاله وجبدها من يدها لين طاحت
نور:سبقوها دموعها…مم م مالك
مالك؛لوح المزهريه تكسرت وعيونه نااااار……سكرررررري فمك صوتك الخامر منبيش نسمعه
نور:بلعت ريقها ودموعها ينزلو من الخوف
مالك:بصوت واطي…انا نور هكي اديري فيا؟
حنين معاك مش منقص عليك شي وهكي تتصرفي
نور:انا مش
مالك:بصوت يخوف…سكرررررررري فمك منبيش نسمع د???
نور:حاطه يدها ع فمها وتبكي مصدومه من مالك وكلامه
مالك:شوفي لي حالتك …وجهك ولبسك
نور:غطت رجلها العريانه يلي طالعه من العبايه
مالك:هكي ربيتك انا؟!هكي علمتك
نور:تبكي بصوت
مالك:جن جنونه من دموعها لا قادر يحضنها ولا يخليها هكي….بدي يخبط ويكسر ……معش تبككككككككي معش نبي نسمع صوتك
نور:خافت من حالة مالك وتوقعاته يدير اي شي …حاولت تسكت وتكمد البكي لاكن العبره كانت فاضحتها
مالك:عطاها بضهر ويديه علي وجها يحاول يهدي نفسه….
نور:حاولت توقف
مالك:تلفت شافها كيف واقفه وشعرها نازل علي ضهرها وعيونها….شعرك قداش مره قتلك ينقام
نور:قامت عيونه بوجه تاعب من البكي….من حقي مالك من حقي نمشي ونطلع لي صاحباتي ونلبس يلي نبيه مش كله بي امر منكككك
مالك:بدون مايوعى لي نفسه قرب عليها بيضربها لاكن مسكه عصام
عصام:لا ماااالك مش هكي متمدش يدك
مالك:حسااااابك معاي يانور حسابك معااااااااي
نيروز:خذت نور….اركبي بسرعه حي عليك شن مدايره
نور:ركبت لدارها وهيا تبكي ونيروز معاها اما نهله وبنتها الاء واقفين مصدومين مش فاهمين شني يلي صار ويشوفو في الدنيا كيف مكسره

_________________

عصام:شن هاذا؟
مالك:البنت نحلت وفسدت خليني نربيها ومتدخلش بينا يابوي
عصام:نور لا فسدت ولا نحلت البنت تمر بي سن مراهقه ويلي قاعد يصير طبيعي.. نسيت كم مره خواتك غلطو؟!
نسيت كم مره نيروز تمشي لصاحبتها بدرن متقول وتقلب الدنيا عليها ؟!!
مالك:يديه يرعشو طلع دخانه وولعه بدون مايحكي
عصام:سيطر ع الغضب متعك البنت مش ملاك كلنا نغلطو متعالجش الغلط بي الغلط اعرف كيف تحكي وكيف تتصرف مع البنت
مش كان عطيتك حرية التصرف مع خواتك خلاص في النهايه نور يتيمه مهما كنت معتبرها اختك وبنتنا يتيمه بتقعد
مالك:يدخن بدون ميتكلم وداخله بركان قاعد منطفاش
عصام:يلي صار معش نبيه يتكرر
مالك:يصير خير
عصام:سيبه وركبت لي داره
مالك:طلع من الحوش وباش يفرغ حتى جزء صغييير من الغضب متعه فرغ مخزن سلاح في الهواء
فراس:ابتسم بي خبث…مصارش من الدم ?

_____________

ناهد(ام منى):تسوق وتهزب…الف مره نقولك متطلعيش قبل متقولي تخيلي طاح عليكم صاروخ مثلا نقعد ندور فيك طول عمري انا ع اساس خليتك في حوش نور كيف بنعرف مكانك
منى:تعرفينس من شعري الاخضر
ناهد:اخ بس تماديتي وبديتي كل شي اديري فيه من دماغك في بنت عقلها في راسها تصبغ شعرها اخضر….
منى:ترا خليني علي راحتى خير منتزوج ويبدا شعري لونه برتقالي من الميش والصبغات ?

___________

نهله:الله يسامحك يانور حتى انتي عمله ادريها هاذي
نور:خاطري نحضره العيد ميلاد يامرت عمي
نهله:اححح ربي يهديكم وخلاص….وطلعت
نور:ناضت مسحت مكياجها وغسلت وجها
بدلت حوايجها ووقفت علي الروشن تشوف بي خوف لي مالك يلي كان مقعمز
مالك:لوح الدخان وقام عينه علي روشن نور وتلاقت عيونهم في بعض?
نور:وخرت بسرعه وسكرت الستار
مالك:خش للحوش بدون ميتكلم مع حد
نور:قعدت ماشيه جايه تسوف لي دارها كيف مدمره وحاسه ان مالك رح يجيها في اي لحضه
سمعت صوت باب دار علاء ومشتله تجري

طق طق طق
علاء؛ادخل
نور:فتحت الباب وخشت…علاء نبيك
علاء:ينحي في سبيدروه ويضحك…شن مدايره من الاخر؟!
نور:مصيبه وخايفه من مالك بيقتلني وربي
علاء:شفت الدنيا خاشه بعضها لوطه
نور:خليني في دارك لين يرقد ولا يطلع
علاء:اسمعيني نور مالك صح يدير في العار لاكن خايف عليك لا اكتر مستحيل يأذيك ره
وبالك تسحابيه نسي موضوع طلقيك وحق يلي مخداشي قاعد؟!
نور:شن قصدك؟
علاء:قصدي ان مالك مش رح يسكت علي حقك يلي تسحابيه ان خلاص نسي الموضوع فهمتي؟
اسمعي الكلام ومعش اديري مشاكل
نور:هزت براسها
علاء:توا بري ارقدي سلم بنتي
نور:اففف به تصبح ع خير
علاء:وانتي بخير

?رِوايـَــــاتْ بـــــَــــنـــو تــِةْ الشــِـــيـــــــخْ?
?أَروى الطــَـــاهـــــِرْ المــــســـلاتـــــــــي?

فاتت ليله هاااااديه بكل مالك في غرفته مطلعش ونور نفس الشي بس قعدت طول الوقت تحكي مع منى ع النت لعند الصبح

ثاني يوم??

نور:وتت روحها للمدرسه ونزلت لاكن رجل القدام ورجل لتالي مش قادره تقيم راسها لا قدام عمها ولا قدام مالك
خذت كتبها وطلعت قعمزت في السياره وهيا ساكته وبس

مالك:فايت من قدام الطاوله خدي رشقة قهوا وجي بيطلع…وين نور؟!
نيروز:تراجي فيك في السياره مبتش تفطر
مالك:هز براسه بمعنى فهم وطلع وسكر الباب
نور:شفاته جاي وقلبها يدددق بيطلع …يارب كون معاي يااارب
مالك:فتحلها السياره…انزلي
نور:شبحتله بصدمه….انا؟!
مالك:انزلي قتلك
نور:نزلت وعيونها في الارض
مالك:خذي بعضك ركب السياره وطلع
نور:قعدت واقفه مصدومه ….هوا لزها؟بجديات لزها؟؟؟!

علاء:واقف قدام نفس القهوا يلي شاف فيها البنت ع امل يرجع يتلاقى معاها ومخلى من سأل عليها بس كلهم مش عارفين منو تكون بس مع هاذا الماشيه والجايه يعاكس فيها?

______________

منى:ماشيه للمدرسه ع رجليها وتحمى بي التالفون …كذااااابه كيف كيفف؟!
نور:انا قاعده مصدومه مقدرتش حتى نخش الحوش تصوري لاصبح عليا ولاقالي شي نزلني من السياره وخلاص
منى:مريض ولد عمك هاذا مرررررريض
نور:بنخش نكلم عمي يوصلني انا
منى:به نتلاقو
نور:سلام…وسكرت الخط ،قامت عيونها ولمحت ولد صغير يجري لعند السيارات وطبعا ادخلت بسرعه زي البطله ونقذاته
علي؛ااااه صحيتي صحيتي جديات مش عارف كيف نشكرك
منى:سارحه فيه….عطيني رقمك ?
علي:نعم؟!?
منى:دير بالك ع الولد الصغار زي القناتش بسلامتهم فهمت عليا؟
علي:اها اي مش عارف كيف هرب مني الحق صحيتي
منى:سلمك ياسموح
علي:ابتسم وخذي الولد وجاي ومشي
منى: لبست شنطتها ورجعت نداته ….هيييي استنا يا اخ
علي:نعم
منى:بنسألك ومتضحكش عليا بالله عليك
علي:تفضلي
منى:انت حلو ولا انا بديت نكبد ع اي حد نشوفه؟!
على:نزل عيونه يضحك ومش عارف شنو يرد عليها
منى:يما جممميل ?
على:بري لمدرستك تأخرتي
منى:وووه عليا الحصه بتبدا….ومشت تجري وهيا تقوله….نتلاقو صدفه يا سموح
علي:ركب الولد في السياره وضحكه مفارقتش وجها

________________

نور:عمي وصلني
منى:اريح
نور:بنهبللللل بنهبلللل ع اللقطه يلي دارها التافه كيف يلزني هكي
منى:تاكل في البطاطا….عادي اصلا الخوت علاش ربي خالقهم؟باش يحشمونا ويديرو فينا العار ويستهلكو في الاكسجين شن ليهم فايده تاني
نور:حقييير حسبي الله فيه
منى:فمها معبي …انتبهي مع الكربوهيدات باش تتكربي حتى انتي ?عطيها دي ابلة الكيمياء تقول اين شتاين لابس شاربه
نور:???

_______________

علاء:وصل لي مرحلة اليأس خلاص وقرر يروح تعب من البحث ع نفس البنت يلي معطاتاش حتى ربع وجه وفي نفس الوقت خطفت قلبه ❤️

كمل قهوته وجي بيقص لي سيارته لاكن بطريقه مش مفهومه ضرباته سياره بس مكانش الحادث قوي هلبا
طاح علاء وبسرعه ما تجمعت الناس
مزلت البنت يلي كانت تسوق تجررري مصدومه ….صااار شي حي عليااااا اسفه اسفه مكنتش منتبها
علاء:رغم يده المكسوره يلي كان فيها وجع رهيب لاكن عيونه ضحكو لما شاف البنت ❤️…..اخيرا لقيتك??
البنت:نووض لو سمحتم ياريت تساعدوني نحطوه في السياره عشان نرفعه
علاء:طول الوقت يشوفلها. ي المتهستر ويبتسم …ركبوه في سيارتها وطلعت بيه

_____________

مالك:يرتب في الاوراق…امم تمام هكي شوفلي جماعة السيارات باش نتفاهمو
فراس:مش حاس ان عبيت روحك خدمه اليوم؟!ياسر يلي خذيته امتى بتلحق تكمل
مالك:طلع دخانه….نلحق نلحق دير زي ماقتلك
فراس:عطاه بضهر وجاي بيطلع….الحرب يلي خاش فيها ياهتلر مش الخدمه يلي رح اطلعك منها!!!
مالك:يشوف لي الروشن…احتفض بي الحكمه لي عمرك فراس
فراس:هز بكتفه…نعرف الحجات يلي ميعرفوهاش الناس انا
مالك:لوح الدخان ومشي

?رِوايـَــــاتْ بـــــَــــنـــو تــِةْ الشــِـــيـــــــخْ?
?أَروى الطــَـــاهـــــِرْ المــــســـلاتـــــــــي?

رن الجرس وصوت الزحمه متع البنات يلي طالعين للمرواح معبي المكان

منى:ع اساس يعني لبسها مليح نحلف عليها واخداته من بنت خالها
نور:اففف انا عقلي في شنو وانتي في شنو يامنى
منى:شوووووفي شوفي هاذا لقيته الصبح وفضحت روحي قتله محلاك
نور:ههههههه اصلا ديمه فاضحه روحك
منى:اشرت بيدها …اهلين

علي:اول مشافها ابتسم…اهلين بيك
منى:تعالي نور بنعرفكم ع بعض …هاذي صاحبتي نور
علي:بجوده…نور تسلم ومتحشمه…بيك اكتر
منى:يانور هاذا واحد قابلته الصبح مش عارف اسمه لاكن قنين
نور:تحشمممت ووجها احمررر
علي:هههههه مليكش حل انت
منى:صعبه صح؟!حلني حلني ??
على:???
منى:وانت شن جاي ادير هنايا ولا تخون فيا
على:وهوا يحاول يسيطر علي ضحكاته…بنت اختي هنايا جاي بنروح بيها
منى:اها به كويس انا ماما جتني يلا باي وانت رد بالك تشوف لحد راهو زوجتك نفسي
علي:هههههههه
نور:تباعد عليه وهيا تضحك ع منى وحركاتها ….لاكن بسرعه ما اختفت الضحكه بعد شافت مالك وصل
نور:حقير الصبح لزني وتوا جاي يروح بيا
مالك:درس السياره وعيونه في التالفون
نور:ركبت من تالي بلعناد وقعدت ساكته
مالك:شبحلها في المرايا وقام حاجبه
نور:نزلت عيونها
مالك:ولع وطلع بدون ميحكي معاها ولا كلمه

_______________

علاء:جبسوله يده وخشت البنت
البنت:بتكبر…..اسمع
علاء:عيون الاسمع?
البنت:منبيش مشاكل انت يلي طلعت في وجهي ايوا
علاء:احمم لا وخيتي معليشي بنفتح محضر انا
البنت:توترت…تبصر صح؟!
علاء:بنضرات جديه….تشوفي فيا متع بصاره؟!
البنت:اففف بالله عليك ونبي ?محدش يعلم بيا طالعه بسياره ارجوك فوت الموضوع وحوذ اي شي تبيه
علاء:تمام 092كم؟!
البنت:ها?؟
علاء:تبي محضر؟
البنت:لالا خلاص اكتب عندك
علاء:ابتسم ع جنب وبدي يكتب

____________________

نور:نزلت من السياره وكانت متوقعه ان مالك يحكي معاها اي شي بس للاسف مقلهاش ولا كلمه وكانت بتمووت وتعرف شنو يفكر وشن يبي يتصرف بعد يلي دراته ??‍♂️
بدلت حوايجها ومنزلت للغدي كل يلي دراته اتصلت بي منى وتحكيلها شن صار

منى:مدوريشي تو يرضى بروحه طنشيه
نور:منى مقتلكش انصحيني مع حبيبي بالله عليك ركزي
منى:المهم طنشي انا اي حد يبي نصيحتي هاذي النصيحه يلي معتمدتها
نور:???
منى:المهم ركزي معاي توا امس بعد يلي صار نسيت نسألك
نور:شنو؟!
منى:مروان اخ فاطمه …شن يبي منك امس؟!
نور:تصدقي نسيته بكل منعرفش مكنتش حتى نسمع فيه من الخلعه امس
منى:خساره …لاكن شفتيه اليوم كيف يشبحلك لما جاب اخته
نور:خل يشبح فوتيه
منى:احح نسيت نسأل راجلي شن اسمه اليوم
نور:من راجلك؟!
منى:السكر يلي شفناه وعرفتك بيه
نور:هههههههه وفراس يامنى
منى:هذاكا طليقي خلاص كبدت انا
نور:مسهل عليك ?…حقا بنقولك نيروز حددو العرس رسمي بعد اسبوعين
منى:اللطف علاش سبوعين بس منو يجري وراهم
نور:قداش ليهم محددين بس توا ثبتو
منى:به يا حنى ان شاء الله نثبت علي راجل حتى انا خلي نمشي نشوف صفحات القفاطين توا مدايرين تخفيضات
نور:من قالك بيعزموك?
منى:طز فيهم بنجي بسيف والله عشي ورقيص وتبوني نفوته ع خاطر عزومه
نور:?????

___________________

البنت:تسوي ومتوتررره
علاء:متكي ع الكرسي يشبحلها ومبتسم زي الابله
البنت:به خلاص عاد ياسر عقدتني
علاء:اسمك ؟!مقلتليش عليه
البنت:اسمي مرام
علاء:اصلا هاذا حال بنات ليبيا اي بنت تبي تكذب تقول اسمي مرام واي ولد يبي يكذب يقول اسمي محمد
مرام:ضحكت….اسمي مرام اي لين نوثق فيك ونعطيك اسمي
علاء:وكيف نخليك توثقي فيا
مرام:درست السياره وشبحتله….كلكم كلاب حبيبي الثقه في الرسول والرسول مات
علاء:تمام انا رح نسامحك علي خاطر كلمة حبيبي بس??
مرام:ضحكت ….يالله برا سيارتك والف لاباس
علاء:يفصل فيها وفي جسمها بنضراته لين نحرجت
علاء:بنضره صايعه….نتلاقو
مرام:طلعت بسيارتها وهيا تتنفس بعمق قاعده تستوعب في يلي صار

_______________________

#تسريع_في_الاحداث

بعد مرور اسبوعين…..
فاتو اسبوعين علي نور جحييييم من التفكير بتموت مش عارفه ولا فاهمه شن رح يصير
مالك متجاهلها ولامعبرها يوصل فيها للمدرسه بدون كلمه في الطريق ومرات ميرفعش فيها
ميحكيش معاها ولا يصبح عليها وطول الوقت برا الحوش ….والقصه كلها ان نور مستغربه في روحها ليش مهتمه بي الموضوع لدرجه هاذي كأنها ادمنت حاجه ونقطعت عليها !!

علاء:حاول يتواصل مع البنت لاكن غيرت رقمها علي خاطره وبدت رحلة علاء للبحث من جديد ??‍♂️

مالك:معضم وقته مشغول في الخدمه والحركه هاذي كانت متعمده منه عشان ميفضاش ويقعد يفكر فيها زي قبل

?رِوايـَــــاتْ بـــــَــــنـــو تــِةْ الشــِـــيـــــــخْ?
?أَروى الطــَـــاهـــــِرْ المــــســـلاتـــــــــي?

كانت زحمه رهيبه في حوش عصام عشان الاستعداد لي عرس نيروز….
الاء:كانت طول الرقت بروحها تخطط لي شي مش معروف !!
نور:كانت تساعد في مرت عمها في كل شي
جو الاقارب كلهم وكل وحده خاشه بي شناطيها عشان يباتو لان تاني يوم صابح سهريه
وهنايا اضطر مالك يسيب شغله شويه عشان عرس اخته ??‍♀️

منى:واقفه علي الروشن السياره …به يما به بذليني بيها البيته انتي
ناهد:اقسم بالله كان يسمع بيا خالك خليتك تباتي يفرمني انا وياك لاكن لسانك من يقدره بس
منى:تشكرات فندم هي باي
ناهد:دورت السياره وطلعت ومنى اديرلها في باي من بعيد
منى:خذت شناطيها الخضر وجت خاشه وهيا تتمخطر ….هاي طليقي
فراس:قلب عيونه وميبيش يتكلم
منى:طز فيك اصلا لقيت واحد عسل يجنن خير منك ع الاقل هذاكا حاس بيا …صح منعرف اسمه لاكن عادي مهم ضحكلي وزوجته نفسي خلاص
فراس:خشي تفضلي تو نبعتلك موقع قرقاش مع نور
منى:اححح سخفاني عارفاتك قاعد تحت تأثير الصدمه الله غالب الدنيا ناصيبات
مالك:متعيش انتي
منى:هتلر?عن فيتك كل يوم احلا من يلي قبله شنو العيله الكيكه هاذي شن كنتو تاكلو قبل
والله مفيكمش الا العقربه الاء شكلها تاكل في الخرا زمان
مالك:وهوا يضحك….خشي مكتر دوتك
منى:اي خلي نخش وناكل رزقكم اكيد مدايرين شكلاته وعشي وحجات هي بسلامه ….وخشت
فراس:هز كتافه لي مالك بمعنى(مجنونه)

__________________

نور:واقفه هيا ومنى بعد ماستقبلتها وتشوف لي بنات خال مالك
منى:خيرك تفصلي فيهم وهما مافيهم ماينشبح
نور:كان تشوفيهم كيف يتلصقو علي علاء ومالك
منى:تاكل ….الا علااااااء ايوا
نور:وعلاش
منى:راجلي الاحتياطي كان مصارش من السكر يلي شفناه قبل اسبوعين
نور:???فضيعه انتي …خلي نجيب الميه من الفريز الدنيا بدت تزحم
منى:جيرانكم ميتحشموش جايين من اليوم مصحهم
نور:وانتي?
منى:انا من العيله ….وقعدت تعدد في صوابعها
انا صاحبتك وطليقة فراس ومعجبة مالك وعلاء راجلي الاحتياطي
نور:طلعت من المطبخ وهيا تضحك

مالك:ماشي جاي يدخن ويحكي ع التالفون ودوته كلها خدمه وحجات مش مفهومه سكر الخط لما كلماته بنت خاله
فردوس:مالك الحمد الله يلي لقيتك بنسألك
مالك:اها شنو
فردوس:عندي ممري معش بي بتعرف عليه التالفون
مالك:شوفي علاء يزبط اكتر مني في الحجات هيا
فردوس:اهاا تت تمام…خذت باقي كرامتها وخشت
مالك:شاف يمينه بحركه عفويه لقي نور❤️

لابسه سروال جينز وبلوسه ورديه …قايمه شعرها ذيل حصان وتشوفله
مالك:بي ملامح جمود وبردو في وجها اشرله بعيونه بمعنى خيرك تشبحي؟
نور:سكرت الفريز بقوه وخذت السفره وخشت
مالك:يشوفلها لين خشت وطلع وهوا يحكي بصوت واطي ……الززح قداش حلوه ….يتبع