رواية فوضى المشاعر
الرواية بقلمي وجميع الحقوق محفوظة (الكاتبة عبير الحياة)
المقدمة
غلطة صغيرة او ذنب ما بنغفر… خيانة او هي كسر روتين
جرح المشاعر والا اهانة كرامة…. وجع القلب او… ما بعرف
يمكن كلها سوا يمكن وحدة منهم… بس بالنهاية ما بعرف
كتبت هالرواية كرمال لاقي جواب
هو كل يلي كان بدو اياه تغيير هالبرود اللي بحياته
يرجع مشتاق…. وكله طاقة وايجابي
بس اللي صار….. دموع…. شرخ….. حرق…. وبالاخر الانهيار
شو السبب؟؟؟ ما عرف يجاوب
معقول هالقد كان في سوء باختيار….. معقول اللي عمله اذاه واذاها
طب وبعدين شو رح يصير…. شو النتيجة
رح تسامح وتقلي هيني بين الأيادي… والا رح تضل تطلع بكره وتذكرني انها نتيجة افعالي
طيب انتي شو اسبابك…… معاه ما بحس حالي أنثى.. ما في مشاعر…. تلسط وأنه الصح بكل شي… وووو مو رجال كان….
هاد عذر برإيك….. يمكن ما بعرف
بكل سؤال جواب اخره ما بعرف
الحياة الزوجية حياة مشتركة أساسها واهمها الحب و التفاهم والاخلاص … ازا نقص شي منهم انهار الزواج .. وانهار كل شي معاه …
الخيانة الزوجية هي من أقسى المشاكل يلي بتصير بين الازواج …. لانو انعدام الثقة ضربة قاسية و بتوجع وهي اساسآ كفيلة انها تنهي حياة كاملة
الكتابة بهيك موضوع صعب كثير بس مثل هيك موضوع لازم ينطرح وللاسف القصص يلي فيه راح تكون واقعية
شي يوم اتخيلت تصحى اتلاقي حالك بغرفة كبيرة انت و مجموعة ناس ما بتعرفهم ولا بعمرك اعرفتهم واساسآ مو قادر تتعرف عليهم لأنهم لابسين اقنعة …
مين هدول ؟
شو بعملو هون ؟
طيب انا وين ؟
شو هالمكان الغريب يلي انا فيه؟؟
حدا يفهمني شو في ؟
العتمة عمت المكان… الخوف زاد ..القلوب راح تتوقف من قوة النبض …ما شي مسموع الا صوت الخوف يلي مسيطر على المكان …
واخيرآ طلع طلع صوت زاد من الخوف والرعبة
(انا الحاكم …. انا الجلاد… انا يلي راح احاسبكم على اغلاطكم …. وانا يلي راح اخذ حق البعض منكم )
ما حدا قادر يجاوب الكل عم يراجع حياته شو ممكن عمل غلط او شي خلاه يوصل لهون بس كمان ما في إجابة
شو عم يصير …
مين هدول الناس
مين هالصوت وشو بدو