جاري سداد الدين
_____________________توقف الزمن لدي! لا أشعر بثوانيه أو اعبأ بأيامه التي تمضي، وأنا أسبح بملكوت خيالي وگأن الكون أختصني وحدي بمساحة مقدسة لا يطأ فيها قدم بشر سواي! ولا يقتحم عالمي غير أصوات أعرفها يخبروني دائمًا بأشياء جميلة تؤنس وحدتي.. وهمساتهم الحانية تتدفق گ الحلم لعقلي .. انتظرهم وأشتاق أخبارًا يقصوها بنبرة أمل أن يستجيب كياني ويتفاعل! لكني لن أترك عالمي الهاديء الذي صنعته وحصنت به روحي المتعبة.. سأظل أحارب صحوتي.. وأتمسك بتلك العزلة.. ويكفيني نيل مسامحة الجميع!
…………………
بعد مرور أسبوع!عبد الله: قومي البسي هنروح مشوار!
رجاء بوهن وحزن: مشوار أيه أنا تعبانة ومش قادرة اخرج!
أجاب بتصميم: ماهو عشان تعبانة حجزتلك عند دكتورة.. عايز افهم فيكي أيه!!
صمتت برهة تستجمع الكلمات بذهنها.. ثم تفوهت بما يحق له معرفته من زمن:
_ مافيش داعي! أنا عارفة علتي أيه!
قطب جبينه بحيرة، منتظرا ما ستجود به، فهتفت:
_ أنا حامل يا عبد الله!
تغيرت تعبيراته الحائرة إلى أخرى متعجبة ثم غاضبة وهو يصيح بحدة: حامل!!! وأنا معرفش؟! ياترى كنتي هتعرفيني بحاجة مهمة زي دي إمتى يا مدام؟
تجرعت ريقها بخوف، بعد أن لاح غضبه، وهي التي ما احجبت عنه حملها إلا خشية من ثورته!
_ صدقني أنا ماقصدتش أخبي عليك! أنا بس…….
قاطعها مقتربًا وثورته في تصاعد:
امال قصدك أيه.. إزاي تكوني حامل وتخبي عليا.. وده حقي أني اعرف.. أنتي كل تصرفاتك غلط في غلط ومابقيتش عارف أعمل معاكي أيه!
الضغط بلغ داخلها ذروته.. والأمور حولها تزداد سوء، غيبوبة عايدة، غضبه ونفوره منها.. إحساسها بالذنب تجاه الأم الفاطمة وخجلها حتى من الإعتذار لها.. ومتاعب حملها الذي تضاعفت مع تدهور حالتها النفسية وشعورها بالاكتئاب.. وأخيرا ثورته الآن! وهي التي بأمس الحاجة لدعمه وعفوه وحنانه..انفجرت بهياج بعد أن عجزت تلك المرة عن ظبط إنفعالها:
_ خوفت أقولك تفتكرني بلوي دراعك عشان ترجعني.. خوفت تظن أني بستغلك.. وحتى لما رجعتني ماما فريال مقدرتش اقول لأنك طول الوقت بتحسسني بكرهك وزعلك مني..فضلت ساكتة وعندي أمل تسامحني، بس أنت خلاص مابقيتش بتحبني ولا عايزني، أنا كنت بأجل اللحظة دي عشان عارفة بعدها يمكن مقدرتش اتحمل ثورتك وكرهك.. خلاص يا عبد الله أنا تعبت من نظراتك وعتابك وقسوتك وبعدك..ومادام زعلت كده إني هخلف منك تاني، سيبني لأني مش هقدر افرض نفسي عليك أكتر من كده أنا تعبت و………………… .
قاطعها بجذبها بغتة لتتوسد صدره محيطًا جسدها المرتجف إنفعالًا بذراعيه، مربتًا على ظهرها برفق، متمتما بخفوت:
_اششش.. أهدي وبلاش تخاريف.. اهدي!
وازداد بضمها واحتواء ثورتها بصمت وهو يقبل رأسها، تاركا لها العنان لإفراغ مشاعرها وبكائها على صدره مستمرا بالربت عليها وتقبيلها..! وأمتد الوقت بهما على نفس الحالة، هي تبكي متشبثة به.. وهو يهدهدها بكلمات خافتة حتى هدئت وسكن جسدها، ثم رفعت وجهها إليه متمتمة بخفوت:
_سامحني ياعبد الله أنا عارفة إن غلطي كبير أوي في حقك وحق والدتك وجدتك.. وإني صدمتك فيه، بس اتعلمت من غلطتي وعمري ما هرجع لنفس سلوكي ده تاني ولا هعمل حاجة تخليني اخسرك تاني أنت أو ولادي، أنا اتعلمت إني أكسب أم تانية زي ماما فريال احسن ما اخليها عدوتي،وعرفت إن أنا المسؤلة عن صورتي في عين الناس وإن محدش ظلمني غير نفسي وافعالي.. أديني فرصة تانية اثبتلك إني اتغيرت، وإني رغم كل عيوبي بحبك ومقدرتش استغنى عنك!
ظلت تتحدث وعيناه تدور على ملامحها بحنان، ثم اندفعت شفتيه ترفرف على وجهها متنقلة بين عيناها ووجنتيها غامرًا أياها بمشاعره المشتاقة.. وبعد برهة أحاط خديها براحتيه:
_ غصب عني كنت غضبان منك ومصدوم فيكي، وكنت محتاج وقت اهدي وأصدق إنك اتغيرتي وندمتي..لأنك أذيتي أقرب الناس لقلبي، كان طبيعي يكون ده رد فعلي! بس خلاص أنا مابقيتش زعلان منك وسامحتك من قلبي وهفتح معاكي صفحة جديدة!
ثم ربت على بطنها المنتفخة قليلا:
_ على قدوم الزيتونة اللي في بطنك ده!
ضحكت من بين دموعها : الزيتونة ده فاضله خمس شهور وهيشرفنا..!
قبل باطن كفها مرددا: طب يلا عشان نروح للدكتورة.. لازم اطمن عليكي واعرف اكلك وادويتك، مش هسمحلك بالهزلان ده تاني.. أنا عايز الواد يتولد مربرب وبخيره زي ابوه!
ابتسمت بحب وسعادة لا تصدقها.. ثم احتضنته بشدة وهي تتمتم: وحشتني يا عبد الله.. ربنا مايحرمنيش منك ابدا تاني.!
______________________________
لا يبرح غرفتها.. يظل يحدثها عن يومه هو وصغاره وكيف يفتقدونها وينتظرون منها المحاربة لأجلهم بتركها هذا العالم الذي غاصت فيه بإرادتها.. رافضة الحياة.. يبثها اشواقه وحزنه بالساعات كما يذكرها بلمحات جمعتهما سابقا.. يغذي عقلها بذكريات ومعلومات كثيرة.. هو على يقين أنها تسمع كلماته!
كما يناجي ربه الصبر وزوال الغمة.. فالحزن بلغ في نفسه الذروة، ويتمنى الصمود حتى يعيدها مرة أخرى!
أسند رأسه للوراء مسبلا جفنيه باسترخاء، عل الصداع يهجره، والأحداث الماضية تتدفق إلى ذهنه تباعًا..مستعيدا كيف تم معرفة الجاني، حين تم العثور على خصلات من شعره علقت بين أصابع عايدة وهي تقاومه وبصماته المطبوعة على مقبض نافذة دورة المياه، وحرق كفه المميز والذي أشارت له والدته فريال للشرطة حين سقط قفازه وقت عراكه مع عايدة..وبالبحث بين المسجلين لديهم بمواصفات مشابهة تم التأكد باستدعائه وتبين أن خصلة الشعر تخصه تحديدا مع مطابقه بصماته بتلك التي وجدت على النافذة.. ولم يعد هناك مجال لإنكاره حين اكتملت الأدلة ضده، وسريعا ما اعترف بجريمته طمعا في مال وعدته به العجوز شكرية زوجة عم المجني عليها.. والتي للحظ توفت على أثر ازمة قلبية مفاجأة داهمتها بنفس ليلة الحادث ولم تلحق بطائرتها التي كان موعدها بعد ساعات من موتها..! وهو قصاص الله العادل فيها..!
وبهذا قُفل ملف الجريمة بموت المحرض وسجن المنفذ! أما شاهندة الرفيقة لزوجته، لم تكف عن زيارتها وكم حزنت لما حدث وتمنت لها السلامة، كما أصرت أن تخبرني بما قصته عايدة لها عني وعن ندمها وحزنها..!
تنهد خالد مرة أخرى، وراح يردد وراء الإمام، فآذان العصر صدح للتو، ووجبت الصلاة والدعاء!
………………….
الطبيب: لازم تستمر في إنها تحكيلها كل تفصيلة ومعلومة عن الناس اللي بتحبهم، هي سامعاك، وأكيد في وقت ما هتعافر عشان ترجع!
خالد بحزن: طولت وانا مش قادر اشوفها كده.. وولادنا هيتجننوا عليها يا دكتور!
الطبيب باهتمام: هو ولادها بيكلموها زي ما أنت بتعمل؟
أجاب بنفي: لأ.. مشفق عليهن يشفوها كده، خايف نفسيتهم تتعب أكتر!
صمت الطبيب برهة، ثم هتف بعدها:
طب في حاجة ممكن نعملها ونشوف هيكون رد فعل المريضة إيه.. يجوز تكون خطوة كبيرة في طريق الشفاء وتقدم حالتها!
_______________________________
هند: صعبان عليا أوي اللي خالد فيه يا أحمد، وعايدة اللي راقدة لا حول ليها ولا قوة.. يااااه قد إيه الإنسان فينا ضعيف، بيتجبر بقوته وفي لحظة بيكون عاجز حتى عن رمشة عين!
صمتت برهة وواصلت: رغم غضبي منها في الأول، بس بجد دلوقت بتمنى من قلبي تتعافي وتفوق عشان زوحها وولادها اللي حالهم يقطع القلب!
أحمد بحالٍ لم يختلف عن شقيقته:
كلنا مابنتمناش دلوقت غير سلامتها.. وانا عن نفسي مسامحها، اللي شافته كان عقاب كافي اوي، وانا عندي ثقة برحمة ربنا.. بإذن الله قريب هتتعافى!
فقالت: بإذن الله.. واستأنفت حديثها:
بس غريب حزن فريال عليها.. والأغرب رجاء كمان اللي بقيت بني آدمة تانية خالص، تخيل يا أحمد لقيتها جات من يومين وانا عند فريال وماما، وبتعتذر وتطلب السماح مننا وهي بتبكي..اتمسكت بنفوري منها في الأول بس صدق اعتذارها ودموعها، خلاني اخدها في حضني واسامحها.. ومانا كمان سامحتها..!
هتف بتفهم: ماتستغربيش.. مهما كان شر الإنسان، فهو في الأساس فطرته هي الخير والطيبة اللي بيرجعلها مهما شرد عنها..وأكيد توبتها وندمها الصادق، هو اللي خلاها تقوم نفسها وتحسن صورتها في عيوننا مرة تانية! ربنا يهديها ويشفي عايدة!
_____________________________
عالمها يتزلزل.. جدرانه الوهمية تتصدع حولها، وسهام استغاثة أطفالها يأتي من كل صوب، تبحث عنهما دون جدوى..جسدها ينتفض گأن تيار بارد سرى بعروقه!
………………
الطبيب بحماس: الحمد لله في استجابة ممتازة.. بعد ما قدرنا نستفز أمومتها وخوفها على ولادها..!
خالد وعيناه مغرورقة فرحًا لما حدث:
أنا مش قادر اصدق إن عايدة فتحت عينها تاني حتى ولو ثواني، صحيح كان معالم الخوف مسيطر عليها، بس ع الأقل ده أول رد فعل جسدي ليها..! بجد مش عارف اشكرك ازاي يا دكتور.. ماكنتش فاهم ليه طلبت مني أخلي ولادنا يسجلوا أصوات استغاثة بصوتها وكأنهم خايفين!
وسمعته لعايدة بتتابع زي ما قلت، وبعد شوية ابتديت صوابعها تتحرك ووشها يظهر عليه المقاومة كأنها بتحارب حاجة جواها..!
الطبيب بحماس أكثر:
بالظبط كده.. ده الوصف الأدق للي حصلها.. مادام عايدة كانت مستسلمة تمام لعزلة عقلها عن الواقع، بس أمومتها حركتها لما حست إن ولادها في خطر.. وأحب ابشرك من دلوقت، إن قريبا جدا هتستعيد وعيها من تاني!
——————————————
بعد أيام!
گعادته ذهب لزيارتها والمكوث معها ، بعد عمله واطمئنانه على أولاده! وما أن وطأ المشفى واقترب لغرفتها، حتى قابلته أحدى الممرضات مهللة:
أستاذ خالد، فينك من الصبح، في أخبار هايلة تخص مدام عايدة! روح لدكتور مصطفى وهيفهم كل حاجة!
هرول دون تباطؤ، مستفسرا عن حالتها، فعلم أنها فتحت عيناها بشكل طبيعي ، وبدأت تستجيب للألم، وهي دلائل مبشرة بنسبة كبيرة لقرب عودتها وشفائها تماما كما أخبره الطبيب!
________________________________
بعد شهر!
جالسا قبالتها على فراش غرفتهما بمنزلهما الخاص، يطالعها بشوق وسعادة جمة، فأخيرا استعادت زوجته وعيها، رغم قلة حديثها، وعيناها مازالت حزينة، ولكن كفيل هو بمحو حزنها، سيبدأ معها من جديد، ويصنع لها عالم أكثر أمان ومسامحة وصفاء.. سيدعمها لتحصل على عفو الجميع حتى تستطيع استقبال الحياة بروح جديدة أكثر أملا وتفاؤل.. سيطمس كل ما مضى من تاريخ مؤلم بينهما.. هذا عهده الذي قطعه بينه وبين نفسه!
قال وهو يمد أصابعه بلقيمة لفمها:
يلا يا حبيبتي كلي دي كمان عشان خاطر خلودك!
ابتسمت له وتناولت طعامها من يده ومضغته ببطء وهي تطالعه.. ومازالت تلتزم الصمت! لكن يكفي أنها حاربت غيبوبتها لأجلهم وهاهي تنعم بحنان زوجها ورؤية أطفالها، وعبق مسكنها يغزو أنفها من جديد، مسببًا لها شعور الأمان الذي افتقدته!
ابعد الطعام بعد أن اكتفت منه، ثم مدد جسده جوارها وجذبها برفق لتتوسد فوق قلبه، وهو يشاكسها: لعلمك الدلع اللي بدلعهولك ده كله مش لله.. أنا مسجل كل حاجة، وهطالبك بالمثل لما تخفي خالص.. واما اشوف بقى هدلعي خلودك ازاي!
أحاطته بذراعيها بصمت واغمضت عيناها مختبئة ببن عنقه وكتفه، فضمها إليه أكثر وهو يبثها غرامه وحبه لها، حتى غرقت بنومتها على صدره! فأراح جسدها أكثر ودثرها بالغطاء مقبلا بين عيناها، حامدا لله بقلبه على شفائها .. بعد صبره ومعاناته بمرضها..!
________________________________
داخل المدرسة التي يعمل بها عصام!
عادل: أنت حجزت الفوج كله لحسابك يامفتري!
عصام: بقولك أيه أنت ومشرف الرحلة بلاش قر! سيبولي أنا الطالعة دي مع عيلتي، وبلاش ندالة، لأن محتاجين كلنا نكون مع بعض! الفترة الأخيرة كلنا انضغطنا نفسيا ومحتاجين نطلع المصيف ده گ أسرة واحدة، والحمد لله كله رحب وبعت أول دفعة من تمن المصيف، أحمد وعبد الله وخالد.. وكمان أخويا رامز حجزتله هو واسرته، لأنه نازل أجازة من الكويت هو وولاده ومراته..!
عادل بمشاكسة: الله يسهلوا ياعم.. هحاول ابطل نق وقر.. ورحلة سعيدة إن شاء الله، انا عارف إنكم محتاحين تغيروا جوا فعلا بعد اللي مريتوا بيه، وياسيدي أنا ومستر وليد مظبطين تاني فوج بعديكم بخمس أيام! بأذن الله مصيف سعيد للكل!
________________________________
في منزل أحمد!
يمنى وهي تقطع مكونات طبق سلطة الغداء:
_ بس وقت رحلة المصيف هنسيب ماما فاطمة كلنا مرة واحدة ازاي يا أحمد؟! فريال لوحدها صحتها مش هتساعدها.. لعلمك أنا ماليش في الرحلات، ممكن تروح مع الولاد تغيروا جو، وأنا…………
بترت جملتها وأحمد يحتضن ظهرها لصدره مرددا:
ده كله يقعد وانتي اللي تروحي!
ثم أدارها ليطالع وجهها الذي أحاطه براحتيه:
_ أنا ما وافقتش أطلع المصيف ده غير عشانك أنتي.. عشان اعوضك الفترة اللي فاتت والحمل الشديد اللي شيلتيه معايا.. عمري يا يمنى ما هنسى وقفتك جمبي، وإنك سديتي غيابي مع ولادي اللي شغلني عنهم مشاكل أهلي.. ولا مرة اشتكيتي وقلتي تعبت، وأقل حاجة اقدمهالك إنك تطلعي رحلة تغيري فيها جو!
أحتضنته بتأثر: ماتقولش كده أنا مش غريبة عنكم أنتوا أهلي..ووجعكم وجعي وفرحكم فرحي..أنا هفضل دايما في ضهرك وقت ماتحتاجني!
قبل بين عيناها وضمها إليه، هاتفًا بمكر:
_أنتي مش واخدة بالك من حاجة!
يمنى ببراءة: حاجة أيه؟
_ العيال مش هنا واحنا عمالين نرغي..!
ضحكت برقة هاتفة بدلال:
امممم صح.. بس هما على وصول من دروسهم، وهتلاقيهم بيرنوا الجرس و………… .
حملها بعتة وهو يردد بنبرة تعرف خطورتها:
_ لو الجن الأزرق خبط لى الباب دلوقت.. مش فاتح!
_______________________________
ألتف جميع الأحفاد گ فرقة موسيقية مدربة.. مرددين بأصواتهم البريئة تلك الأغنية القديمة التي ارتبطت بأذهان الجميع بذاك اليوم تحديدا..!
( ست الحبايب يا حبيبة.. يا أغلى من روحي ودمي.. ياحنينة وكلك طيبة.. يارب يخليكي يا أمي)
اغرورقت عيونهم فرحًا..فأخيرًا هلَ عيدهم الحقيقي بتجمع دافيء وشعور السكينة يحتل أوصالهم.. والأم فاطمة تدور على ملامحهم وتستقبل هداياهم.. وتحمد الله سرًا علي عودة علاقة قوية هادئة بين أبنائها ثانيًا..الآن فقط شعرت باكتمال رسالتها.. الكل يستظل بحنانها ويلتمس رضاها.. وسادت أجواء البهجة من جديد في يوم عيدها..!
…………… ..
فريال: قربي من جدتك يا عايدة.. ماتتكسفيش!
منذ قدومها خائفة من المواجهة والخوف من النبذ مرة أخرى، وأفعالها تتجسد لعيناها جاعلة ذاتها تغرق خجلًا.. كم كانت قبيحة وعديمة الرحمة!
اقتربت بعد أن شجعها خالد وهو يجرها جرًا إلى جدته فاطمة، التي ما أن ابصرتها حتى تبتسمت بحنان هاتفة: خلاص يا عايدة أنا مسمحاكي!
كيف تكون أمًا بهذا النقاء وتلك الطيبة!
أرتمت عايدة بأحضان الجدة باكية ومطلقة كل عبارات الاعتذار التي أستطاع عقلها صوغها بلسان يرتجف بمشاعرها الشاكرة.. مجددة معهم جميعًا الوعود بعهد لا يشبة سابقه!
لقد حصلت على عفوهم..وشكلت لها بأعينهم صورة جديدة.. أكثر ودًا وحبًا.. هي أبنتهم منذ اللحظة، وهم عائلتها الجميلة!
________________________
كلمة ختامية!
الأمومة!
هي معزوفة مشاعر خُلقت لتتدفق بعروق كل أنثى منذ ولادتها.. فطرتها تدرك أنها ما خلقت إلا كي تصبح أمًا في يومٍ ما.. حتى لزوجها تكون أمًا..هي فطرتها التي أختصت بها وحدها..!
وفي الختام.. أرجو أن أكون وفقت بعرض نموذج حاكى الواقع كثيرًا من وجهة نظري..وأتمنى ألا تكون حروفي أصابتكم بالملل..!
وشكرًا لكل من تابعني ودعمني ووضع ثقته بقلمي المتواضع!
تمت بحمد الله!