حكاية فاطمة للكاتبة زهور جمال الدين
#حكاية_فاطمة
?بقلم زهور جمال الدين?
? الحلقة السادسة ?
فاطمه ترد على منير باستغراب : مراد مش قاعد
-منير: افتحى انا جاى بنكلمك انتى
فتحت فاطمه الباب …
لقت منير واقف قدام الباب
وانفتح باب الاسانسير
وطلع منه مراد وقف فالممر ويتفرج عليهم
سمع منير صوت الاسانسير لما انفتح ..
تلفت وراه لقاه مراد
-منير: اووو مراد ..جاى ندور فيك نبيك شوى
-مراد غار على فاطمه وكلمه بتكشير: اهلا منير
خشت فاطمه للحوش…
مشت طول للمطبخ وسكرت الباب
وخشو منير ومراد للصاله
قعمز منير واستادن منه مراد
-مراد: شويا بس نقوللهم يديرونا شاهى ونجيك
وخش مراد للمطبخ وسكر الباب
فاطمه واقفه عالغاز
-جى مراد من وراها وحط يديه الزوز على كتافها وقرب من ودنها : ليش فاتحه الباب
-فاطمه : نحسابك انت وياه
-مراد : اولا انا بمفتاحى.. ثانيا ممكن لو تفضلتى معش تفتحى الباب وانا مش موجود
-فاطمه: وليش هدا كله
-مراد : لانى نغار عليك ..انتى لتوة قاعدة مرتى وعرضى…
ومايساعدنيش حد يجيب سيرتك بالعاطل
-فاطمه قريب اطير بالفرحه: حاضر معش نفتح الباب مرة ثانية
-مراد: باهى اديريلنا شاهى توة
-فاطمه : من عيونى
-مراد: يسلمو عيونك ويخليهم ليا
فاطمه حست ان اسلوب مراد تغير معاها ..
وجيت منير اللى بتفسد انقلبت للضد
وقربت بينهم وعطت لفاطمه انطباع ثانى عن مراد ????
ومع هدا قعدت فى بالها جملة منير..انا نبى نكلمك انتى ..
وفى خاطرها زعما شن يبي يقولى..
وتتكلم فى خاطرها اكيدة يبي يتزوج ويبي يسالنى لو نعرف وحدة فى ليبيا مناسبه ليه ..
وتزيد تفكر.. لكن ليش يسالنى انا اكيدة عنده خوات ويقدر يقوللهم يدوروله …وقعدت حايرة
” يانارى على نياتها شوفو هوا فيش يفكر وهيا فيش تفكر يانارى ??”
وعمك منير مقعمز فالصالة
ومغتاظ من وجود فاطمه مع مراد فالمطبخ والباب مسكر
“حقارة بعد هكى مريتش. غاير عليها من راجلها?”
_________________________
شرب الشاهى عمك منير وهدرز ماطاب خاطره
وهوا الجثه مع مراد ..والعقل مع فاطمه
“مصح وجهه الواطى ??”
فالليل خش مراد لدار النوم …
“ماصارش من قطيعته مع فاطمه???”
لقى شهادات فاطمه كلهم عالسرير
-مراد: هادو شهاداتك ويتفرج
-فاطمه : ايه شهاداتى .. الحمدلله عالنعمه
-مراد: شن بنقولك يا فاطمه …
-فاطمه: نعم
-مراد : انا والله مش مع فكرة ان تمشى للجامع
-فاطمه جاها احباط: ليش !!؟
-مراد: يا فاطمه هنايا امريكا مش زى ليبيا ..هنايا كلها مجرمه ..
وانتى تلبسى فالحجاب الشرعى ..وانا نخاف عليك
-فاطمه: ليش هكى ادير انت .. هلبا زينى نشوف فيهم فالشارع هما ورجالاتهم
-مراد: هاك قلتيها معاهم تريسهم ..وانا الحق منقدرش نلتزم بيك
-فاطمه : متقدرش تلتزم بيا شهرين او اقل اللى مزال بنقعدهم ..
وبعتالى خلاص حتستريح منى
-مراد قام يده: انتى تهددى فيا بالمرواح ولا شنو
-فاطمه : انا مقلتش….حنا خلى نمشو للمقابله وبعتالى ساهل
-مراد: انتى اصلا كيف بتخشى الجامع مش قلتى عندك الدورة
-فاطمة : والله وقفت ..جتنى يوم واحد بس ووقفت مش عارفه خيرها
-مراد: قلتلك موضوع الجامع فوتيه
-فاطمه: ليش هكى بس
-قص عليها مراد: بالله هيا اقعدى فيها
وطلع من الحوش ….
مشى لبار وشرب وثقل
هوا متعود انه يشرب
وروح للحوش .. فتح الباب
يدعدع غادى وجاى
سمعاته فاطمه لانها مزال مارقدتش
مشت تجرى للباب سكراته بالمفتاح
جى هوا للباب حاول انه يفتحه ماباش ينفتح
مشى طول للصالون رقد عليه للصبح
______________________
حوش محمود روحو ليبيا ….
جت سالمه تسال فى مفيدة على حال ولدها وكنتها
وماتمت مفيدة تحكى وتشكر وتبدع فى حياة بنتها فاطمه مع ولدهم
-مفيدة: تهنى عليهم يا سالمه امورهم بعد الكفساد
-سالمة مستغربة : هيا قالتلك هكى
-مفيدة : هيا ايه…وقالت قرايته ناجح فيها …ربي يحفظهولك يا سلومه
روحت سالمه للحوش وهيا حايرة ..
مستغربه ..ومصدومه فكلام مفيدة
-يحيى: خيرك يا سالمه
-سالمه: توة كنت عند مفيدة وسألتهم على ولدك وكنتك …
قالت امورهم تمام والبنت تشكر وتحط وقالت قالتلهم حتى قرايته عالكيف
-يحيى مصدوم : ينصر دينها فاطمه .. مش قلتلك يا مراءة انا عرفت من نختارله
-سالمه : قصدك البنية درقت على اهلها
-يحيى : ايه ..خافت عليهم ومحبتش تحطهم فالصورة
-سالمه : لكن مفيدة قالتلى كلام شغلنى ..
-يحيى: شن قالت
-سالمه : قالت ان فاطمه خشت بالغلط لامريكا …
وقالولها لازم تروحى ليبيا وتعاودى اوراقك من اول وجديد
-يحيى: فاطمه اللى نعرفها انا بادن الله مش راح تروح ..
وحتقعد تقاوم لاخر نفس
__________________________
فتح مراد عيونه وهوا راقد عالصالون ….
مقابلاته الكوجينه ….
يشبح فى فاطمه اطيب فالغدا …
لابسة سروال وتيشرت وفاتحه شعرها …
وهيا تتحرك غادى وجاى واتعول وهوا ايمتع فنضره بيها
الولد بجديات بدى يحب ..لكن معش عارف كيف يتراجع على كلامه
وعالاتفاق اللى داره معاها انها تروح
وهيا مش عاطياته فرصه ان يقوللها اقعدى
ناض من مكانه … قرب من المطبخ
-مراد : صباح الخير
-فاطمه منغير ماتشبحله : صباح النور
-مراد : وتيتى اوراقك
-فاطمه تلفتتله وانخلعت تحساب اوراق المرواح لليبيا : اوراق شنو
-مراد : اوراق الجامع مش قلتى بتقري الصغار فالجامع ولا
-فرحت فاطمه زى العيل : ايه واتيات من امس
-مراد : هوا الموعد امتى
-فاطمه : غدوة
-مراد : باهى عالخير غير فكرينى
-فاطمه جت لمراد وقامتله يده وباست عليها ????…
وقالتله صحيت وربي يحط كل حرف نعلمه للصغار فى ميزان حسناتك
-مراد انصدم : مش لدرجه تبوسى على يدى ?
-فاطمه : شيخنا زمان يعلم فينا فى البر…ومعانا نساوين متزوجات …
يقوللهم الشيخ لما راجلك يغير رايه ويسمحلك بموضوع كان رافضه ومانعك عليه …
مفروض تبوسى يده او راسه وتقوليله صحيت وفى ميزان حسناتك
لان فى قول للرسول عليه الصلاة والسلام يقول ..
( لو امرت احدا ان يسجد لغير الله ..لامرت المراءة ان تسجد لزوجها)
-مراد : عليه الصلاة والسلام … لكن تعرفى شيخكم هدا معلم …ومعاه حق
تعرفى بوسة اليد هادى ركبتنى من سابع ارض لسابع سما …
وحسستنى انى اللى درته صح ومش غلط
“ياريت بناتنا ايديرو هكى .. بلاش من بوسة اليد غير قوليله صحيت وربي يخليك ليا وشوفيه كيف يتغير?”
-فاطمه تضحك: باهى مشكور وفى ميزان حسناتك
-مراد : شن درتينا غدى
-فاطمه : مكرونه صالصه
-مراد يضحك: صالصه ???.. وتعرفى اديري حتى الصالصه
-فاطمه ?: قلتلك انا مفيش شى منعرفش نديره غير اصبر بس
مشى مراد دوش وجابت فاطمه الغدى مكرونه صالصه بالحبق ….
مراد عجباته هلبا وبدع وشكر فيها وعلى قولت يسلمو يدياتك
وناض طلع من الحوش …وقال لفاطمه انه مش حيتأخر
وبالفعل طلع دار دورة على صحابه وطلع من شقه صاحبه بيروح …
لما روح وهوا نازل فى اسانسير عمارة صاحبه
تلاقى هوا ووحدة اجنبيه ساكنه بروحها وكانت صاحبته زمان وعنده معاها جو …
.. وعلى قولت وينك معش مبين وهوا قاللها تزوجت
كلمه منى ..كلمه منك .. لقى روحه راكب معاها لشقتها وبات عندها
وفاطمه تراجى فى سيد الشباب بيروح عاد
وهوا غاطس
_______________________
ناض مراد الضهر لقى روحه راقد فسرير صاحبته متع امبارح
وهيا مهناش بدلت وطلعت للعمل وخلاته فالحوش
“الاجانب ميعدلوش ??”
طول خطرت عليه فاطمه والموعد متع الجامع اللى بتمشيله
نط جى واقف …
لبس حوايجه وطلع خدى تاكسى وروح للحوش طول
فتح الباب ..خش …
لقى فاطمه مقعمزة فالصالة وواضح انها باكية
-مراد: انا اسف
عيونها تعبو دموع وناضت خشت دار النوم وسكرت الباب بالمفتاح
-جى مراد وقف قدام الباب وقعد يطقطق بالشوى
-مراد : فاطمه افتحى حقك عليا
وهيا ساكته
-مراد: باهى افتحى ناخد حوايجى بس وبعتالى سكرى ثانى
فتحت فاطمه الباب ورجعت قعمزت عالسرير
خش مراد قعمز قدامها على ركابه و شدلها يداها
فكت فاطمه يداها منه
وتتكلم بكل هدوء
-فاطمه: اليدين هادوما كانو يزنو .. وايديا شريفات .. صعب يتلاقو يا مراد
-مراد : انا اقسم بالله …
-قصت عليه فاطمه : متحلفش بالله .. اسكت متزيدش دنوبك ..
-مراد: انتى تصدى فيا باهى كيف ندير
-فاطمة : حاشا وكلا .. تبى تحط دنوبك فى رقبتى .. لااااااااا…
وقف مراد على طوله : وتى روحك كان بتمشى للجامع
-فاطمه : خلاص الوقت فات
-مراد: مزال الوقت.. الجامع يقعد فاتح لادان العشاء
نطلع مالدوش نلقاك واتيه
وخدى حوايجه وخش للدوش
ولبست فاطمه حجاب عالابيض
تبان زى الملايكه
وطلعو مشو للجامع للمقابله
__________________________
منير مقعمز فى شقته ويخمم
هادى هيا اللى كنت نحلم بيها من زمان ..
لكن كونى مزال نمشيلها مرة ثانية لشقتها مستحيل
هيا تطلع للسوبر ماركت بروحها ..
تو نصطادها مرة من المرات .. ونحكيلها على حقيقه مراد
ونوعدها انى نساعدها
وحتى كان روحت ليبيا عادى
نكلم اهلى غادى ويتصرفو ويخطبوهالى
ونقطع كل علاقه ليا بمراد الزفت هدا
انا فبلاد الغربة ونبى ندير صغار
ومش اى مراءة نقدر انأمنها ونديرها ام لصغارى فى بلاد الكفار
وكان مراد مش عارف قيمتها.. تو نعرفها انا
________________________
وصلو مراد وفاطمه للجامع
وقفو فم باب الجامع
-فاطمه : مراد انت متوضى
-مراد : صراحه لا
-فاطمه : باهى اهو واقفه نراجى فيك هنايا
خش للحمام توضا وبعتالى تعالة نخشو
-مراد: باهى ..استنينى شوى ونجى
-فاطمه : تعرف كيف تتوضا
-مراد يضحك: مصح وجهك مش للدرجه هادى عاد
وخش مراد توضا وطلع
وخشو للجامع هوا وفاطمه
الجامع من داخل صاله كبيييييرة ومفتوحه على بعضها
جماعات جماعات مقعمزين ..
وكل جماعه لاهية مع شيخهم او شيختهم
ليبيين على سوريين على خليج على اتراك
من كل البلدان
وفى من عرب ايقرو فى صغارهم فى مدارس الامريكان
ويجيبو فيهم للجامع بيش يتعلمو عربي ..
عالمهم خشت فاطمه وبدت ادور بعيونها لين لقيت الشيخ القحطانى ولا شن اسمه ..
لقاته مقعمز على تركينه ويسبح
مشوله هيا ومراد
-فاطمه : السلام عليكم يا شيخ
-الشيخ : وعليكم السلام
-فاطمه : انا فاطمه اللى تلاقينا فى السوبر ماركت وقلتلك نبى انقري فالجامع
-الشيخ يضحك: هلا بنيتى فاطمه ..ادكرتك من كلمه نبى
-فاطمه : هدا زوجى مراد
-الشيخ : هلا اخوى مراد
-مراد : اهلا بيك يا شيخ
وناض مشى معاهم لتركينه ثانيه ..قاللها راجينى هنايا
ومشى جمع ثلاث شيوخ ..لجنه متع الجامع
وقاللهم هادى البنت اللى قلتلكم عليها …ونبو نديرولها اختبار
ونادى شيخ مصري وقاله نبيك ادير لفاطمه امتحان فى النصف الاول من القران
لو كويسة نعطيها فصل وتبدا معانا
_________________
وعطاها الشيخ ايات من سورة ياسين ….
وبدت فاطمه تقرا فيهم
ماتتصوروش يا بنات اللى صار
سكت الجامع كله فى لحظه …صارت لحظه صمت رررررهيبة
صوت غريب وقوى وعالى بدى يقرا فالقران
فى لحظه وحدة توجهت الانظار كلها ليها
وهيا تقرا … يس ..والقران الحكيم
وسكوت تاااااااام والناس تسمع
تصدقو مراد لما سمع صوتها رعش مع بعضه ودموعه منغير ارادة منه نزلو
دموع دموع دموع غريبه ينزلو منه
كملت القراءة وقالت صدق الله العظيم
وبدى الجامع كله يصفق
ومراد يشبحلها زاد اعجابه بيها
-الشيخ المصري : ربنا يكرمك يا بنتى انتى روووعه روووعه …
وقف الشيخ قحطان وكلم الجميع : هادى البنت ليبية ..
والليبيين مش غريب عليهم قراءة وحفظ وتجويد القران …
واكبر المسابقات تلاقون الليبيين فالمراتب الاولى …
وتلفتلها : ابدعتى بنيتى …
بس شوى تتشاور لجنه القبول ونعطيك الرد
ومشى هوا الشيخ المصري وخلاها هيا ومراد
وفاطمه فرحانه
وتلفتت لمراد لقاته وجهه احمر ودموعه نازلات
-فاطمه : مراد خيرك تبكى
-مراد : فرحان انك مرتى
-فاطمه حطت يدها على يده وابتسمت: باهى خلاص الناس تشبحلك
-مراد قرب منها وباسها على جبهتها : انتى شرفتينى اليوم … قداش بنجرى بيش نقدر نوصلك
وهادوكا الناس كلها تتفرج عليهم عاد.. ومعجبين بيهم
وجو نساوين ليبيات كبار شوى فالعمر سلمو عليها
وهنوها على صوتها
-خيريه : نهنيك يا حبيبه عالصوت والتجويد الرائع هدا
-صباح : ربي يحفظك وبالتاكيد حيقبلوك معانا
-فاطمه بخجل : صحيتو وخياتى وربي يحفظكم
-خيريه تلفتت لمراد : هنية ليك بيها يا وليدى
مراد سكت مردش …لكن يتكلم فى داخله
وتبى تروحى وتخلينى يا فاطمه ..مستحيل نفرط فيك ..
خاصهً بعد اليوم
____________________
فاتت ساعه وجى الشيخ المصري والشيخ قحطان قعمزو مع فاطمه ومراد
-الشيخ قحطان: بنتى فاطمه .. لا تنصدمين من النتيجه
-فاطمه : انشالله خير يا شيخ
-الشيخ قحطان : انتى قراءتك رائعه ومخارج الحروف عندك ممتازة ..
بس انتى تقرين برواية قالون عن نافع..واحنا هنى ندرس برواية حفص
بس نستأدنك تاخدين ثلاث اربع حصص عند الشيخ عبدالعليم
عشان تتغير طريقه قراءتك من رواية قالون الى رواية حفص
-مراد: ووينه الشيخ عبدالعليم
-الشيخ قحطان: هو شخص ليبيى مثلكم
واشر لشخص وناداه : ياشيخ عبدالعليم ممكن تتفضل هنا شويا لو سمحت
وتلفت مراد وفاطمه شافوه
يلقاه مراد جمال وشخصيه ..زى الغزال
مراد بدى قلبه ينعصر ونااار الغيرة ركبت فيه على مرته
جاهم شيخ عبدالعليم : اهلا خوى ..اهلا اختى
-الزوز ردو عليه : اهلا
-الشيخ عبدالعليم : نهنيك على قراءتك وصوتك اختى فاطنه …ادهشتينا كلنا الجامع بالكامل
-فاطمه نزلت راسها باستحياء: شكرا ليك يا شيخ
“ومراد قريب يجيبوله المطافى من النار اللى راكبه فيه”
-الشيخ عبدالعليم : لو تحبى نبدو من غدوة معنديش مانع اختى فاطنه
-مراد?: بتقراها فالفصل هداكه اللى جيت منه
-شيخ عبدالعليم: لا بنقراها بروحها .. ناخدها بعد ماتكمل حصة فصلى
-مراد?: باهى ياشيخ قحطان مشكور وصحيت ونفكرو وغدوة نجو نردو عليكم
تفاجئو عبدالعليم وقحطان برده
وفاطمه انصدمت من كلامه
تلفتلها مراد : هيا نوضى
وطلعو الزوز من الجامع …
مراد يمشى بسرعه وفاطمه اتبع فيه
فاطمه مراءة محترمه ومتحبش اتناقش راجلها فالشارع
الجامع قريب هلبا على حوشهم ..فيسع وصلو
خشو للشقه
فاطمه : شن التصرف اللى درته هدا
-مراد يعيط : منو عبدالسميع هدا اللى تبنى نخليك تقري معاه بروحكم
-فاطمه : نقرا عنده مش معاه
-مراد: اسمعى الموضوع هدا طلعيه من دماغك وفوتيه ..
وانا الف مرة قلتلك انى راجل غيور ومنحبش حد يمس حاجتى
-فاطمه : وحاجتك من مسها يا راجل خيرك تقول هكى …
مش بكرى قلتلى عجبتك لما سمعتنى نقرا
-مراد: تعجبينى انا اوكى …لكن تعجبيهم هما لا …
اسمعى هدا اخر كلام عندى بيقريك فى فصل مع الناس مرحبتين …
اما انتى وياه بروحكم لا
-فاطمه : الجامع مفتوح على بعضه .. مفيش خلوة بينا
-مراد يعيط: ايه وانتى شن ناقصك عاد غير تطلبى منى تقعدى انتى وياه فى خلوة بروحكم ..
نمشى نقتل روحى خير انا
????
وعيت فاطمه ماتترجى فيه ..فى طولك فى عرضك ..
قاللها مستحيل احنا تفاهمنا اتقري صغار …مش تقري عند شيوخ ليبيين
هيا تترجى وتبكى … وهوا الغيرة واكلة قلبه
وطلع وخلاها فالحوش
وبكت فاطمه ماغسلها
_________________________
فالليل هدى مراد شوى و روح للحوش
لقى الضى طافى …
وقف قدام دار النوم ..يسمع فى فاطمه تبكى
خش لدار النوم …
فاطمه راقدة على طرف السرير
جى مراد قعمز فمكانه عالسرير وراها
هيا راقدة وهوا مقعمز …
مد يده ولفتلها راسها لجيهته لقى وجها مليان دموع
-مراد: ايوه ايوه ..هادو كلهم دموع …
خدى طرف تيشيرته بيده
وقعد يمسحلها فدموعها ..ومسحلها خشمها
-مراد يضحك : توة عاجبك هكى تيشيرتى راح كله امية من دموعك
وسلبه وحدفه عالارض
رقدت على بطنها وحشت راسها تحت المخدة غمت بيها راسها
-مراد: بالشوية عليك ينقطع التنفس عندك مش مسؤل انا راهو
-فاطمه: شن تبى
-مراد :نبى نتعرف عليك
حولت فاطمه راسها من المخده وتلفتتله: كيف يعنى تتعرف عليا
-مراد: يعنى نبى نعرفك منو ..وين كنتو ساكنين.. وين كنتى تقري ..
حبيتى زمان ولا لا …نبى نعرف كل شى عليك
-فاطمه: بالك رايق انت وانا والله قلبى مغموم
-مراد: فطومه نعرفك بالك واسع ونفسك قوى.. وماتتراجعيش من اول جولة
-فاطمه : الاحباط اللى درتهولى انت اليوم ماخلى فيا بال واسع ولا نفس قوى
-مراد : باهى على خاطرك بس راهو .. بري وتعلمى ..
لكن مش اكثر من ثلاث حصص
-فاطمه قامت راسها ونزلو دموعها : بلحقه نمشى
-مراد حط يده على خدودها يمسح فدموعها بيده ويضحك : معش عندى بيش نمسحلك دموعك تيشيرتى لوحته ..
وحط يده على فخدتها وقاملها القفطان اللى لابسته
: هاتى قفطانك نمسحلك بيه
-فاطمه : حول اتحشم
-مراد : وين بنحول .. ومن منو بنتحشم ..
فاطمه مبتسمه …
-مراد: قاعدة واقفه الدورة
-فاطمه : ايه
-مراد : نقولك من تو انا من هنايا مش طالع وانتى ديري رايك
-فاطمه : مستحيل نرقد معاك وانت من بنت لبنت ……
هيا تدوى ومراد قص عليها وبدى مراد يبوس فيها ..
ويقوللها امنعينى كان تقدرى
-فاطمه بدلع : قلتلك حول
-مراد يبوس فيها: ايه ادلعى .. وبعتللى قوليلى حول
وقامها بيده حطها فوقه
ورقدو مع بعضهم
الفجر فاطمه مشت فى نوم عميق على صدر مراد
يكلم فيها مراد بالشوى: فاطمه حبيبي رقدتى
فاطمه ماردتش ..عرفها رقدت
حطها فمكانها وغطاها …
وباسها من شفايفها وقاللها نحبكك
وكانت هادى اول مرة مراد يقوللها نحبك
بس يا خسارة فاطمه راقدة بلحقه ومسمعتاش
__________________________
يتبع ????
مش عارفه خيرنى نطول فالحلقات هلبا ..الحلقة هادى نحس فيها فى عوض حلقتين ولا ???
نحبكم ❤