حكاية فاطمة للكاتبة زهور جمال الدين
#حكاية_فاطمة
?بقلم زهور جمال الدين ?
?الحلقه السابعه ?
فاطمه فاقت الفجر دوشت وصلت ..
وقعدت تسبح وتقرا فالقران ..
مع الساعه 9 نزلت للسوبر ماركت ..
وهيا تمشى فالشارع لقت نساوين كل وحدة لابسه توته ويهرولو ..
وحدة منهم كانت سعاد السوريه جارتها
سعاد زبطت فاطمه .. جتها سلمت عليها
وقالتلها ياريتك تنسجمى معانا
وتطلعى اديري رياضه وتقعدى معانا فالجردينه
طبعا فاطمه مستحيل تلبس توته واطيح تجرى فالشارع …
وهيا اصلا استغربت فيهم كيف لابسين هكى
فقالتلها سعاد هادو كلهم عربيات ..
وحدة سعوديه ووحدة سودانيه ومعاهم وحدة مصريه
وفهمتها ان الناس فى امريكا كل حد فى حاله …
ماحد ليه علاقه بالثانى
تلبسى اللى يعجبك ..واديري اللى يعجبك
ابتسمت فاطمه وردت عليها بكل لباقه: انشالله
انحاول انوفق فى وقتى ونتواصل معاكم
خشت للسوبر ماركت بتشري لحم لقتهم مزال ماجابوش
قالت نراجيهم شوى وندير دورة فالسوق
وهيا تمشى بين الرفوف
يجى قدام وجهها منير
__________________________
روحت فاطمه للحوش …
وعيونها معبيات دموع ..
وهيا خاشه للعمارة بتفتح الاسانسير
لقت جارهم زهير واقف قدام الاسانسير
مقدرتش تسلم عليه ولا تقوله كيف حالك
لان مراد مانعها تكلمه
انفتح الاسانسير ..
خشت فيه فاطمه وخش هوا معاها
-زهير : تحلّف فيك مراد لا تكلمينى ولا تسلمى عليا ماهو
-فاطمه : لا مش هكى
” مابتش تحلف ”
-زهير : لاااا هكى واكثر …
وقف الاسانسير وصل للدور الثالث
قبل ماينفتح
-زهير : نقولك حاجه وحدة بس …
انك لو استحقيتينى تلقينى انا وعيالى اول وحدين نوقفو معاك ..
انا فالدور الخامس شقه 60 ..
وطلعت فاطمه من الاسانسير وخشت للحوش
لقت مراد مزال راقد
______________________
هما شقتهم فيا زى الشرفه اطل عالشارع …
لكن ديما مسكرة ومنزله عليها ستار ..
ودايرة وراها كرسى ديما تقعمز عليه فاطمه وتقعد تتفرج
قعمزت فاطمه على هداكه الكرسى وسرحت مشت فى عالم ثانى …
وتدكر فكلام منير
-فاطمه: لوسمحت خوى منير .. منقدرش نوقف عليك فى السوق وزوجى مش معاى
-منير: هيا دقيقه وحدة بس … انا نبى نوعيك ..
اللى حاسباته زوج راهو واحد ملاعبى ..ومن مراءة لمراءة
وانا نشوف فيك انسانه متدينه
-فاطمه: ربي يهديه انشالله..
منير: ونزيدك ثانى.. انه واخدك
بيش يخلى اهله يتوبو ومعش يكلموه عالزواج نهائي..
انتى كنتى مجرد لعبه وجيتى بين الرجلين
-فاطمه: عارفه .. وهدا زوجى ومش ممكن نسيبه
-منير: باهى نزيدك ثانى انه يسكر وميصليش ويزنا..
تى هدا نهايته فالهاوية
-فاطمه: انت بكلامك هدا زدت خليتنى انصر اكثر
انى نحمى عيلتى ونحمى زوجى ونحاول ناخد بيده
وانت معاك حق وصحيت لانك خايف على صاحبك وجيت نبهتنى
و صحيت على روحك الطيبه لانك توعى فيا و تبى تنقدنى منه
لكن انا عارفه الى تقول فيه كله وعندى علم بيه و قاعدة برضاى ومش غصبا عنى
“فاطمه مزال مفهمتش ان منير يبيها لروحه ?”
-منير: وشن جابرك تقعدى معاه وتنقديه .. الف من يتمناك غيره
-فاطمه: وانا نبيه هوا بس ..ومنتمناش غيره .. باعد من طريقى خوى
ومشت فى حالها وخلاته
“يانارى منير وكأنك يا ابوزيد ماغزيت??”
فاطمه قاعدة عالكرسى قدام الشرفه …
وتخمم وتتكلم مع نفسها ….
انا لاااازم ندير راى ونخلي مراد يطلع من الدائرة اللى حط نفسه فيها
وتخمم …
هوا كويس وحنين غير كانا يصلى بس ويبطل المحرمات اللى يدير فيها
وقعدت تخمم كيف تخليه يصلى
وتكلم فى نفسها : تى هما شهرين بتقعديهم بتخليه يتوب
وترد على روحها : انشالله يومين بس.. حنحاول وحنجاهد فيهم
بس كيف نخليه بادارته يصلى …
مفيش راى الا انى نحطه فالامر الواقع قدام الناس بيش يصلى بالسيف
لكن كيف اندير الراى هدا ..
وخطرت عليها فكرة ??
طلع مراد من الغرفه وفاطمه سرحانه مش حاسه بيه ….و حط يديه على كتافها وعاها من سرحانها
-مراد:صباح الورد
-فاطمه تضحك : صباح القايلة
-مراد باس على خدها : ماهو دوختينى امبارح
-فاطمه : شنو هالرومنسيه هادى
-مراد: بندوش ونطلع .. ونبى نتكلم معاك فى موضوع
وخش مراد للدوش
________________________
الشيخ عبدالعليم مقعمز فالجامع
ويراجى فى موعد فاطمه بالدقيقه ويدعى انها تجى
“يانهار امزقح حتى انت يا شيخ ??”
صوتها قاعد فودانه كيف تقرا وتجود
حركاتها المستحية قاعدة بين عيونه
وخاصه انها لييبيه من نفس بلاده
ويتكلم فى خاطره: هنيئا لزوجها بها
ويدعى : يا مقلب القلوب ثبت قلبى على دينك
“مرات معاه حق مسكين حتى كانا شيخ كيف بيتحكم فى قلبه النهارات ”
المهم يقري فالاولاد قدامه ..هوا صارم شوى ..
عاطيينه الاولاد فى عمر الثانوى
مقعمز يقري فيهم بالاسم …ويراجى فالموعد متع فاطمه على احر من الجمر
_____________________
مراد طلع من الدوش …
لقى سفرة الفطور واتيه ..
قعمز مقابل فاطمه
-فاطمه : هاا شن تبى تقولى
-مراد : شن رايك نديرو اتفاق جديد
-فاطمه : اتفاق شنو
-مراد: مش احنا اتفقنا انك تقعدى شهرين وتروحى
-فاطمه : ايه
-مراد:شن رايك نغيرو الاتفاق .. نجربو روحنا مع بعض
لو انسجمنا واتفقنا مفيش داعى لمرواحتك
-فاطمه دكيه وتبيه يقوللها اقعدى بلسانه : كلمنى بالواضح مفهمتكش انا
-مراد ناض قعمز جنبها: بالعربيه ..متروحيش .. خليك ..بالك نتفاهمو ويصير مننا
وفى باله يبي يقوللها انه حبها …لكن اجل الموضوع هدا شوى ..
لين يحس انه شعور متبادل بينهم
-فاطمه مبتسمه: ايوه قول هكى..قولى يا فاطمه خليك معاى ?
-مراد: واااك عالدُل .. باهى يا فاطمه خليك معاى ..
ويضحك: تمام هكى??
-فاطمه : منبيش نقولك عندى شروط لقعادى …لا مش حنقول هكى
لكن حنقولك من توة صعب نتفاهمو وانت تزنا وتسكر ومتصليش ..لازم تتغير
-مراد: مديريليش شروط يا فاطمه
-فاطمه: انا الايام اللى فاتو عارفاتك تمشى لنساوين .. ومع هدا نسكت
لانى عارفه انى مروحه ..وهدا مش مكانى بيش نحاسبك
لكن توة مدامنى منقعد فيه المكان ..معناها بناخد كل حقوقى فيه
واول حق انى نحاسبك على موضوع زى هدا
مراد سكت ومعجباش الكلام
-فاطمه: ترضى نكون مع غيرك وبعتالى نجيك
-مراد شبحلها وعيونه حمر : انتى شنو الكلام اللى تقولى فيه هدا
-فاطمه : شفت غير سمعتها جمله بس شوف شن صار فيك ..
امالا انا اللى نشوف فيه فعل كيف ندير
-منير: خودينى وحدة وحدة وانشالله مايصير الا خاطرك طيب
-فاطمه : نديرو اتفاق ثالث
-مراد: شنهوا
-فاطمه: نفس الشهرين .. يقعدو اختبار ليا وليك
اللى يساعده الوضع يقول ساعدنى
واللى مايساعداش ينسحب وهوا ساكت منغير اى مشاكل ولا جرح للثانى
-مراد : ديل
-فاطمه : مفهمتش
-مراد : ديل يعنى متفقين ..انا موافق
-فاطمه : باهى بنطلب منك اول طلب فالديل هدا
-مراد يبصر عليها : اهو بدينا فالطلبات من توة
-فاطمه: لا والله بجد
-مراد : نعم
-فاطمه : نبيك تمشى معاى للجامع فى حصه الشيخ عبدالعليم …
نبيك تقعمز فى جنبي
“وهيا نيتها فالفكرة اللى فكرتها بكرى ..
انها ترفع معاها مراد وحيأدن العشى وهما فالجامع ..
وتحطه فالامر الواقع وتقوله صلى مع الناس جماعه …
وهوا طبعا حيتحشم ومش حيقدر يهرب ”
-مراد: متفهمينيش غلط يا فاطمه ..انا واثق فيك راهو
-فاطمه : عارفاتك واثق فيا ..لكن انا نبى محرم معاى فى قعادى معاه …
والمحرم بالتاكيد بيكون انت
-مراد: انا منقدرش نمش…
-قصت عليه فاطمه: على خاطرى هيا عاااد
-مراد : باهى غير منعطلوش
خشت فاطمه باطيب الغدى …
-مراد : شن بطيبي
-فاطمه : بكبوكى
-مراد : اممممم بكبوكى ..حولى نطيبها انا شوفى طيابى حتى انا زى العسل
-فاطمه : ترا ورينى
وخش مراد يطيب فالمبكبكه ويضحك : ماهو منعرفش انطيب غيرها ?? ..
-فاطمه: شنو اللى خلاك تغير رايك
-مراد شبحلها: حسيت انك طيبه ..وماتنهانيش .. طيبتك ..ضحكتك .. صبرك ..
باختصار انتى ?مدهله ?
فاطمه فرحت بكلامه و بدت تحس زى اى عروسه يدلع فيها عريسها
ويضحك معاها ويهدرز
__________________________
وجى المغرب صلت فاطمه فالحوش وطلعو مشو للجامع
لانهم متفقين موعدهم بعد المغرب
خشو الجامع …
شافها الشيخ عبدالعليم من بعيد ..قلبه انتفض بالكامل …
وناداها منغير ميحس بنفسه: يا فاطنه
وبعتالى تحشم لما تلفتله مراد
مشوله فاطمه ومراد وقعمزو معاه …
وفتحت فاطمه كتاب القران متاعها
وعمك الشيخ عيونه فالوطا .. لكن سمعه وحواسه كله معاها …
وهيا تقرا وتجود ..
وهوا يتبع معاها فى الكتاب اللى عنده بالكلمه وينبه فيها لطريقه القراءة
جت خيريه اللى كلمتها امس
-خيريه: شنو مزال قاعد عبودى
فاطمه قامت راسها مستغربه فيها كيف ادلع فيه
-خيريه شافت فاطمه : اهلا شن حالك يا فطومه
-الشيخ عبدالعليم: مزال يااام بنصلى العشى وبعتالى بنروح
-فاطمه ابتسمت: ولدك !!
-خيريه: وليدى راس وليد عندى ..
ربي يحفظهولى وتجيبي حتى انتى وليد يا فطومه ويطلعلك شيخ كيف ولدى
-فاطمه ومراد فصوت واحد: ااامين يااارب
وتلفتو لبعضهم وضحكو
خيريه: والله ماسكرنا عليك فم امس انا وعبدالعليم
عبدالعليم قام راسه شبح لامه بغضب
وخيريه منبهتلاش ..ماهو بسلامتها هدرازة ??
-خيريه تكلم فى فاطمه : والله عييت نتصل وندورو لوليدى فى ليبيا
على وجه كيف هالوجه الصافى ماحصلناش …
بالك تعرفى وحدة مدينه زيك تكون فى ليبيا
-فاطمه واطت راسها تحشمت : ربي كريم خالتى خيريه
وليبيا معبيه بالبنات المدينات
-خيريه تلفتت لمراد: جابهالك ربي نعمه يا وليدى
من كثر ما عجبتنى كتبت عليها شعر امس
-مراد : هاتى سمعينى شعرك خالتى خيريه
-خيريه : يعطيك الخلي ياحوش بعد فطومة…..
يطيحو حيوطك وتمسحه الحكومة..
يافاطمة ياام الحواجب قامه.
ياسعد من كمل معاك ايامه.
يافاطمة ياام الوشام امنيل
انتي خير من صندق مال مكيل
انتي خير من سرعوفه انتي خير من صندق ماله يوفى تبي ولد راكب علي الهيفوفه
يا ياخذك والا حداك يقيل?
وضحك مراد من قلبه عجبه الشعر ..وتحشمت فاطمه وواطت راسها
-عبدالعليم قريب يتفجر: تعالى يااام
وناض من مكانه مشى هوا وامه بعيد
وادن العشى
الله اكبر الله اكبر
وفاطمه فرصتها عاد بيش بتحط مراد فالامر الواقع وتقوله صلى
طبعا الادن شخص يوقف ويادن مكبر داخلى ..
ممنوع الادان بالمكبر فالسمعه متع الجامع وقتها
لما بدى الادان يادن بدى مراد يرعش
-فاطمه : خيرك يا مراد
-مراد : بنروح
-فاطمه : بتروح وادان العشى ادن ..اهو نصلو معاهم جماعه وبعتالى نروحو
-مراد : منبيش نصلى مش بالسيف
-فاطمه :شن الكلام اللى تقول فيه يا مراد ..
راك فى بيت الله وسمعت الادان كيف تطلع وتخلى الصلاة
-مراد اكثر مابدى يرعش: مدخلكش فيا انتى قلتلك منبيش نصلى وعيونه دمعو
وناض وقف بيروح ..ووقفت فاطمه وراه تلحق فيه
لما رجع عبدالعليم مالقاهمش ..وشاف لباب الجامع لقاهم طالعين
وصلو للعمارة خش مراد هوا الاول وخشت وراه فاطمه تجرى
فتح الاسانسير خشت معاه فيه
مراد يبكى وحاط يديه على عيونه كأنه متحشم منها
-فاطمه: مراد خيرك بالشوى عليك
وهوا مايبيش يرد عليها
انفتح الاسانسير .. طلع مراد وفاطمه وراه …
خش الشقه ومشى طوووول لسريره رقد فيه وتغطا وهوا يبكى
“ايه بلحقه يبكى راهو? ”
الولد تهستر …العقل الباطن يلوم فيه على طلوعه بعد سمع الادان ..
وعقله مسيطر عليه بفكرة انه ميصليش
“مسكين صارتله لخبطه ويا فاطمه شن درتى فالولد ”
خشت فاطمه دارتله شاهى سخون وعصرت فيه الليم وجابتهوله
-فاطمه: مراد هاك خود اشرب
-مراد: منبيش
فاطمه حست انه هوا حنين عليها فى بعض المواقف …
فحبت تكون حتى هيا حنينه معاه
قعمزت فى جنبه عالسرير وهوا راقد وحضناته …
زى الام وولدها
لما حس بحنانها …تلفتلها وحضنها بالقوة
-مراد: ماتسيبينيش يا فاطمه
-فاطمه بحنان : مستحيل نسيبك ..انا معاك
واكثر مازاد يرعش مراد
-فاطمه : قولى وين نمشى نجيبلك دكتور ..
ولا عطينى رقم واحد من صحابك نكلمه يجى يرفعك يعاينك
-مراد: متطلعيش من الحوش نخاف عليك الدنيا ليل
-فاطمه : تربح خلينى نجيبلك دوا من الصيدليه عالاقل
“هوا جوه قفاقف من الموقف …غير كان هيا خلاته بروحه راهو هدى شوية ”
قعدت حاضناته وتسبح
“لا اله الا انت سبحانك انى كنت من الضالمين ”
“لا اله الا انت سبحانك انى كنت من الضالمين”
وتدعى ياااارب .. ياااارب
وماسكتتش وهيا تسبح …
وشرين باب الحوش …
نزلت مراد من حضنها شوى …
ولبست حجابها
ومشت من ورا الباب ردت : شكون
-الدكتور: انا الدكتور جيت عشان المريض لو سمحتى افتحى
فتحت فاطمه الباب لقت قدامها واحد مبتلز بالبدله وقاللها : فين المريض
-فاطمه مستغربه : المريض لداخل
-الدكتور: طب ممكن اشوفو
-فاطمه : تفضل
وخش الدكتور لمراد …وكشف عليه
وفتح شنطه وطلعله يبرة مهدئة وضربهاله ..وفى نفس الوقت ترقد
وعطاه حبوب كلاهم
-مراد يشبح لفاطمه : من بعته
-فاطمه متعجبه بحواجبها واشرت بصبعها فوق? وقالتله : بعته ربي ??
-الدكتور: بس انتى لما اتصلتى قوتيلى انو طفل
-فاطمه : انا متصلتش يا دكتور ..ممكن انت غالط فالشقه
-الدكتور: هيا مش دى شقه 9
-فاطمه : لا يادكتور هادى شقه 6 .. بس ممكن الرقم طايح انكتب قدامك 9..
-الدكتور: طب مش حتدفعولى ثمن الفيزيتا ولا ايه
-فاطمه : لا كيف حقك يا دكتور هدا حقك
وعطاته حقاته وطلع الدكتور
وسكرت الباب ورجعت رقدت مراد فى حضنها
مراد راقد
-فاطمه : الحمدلله حبيبي شفت ربي كيف بعتلنا الدكتور …..نحبك هلبااااا
ولكن نفس الشى …يا خسارة مراد راقد وماسمعهاش
_____________________
يتبع ????
ومشكورة جدا جدا جدا حبيبتى صاحبه الشعر المكتوب فالحلقه Cats Queen ابدعتى
نحبكم ❤