حكاية فاطمة للكاتبة زهور جمال الدين

#حكاية_فاطمة

?للكاتبة زهور جمال الدين ?

? الحلقة التاسعة عشر?

ماقبل الاخيرة

الصبح الساعه 8 ونص

مراد يشرين عالباب …

فتحت نادية لقت مراد واقف قدامها ..رعشت مع بعضها

-مراد حامق وحاط يديه فى نصه: ليش درتى هكى

-نادية: انا اقسم بالله …

قص عليها مراد شدها من شعرها وخش وسكر الباب وراه ودخلها للشقه

-مراد : انتى الباين عليك مش ح تجى بالباهية

-نادية: حول يدك اااي وجعتنى

-مراد : تكلمى ..انا لتوة منبيش نضرك يا نادية ..

اقسم بالله لو ننوى انتى تعرفينى نعرف عليك مية حاجه اضرك

-نادية: اقسم بالله حتى درته الشى ومانى راضيه علي نفسى ..

لكن اضريت انى ندير هكى

-مراد : من باعتك

-نادية : ماباعتنى حد ..انا بروحى درت الشى هدا

وقف مراد : تمام ..تو نعرف انا بطريقتى …

ووقتها يمشى الظالم فى جرت المظلوم ..

وانتى تعرفى مراد كانا نوى على حاجه

وجى طالع .. حط يده بيفتح الباب

-نادية : صاحبك هوا اللى طلب منى الخدمه هادى

تلفتلها متفاجئ: من صاحبي

_________________________

فى نفس الوقت

زهير وحياة يحكو مع بعض فى شقتهم قبل مايطلعو للعمل ..

-حياة: تعرف يا زهير عجبتنى فيك فزعتك لفاطمه

-زهير: امالا كيف حبيبتى .. احنا هنا الليبيين نعتبرو مجتمع ضئيل ..

مفروض كلنا نعتبرو نكونو خوت وصغار عم

-حياة: ممكن انا مجربتش الغربة .. انولدت هنايا ..خوالى من امريكا ..

وبابا مولود هنايا وجدى وعمامى كلهم فى امريكا…

مش حاسه بالغربة اللى انتو حاسين بيها

-زهير: تعرفى يا حياة لو بس عشتى فى ليبيا..

فراقها صعب بلادى..وصوته انخنق ودموعه نزلو ….

-حياة : احكيلى على ليبيا ..

-زهير دموعه نزلو : شن نحكيلك عليها …

ليبيا الحن ..وليبيا محبة الناس لبعضها ..

فى ليبيا عيب المراءة فالنهار تسكر حوشها على جاراتها

وعيب تشد عيلها وتقوله ماتلعبش مع صغار الجيران ..

ليبيا مع ان فيها الشوارع تراب …

لكن ريحت ترابها يرد الروح

والسيارات يمشو فى شوارعها بالشوى

والصغار مكرشين فيهم ويجارو وراهم اللى حفيان واللى لابس

ليبيا قزقيزة ..وليبيا حسن الكشيك.. وليبيا لطفيه ابراهيم

ولمه العيلة فى رمضان على حكايات البسباسى

اييييييه شن بنحكيلك يا حياة

ليبيا امى وبوى وخواتى ..اللى ستاحشتهم …

واللى ماشافوش صغارى لتوة

-حياة تمسحله فدموعه : حبيبي ياسرك دموع

سامحنى قلبت عليك المواجع عالصبح

-زهير: نقولك حاجه يا حياة ..مواجعى تقلبو من يوم شفت فاطمه

لان فاطمه مثال للبنت الليبية الصح ..

الليبيات اللى تربو فى ليبيا محترمات ويشرفو وين ما يمشو

-حياة : وامتى بترفعنا نزوروها انا والصغار

-زهير: فالقريب العاجل انشالله ..

والله لولا ظروف الحياة والشغل مانفارقها

_________________________

-نادية: الو وو

-منير : ايوة

-نادية : اسمع مراد لقي فاطمة

-منير وقف : ووينها توة

-نادية: فى شقتها .. وتبى من يساعدها لانه مسكر عليها

-منير: باهى نبى نمشيلها كيف يصير

-نادية : ننصحك ماتتهورش ..مراد فالحوش وتخاف يشدك

-منير: ماعنديش صبر ..لااازم تلقانى انا توة .. لازم ننجدها انا …

لانها ماعندهاش حد هنايا ..

وهكى الخطه متعى ح تنجح مية فالمية

ونفتك منه مراد الحقير هدا

-نادية : عموما حنديرلك اخر مساعدة منى ليك ..

ان مراد غدوة فالليل عنده الاجتماع النصف سنوى

فالجمعية العمومية اللى داير اسهم فيها

وانت عارف انه لازم يحضر فى كل اجتماع ..

معناها ممكن غدوة فالليل تقدر تلقاها بروحها

لانه حابسها ومسكر عليها من برة بالمفتاح ..

و المفتاح عندك .. وتقدر تخشلها واتهربها

-منير: باهى صحيتى يا احلى نادية ..شن بيصبرنى

لعند غدوة فالليل

-نادية : تمام باى توة

سكرت الخط …

وتلفتت لمراد .. شنو توة تمام انا هكى معاك

-مراد : لا شنو تمام ..مزال عندك مشوار بديريه معاى

وخدى مراد التليفون اتصل برقم زهير

تكلمو ممكن دقيقتين وسكرو

وطلعو مراد ونادية الزوز مع بعضهم من الشقه

_________________________

مراد ونادية وصلو قدام عمارة مراد

نزلو من التاكسى

وخشو من باب عمارة مراد

ركبو للشقه …

فتح مراد الباب وخش

لقو فاطمه وزهير وحياة وفرحات …

مقعمزين عالصالون

خش مراد هوا الاول … وبعده خشت نادية

سكر مراد الباب وشدها من شعرها ودخلها جنبهم

نادية متوقعتش التصرف هدا من مراد

وقعدت تقوله حول يدك تحشم

-مراد : احكى يا زفته يا عافنه

-نادية : شنو بنحكى

-مراد : احكى اللى كنتى تحكيلي فيه توة فى شقتك

-نادية : باهى حول يدك بس

وقعدت نادية تحكيلهم كيف دبرت الامر هيا ومنيرر

وحكتلهم ان خطتهم كانت مفروض ان لما تطلع

فاطمه من العمارة

يلاقيها منير قرانديزر عاد داير روحه ? وينقدها

ويرفعها لشقته ..

وكان من ضمن احلامه وخطته انه يشربها دوا اطيح البيبي

لكن يومها قعد يراجى قدام العمارة

وفاطمه ماطلعتش

وحكت لفاطمه ان منير يبيها ليه فترة من اول يوم شافها فيه

وحلفتلها انها من يوم تفارقت هيا ومراد ماعاد حد منهم شاف الثانى

وان حتى جيتها الاولى ليهم بتدبير من منير

-فرحات : ومدامك ماتبيش مراد ..شن جابرك تساعدى منير

-نادية : لانى خفت يفضحنى

-مراد مستغرب: يفضحك !!

-نادية : هوا اللى ساعدنى زمان فى حكاية السرقة الل لفقناها لزهير

-وقف زهير: يابنت الحرام ..

وليش لما واجهتك قلتيلى ان اللى نفد معاك الموضوع مراد

-نادية : انا مقلتلكش ان مراد نفدها معاى …

انت اللى قلت مراد لانك تكرهه هادية الفترة بسببي

وانا سكتت لا قلتلك ايه ولا قلتلك لا

وقف مراد وطاح يشلبخ فيها كفوف : يابنت الكلب تبى اضيعى مستقبلى

وشدها من شعرها وطاح فيها شلابيخ طريحه نباشه القبور
فاطمه تحز من جهه وفرحات يحز من جهه ثانية

وهيا عاد طاحت تعيط بيش يسمعها مولى العمارة ويجيب الامن ??

-مراد داهش من الضرب: اقسم بالله يا نادية المرة

هادى تكلمى منير وتنبهيه يجيك ماكان غايب منى

تى والله ماقاتلك واحد الا انا يا زفته

________________

روحو الضيوف كلهم

وشكر مراد زهير انه لما كلمه جى هوا وفرحات وحياة شهدو عالموقف

وقعدو فاطمه ومراد بروحهم فالشقه

مراد مقعمز عالصالون .. وفاطمه مقعمزة عالكرسى الفردى

-فاطمه : مراد نبيك تسامحنى

-مراد قام يده : تعالى

-فاطمه جت جنبه : ممكن منحكوش فالموضوع هدا نهائي

لو بتتأسفيلى حتى انا بنتأسفلك .. لان اللى صار كله بسبب معارفى انا

اللى صار كله بسبب اختياراتى الغلط للناس

-فاطمه حضناته : نحبك هلبا يا عمرى ..كنت بنغلط غلطه حياتى

-مراد : اكبر غلط ان الانسان يتخد قراراته فى ساعه غضب

-فاطمه : صح مفروض الانسان يزعل ويحرج ..

ويدير كل اللى يرضى نفسه

لكن القرار المصيري ياخده بعد مايهدا

-مراد حط راسها على صدره : تعرفى انى تعلمت

هلبااااا من منحتنا هادى

-فاطمه : وانا نفس الشى

-مراد يضحك : شنو قررتى القعاد معاى …

ولا بتروحى فى موعد الطيارة متع غدوة

-فاطمه ضرباته على صدره : بلاش برادة عاد …

تعرف انا مرة ثانية لو نشوفك بعيونى ..

معش نطلع من حوشى لين نتناقش انا وياك

-مراد : اهم حاجه المصارحه بين الزوجين ..

بيش لو فى سوء تفاهم الثانى يبرر موقفه

-فاطمه : بالزبط

-مراد : باهى شنو يا قطوسة ..يعنى نبدا فى اوراق الجنسية الامريكية ليك

-فاطمه: ابدى ?

-مراد شن بديرنا غدى..يومين نجرى على لحم بطنى

-فاطمه ناضت وقفت : انا ندير لحبيبي كل شى يحبه

-مراد : كل شى شى

-فاطمه : طبعا كل شى كل شى

-ناض مراد وقامها بين يديه : باهى ابدى بالترتيب فى كل شى هى

ودخلها لدار النوم

-فاطمه تضحك: والغدى يا مجنون

-مراد : لا حقين عليه مش بيهرب مننا

وخشو للدار وسكرو الباب

_________________________

ثانى يوم فالليل مع الساعه 7 ونص

منير واقف فى جهه عمارة مراد

يراقب …

شوى ويشوف فى مراد طالع من العمارة ..

وقف مراد تاكسى ومشى

قعد يراجى منير شوى لين اتأكد من مراد انه مشى

وخش للعمارة من البوابة ..

مشى للاسانسير وركب للدور اللى ساكنه فيه فاطمه

وقف الاسانسير ..طلع منه

والكرادورى كله هدوء

مشى لشقه فاطمه ..

حط المفتاح فالباب وفتحها

لما فتح الباب عفس على وراقى تحت رجله …

تلفت لوطا ..ميبيش يدير صوت …

قام هادوكا الوريقات مدبسات مع بعضهم بايديه ..

وخش للشقه وسكر الباب

وحط الاوراق عالطاولة ..وبدى ينادى

-منير: فاطمه .. فاطمه …

وينفتح وراه باب الشقه بالمفتاح ?…

واحد لابس عسكرى وحاط طاقيه فوق راسه ويعيط عليه : بوليس

وفجأة بدو الشرطه زى الرز خشو للشقه..

على طول القو القبض عليه وخدو هادوكا الوريقات اللى لقوهم عالطاولة

وطلعوه ….

ومراد واقف داير روحه مندهش: مستحيل .. انت السارق يا منير ??

تاريته مراد اليوم اللى قبله الصبح …

مشى لمركز المقاطعه ورفع معاه نادية ..

ودار بلاغ ان فى اوراق مسروقين منه …

وقدم البلاغ اللى داره فالمطار ك دليل

ونادية شهدت ان جتها معلومه ان السارق بيرد

الاوراق غدوة فالليل

دارو لعمك منير كمين مليح ..

واتهموه بسرقه اوراق مهمه

وطبعا الشرطه حبساته على دمة القضيه…

لانه فى جيبه مفتاح شقه مراد ..

وعالاوراق اللى داير عليهم مراد البلاغ بصماته

_____________________

بعد شهرين

مراد وفاطمه مقعمزين فالحديقه ..

ومعاهم طارق وزوجته بنت خاله اللى بعتوهاله اهله من ليبيا

مراد وطارق يوشوشو مع بعضهم

-طارق: صاحبك حكمو عليه بخمسة سنين سجن

-مراد : ماهوش صاحبى النمودج هدا

-طارق: مع انى توقعتك اتنازل

-مراد : مستحيل ..تى هدا قريب دمرلى حياتى ..شن تحكى انت

-طارق: بعد يطلع ح يرحلوه اكيد .. عشان ماعنده الجنسية ..

وصعب يحصل على حسن السيرة والسلوك

-منير: درب يسد مايرد… لامتى بنقعدو احنا الطيبين

واحنا اللى بنتحملو

وفاطمه واسماء مرت طارق مقعمزات بروحهم يتعرفو ..

____________________

بعد خمسة شهور ..

مراد مقعمز ع سريره ولابس نضاراته ويقرا فى اوراق تخص شغله

وفاطمه راقدة جنبه …

-مراد : تعرفى يبونى نزيد سهمين معاهم

لكن مش عارف خايف نجازف

فاطمه ساكته

-مراد يشبح لااوراق : فطومه نكلم فيك

وتلفتلها لقى وجهها اسود

-مراد انخلع : خيرك حبيبي

-فاطمة : متخافش حبيبي هادى اوجاع اتجى من

الليل لليل فالشهر الاخير

-مراد : باهى شن تبى نديرلك ..كيف نساعدك حبى

-فاطمه : شن بديرلى حبى شى ..

وزاد عليها الوجع .. وبدت فاطمه تتألم هلبا

-مراد : نوضى نوضى نرفعك للمستشفى

-فاطمه : قالتلى الدكتورة موعدى الاسبوع الجاى

-مراد : قلتلك نوضى هيا

__________________________

يتبع ???

الحلقه الجايه هيا الاخيرة

مش حنعطل عليكم بيها انشاء الله

نحبكم ❤