حكاية فاطمة للكاتبة زهور جمال الدين

#حكاية_فاطمة

??بقلم زهور جمال الدين ??

☘?الحلقة الخامسة عشر ?☘

-روعة : باركلها يا شيخ فاطمه طلعت حامل

الشيخ عبدالعليم يبس فمكانه .. وحتى صوته هرب

-عبدالعليم تلفت لفاطمه: الحمدلله الدى بنعمته تتم الصالحات …

ربي يرزقك بالخلف الصالح ..ويطول فى عمرك وتربيه احسن تربيه

وعطى بالضهر ومشى لمكانه

وفاطمه وروعه قعدو مع بعض

-روعة: فاطمه عندك علم

-فاطمه: بشنو

-روعه : بأن الشيخ عبدالعليم معجب بيك

-فاطمه رعشت مع بعضها : استغفر الله العظيم .. مافى بينى وبينه الا كل خير

-روعه: خيرك انتى هبله .. شنو انا قلتلك انتى تحبيه ولا معجبه بيه …

انا قلتلك ان هوا اللى معجب بيك ..

-فاطمه وجهه بدى احمر: اختى روعه اكيدة انتى غالطه …

ولو سمحتى الكلام هدا منبيش نسمعه منك ثانى

-روعة: انا اكبر منك يا فطومه ونعرف نميز ..هدا اولا

ثانيا تبى الحق انا معجبه بيه الشيخ..

وخش خاطرى هلبا من اول يوم شفته فيه ..

ولانى معجبه بيه ومنتبهتله .. لاحظت انه معجب بيك ومنتبهلك

فهمتى توة يا طيبه

-فاطمه : لا فهمت ولا نبى نفهم .. وراس روعه مراد عصبي

ولو يسمع كلام زى هدا والله يحرم عليا نجى للجامع …

وانا والله والله مانى منتبه لا للشيخ ولا لغيره

-روعه : راجلك مش عصبي.. راجلك غيور ويحبك ..

وانتى تبى الحق تنحبى هلبا

وتشبح للشيخ عبدالعليم : وبالرغم عارفته معجب بيك

بس حنحاول معاه

وناضت روعه توجت للجهه اللى مقعمز فيها الشيخ

-فاطمه : تعالى يا مجنونه شن بديري

روعه ماردتش عليها ومشت جهه الشيخ عبدالعليم

____________________

-نادية : لاااا مش للدرجه هادى يا منير ..

حرام عليك مراد مايستاهلش نديرو فيه هكى

-منير: ومراد شن بنديرله انا مالى وماله

-نادية: تى كيف مالك وماله .. هادى مرته

-منير: اسمعى زمان لما طلبتى مساعدتى فى قصه زهير وقفت معاك

والاوراق اللى جبتهملك كان اطيري ماتقدرى توصليهم

-ناديه : بس فى فرق بين القصتين ..زهير احنا درناه سارق

مش زى ماتبى ادير لمراد انت توة

-منير: نفس الشى .. الغاية والغرض المهم تسوء السمعه ..

-نادية: اسمع المرة هادى ح نسايرك وح انفد معاك ..

بس حتكون هادى اخر مرة نساعدك فيها ..

معش تحلم نساعدك ثانى

-منير: اصلا لو هادى مافرقتش بينهم .. خلاص معش فى شى يفرق بينهم

-نادية : وامتى التنفيد

-منير: اليوم قبل غدوة .. توة تقدر اطيح مزال الحمل فى اوله

مانبى شى يربطها بيه

_______________________

روعة وصلت قدام الشيخ عبدالعليم وقعمزت

الشيخ قام راسه استغرب من جرئتها

-روعة: ممكن نحكى معاك شويا

-الشيخ عبدالعليم يشبح للمصحف: اوجزى الكلام اختى ..
عندك خمسة دقايق بس ..قولى شن تبى

-روعه: انت حاس باعجابى بيك صح

-الشيخ عبدالعليم قام راسه: انتى شن تقولى ..

الانثى يجب ان تكون اكثر حشمه..مش مفضوحه هكى

-روعه: اسمع انا نطلع شعرى مفتوح ..

نلبس مستور وعريان ..شوارط وسراويل

وصلت 18..بنخش الجامعه .. يعنى نقدر نطلع وين مانبى حتى بدون علم بابا ..

ونقدر نسكن بروحى

-عبدالعليم : وليش تقوليلي فالكلام هدا كله

-روعة: لان عجبتنى فاطمه زى ماعجباتك

وعجبنى تغير مراد بعد ارتبط بيها

وحتى انا نبى نتغير على يديك .. زى متغير مراد على يد فاطمة

-عبدالعليم: انتى جريئة هلبا

-روعة:وقابلة للتغير لانه بارادتى

-عبدالعليم: الخمس دقايق تمو …نستادنك

تلفتت روعة لفاطمه تشوف فيها لاهية وتقري فالصغار

-روعه تهمس للشيخ : تصدق انها منتبهتلكش اصلا

-عبدالعليم : على من تحكى انتى

-روعة : على فاطمة

“فى علم النفس ? هدا ينقاله مواجهه الشخص باخطائه …برافو روعه ??”

-عبدالعليم : حاشا لله فاطنه محترمه

-روعة: وقطع لسان اللى يقول عليها غير هكى…

بس حبيت نوضحكلك انها مش منتبها ليك ..

ولدلك ننصحك انتبه لغيرها

-عبدالعليم : انتى بالتاكيد غالطه فى كل توقعاتك

-روعة: اسمع انا عشقتك ونجى على خاطرك هنايا..

واللى يعشق حد يلاحظ كل تصرفاته ..

وانا ملاحظتك كيف متاخد عليها

وتوة زدت تاكدت اكثر ..

لانى بالعانى قلتلك على حكاية حملها نبى نشوف ردت فعلك

سكت الشيخ عبدالعليم ومقدرش يواجه كلامها

وتلفت للطلبة: نبدو على بركه الله

وناضت روعه من جنبه

________________________________

كملت فاطمه حصتها

وسقدت الصغار وتراجى فى مراد بيش بيصلو المغرب وبيروحو

ادن المغرب …

وبعده طول الاقامه ..

وقفت فاطمه فى صف النساء بيش تصلى ومراد موصلش

اقام الشيخ الصلاة

وفجأة خش مراد يجرى وقف مع صفوف الرجال

صلو وكملو وحاست الناس وقعد يدور فى فاطمه

مالقاهاش عرف انها طلعت طول

طلع من الجامع يجرى لقاها تمشى بروحها

قرب منها : فطومه

-تلفتت فاطمه وتضحك : مراد

-مراد مسك يدها: خيرك ما استنيتينيش

-فاطمه : نحسابك مش حتجى

-مراد : انا معش نقدر نتأخر عليكم خلاص

-فاطمه : منهما احنا

-مراد : انتى والبيبي ..

وقعدو يضحكو الزوز

وصلو للعمارة …

لقو عمك باسل يراجى فيهم

-باسل: خيي مراد : امك اتصلت شى خمس مرات

-مراد فرح : امى اتصلت

-باسل: اي وقالت رح ترجع تتصل

قعدو فاطمه ومراد مقعمزين يراجو

مراد قلبه يطق ..مستاحش صوت امه واخبارهم كلهم

ومقعمز مشت بيه الداكرة لمكالمته مع بوه لما قاله بيخطبله بنت ليبيه

وقعد يدكر فكلامه هوا وبوه ??

[مراد: ليش ادير هكى يا بوى حرام عليك تظلم بنت الناس معاى

-يحيى: بوك اختارلك بنية تعجبك يا مراد ..

وادير منها عويلة وصغار وانت مرتاح من ناحيتها

-مراد: يا بوى انا مش متع عويلة توة ..ولا نتحمل مسؤلية صغار

-يحيى : الخير هلبا ولدى وبادن الله بوك مايسيبكش

-مراد : مش قصه فلوس يا بوى حالتى الحمدلله توة ..
لكن ليش نظلم انسانه معاى

-يحيى: انت جرب سلم ولدى : وحيجيك يوم وتكلمنى وتقولى صدقت يا بوى ]

طلع مراد من حالة السرحان ورجع للواقع

-مراد يشبح لفاطمه: والله صدقت يا بوى

شرين التليفون

رد باسل لقاها عمتك سالمه .. عطى التليفون لمراد

-مراد عيونه مدمعات : اهلين يمى كيف حالك يا غاليه

“واعرة الغربة?? ”

-سالمة تبكى : مراد شن حالك يا وليدى انت وفاطمه انشالله كويسين

-مراد : الحمدلله يمى فى خيار الخير ..شن حال بوى وخواتى وصلاح وحوش عمى محمود

-سالمه : الحمدلله كلنا كويسين وينها فاطمه خلى نسلم عليها

وعطى مراد التليفون لفاطمه

-فاطمه: اهلين يا عمتى كيف حالك

وقعدو فاطمه هيا وعمتها سالمه ينشدو عالصحه والحال والاحوال وسالت فاطمه على امها وبوها وخواتها …

ومن كثر ما مستاحشه حتى الجيران نشدت عليهم ?

-سالمه تضحك متحشمه زعميتا: ههه شنو بنيتى عندكش حاجه

-فاطمه متحشمه : عندى ايه يا عمتى

-سالمة: مبروك على وليدى وبنيتى .. قداش ليك

-فاطمه : ليا شهر وشوى

-سالمه: ربي يوصلك بالسالم بنيتى

وخدى مراد التليفون يكلم فى امه

-سالمه : مرتاح وليدي

-مراد: الحمدلله يمى .. كفيتو ووفيتو كيف بعتولى فاطمه

ووصية منى ليك تقوليها لبوى.. قوليله قالك مراد صدقت يا بوى

-سالمة تبكى: بوك ستاحشك هلبا يا وليدى

-مراد يبكى : حتى انا ستاحشته يااام ..

وكان جانى وليد ح نسميه يحيى بادن الله

-سالمه : سلم وليدى …وبنبشرك اختك لهام عطيناها

-مراد : عالخير يااام انشالله … لمن عطيتوها

-سالمه: كانا نقولك لمنو …

عطيناها لخالد خال فاطمه

-مراد : خال فاطمه

انتبهت فاطمه للكلمة.. تأشرله بيدها : شنو ..شن

مراد تلفتلها: خالك خالد خطب اختى الهام

-سالمه: سنو وليدى نكملو عالخير ولا عندك راى ثانى

-مراد: اسألو يمى وكان الراجل باهى اعطو

-سالمه : ماخلينا من نشدنا واللى ننشدوه يشكر ويحط

-مراد : على خيرت الله امالا

________________________

مراد وفاطمه فى شقتهم

-فاطمه: يازين ما اختار خالى ..ويا زين ما اختارت لهومه

-مراد: هدا خالك اللى جى معاك ولا

-فاطمة: هوا هدا خالى العزيز الحبوب ..

تو تشوف كيف ترتاح معاه اختك الهام ..

خالى خالد خيار التريس

-مراد : ربي يهنيهم

-فاطمه: انشالله

-مراد: تعالى

جت فاطمه قعمزت فى جنب مراد .. خداها بيده ورقدها على صدره

-مراد: غدوة نمشو نديرو صورة للبيبي

-فاطمه: ونديرو التحاليل

-مراد : ربي يخليكم ليا انشالله

-فاطمه حولت من حضنه وتلفتتله : حقة تعالة منسئلك

-مراد : اسئلي

-فاطمة : ليش قلت لامك قولى لبوي صدقت يا بوى ..
شن معناها ولا هادى شفرة

-مراد : لما قالى بوى بنبعتلك بنت ليبيه..

انا رفضت وقلتله انى توة مش قد المسؤلية

فقالى انت خير جرب وتو تقولى يا بوى صدقت

وحط صبعه على خشمها : وبالفعل جربت يا قطوسه وطلع بوى معاه حق

ضحكت فاطمه

ردها مراد لحضنه : تعرفى يا فاطمه ..بوى انسان عظيم والعظمه لله …

تعب علينا ولبسنا احسن لبس فى ولاد عمامى ..

كان ميضربش فينا بكل ..ولما يسافر كان يجيبنا فى احلى لبس

-فاطمه: امالا انا بوى .. كنت نمشى فالجامع

نحس فى روحى زى الطاوس مفتخرة ونقوللهم انا بنت الشيخ محمود

-مراد: امالا فالعيد ثلاث لبسات لازم اول يوم وثانى يوم وثالث يوم

-فاطمه عيونها دموع : والله كأنه قدامى توة واحنا صغار ..

كيف ليله العيد واحنا نقيسو فالحوايج اللى شريناهم ..

وكل وحدة تطلع تورى لبوها لبستها ..

ويقعد بوى يشكر فينا وفى جمالنا

وقعدت تبكى …

-ضمها مراد: استحشناهم ولا

-فاطمه : هلباااااا

تليفون عمتك سالمه قلب عليهم المواجع ??

_________________________

روعة روحت للحوش

وعبدالعليم فى بالها

-حياة: روعة حبيبتى انزلى جيبي حليب من المحل

-روعة: ماما تعبانه غدوة ننزل نجيب من السوبرماركت

-حياة : هيا بلاش كسل عاد

-روعة: حاضر يا ماما

لبست روعه تيشيرت وشورت …ونزلت للمحل الصغير القريب من العمارة

خشت للمحل

روعة خدت باكو حليب ومشت للبياع : بكم هدا

بالصدفه عبدالعليم واقف يشرى

شبح لمنضر روعه فالشورت والتيشرت انصدم

وقعد يشبحلها وهوا ساكت

وروعة شافته انصدمت …

وطلعت تجرى هربت

????

روح عبدالعليم للحوش

-خيريه: عبدالعليم تعالة اهو نتعشو انا وبوك

-عبدالعليم : صحتين ياام

وخش لداره طول ماعنداش نية فى شى

ويفكر فالكلام اللى واجهته بيه روعه

البنية صدقت فى كل كلمه قالتها ..

فاطمه حلال لشخص ثانى ..وتفكيري فيها كله غلط

استغفر الله العظيم من كل دنب عظيم

ومافكرش فى كلام روعة الثانى كيف عرضت عليه نفسها

اكتفى بالتفكير فيها وفى منضرها اللى طالعه بيه للشارع

وقعد حاير كيف بنت ليبيه مسلمه يسمحولها اهلها انها تطلع هكى

تعب مالتفكير …طفى تلضى ورقد

___________________

ثانى يوم …

طلعو فاطمة ومراد مشو للعيادة بيش يديرو الصورة والتحاليل

وبعد كملو روحو للحوش …

-فاطمه : حبيبى خلينى نمشى للجامع

-مراد : خلاص عاد.. قلنا مشوارين فى نفس اليوم لا

-فاطمة : هيا الساعه قداش موعدنا مع الدكتورة

-مراد : الساعه ثلاثه

-فاطمه : نطلعو ومزال الوقت

مراد شبحلها وسكت متع متحاوليش

طيب فاطمه الغدى …

تغدو وطلعو ..مشو للعيادة

خشت فاطمه للدكتورة

وطبعا مراد يترجملها

تكلمت الدكتورة ومراد فرح هلبا : معقولة يا دكتورة

-فاطمه : شنو

-مراد شبحلها : الدكتورة قالت 50 % تؤام

فاطمه قريب طارت من الفرحه

وروحو لحوشهم وهما فرحانين …

________________________

-منير: انا معش عندى صبر ..غدوة انفدو اللى اتفقنا عليه

-نادية : انا خايفه وكان يزبطنى مراد والله يقتلنى

-منير: لا يقتلك لا سو ..هيا كلها كلها عشرة دقايق

-نادية : باهى افرض انها ماطلعتش للسوق

-منير: انفدو بعد غدوة

-نادية : امالا نقعد على حسابك انا

-منير: متقعديش تتشرطى عليا عاد

-ناديه : ربك يستر ومايكشفناش مراد

___________________

الحلقه الجاية نعرفو كيف بيصير فى فاطمه ومراد ….
وانشالله ربك يستر من اللى بيديروه منير ونادية

وهما زعما شن بيديرو ترا من تقدر تتوقع ??

نحبكم❤