الصديقتان

الفصل التالت

_ طب يلا معانا
نظرت علا إلى الأسفل باكية .. ثم قالت
_ أنا بريئة والله و عارفة كمان مين القاتل
قال الضابط و هو يضع في يديها الكلبشات
_ الكلام ده مايتقالش هنا .. انتي خلاص طلع قرار القبض عليكي
تم القبض على علا و في أول ميعاد زيارة لها.. ذهبت إليها أميرة مع والديها و صديقهم شكري المحامي.
قالت أميرة بحزن
– ازاي ده حصل .. الضابط بيقول لقوا موبايلك في مكان الجريمة !!!
قالت علا بإرتباك
– معرفش الموبايل كان هناك ازاي .. و على فكرة لقوا دبلتي كمان اللي كنتي مستلفاها .. و صارحتهم بالحقيقة لكن مفيش حد صدقني و بيقولوا كل الادلة ضدي .. إنتي لازم تخرجيني من هنا .. إنتي عارفة كويس إن مش أنا اللي قتلته
قالت أميرة بلهجة غاضبة
– إيه اللي جاب موبايلك هناك يا علا ؟
قال المحامي و هو ينظر إلي الجميع بنظرة سريعة
– ممكن تمشوا كلكم و تسيبيوني أتكلم مع علا لوحدنا .. ده لو عاوزين مصلحتها
قالت الأم
– خلي بالك من نفسك يا حبيبتي لغاية ميعاد الزيارة الجاي .. أنا عارفة إن الأيام دي هاتكون صعبة جدا عليكي .. بس إستحملي علشان خاطري .. انا واثقة انك بريئة .. بنتي مستحيل تقتل
و وضع الأب يده على يد زوجته و هو يقول
– قومي نمشي .. و خليها تتكلم مع شكري
ذهب الجميع .. و قالت علا للمحامي
– أنا ماقتلتش يا عمو شكري والله
– طب صارحيني أنا بكل حاجة .. لازم أعرف الحقيقة علشان أقدر أساعدك
قالت علا بعد لحظات صمت
– حاضر .. عايز تعرف إيه ؟
– إيه اللي جاب موبايلك و دبلتك مكان الجريمة
– حضرتك سمعت و أنا بقول لأميرة انها كانت مستلفة الدبلة
– طب و الموبايل
شردت علا للحظات ثم قالت
– علشان أعرفك إيه جاب الموبايل هناك .. لازم أفكرك بموضوع قديم شوية
– موضوع إيه ؟
******
(قبل عامين)
أنا مخنوقة قوي يا علا
قالتها أميرة وهي تفكر فيما حدث و هل تصارح صديقتها به أم الأفضل الصمت
ردت عليها علا و هي تضع يدها على كتفها قائلة
– يبقى لازمتي إيه في حياتك لو سيبتك مخنوقة .. فهميني الأول إيه اللي خانقك كده
ضمتها أميرة وقالت باكية
– أنا حياتي كلها كتاب مفتوح بالنسبة لك .. و أول مرة أكون مش قادرة أصارحك بحاجة
ضمتها علا أكثر لتطمئن ثم قالت
– في إيه يا حبيبتي بس؟
– هاتعرفي في الوقت المناسب
– لازم أفهم في إيه .. مالك يا أميرة .. من إمتى و إنتي بتخبي عليا
– الموضوع كبير و ممكن يحصل مشاكل بسببه
– إيه هو ؟ …… إتكلمي