رواية حياة فقير

حلقة (( 5 ))
قصة حقيقية
للكاتب محمد مالك

لايك قبل ما تقروو

مصطفي وقف وشد سليمان من تيشرته : انتا جبان معرفتش اطلع روحك من الحرام الله اعلم شن اديرو ف الاستراحة لكن اني عندي زايدة ناقصة متت الله يرحمني ورب الكون لما نطلعك من العفن الي انتا فيه

سليمان: نعاود نقولك متدخلش *

مصطفي: قول لحد غدوا اني مش واقف

سليمان: تلعب برواحنا يا خوي ؟؟

مصطفي: كلنا حنموتو مفيش حد حيعيش طول العمر يا نعيشو بكرامتنا ونظاف يا نموتو خير

طلعت من الشقة نزلت لوطا لقيت سيارة ايوب مهناش

ركبت سيارتي وكملت الخدمة الي عندي بسرعةة

___
سليمان قعمز يفكر حس انه ف مصيبة وخائف ع عيلته وقعد يقول ياريته ما كلمتهم ولا مشيتلهم كان قعدو بعاد عليا احسن

شاف لي تلفونه لقى مسج من ايوب

( الحقني الاستراحة )

مشى داره وخدى سلاحه ونزل

______
بعدها بساعتين **

امهم: نيروز خليك جنب الطنجرة يا بنتي
نيروز : حاضر

امهم مشت جهة دار فاتن وتسمع فيها تتكلم ف تلفون

فاتن: حاضر يا عيوني اصبر عليا يومين بس نلقا سبلة نهرب بيها من سليمان ونجيك

امهم ضربتها الصدمة وخشت الدار

امهم : تخوني ف سليمان يا قليلة التربية
فاتن نخلعت وجبدت تلفونها سكراته: من سمحلك تخشي داري
امهم : نخش وين ما نبي ونعفس ع رقبتك معاها وسليمان اليوم نقوله مرتك بتاع رجاله ومش قد الامانه
فاتن توترت ناضت ومشت وقفت قدام امهم : اطلعي برا داري
امهم: خزي مش متربية ولا خاطمة عليك مهم توا لما سليمان يعرف وخوك شوفي من يطلع من الحوش مرة وحدة مش من الدار

فاتن ركبها العصاب وكانت امهم واقفة قدامها
دفتها بيدها بقوة : اطلعي برا قتلك

امهم وخرت وطاحت ع راسها

نيروز ..طلعت من المطبخ بسررعة : حي ماما
مشت تجري
شدتها وحطت ايدها ورا راسها
نيروز ..دموع ينزلو سخان ع خدهاا : شن درتيلهااا شن درتيلهاا
نيروز وتعيط باعلي صوتها: كلمي مصطفي كلمي

فاتن ايدهاا ترعش طلعت فونها واتصلت بي مصطفي

__
مصطفي شاف للتلفون لقاه فاتن

فتح الخط

مصطفي: ان شاء الله خير ؟
فاتن ..نبرة صوتها ترعش : تعال بسرعة يا مصطفي تعال بسرعة
مصطفي: خيركك شن فيهه ؟
فاتن: امك
مصطفي..بصوت عالي : خيرهااا امي ؟
فاتن: امك بتموت
مصطفي رمي الفون ع الكرسي

مصطفي ويجري بسيارة قريب دار حادث ويقول صار بديت يا ايوب

__

نيروز حاطه يدي ع راسها من تالي لما حولتها لقيت ايدي دم زدت نبكي وندعي : يااارب ما يصيرلها حاجة يااارب

جي مصطفي بسرعة ركب يجري
فتح الباب وخش يجري

مصطفي..يدور ف الشقة وينادي : امي امي

فاتن: اهنى يا مصطفي

مشي لقي امه طايحه خداها في حضنه وطلع يجري بيها ولحقاته نيروز نزلت وراه

ركب السيارة ومشي بيها ع طول مستشفي

____
فاتن تبكي طلعت فونها واتصلت بسليمان

___

سليمان مقعمز معا ايوب شاف لي فونه دراه صامت

ايوب: والله ع خاطرك اني يا سليمان ع خاطرك
سليمان: بارك الله فيك ع راسي الي ادير فيه والله
ايوب: به توا نسكرو موضوع خوك مصطفي ونفتحو موضوع خدمتنا
سليمان: ايه عندك سيارات *
ايوب: يا عيني ثلاثة سيارات جيبهم الاستراحة
سليمان: خلاص اعطيني موقعهم ونوعهم وتوا نجيبهم الليلة
ايوب: ايه اهم شئ الدقة والخفة
سليمان: وين بترفعهم مصر ولا سودان ؟
ايوب: سودان الثلاثة مبيوعات وعندك 25 الف فيهم
سليمان: تمام نستاذن اني
ايوب: حنبة نظيفة نبو ومن غير مشاكل
سليمان: امتا خنبت وصار شى غلط
ايوب: هههههه هاده الي مصبرني عليك وشد خوك زين راه تلفون نقتله ويرموه في وداي الربيع
سليمان : لا خلاص مصطفي عندي موضوعه

طلع سليمان ركب سيارته

شاف لي تلفونه تفكر فاتن اتصلت بيه
اتصلت بيها

سليمان: ايوا
فاتن ..تبكي : تعال درت عمله كبيرررة
سليمان..فنص عيونه: عمله شن ؟
فاتن: تعال نحكيلك بسرعة قبل ما يرجع خوك
سليمان: جاي مسافة الطريق

____
مصطفي خش بيها المستشفي وخدوها الدكاترة

ومقعمز برا هوا ونيروز ويشوف لي يده كيف دم

مصطفي شاف لي نيروز : كيف طاحت ؟
نيروز ..تبكي بالعبرة وتشهق وهيا تتكلم : اني كنت ف المطبخ نسمع فيها تتعارك هيا وفاتن طلعت من المطبخ بنشوف لقيتها طايحه ع الارض وفاتن حاطه ايديها ع راسها
مصطفي حط ايديه ع راسه مش عارف شن يدير امه من جهة وخوه من جهة

___
فاطمة : لا طفح كيلي منه خلاص

حنان..اختها : فوتيه فقري وشن استفدى منه ولا حاجة غير حرق الدم

فاطمة: ايه عطه مرض حرقلي دمي وخلاص مشكلة حتا تلفون ايفون مستخصره فيا

حنان: قتلك اني يا خودى معبي يا انسى فقير ما عمركم ما حتستريحي معاه ولا تعيشي في سعادة

فاطمة: الله غالب هاده حظي

حنان: اتصلي بيه توا وقوليله معاش نبيك وفكيك منه مرة وحدة ودوريلك واحد يبندق عليك

فاطمه: هاده الي حيصير حسبي الله فيه اكيدة عنده غيري مش معاش يدورني هكي

حنان: تي اتصلي شن تستني يا بنت

فاطمه: اهو بنتصل هي

طلعت فونها وقعدت ترن عليه وهوا يسكر عليها

فوق من 10 مرات وهوا يسكر عليها

فاطمة: شوفي يسكر عليا مباش حتا يرد اكيدا الي يكلم فيها معاه

حنان: ابعتيله مسج وحطيه ف الحظر

فاطمة ايه هي شن نكتبله

حنان اني نقولك وانتي اكتبي

المسج : ( تم الي بينا كلنا يا مصطفي كل واحد في طريقه متمشيش معاملة هادي معاي واصلا حرام نكون معاك لحظة انسان متصلحش (وفقير معاها )
حسبي الله فيك

مصطفي كان مقعمز وراسه صداع وخائف علي امه وصله المسج
فتحه وشاف المسج وابتسم معا انه المسج جرحهه اكثر مما تتوقعو بس مدارش اي رد فعل ع الي قراه

____

سليمان : كيف ادفيهاا انتي كيف
فاتن..تبكي : والله ما كان قصدي قتلها هكي بشوية طول طاحت
سليمان؛ شن سبب المشكلة
فاتن..رفعت راسها بتوتر : لا بروحها خشتلي الدار قتلي نوضي ياسرك تلفونات وديما تكلمي ف صحباتك
سليمان: وطبعا انتي حرفه لسانك طويل
فاتن: هيا استفزتني والله …وتبكي
سليمان: اقسم بالله عليا العظيم امي تصيرلها حاجة ولا تموت لقدر الله لما نقتلك اصلا اني واخدك بسيف زايدة ناقصة عندي

وطلع وقربع الباب

فاتن حست بتهديدات سليمان جديات ومفيهمش اي بصارة

قعدت تفكر شن ادير ملقتش حل الا تكلم ايوب وتستنجد بيه

_____

سليمان طلع من الشقة ومشى اتصل بنيروز وخدي اسم المستشفي ومشالهم ع طول

سليمان: السلام عليكم
مصطفي..رفع راسه: وعليكم السلام
سليمان: شن حالها توا
مصطفي: يخيطولها ف الجرح ف راسها قالو خسرت دم بس حالها كويس باذن الله
سليمان: الحمد الله ليك يارب
مصطفي: شفت رزق الحرام شن يدير
سليمان: وشن علاقة رزق الحرام ف الموضوع
مصطفي: رزق الحرام يا خوي علاش يا خافو منه ترا
سليمان ..هز راسه بمعني شن ؟

مصطفي: يصرفو فيه ع المرض وتتالم ع الغالي بيهم يا خوي لو مقتنعتش انتا مش حتقدر تسيب الحرام تشوف فيه ساهل كيف تلقط فلوس حرام وصعب كيف تلقط فلوس حلال لكن شوف ف شن تصرفهم

سليمان: اني مربوط ربط وقت كنت محبوس كان معاي ايوب محبوس كانت في سرية صغار في العمر يجو كل خميس اهما مفيش حد سالم منهم في الليل يكسدو يبدو يضربو ف المساجين كليت منهم طرايح الله مهم ايوب كان صاحبي ومعاي في الحبس وكان عنده كلمه قبل ما يطلع بي اسبوع عرض عليا نتجوز اخته تشوف فيه عرض غريب ولااا من يعرض اخته عرضها لانه سمع انها خسرت شرفها وشافني غلبان وصغير ف العمر ومش بتاع مشاكل وناكل في طريحة كل خميس قالي تتجوزها وتستر عليها نطلعك من الحبس كنت بين خيارين يا نطلع ونتجوز حد غصب يا نقعد و ننضرب لن يفرجها ربي

مصطفي..حط ايده ع راسه : وبهه شن معنى تخدم معاه ف الحرام

سليمان: صارت مشاكل ع الخدمة هلبا وضغظو عليا لما خشيت معاش عرفت نطلع

مصطفي: تبيعو ف المخدرات ولا ؟

سليمان: لا نخنبو ف سيارات ونطلعو فيهم لي مصر وتونس وسودان ونبيعو فيهم دبل سعرهم

مصطفي: به سيب توا اوقف واني معاك

سليمان: اليوم اخر عملية باذن الله

مصطفي: وعد ؟

سليمان…شاف لي مصطفي: وعد
وحضنهه

طلع الدكتور

مصطفي: طمنا يا دكتور

دكتور : امكم حالها باهي خسرت دم لكن مش هلبا باذن الله غدوا تفيق من التخدير او في الليل امخر

سليمان: ربي يطمنك زي ما طمنتنا

مصطفي: اني ماشي مشوار وجاي رد بالك ع اختك

نزل مصطفي الدروج

وركب سيارته وشاف لي الايفون الي خداه لي فاطمة وابتسم

مشى قدام حوشهم
وخدى ورقة وقلم وكتب

الله غالب الفقير يخدم شهرين مش لقط حقه وفي الاخير طلع ما يصلحش بس هادي الدنيا جينا ولاد حلال مناكلوش ف الحرام وهاده الايفون بتاعك تبيديه بالهنئ ان شاء الله عرفت معدنك في نهاية القصة وبعدك من عليا ربي

ربط الورقة ع الايفون بيستيك

واتصل بيها

فاطمة: بي اي وجهه تتصل بيا مقريتش الرسالة ؟
مصطفي : قدام بابكم في حاجة خوديها ومعا سلامة

طلعت فاطمة شافت الايفون وقرت الورقة
وجعها ضميرها اول مرة وعرفت روحها خسرت حاجة غالية وصعب تلقا زيه ثاني

____

فاتن..حطت طاسه الشاهي قدام ايوب: هددني بيقتلني معاها
ايوب..يلعب بلحيته : هاده بدى يلعب
فاتن: اني دفيت امه بالغلط يا ايوب والله
ايوب: حتا لو مش بالغلط يسكرو فمهم ويسكتو مفروض
فاتن: شن بديرلهم هي بدات سليمان نسى روحه
ايوب: اصلا لو مش منك راه قاعد في الحبس جبتي مصيبة فوق راسنا
فاتن نزلت راسها
ايوب:هيا نوضي البسي امشي معاي
فاتن: وين ؟
ايوب: المستشفي لازم نديرو الواجب..وابتسم

فاتن ناضت لبست ونزلو

ساعة 9 في الليل

مصطفي ف مطعم ياخد في عشاء

وسليمان يوتي في روحه بيخنب السيارات

ونيروز مقعمز ف الدار معا امها

وفاتن وايوب كيف وصلو المستشفي

يتبع

(( ان شاء الله تكون طويلة وعجبتكم اعذروني يومين الي فاتو كان في ظروف وعندي قراية اعذروني ❤

وجهزو روحكم لي رواية المشتركة بعد هادي معا ميرو الشريف ❤