رواية حياة فقير

حلقة l 3 l
قصة حقيقية
للكاتب محمد مالك

لاااايك قبل ما تقراء ❤?

فاتن: متعبش روحك مش حتقدر ادير شئ *

تلفتت لي فاتن وتجمدت ف الحظه هادي معرفتش نقول حتا كلمة

طلعت فاتن من الدار واني كلامها يدور ف راسي منقدرش انديرله شئ ؟ ومتعبش روحك ؟

مر يوم واني شاد اسالتي ع سليمان
مر شهر
وسليمان طالع جاي ويروح في الليل امخر
مرو ثلاثة شهور واني كابت روحي شاد اسالتي نبي اجوبة لي هلبا حاجات
كنت مجمع مبلغ وزدت عليهم فلوس وخديت سليمان بنشري سيارة

رن تلفوني

مصطفي: الو
فاطمة: ايوا تغيرت يا مصطفي
مصطفي: بشوية ناس يقولو كيف الحال قبل
فاطمة: معقولة متتصلش بيا لن نتصل بيك اني ؟
مصطفي: سامحيني كان في شى شاغلني ولتوا شاغلني
فاطمة: اختي سارة خطيبها امس جابلها ايفون وباقة ورد واني الي قعدت هكي
مصطفي..حط ايده ع راسه : به فترة جاية نجيبلك ايفون
فاطمه: ايه تقول تجيبلي بعدين تجيبه صيني
مصطفي: اسمعي سكرى توا خير مش تحافظي ع كرامتك
فاطمه: به يا مصطفي توا تشوف

وسكرت الخط

نزلت من العمارة لقيت سليمان مولع سيارته يستنا فيا بنمشو سوق بوسليم سيارات

ركبت اني وياه

مصطفي: شن الجو
سليمان: الحمد الله اهو
مصطفي: توا ناخدو سيارة ونبدو نخدمو
سليمان : شن بتخدم ؟
مصطفي: موزع
سليمان: شن بتوزع ؟
مصطفي: قهوة عربية
سليمان: فيها مكسب ؟
مصطفي: اهو الحمد الله اطلع مصروف اليومي
سليمان: كم عندك فلوس سيارة ؟
مصطفي: علاش ؟
سليمان: مش نزيدك عليهم وتاخد حاجة مقومة
مصطفي: لالا صحيت سادات الي عندي

وصلنا السوق وخديت سيارة نظيفة

وروحنا

وطول الفترة هادي مفيش دوة بيني وبين فاتن
في سر وراها كبير ونقول كيف المراة هادي سبب طلوعه من الحبس شن ؟ ع خاطر متجوزتش وبتعنس ؟؟ بس البنت قنينة مستحيل في موضوع في سر وقلبي مش مرتاح لن نعرفه شن هوا *

طلع سليمان المغرب
شوية وطلعت وراه ع طول ركبت سيارتي ولعتها وقعدت نتبع فيه

امشيت وراه لحد تاجوراء البيفي
وقعدت وراه

وصلنا لي شارع عريض تراب كله مهم فيه استراحات في جنب بعض هلبا
وقف قدام وحده ونزل خش الاستراحه

اني درست بداية الشارع مش محدش يشوفني ولا يشك فيا

قعدت لساعة 12 ف الليل وسليمان مطلعش من الاستراحه

الشيطان وسوسلي بالك قتلوه وهلبا حاجات والمشكلة مفيش حتا دوشة هدوء تام

نزلت من سيارتي ومشيت لقدام باب الاستراحه
وقفت ع الرخامه الي برا ونشوف من فوق السور ف الاستراحة مفيش حركة قلت شكلهم داخل

ف الاول خفت وترددت اني نقز
نقزت ف الاستراحة

________

نيروز… اطبق ف الحوايج : ماما
امها: نعم يا بنتي
نيروز: خوي سليمان تصرفاته غريبة شوفي توا ساعة 12 ومروحش وحتا مصطفي لتوا اول مرة
امها: مصطفي نتصل بيه ميردش وسليمان قال بيعطل معا صحابه
نيروز: فيها شئ فاتن مش طبيعية
امها: حرام عليك المراة كويسة معانا ما خلت ما دارت اضم واطيب وتساعد وتهدرز ماشاء الله عليها
نيروز: صدقيني الا سوسة ومن تحت لي تحت وتوا تشوفي الايام توضحلك
امها: سكرى ع الموضوع وطبقي الحوايج وانتي تحبي القرمه كان كل حد يلها في عمره بس
نيروز: سكتت خلاص
امها: من الاول هكي مفروض

خشت عليهم فاتن
فاتن قعمزت جنب نيروز

فاتن: هاتي نساعدك
نيروز: لا كملو هما اصلا استريحي اليوم تعبتي معانا
فاتن: لا والله ما في تعب حوشي زي ما هوا حوشكم شن
امها: سلمها كنتنا الفالحة كنا نتقابلو ف ظروف احسن من هكي بس الحمد الله
فاتن : الله غالب
امها : احكيلنا كيف خداك سليمان
فاتن..اتفركست وتوترت : والله شن نقولك سليمان حلفني قالي اني حنقولهم القصة وانتي متحكيش شئ
نيروز: العفو شن متحكيش احكى احكى
فاتن: والله خائفة الا يزعل مني سليمان
نيروز: ع شن بيزعل العفو
امها: خلاص يا نيروز قتلك سليمان يبي يحكيلنا خليها
فاتن: تصبحو ع خير اني بنرقد
امها : قدامك كل خير ان شاء الله

طلعت فاتن من الدار

نيروز: هاا شن قتلك يا ماما مش في شئ وراها ؟؟
امها: أييه علينا توا شن بيسكتك
نيروز: عوج سليمان يبي يحكيلنا قتلك الكذابة هادي
اشبح شن داسه
امها..ناضت : ربي يهديك يا بنتي

يرن تلفون نيروز ردت عليه *

نيروز: الو فاطمة

فاطمة : ايوا نيروز سامحيني كان نوضتك عارفة متصله ف وقت متاخر

نيروز: لالا ولا يهمك كنت نايضة اصلا
فاطمة: بالله يا نيروز خوك يحب غيري

نيروز: لا علاش ؟

فاطمة: لانه معاش يدور فيا وكان منتصلش اني معاش يتصل بيا وبكرى قال سكري خير ما نطيحلك كرامتك

نيروز: مصطفي هكي مداير ؟

فاطمة: ايه مصطفي مستغربة فيه حتا اني

نيروز: صايرله ضغظ الفترة هادي اعذريه وتعرفيه يحبك وميقدرش يستغنا عليك وانتي نقصي عليه طلبات شوية

فاطمة: العفو طلبات شن والله ما نطلب في حاجة ولا عمري قتله جيبلي حاجة شن منعرفش ظروفه اني

نيروز: نعرفك يا فطو ماشاء الله عليك ف اعذريه المرة هادي راه يحبك مصطفي

فاطمة:لا نعرفها وحتا اني نحبه والله قلت نتصل بيك شوفيه خيره متغير وقوليلي كان نقدر نديرله حاجة

نيروز: حاضر يا فطومة توا نشوفه

فاطمة: صحيتي هي تصبحي ع خير

نيروز : قدامك كل خير

سكرت الخط نيروز

نيروز: شن ها الكنات النفاخات الي طحنا فيهم

__________
نقزت ف الاستراحة

وقعدت ندور ونشوف من الرواشن
في حد مقعمز معا سليمان راجل او اثنين مش واضح بس شن يديرو معرفتش الروشن مش واضح منه شئ

قعدت ندور ف الاستراحة كانت حاجة فخمة

شوية ونفتح الباب وشافني سليمان

سليمان جري جيهتي

سليمان: شن ادير اهنى … وملامح خوف ع وجهه

مصطفي: انتا شن ادير اهنى ؟

سليمان…شدني من ايدي ويجبد فيا بيطلعني : بسرعة تحرك بسررعة

…
يتبع

عارف قصيرة اكيد ?

للكاتب : محمد مالك