رواية الجثة الرابعه للكاتبة زهور جمال الدين
#الجثه_الرابعه
بقلم زهور جمال الدين?
?الحلقه الرابعه ?
–
العزى قايم .. ومنيرة لابسه جلابيه ووشاح .. وتشوف فى غزلان تدوى مع فوزيه
-فوزيه / الجن ينقسم لقسمين ..جن مسلم ..وجن كافر .. الكافر ينحرق لما تقرى القران والمسلم يخاف بس
-غزالان / قصدك انا ملبوسه
-فوزيه / لا ماقلتش هكى .. لكن انتى اللى يلاحقو فيك جنون .. ومدامهم شادينها وراك يبو منك حاجه
-غزلان / نقولك سر
-فوزيه / قولى
-غزلان/ ليلى حماتى ماتت بسببي ..
-فوزيه بخوف / نقصى صوتك يسمعوك .. والله تسمعك منيرة مايصير فيك طيب اليوم
-غزلان / باهى باهى ..
-فوزيه / كيف عرفتى انك انتى السبب
-غزلان / انا ندكر فاللى صارلى كله فى الدار بكرى .. وندكر انها قعدت تقولى وين الريحه اللى عطيناهالك …
-فوزيه / ايييه
-غزلان/ شنو ايه ..والليله اللى توفت فيها ليلى كانت عندى وعجبتها ريحه وقلتلها خوديها وبالفعل خدتها
-فوزيه/ لا حول ولا قوة الا بالله .. مبشر جابهالك الريحه
-غزلان / لاااا لما ورتهالى قلتلها انا منعرفهاش الريحه هادى ولما لقيتها عجبتها قلتلها خوديها
-فوزيه / شن اسمها الريحه
-غزلان / تقريبا دا فور
-فوزيه / يعنى الرابعه ?
-غزلان / ايه بالزبط …غير قوليلى شنهيا الفكرة اللى فكرتى فيها وكنتى تبى تقوليهولى
-فوزيه / جبتلك معاى رقيه واخدتها زمان من شيخ سعودى لما درت عمرة ..
وطلعت من شنطتها مق مصكر ….
-تأشر عليه/ حطيتلك شويه منها فى طاسه حليب وصبيتها فى المق .. وقريا عليها ايات معينات ن الدكر الحكيم .. ونبيك تشربيها ..الجن مستحيل يقربك بالرقيه هادى
-غزلان تبى اى شى يفكها ماللى هيا فيه / هاتى
فتحت فوزيه المق ومداته لى غزلان
ويجى هداكه الوطواط ينزل عليهم ايطيح طاسه الحليب ويدير فيهم حوسه النساوين كلهم انخلعو
__________________________
–
ومر اسبوع …..
غزلان قعدت فيه بسلام .. واللى يطلعولها خلوها فى حالها
والوفاة خفت..واتفقت مع فوزيه انهم يتلاقو بعد اتم الوفاة ويشوفو شن بيديرو ..اقاربهم البعاد كلهم روحو .. وحولو الخيمه وركبو لحوش ليلى … منيرة وغزلان لتوة ماروحوش قاعدين يتقبلو فى العزى
فى الصاله منيرة مقعمزة مع جارتها..اللى نتقلت من ثلاث سنوات للجنوب وتوة بالصدفه مروحه زايرة …
-منيرة / يمنى نادى امك قوليلها عمتى امال جارت عمتى منيرة تبى تعزيك
-يمنى/ باااهى يا عمتى اهو تو اناديها …
وبالفعل خشت يمنى للمطبخ تنادى فى امها / ماما قالتلك عمتى فى مراة تبى تسلم عليك
-غزلان طفت الغاز على براد الشاهى وتمسح فى ايديها/ اهو بنجى هى …
طلعت للصالة لقت امال جارت منيرة مقعمزة / اهلين امال
-امال تشبحلها معجبه/ اهلين غزلان ..سلامت راسك فى حماتك
-غزلان / يسلم راسك حبيبتى.. كيف حالك وحال صغارك…
-امال/ الحمدلله فخيار الخير تسلمى ..وكيف حال هنيدة بنت خالت ليهاوحشه
-غزلان / هنيدة مرت خوى .. كويسه الحمدلله ماشيه امورها هيا وعماد
-امال/ وشن عندها من صغار توا
-غزلان / عندها ولدين وبنيه
-امال/ماشاااءالله ياريتها حملت من خوى وعقبتله حتى بنيه
-غزلان / اهو ربي عطاها ..سبحان الله يشاء القدر ان خوك يتوفى بعد ماقعدت معاه خمس سنين وجرى بيها لكل مكان وماحملتش… ولما خدت خوى حملت من اول شهر
-امال / بالرغم زمان المشكلة عندها هيا وبعلم منيرة اهو تعرفنى وشاهدة على كل شى
-غزلان / لا عارفتها وحتى هيا معترفه تقول شورة هما الزوز ماكانوش يجيبو مع بعضهم
-امال/ سبحان الله نصيبات ..اهو ربى جابلها نصيبها مع خوك اللى كان 5 سنين رافض الزواج بعد مامرته وولده توفو فى هداكا الحادث
-غزلان/ نصيبات ..قد ماشدينا فيه زمان ياخد ماباش.. متأثر الحادث المشؤم اللى داره هوا وياهم ..هما ماتو وهوا قعد حى ولما قلتله على كنتكم واقف طول منغير اى اعتراض بالرغم مايعرفهاش
-امال/ ربي يوفقها انشاءالله
هدا كله ومنيرة ساكته
-غزلان لاحظت ان منيرة تكنطت من قعادها / نستادنكم توة … خلى نكمل شاهى الرجالة
-امال/ غير قعمزى شوى خيرك ..مننشدك قالتلك هنيدة بنت خالتى عالشقه اللى قلتلها عليها ايامات انتى ادورى
__________________________
–
فى حوش زينب صاحبة غزلان
-زينب/ اسمع بتمشى للجنوب رجلى على رجلك مانقعدش بروحى انا والصغار هنايا
-صلاح/ هيا حاجه بنجيبها وبنجى غير اتعبى فى روحك
-زينب/ مافيهاش تعب ..احنا نمشو بالطيارة ناخدو فندق ونقعدو فيه اتكمل انت موضوعك ونولو
-صلاح / انا مانبيكش تتعبى يا عمرى نمشى…
-قصت عليه / انت ليش ماتبينيش نمشى ..من رافع معاك
-صلاح/ اوووف علينا عاد ..تقعدى هكى طول عمرك شكاكه
-زينب/ كانا ماشفتكش بعيونى نقول شك والشيطان لعب بيا
-حضنها / حبيييي .. حركه ومشت فى حالها انسيها عاد
-دفاته / اسمع انت عارف علاش انا قاعدة معاك .. يكمل موضوعنا وكل حد يمشى فى طريقه
-صلاح / لا حول ولا قوة الا بالله..غلط اللى اديري فيه راهو
-زينب/ امالا نخليك تلعب بيا ونسكتلك
-صلاح / اوووووف علينا عاد .. انتى مش حترتاحى لين تخربيها على روحك
-زينب / انخربت وفات …
وخشت للممر مشت لدار صغارها تشوف فيهم
__________________________
–
فى شقه ليلى …
امال وغزلان قاعدين يهدرزو
-غزلان / نستادنكم توة … خلى نكمل شاهى الرجالة
-امال/ غير قعمزى شوى خيرك مستعجلة ..مننشدك قالتلك هنيدة بنت خالتى عالشقه اللى قلتلها عليها ايامات انتى ادورى
-منيرة وقفت / خلى نعطيهولهم انا ونجيبلكم هنايا
-غزلان / لا لا عادى اهو تو نمشى انا نكمله بسرعه
-منيرة بحزم/ لا لا عادى خليك
ومشت للمطبخ تبى تكمل شاهى التريس وتعطيهولهم
-غزلان استغربت / هنيدة مرت خوى .. لا لا ماقالتليش على شقه ..لكن احنا الحمدلله حصلنا شقه وساكنين لينا قريب نصكرو عام ..بالزبط عشرة شهور فيها توة
-اماال/ خسارة .. والله شقه ماهى عاديه وسط البلاد .. سوق السنابل جنبها خطوة
-غزلان استغربت / حتى انا سوق السنابل جنبى خطوة
-امال/ بلحقة …معناها نفس الجهه اللى قلت عليها لى مرت خوك …
-غزلان ركزت /عماراتنا لونين الشقه اللى قلتى عليها شن لون عمارتها
-امال / ابيض مختلطه بالاخضر
-غزلان / نفس جيهتى …هيا اما دور
-امال/ الدور الثانى
-غزلان ضحكت / سبحان الله نفس مواصفات شقتنا ..اكيدة نفس الجهه اللى احنا فيها
-امال/ شكلها مكتوبتلك مش بعيد تطلع نفس الشقه … وبالامارة عندهم بواب للعمارة واسمه غنوم
-غزلان / لا احنا البواب العمارة اسمه صالح ..معناها مش نفسها …
-امال/ صح معناها مش نفسها ..معناها بالتاكيد وحدة من العمارات اللى حواليها …. انتى من قالك عليها
-غزلان / قالتلى عليها غادة صاحبتى …
-امال / وتعرفتى عالجيران ودرتى صحبه ..نعرفك تحبى الهدرزة احرف منى ?
-غزلان / لا والله .. ماعنديش هلبا على خلطه الجيران مبشر ميحبش
-امال/ على حكايه جارتى كانو جيران عسل مع بعضهم .. وكانت عندها جارتها اسمها الهام هيا وياها زى الوخيات .. وغنوم بواب عمارتهم كان الى يبوه يجيبهولهم مرتحات 24 قراط
-غزلان / شفتى مش نفسها .. لان مافيش وحدة اسمها الهام فالعمارة نعرف اساميهم …لكن انتى منين لك المعلومات هادى كلها …انتى تعرفيها صاحبة الشقه
-امال / نعرفها ايه .. كانت جارتى تعرفنا لما انتقلت هيا وراجلها للجنوب …غير توة بعدو علينا شوى وسكنو فى منطقه ثانيه
-غزلان / انتى فى اما منطقه فالجنوب
-امال/ انا فى غدامس
-غزلان/ وصاحبتك
-امال/ فى غات
-غزلان / وكيف معرفتيش منها لمن باعوها
-امال/ هما باعوها لى سلفها تاجر عقارات ..وهوا اللى باعها بعد ماشراها منهم بي عشرة ايام.. وهيا مش فالابيض مع سلفها ولا تحب تجيب سيرته
-غزلان تشبحلها حست بحشمه ان مرت خوها فاتتها وماقالتلهاش فحبت تغطى / اهاا توة ادكرت .. ايه قالتلى هنيدة على شقه صح
-امال/ حتى انا حايرة علاش ماقالتلكش
-غزلان / توة بس ادكرت … لكن لما قالتلى وقتها خلاص كنا حصلنا الشقه هادى ……قتلك انتى لامتى قاعدين هنايا
-امال/ ممكن اسبوعين لان ابراهيم ما جاش معانا
-غزلان / اعطينى رقمك الارضى
فتحت امال شنطتها وطلعت بيرو ولقت ورقه قصت منها شوى وكتبت رقمها وعطاته لى غزلان
وقعدو كل مرة حد يخش موليين يهدرزو .. المغرب روحت امال … ودارو مبكبه للرجالة والصغار والنساوين اللى معاهم …ودارت غزلان صغارها وبتروح..اسبوع ليها توة .. وصغار ليلى قاعدة معاهم خالتهم بصغارها
__________________________
–
فى حوش غزلان ….
غزلان ومبشر راقدين فى دار النوم .. مبشر رقد وغزلان ماجاش لعينها النوم ….
وتخمم / انا ليش مش مريضه وطايحه زى الناس اللى يلتبسو .. زعما انا ملتبسه وساكن فيا جنى … لكن صحتى كويسه وبعقلى ..وفوزيه وينها لا حس ولا خبر
تلفتت لى مبشر حطت الغطا عليه بالكويس …
وحطت راسها عالمخدة بترقد لكن رجعلها للتخميم/ وهنيدة مرت خوى ليش ماقالتليش ع الشقه اللى قالتلها عليها امال
…او عالاقل استغربت لما شرينا شقه نفس الجيهه وسكنا فيها …كفت الخبر وسكتت عليه
وتخمم/ بالتاكيد وحدة من العمارت اللى جنبى هيا اللى تقصدها امال .. وبعدين انا لازم نستفسر من صالح البواب
فتحت عيونها / هما ليش معش جونى ولا زارونى الاشكال اللى كنت نشوف فيها
-مبشر قرب منها / قاعدة فايقه
عيطت غزلان
-مبشر/ خيرك اللطف
-غزلان / خلعتنى
-مد يده / تعالى حبيبتى ..
حضنها / ارقدى خلاص
-غزلان / قتلك منسألك
-مبشر مغمض عيونه / شنو
-غزلان / لما بعتت الكرواين والحاجات لى خيمه النساوين ..
فى واحد اسمه القزون بعتهم مصطفى معاه
-مبشر/ ايه خيره
-غزلان / اسمه غريب .. اول مرة نسمع بيه
-فتح عيونه وشبحلها /القزون هدا نفس الشخص اللى زوقنا شقتنا هادى بعد شريناها ماهو مصطفى مقاول ..وهوا يخدم عنده
انخلعت غزلان لاكن سكتت .. لانها بصراحة زيكم حاطه مبشر فى دائرة الشك وحاسه انه عنده يد فى الحكايه من يوم سأل ع الحنتيته
-غزلان / نبى نطلع منها الشقه
-مبشر/ حتى انا زيك …غير خلى نحصلو مشترى
-غزلان تشبحله بحزم / انا بنطلع الايام هادى انأجرو مابين درنا حل لى هالشقه اللى معش تبى تنباع
-ضمها ليه / حاضر زى مانبى غير خلى نكملو الوفاة
-غزلان / قصدك تاخد فيا على قد عقلى
-مبشر/ طبعا لا ..غير ارقدى توة وهالايام بندير حل انا
__________________________
–
وفات اسبوع ثانى ….
كملت الوفاة نهائي .. وقعدت عمتك مريم ام مصطفى مع صغار ولدها ترعاهم باعتبار بو مصطفى متوفى وماعندها شن شاغلها …وروحو منيرة وغزلان لحياشهم …
فى حوش غزلان …
جايينها صاحباتها خاطر سمعو بيها روحت لحوشها
مدتلهم طاسه شاهى …ومقعمزات يهدرزو
-هاجر/ والله موتت حماتك فاجعه .. عقاب الليل تلقينى نايضه من مكانى نمشى لدار صغارى نضمهم ليا ونرقد تقول حتى انا بنموت ونخليهم
-زينب/ بعيد السو عليك يا هاجر .. ربي يخليك لصغارك
-غادة/ لكن انتو معرفتوش شن جاها وشنو اللى خلاها تشنق روحها
-رباب/ اكيدة متخطيه …مستحيل وحدة بعقلها تحط الحبل على رقبتها وتقتل روحها
-غزلان / الله اعلم شن صار معاها ..وشن اللى خلاها ادير هكى …انا واجعينى غير صغيويرتها
-غادة/ اى والله يوجعو ..
-رباب/ خاطرى نعرف اللى بينك وبين منيرة حماتك لا جت على حالك ولا كلماتك طول الوفاة
-غزلان/ زمان لما خطبت هنيدة مرت خوى ماقلتلهاش.. ولانى نعرف ان امال جارة منيرة كانت حماتها كلمتها وسألتها عليها …شكرتها وتمينا الخطبه والفاتحه
-زينب/ باهى هدا مايزعلش
-غزلان / لما سمعت انى كلمت امال وساألتها عليها زعلت قالت كلمتى جارتى وفوتينى
-رباب/ وهيا شن دخلها تفوتيها ولا ماتفوتيهاش… امال هيا اللى كانت حماتها ومعاك حق تسأليها
– غزلان / ماهو عقليات ..قالت لا مفروض قالتلى بنكلم جارتك ومنشاورها ..
-غادة/ النمادج هادى فى كل مكان ..غضب بلا قدو
-غزلان / ليلى اختها عكسها تماما ..بل بالعكس عاركتها وقالتلها انتى اللى غالطه
شرين باب الحوش …
-غزلان / نستادنكم نشوف شكون …
وخشت لدار نومها بتاخد وشاح وبتفتح …
-غادة/ مدامه غزلان مش معانا .. شن رايكم يابنات نغيرولها جوها الايام هادى و نطلعو مع بعضنا رحلة لى اثار لبده او صبراته او اى مكان
-هاجر/ نمشو لى اثار صبراته ..ونقعدو فى فندق ايام ونمشو لهلبا مكانات صبراته محلاها
-رباب/ لا نمشو للخمس .. نقعدو فى فندق ونزورو زليتن والنقيزة .. وفى هلبا اماكن كويسه
-غادة / ماقلتيش رايك يا زينب
-زينب / احم م .. احنا المدة هادى ماشيين لبنغازى
“مابتش تقوللهم للجنوب”
-رباب/ وخيرك ماقلتيش …باهى خلاص نمشو مع بعض.. حتى بنغازى حلوة
-زينب/ انا الحق ماشيين سلفاتى ورجالاتنا مع بعض..هدا علاش ماقلتش
-هاجر/ ماشالله بديتى تتكلمى مع سلفتك سماح
-زينب/ انا شن عندى فيها .. اهو ماشيه زينى زيهم وخلاص
-غادة/ معاك حق صدقتى
اما عند الباب …
فتحت غزلان لقت صالح البواب
-مدلها زوز اكياس/ عطاهملى مبشر لوطا وقالى انركبهملك
-خدتهم منه / قتلك عمى صالح ..انت قداش ليك تشتغل فى العمارة هنايا
-صالح / انا جيت قبلكم بشهر ممكن
-غزلان / اهاا صار انت ماكنتش فى العمارة من زمان
-صالح / لا ليا سنه وشوى
-غزلان / امالا اللى كان قبلك شن اسمه
-صالح / اسمه غنوم
غزلان انصدمت طاحو منها الاكياس
-صالح / بسمالله
قامهم ومدهملها / صحيت
سكرت الباب وخشت وهيا ساكته ..بدت تربط فى الاحداث بى بعضها .. هادى نفس الشقه اللى قالو عليها لى هنيدة
..الحيرة ليش ماستغربتش لما جت تبارك بالشقه ..حتى لو متعرفش انها نفسها …كيف مستغربتش انى بالصدفه سكنت فى نفس الجهه ..وليش ماقالتش ان امال وصتها تقولى على نفس الجهه والعمارة
حطت براد الشاهى عالنار وتسمع فى الارضى يشرين
طلعت ردت لقت صلاح راجل زينب يتصل …
سلمت عليه وتلفتت/ زينب يبيك صلاح
جت زينب للتليفون ردت / باهى اهو تو نجى هى
وصكرت الخط ..
-زينب / يابنات بنروح
-غزلان والبنات / انشالله خير شن فى
-زينب/ عقبونى حماواتى وعزوزتى…. منقدرش نقعد الحق
-غادة / وااااك مالقو امتى يجو الا اليوم
-زينب تلبس فى وشاحها / الله غالب شن بندير هى
روحت زينب ودارت غزلان الشاهى ومداته للبنات
-رباب/ توة كنا نهدرزو يا غزلان ..اقترحت غادة قالت شن رايكم نطلعو مع بعضنا نديرو دورة نغيرو جونا
-غزلان / وين قصدكم
-غادة/ اى مكان نمشو للاثار او زردة او هكى المهم نطلعو مكان بعيد
-رباب/ ونباتو فيه ايام
-هاجر/ انا رائي نمشو لى اثار صبراته ..والله فيه جو ماهو عادى
-غزلان / انا عندى مكان عمرنا مامشيناله وكان نقول لى مبشر مستحيل يرفعنى ..لكن بالرفقه معاكم ممكن يوافق
-غادة/ وين قصدك
-غزلان / للجنوب
-رباب/ قصدك نمشو لى سبها
-غزلان وقفت / نمشو لى غات
وفى بالها تخمم/ لازم نقابل المراة صاحبة امال اللى كانت صاحبة الشقه لازم نوصلها ونستفسر منها لكن قبل مانمشى لازم نعرف شن قصه القزون ومنهوا وشن قصه غنوم
-هاجر/ فكرة حلوة ..ونمشو لى جبال اكاكوس تهبللل
-غادة تضحك/ ومنها نمشو لى كهف الجن
-رباب/ فكينا من البصارة البايخه عاد ما تخوفيناش
-غادة/ وراس امك فى كهف فى غات اسمه كهف الجن واللى يخش فيه ماعاد يطلع
-غزلان / خلاص متفقين عالمكان وكل وحدة تقول لى راجلها
البنات / تم ?
__________________________
تمت … ويتبع
القصه بتنتقل لى غات وجبال اكاكوس..نشوفو هل بيسلمو هما وصحابهم والا بتصير معاهم مقالب … وهل بتفيدها صاحبة الحوش الاولى ولا ماتعرف شى
وحنعرفو هلبا معلومات على غات وع جبل الجن الموجود فى جبال اكاكوس ?..
الحلقات الجايه اجمل وفيها كميه استرس اعلى ?
حلقه الليله بتنزل فى وقتها بعتالى الساعه 3 ونص او الاربعه هادى حلقه امس
ن ح ب ك م❤