رواية الجثة الرابعه للكاتبة زهور جمال الدين
#الجثة_الرابعة
بقلم زهور جمال الدين ?
?الحلقه الثانيه?
–
فى حوش مبشر ..
اتصلت ليلى وفهمت خوها ان المكالمه الى جت لحوش صاحب راجلها كانت كادبه …صكر المكالمه ..وادا بي غزلان تطلقها عيطه لين صغارها فاقو ونزلو يجرو من سرايرهم …
مشالها مبشر يجرى فتح الباب وخش يلقاها حاطه يديها على وجهها وتعيط وشباك الدار مفتوح
-مبشر / خيرك تعيطى حبيبتى …
-يمنى تبكى/ خيرك يا ماما
-غزلان / قطوسه سودا تهجمت عليا توة وخبشتلى رقبتى وترا شن حدفت وطلعت
-مبشر/ مافيك شى يا غزلان رقبتك مش مخبشع ..هادى تهيئات بس ..
وتلفت للغرفه / شوفى الدار مافيها شى ملوح
-غزلان / والله خبشتنى فى وجهى وفى رقبتى ولوحت حاجه بيدها ضربت السقف ونزلت ولما انا عيطت هربت
-حضنها / اشششش خلاص الصغار بيخافو
-تلفتت لصغارها / انتو ليش نضتو من النوم حبايبي
-عبدالبارى / أنتى تعيطى يا ماما
-نزلتلهم ضمتهم / لا ياماما .. اشششش ماتخافوش انا طلعلى فار خفت وعيطت
-يمنى/ مش قلتى قطوسه
-غزلان / غير تلخبطت ..بنقول فار قلت قطوسه ياماما
وضمتهم وقعدت تبكى
-خداهم مبشر من ايديهم / تعالو ارقدو هى مافى شى
وبالفعل خداهم ورفعهم لدارهم حطهم فى سرايرهم وخلى الباب مردود …ورجع لى دار النوم
-غزلان / نبى نخش اندوش
-مبشر/ حبيبي توة كنتى فالدوش
-غزلان / لا منخش ثانى ..نقولك قتوسه خبشتنى مش مصدقنى ولا شنو
-مبشر/ باهى خشى ودوشى عادى مافيهاش باس
طلعت غزلان من الدار خشت للدوش عالسريع دارت صبت اميه يادوبك نزلت الميه على شعرها ورقبتها وطلعت من البانيو مسحت بالفوطه ولفتها عليها وخشت للدار
لقت مبشر ماسك شنطه اليد متع العرس اللى روحت بيها
فاتحها وترا شنو يدور…ويشوف عالحيط ظل اسود ..متع حد واقف وراه تلفت مخلوع
__________________________
–
فى حوش ليلى
-ليلى/ ياودى الصغار رقدو ..خلينى ننزل نشوف المراة وكيف صار ومنو اللى دار فيهم المقلب البارد هدا
-مصطفى / البلاغ زى ماقلتلك طلع كادب والراجل روح لحوشه وممكن حتى رقدو .. وانتى تبى تنزلى توة
-ليلى/نبى نفهم انت منين عرفت ان البلاغ كادب
-مصطفى/ اول ماخشينا لقيت البواب وقالى ان فتحى كلمه عالارضى وقاله ان صار وصار ويخبرنى ان البلاغ طلع كادب
-ليلى/ ااه قصدك هدا علاش وقفت عليه قبل مانركبو
-مصطفى/ ايوووه فهمتى توة
-ليلى/ و حفيظه جارتى سامعه مالاول ..
-مصطفى/ خير بلاك متبيش تفهمى ..الراجل سمع بالبلاغ كادب كلم مرته وقاللها قبل مانوصلو خافنا نخلعوها .. وقال لبواب العمارة قول لمصطفى مايديرش شوشرة
-ليلى/ ياسبحان الله عليك يا حفيظه..تصدق لما خديت منها الصغار وجهها عادى لا خايف من المقلب اللى صار لراجلها ولا مخلوعه من الاتصال الكادب .. اخيه عليها
-مصطفى / تى ماهو قلتلك راجلها وقضها قبل مانوصلو
…اكيده خافت وفات …تى اهو كدبه وفاتت
-ليلى / نقولك الحق انا الحكايه ماختش راسى
-مصطفى/ اجعنها ماخشت .. نوضى ديريلى قهوة
-ليلى / قهوة فى هالليل ..امتى بترقد
-مصطفى / انتى مش بتورينى نوضى ….
-ليلى / باهى
وطلعت للصاله لقت البرسيان مفتوح / سبحان الله انا مهناش كل شى يقعد زى ماهو …خيرك ماصكرتش البرسيان
ومشت للبرسيان بتصكره …فتحت الشباك وتلاقى قطوسه سودا واقفه على شرفه الروشن …وتطلقها ليلى عيطه
-مصطفى طلع يجرى/ خيرك بتنوضى الصغار
-ليلى/ تى خيرك تعيط غير شفت قتوسه سودة
-مصطفى / تى شنو اول مرة تشوفيها ..صكرى البرسيان وتعالى انخمدى حتى القهوة بلاش منها
__________________________
–
فى دار نوم غزلان
مبشر شاف وراه ظل اسود تلفت مخلوع …يلقاها غزلان طالعه من الدوش وواقفه وراه
-غزلان / مبشر شن ادير فى شنطى
-منغير مايحس بنفسه/ وين الحنتيته …
قعدت تشبحله وهيا مرعوبه
-غزلان انخلعت / وانت من قالك عندى حنتيته
-قام الشنطه وهوا عارق/ ريحتها طالعه
-غزلان تشبحله / وكيف انا ماشميتهاش ..وبعتالى انت منين تعرف ريحتها
-مبشر / الحنتيته يخافو منها الشياطين..وامى كانت تبخر فيها كل خميس …
ومدلها الشنطه / شمى
خدت الشنطه وحطتها فى خشمها وتشم / صح فيهاريحه
-مشالها حضنها / هاا شفتى مش قلتلك ريحتها طالعه ..
-حط يدها عالفوطه الملفوفه عليها وفتحها طاحت عالوطا / ستاحشتك
-غزلان خافت منه نزلت قامت الفوطه وحطتها قدامها / حبيبي معليش تعبانه ونبى نرقد
-ضمها ليه بالقوة / وراجلك بتخليه
-دفاته / حول يا مبشر قلتلك تعبانه
بعد عليها وهوا مصدوم خيرها ..لان هالتصرف عمرها ما داراته …
قعمزت عالسرير حولت الفوطه ولبست روبها / سامحنى حبيبي منرقد
-مبشر/ باهى حتى انا منرقد …
رقدو الزوز عالسرير … هوا يخمم وهيا تخمم
-مبشر يخمم/ الموضوع معش ينسكت عليه
-مبشر يخمم/ الدم ملبز فى جسمها كله ..كنت نكدب فيها لكن بعد اللى سمعته بكرى بودانى وبعد اللى شفته عليها خلاص مستحيل نسكت
-وهيا تخمم / لازم نلاقى خالتى هنيه بأى طريقه .. هيا الوحيدة اللى تقدر تساعدنى .. مكشوف عليها … يااااربى يجيبك ليا خالتى
__________________________
–
فى الصبح …
فاقت غزلان قبل مبشر ….طلعت من دار النوم حست ان جسمها كله تعبان …مشت للمرايه اللى فى السقيفه شافت جسمها خاطر روبها مكشوف …تلاقى كدمات وضرب فى ايديها وكتافها …طول جو النساوين الثلاثه بين عيونها ..
مشت للصالة قعمزت عالصالون وهيا ترعش .. هدا شنو الضربات اللى فى جسمى ياحليلى… والنساوين الثلاثه بين عيونها كيف هيا تنقز وهما يشدو فيها ويضربو .. وادكرت كيف تقرا فى اية الكرسى
وتخمم فى خاطرها / يا ربي هدا حلم ولا علم …باهى لو كان حلم كيف يطع الضرب على جسمى حق …
وتخمم/ اول مرة نواجه الشى هدا بالقرآن …ديما نمشى لشيوخ الحضرة والكتايب تقول عليا ماتعلمتش ولا خشيت مدارس
حست بيد تمس فشعرها ..انخلعت وشهت ووقفت تلفتت وراها تلاقى مبشر واقف / خيرك حبيبي انخلعتى
-غزلان / لاااا شى ..خلعتنى لان الحوش هدوء
طلعت يمنى من دارهم / صباح الخير ماما ..صباح الخير بابا
-غزلان ومبشر/ صباحك ورد
-طلع عبدالبارى/ صباح الخير
-غزلان/ صباحك فل وياسمين حبيبي
مشالهم مبشر قامهم فى غمره/ لااااا انا بنغير هما صباحهم ورد وفل وانا تنخلعى لما تشوفينى
-غزلان تضحك/ نديرلكم الفطور
-يمنى / ديريلنا كورن فليكس
-غزلان / لا نديرو فطور قنين بما ان اليوم جمعه
وخشت للمطبخ بدير الفطور ….لحقتها يمنى قعمزت عالطاولة
-يمنى/ حقه ماما امبارح بابا يعيط يقولنا اسكتو واعقلو واحنا ماندوشوش …وبعتالى قعد يعيط ويقول انتو شكون
خش مبشر بياخد اميه ….
-يمنى/ ولقينا يرغاناتنا محوسه واحنا مش فالدار
قامت غزلان عيونها شبحت لى مبشر/ نوضى ماما امشى تفرجى مع خوك تو نجيبلكم الفطور غادى
-نزلت يمنى/ باهى …
تلفت مبشر فتح الثلاجه خدى شيشه اميه وبيطلع
-غزلان / يعنى ماحكيتليش
-مبشر/ شنو منحكيلك
-غزلان / صوت الدوشه اللى تسمع فيها
-مبشر/ دوشه فالمبارة وانا نشجع .. وبعتالى قعد نعيط عالفريق الثانى ونقوللهم انتو شكون ..ولا غير تبينى نخلعك
-غزلان/ بيش يكون فى علمك .. انا قررت نمشى لشيخ قران
-مبشر/ ترا فكينى من هالمواضيع .. تشوفى فى السيارات كل يوم تلم فى الزنادقه ..من قعد مستشيخ ..ولا تعرفى حد
-غزلان / بندور… ولما نحصل تو نبلغك
-مبشر/ باهى …
غزلان خش لقلبها الشك من راجلها مبشر ..بالرغم يانارى ماباش يحكيلها بيش ماتنخلعش زيادة…
كملت الفطور …. وشرين باب الحوش
__________________________
–
فتح مبشر الباب يلاقى اخته ليلى وراجلها مصطفى وصغارهم …
سلمو عليهم وخشو ….
-غزلان / حماتك بتحبك …وصلتو عالفطور طول
-ليلى حطت شنطتها / عارفتها تحبنى …
فطرو وكملو فطورهم ..وخشو غسلو الماعين ويهدرزو
-ليلى/ لا خافت ..لا قالت حليلى من يتسهوك على راجلى.. لاقالت من يفاول على سلفى ..مدتلى الصغار وهيا متبكمه
-غزلان/ عادى مرات راجلها قاللها ماتتكلميش فالموضوع
-ليلى/ معقولة يكلمها راجلها ويقوللها صار وصار..وانا ومصطفى كنا مع بعض وماتقوليش كلمه
-غزلان/ اهو حتى انتى متكلمتيش معناها الامر عادى
-ليلى/انا مصطفى قالى ماتخلعيش المراة واسكتى لين تسمع
-غزلان / امالا كيف عرفتى انها سامعه لما بعد خشيتو
-ليلى/ بعد ماركبنا قالى مصطفى ان البواب قاللها
-غزلان/ قصه غريبه
-ليلى/ امالا كانا نقولك الاغرب
-غزلان انتبهت/ شنو
-ليلى / طبعا هوا كان فى حوش سالم صاحبه اللى مرته صبحيه ماك تعرفيها …
-غزلان/ ايه نعرفها ماشالله عليها
-ليلى/ امبارح سكتنى ورقدنا ..لكن اليو لما شديت فيه لازم يكلم سالم صاحبه ويخليه يهزب الراجل اللى كلمهم ودار العملة.. قالى مش لازم نكلم سالم اهو انا زابط الرقم وتو نكلمه وبالفعل مشى كلمه ترا قولى شن قالى
-غزلان ترد فى طواسى العصير / شنو
-ليلى/ اتصل بالرقم بيهزبه لقاه غير مستعمل??!!!
طاحت الطاسه من يد غزلان تكصرت
-ليلى/ سمله عليك
-غزلان تقيم فالمرش / لااا عادى..لكن تو معقوله اتصال وردو وكلموهم ناس و بعتالى يطلع الرقم غير مستعمل .. وشن قال مصطفى
-ليلى/ تخيلى وبكل برود قالى غالب هدا اللى صار بتعرضى انتى توة ..
-غزلان/ باهى كلمتى صبحيه وفهمتى منها
-ليلى/ ماخلانيش انكلمها .. لكن بادن الله الليله كانا روحنا بكرى تو نكلمها ونفهم منها…وكانا متاخر تو نكلمها الصبح
–
مبشر ينادى من الصالة/ مزال
-غزلان/ لا لا كملنا هى
وتلفتت لى ليلى/ توة فكينا من هالسيرة وسقدى كان منطلعو
-ليلى/ قصدك حتى المرة هادى بنتغدو فى الاحياء البريه كرهناها ?? ..
-غزلان تضحك/ عندك مكان ثانى هاتى …
__________________________
–
كملو ضمان المطبخ
وخشت غزلان لدار نومها .. وخشت معاها ليلى حماتها ..
غزلان تغير فحوايجها ورا الباب ماتبيش حماتها تشبح الكدمات وليلى مقعمزة عالشكماجه وفى مجموعه روائح
-ليلى / ماشالله كل ريحه احلى من الثانيه …هادو اكيدة هدايا مبشر
-غزلان من ورا الباب/ ايه كلهم من مبشر ..كانا عجباتك وحدة فيهم هيا ليك
-ليلى طمعت/ بلحق
-غزلان / وراسك اللى عجباتك خوديها
-ليلى قامت شيشه عطر/ انا عجبتنى اهيا السماويه
-غزلان مستغربه / انا ماعنديش عطر لونه سماوى
-ليلى/ اهو مكتوب عليه بالانجليزى….اسمها دا فور ..شن معناها …
-غزلان تضحك / معناها الرابعه.. لكن ماندكرش ان عندى ريحه بالاسم هدا .. لكن مدامها عجباتك هيا ليك
-ليلى فرحت / سلم مرت خوى الغاليه
كملت غزلان وطلعت من ورا الباب بتمشى لى ليلى .. لقت ليلى واقفه لكن الوجه لعمتك هنيه
-غزلان انخلعت/ خالتى هنيه
-صوت ليلى ووجهه هنيه/ خيرك اللطف غزلان اوخيتى من هنيه اللى من امس تدوى عليها
ورجع وجه ليلى …
-غزلان / اعود بالله من الشيطان الرجيم ….
وطلعو من الدار …الصغار فرحانين بالزردة .. غزلان تلبس فى كندرتها ..وخشت بتجيب لصغارها ادجابوطواتهم …
ليلى اتفكرت هاديكه الشيشه متع العطر..وفى خاطرها / هيا قالتلى خوديها …غير احنا ارتبكنا لما جابت سيرة هاديكه المراة ونسينا …
وتخمم متحشمه/ توة هيا قالتلى خوديها …معناها ماتبيهاش ..
وتلفتت / خلى نخش نجيبها وخلاص ..
فتحت باب الدار وشدت العطر فى يدها وحطاته فى شنطتها وطلعت من الباب وتعثر فى الفرشه اتجى طايحه على طولها اطيح شنطتها وتتبعثر واطير شيشه العطر بعيد …
جى راجلها مصطفى يجرى وخوها مبشر قاموها …
-مصطفى/ خير بلاك تطايحى
-ليلى/ احيه راسى مافيا شى ..غير حولو خلونى نوقف وتلفتت لى بنتها امل / لمى الشنطه امولة
امل قايمه شنطه امها وتلم فيها ..شافت الريحه متلوحه بعيد مشتلها تجرى وحطتها فى شنطه امها ??
وطلعو وزردو والجو حلو
__________________________
–
فى حوش ليلى نفس الليله ….
دوشت ليلى لصغارها خاطر الزردة كلها رملة .. وخشت هيا دوشت.. ولبست روب عنابى ….
وخشت للدار لقت مصطفى راجلها متكى عالسرير وفاتح التلفزيون قدامه …
فتحت ليلى القجر…وطلعت شنطتها اللى كانت طالعه بيها ..
خدت منها شيشه الريحه ..وبختها بيها روحها انغسلت بيها غسل???….
وحولت طرف الروب الخارجى وجت قعمزت على سريرها وتمشط فى شعرها ..
قرب منها مصطفى/ شنو هالريحه الحلوة هادى طيرتى عقلى بيها …
وقرب من رقبتها ويشم ..وهيا تضحك وتتلوى
-ليلى/ هادى هديه ليا من خوى مبشر
-حط يده على سيور الروب ونزلهم / يسلم وخيها اللى لاهى بيها ويبيها ترتاح مع راجلها
-ليلى تدلع / مصطفى .. بالشوياااا عاد
ضمها ليه ورقدها فى جنبه ودلعها ❤
__________________________
–
ثانى يوم الصبح السبت ….
كان السبت عطلة ..وغزلان متعودة كل سبت تتلاقى مع صاحباتها متعين ايام الدراسه …
دارت مكياج خفيف ولبست سروال ادجين وتيشرت احمر ولمت شعرها ..ولبست فوقهم عبايتها ووشحاها ..
خدت مفتاح سيارة مبشر / حبيبي اهو خديت السيارة
-مبشر/ متعطليش .. تو نجيب غدى من برة
-غزلان / كيف بدير والسيارة معاى
-مبشر/ تو ندبر راسى ولا نقول لى صلاح يفوت عليا
-غزلان/ تمام .. اصلا انا بناخدها معاى زينب مرته
-مبشر ابتسملها / تمام
حطت يدها على فمها حدفتله بوسه / باى
-مبشر مبتسم/ باى ..
طلعت من الحوش نزلت من الدروج .. وطلعت من العمارة ولا حست ان فى وسط العمارة صارلها موقف ..كله امتسح من داكرتها ….
فاتت على حوش صلاح صاحبهم ..دارت كلاكس نزلت زينب وركبت السيارة سلمو على بعضهم …ومشو لحوش فاديه اللى كانت تقرا معاهم …
خشو لقو غزلان وزينب لقو رباب و غادة وهاجر ..سلمو على بعضهم وقعمزو يهدرزو …
جابت فاديه العصير والشوكولاته ..وقعدو يهدرزو قريب نص ساعه ….
وبعدها ناضت فاديه بدير النسكافه…فوقت غزلان بتعاونها
__________________________
–
فى المطبخ
-فاديه / كيف حال مبشر
-غزلان ضحكت/ ماهو سألتونى بكرى وقلتلكم كويس
-قربت منها فاديه/ شكلك مش عاجبنى حبيبتى ..دبلانه
-غزلان ?/ والله شن منقولك يا فاديه …انتى اقرب صديقه ليا ..صاحبتى من لما كنا فالاعدادى وتعرفينى مندسش عليك
-فاديه /وانا هدا علاش سألتك….انى عارفه انى اقرب صديقه ليك
-غزلان عيونها دمعو / انا ندور فى شيخ يعالج بالقران
-جتها فاديه حضنتها/ يااارووحى خيرك …علاش شيخ قران
-غزلان مسحت دموعها وابتعدت عن فاديه/ نقص صوتك تو يسمعونى البنات فى الصالة
-فاديه / باهى ليش..خيرك تحلمى
-غزلان لقتها فكرة/ ايوووووه بالزبط نحلم ونوض مخلوعه
-فاديه / خالتى عندها سلفها يعالج غير مايبيش يقول على روحه ..تو تشوفها ونرد عليك
-غزلان / اى وراس اوخيتى تشوفيهولى
-فاديه / حاضر ولا يهمك كونى هانيه…
وكملو النسكافيه .. وقصت غزلان الكيكه اللى رافعتها هيا .. وحطتها فى صحون .. وطلعو الصفر للصالة
يشربو ويهدرزو ويضحكو …شرين تليفون الارضى
ردت غادة / ايووة…يا اهلين .. انشالله خير شن فى..باااهى
.. حاااضر ….
وتلفتت لى غزلان/ يبيك مبشر
انخلعت غزلان وقف/ انشالله خير والصغار مافيهم شى
مشت تجرى خدت السماعه / نعم … اااه …شنقت روحها ..ووه عليا …
طاحت منها السماعه..وصار الهرج والمرج..ويسكتو فى غزلان
زينب مشت تجرى للسماعه/ انشالله خير يا مبشر شن فى
اااه …معقوله .. لا حول ولا قوة الا بالله
وغزلان تعيط وتخبط على وجها وصحباتها يشدو فيها / ووه على صغارها يا نارى
-رباب / نى منهيا خيرهم يازينب شن فى؟
-زينب حاطه ايديها على خدودها/ ليلى حماتها شنقت روحها
-غادة/ لا حول ولا قوة الا بالله ….
-زينب / نوضيها يارباب ولبسيها عبايتها معاى خلى نرفعوها لحوش حماتها
-هاجر تعيط/ ياودى صغار غزلان وين
-زينب/ والله مانغرف ماسألتش راجلها .. لكن دوشه جنبه شكله فى المستشفى
غزلان صايرة فيها حاله..صاحباتها قسمو روحها..ديل داروها وطارو بيها لحوش حماتها وديل خدو مفتاح حوشها ومشو جابو الصغار ولحقوها لحوش حماتها
__________________________
–
فى الوفاة ….
فى خيمه الرجالة …
-مصطفى يبكى/ والله مافقت بيها …. دارت اللى داراته وانا فى سابع نومه …ولما نضت الصبح طلعت من الدار نلقاها معلقه فى الممر
مبشر يسمع ويبكى بحرقه وساكت
-صلاح / انا لله وانا اليه لراجعون يا مبشر.. انت مؤمن وعارف ان هدا قضاء الله وقدره
-مبشر يبكى/ اختى ليلى .. المصليه اللى تقرا فى القران تشنق روحها…مستحيل..هدا قتل نفس يبي قوة جبارة
-جار مصطفى/ الاولين ايقولو متخطيه ..معناها مش بعقلها ولا تتحاشب عليه …
اما فى خيمه النساوين….
غزلان مقعمزة تبكى .. وصاحباتها حواليها …
جت حفيظه جارة ليلى قعمزت جنب غزلان تعزها من زمان ….
ومنيرة اخت ليلى مقعمزة من الخلف وتعيط/ يا حليلى.. اوخيتى .. قعدت لا ميما ولا وبي ولا وخيه
-فضيلة جارة امها/ سلامت خوك ومرت خوك وصغاره..شنو بتكفرى
-منيرة/ لا اله الا الله …ولا اعتراض لا حكم الله
فى كراسى غزلان وصاحباتها يحكو كيف لاقاها راجلها وكيف فاق وشبح للثريا لقاها مشنوقه …وكيف نزلها من الخيط اللى شانقه بيه روحها
وتبان صبحيه صاحبتها مرت سالم خاشه تبكى …عزت الكل ومن ضمنها غزلان .. وسلمت وكملت وقعمزت جنب غزلان وقعدو يبكو
-غزلان / والله امبارح فى سيرتكم انتو الزوز صبحيه وحفيظه
-صبحيه/ بالخير انشاءالله
-غزلان/ اكيدة بالخير.. حكتلى عالاتصال الكادب اللى جاكم يا صبحيه اول امس لما مصطفى وجماعه راجلك عندكم وقالولكمسلف حفيظه توفى
-صبحيه تلفتت لى حفيظه / امتى صار هدا!!!
-حفيظه/ منك نسمع يا وخيتى
-صبحيه/ لا جانا اتصال ولا شى
-رباب انتبهت/ بالك صار لبس فالموضوع
-غزلان حمقت حستهم يكدبو فيها / لا مفيش لبس.. ليلى قالتلى ان جى اتصال فى حوش سالم صاحب مصطفى وفزعوهم وقالو لى فتحى خوك دار حادث
-حفيظه/ بالنسبه لى فتحى ما عنداش علم بالموضوع
-صبحيه/ ولا سالم حكالى حاجه زى هادى
غزلان قعدت ساكته ومتبلكمه …امالا ليش مصطفى جى يجرى روح بيهم من العرس يومها
وتسمع فى منيرة تعيط/ علاش تجى في اختى ليش
وغزلان تخمم/ وليش منيرة ما جتش للعرس ليلتها طول عمرها عزوزتها تجيها وتطبع ما دورش فيها …
وتخمم/ مبشر من قاله ع الحنتيته …الدايرة فى دماغى فيها ثلاثه توة مبشر ومصطفى ومنيرة…
حفيظه توشوش لى صبحيه/ فتحى راجلى لحقه طول لما رفعها …قالو فيها نفس شوى ..لحق عليها فى اخر لحظه .. وهيا تنادى وخلاص
غزلان انتبهت لكلامهم
-صبحيه / تنادى فى امها
-حفيظه / لاااا قالو تنادى فى وحدة اسمها هنيه …وهيا فى كلمه ياااهنيه تعالى
وقفت غزلان مرعوبه / خالتى هنيه!!!!!
__________________________
تمت ….ويتبع
زعما خيرها غزلان وشن يبو منها.. معقولة يكون راجلها دايرلها هكى..لااا ياودى.. امالا راجل حماتها ..عقلى داخ معش زبطت ..
عموما اليوم طلعو شخصيات جديدة اليوم .. وحيكون ليهم دور كبير فى الحلقات القادمه …زعما بنشكو فيهم حتى هما ولا كيف !! والقزون مزال بيطلع ولا تم دوره .. وعليوة اللى شاد البندير يصحن فيه ولا شنو
اليوم نقصنا العيار شوى ..لكن شدو روحكم فالحلقه الجايه
انشالله غير عجبتكم القصه وسامحونى عالتأخير
#تعديل/ لو سمحتو عبرولى عن مستوى الحلقه وتوقعاتكم منو زعما داير فيها هكى
نحبكككككم ❤