حكاية فاطمة للكاتبة زهور جمال الدين
#حكاية_فاطمة
?بقلم زهور جمال الدين ?
? الحلقه الرابعه ?
طقتقت فاطمة على شقه سعاد
مهناك حد رد عليها …
ولت من الممر بتخش للشقه متاعها وبتعطى حكامها لربي
لقت شاب زى القمر واقف قدام الشقه
انصدمت هدا منو لانها معرفتاش
لكن هوا زبطها بحجابها
-مراد : وين كنتى
-فاطمه : انت منو
-مراد : انا مراد
-فاطمه: ???
وخشو شقتهم
وسكرو الباب
خشو للصالة ….
-مراد مد يده سلم عليه : انتى فاطمه ?
ونزل باس على خدودها بوسه من اليمين وبوسه ماليسار
-مراد: الحمدالله على سلامتك
وفاطمه متحشمه من بوساته ??
وقعمزو عالصالون
-مراد بكل رزن : نورتى حوشك
يابنات البنيه دابت فيه وفى جماله وفى اسلوبه
” تى كانا انا وياكم نتخايلو فيه بس ودوبنا امالا هيا كيف ??”
وساكته عمتك فاطمه ماقالتش كلمه
هيا فى خاطرها بتلوم بتقوله وينك يومين
لكن رزنت وسكتت .. الليله دخولها وماتبيش حاجه تعكر الموضوع
اتكى مراد عالصالون …
-فاطمة: نديرلك فطور
-مراد: لا لا نبى نرقد شوى تعبان وغمض عيونه
غصتها فاطمه وسكتت كيف فاتها ..
وتتفرج عليه وهوا راقد
وفى خاطرها
فرحانه ان هدا راجلها ..زين وشخصيه
ولكن فى نفس الوقت حايرة فيه كيف بارد هكى
ناضت خشت للمطبخ .. ونوت انها اطيبله حاجه ليبيه
هيا اليومين اللى قعدتهم فالحوش تاكل فى الطن والجبنه
وشايفه عنده فالدولاب طنجرة وكسكاس صغيرات
لقت بصل وبطاطا وطماطم فالثلاجه
المهم دورت وطلعت لين حصلت حاجات رز مسقى
وطيباته …
ناض مراد من النوم العشيه …
غسل وجهه ..
وهيا لبست جلابيه قنينه وتكمت شعرها …
وجابتله الرز …
هوا تفاجأ ليه سنوات عاد عالاكل الليبي
كلاه وعجبه وشكرها
وغير حوايجه وطلع …
وهيا مستغربه ومصدومه.. لا مسها لا دورها ولا دار اى حركه …
وهوا طبعا كان ناوى انه لا يمسها ولا يعاملها كويس
لكن المعاملة طبيعه وميقدرش يتصنعها
مقدرش مايعاملهاش كويس .. لان طبيعته هكى تعاملاته مع الناس
المهم فاطمه تخمم …بنات زمان مش زى بنات توة
بنات زمان اهم حاجه عندها انها تتهنى ..
وتكلم اماليها وتقوللهم تهنيت
وهوا ولااااا حاس بيها
__________________________
قررت فاطمه انها تجهز نفسها لراجلها بيش لما يروح تعجبه ويخش عليها
المهم لبست فاطمه هداكه الروب الساتان جماعت مواليد السبعينات كلكم تعرفوه ?
وتكمت شعرها .. طالعه زى القمر
روح مراد الساعه 11 فالليل …
لقاها متكيه عالصالون وواخدها النوم ..
روبها موخر شوى فخادها باينات نصهم وشعرها مفتوح ووجها زى الملايكه
خش بالشوى مدارش صوت
لقاها عالصالون عجباته وقعد يشبحلها …
قرب من المكان اللى هيا فيه ..قرب يديه على فخادها ومسهم
وتنوض هيا مخلوعه
وبدت تنزل فى هداكه الروب بايديها ومتحشمه
-مراد مبتسم: خيرك انخلعتى
-فاطمه : لا شى
ناض من مكانه وقعمز جنبها ..حط ايده على شعرها
-مراد: انا راجلك متحشمه منى
-فاطمه باستحياء وصوت واطى : لاااا من قالك متحشمه
-مراد: امالا خيرك ترعشى
-فاطمه: لاااا منرعشش عادى
-مراد : باهى خيرنا قاعدين هنايا .. تعالى نخشو دار النوم
-فاطمه ترعش مع بعضها: باهى
وخشو دار النوم .. وكانت اجمل ليله فى حياة فاطمة
البنت بدت تحبه بكل قوة واندفاع
وهوا الولد شاطر … وفالح فى المعاملة مع النساء..
دلعها دلع عالسرير ماعمرها تخايلاته ولا توقعاته
عطاته نفسها بكل رضا .. خش عليها وتهنت
ورقدت فى حضنه للصبح
______________________
ناضت فاطمه الصبح الساعه عشرة .. لقت مراد قاعد راقد فى جنبها ..
تشبحله وهيا مبتسمه وفرحانه بيه
-فاطمه: استغفر الله العظيم ..اول مرة يفوتنى الفجر
وناضت خشت للحمام اغتسلت ..
وطلعت للصالة صلت …
وخشت للمطبخ دارت الفطور
وخشت للدار بكل دلع تنوض فيه
-فاطمه متحشمه من اللى صار امبارح? : اسمع
نوض كان بتفطر
مردش عليها ..
-فاطمه: بتنوض توة ولا مازلت
-مراد يعيط : اووووووووف خير امك اتنوضى فيا عالصبح ..
بري تسمسمى بروحك مدورينيش انا خلينى راقد
فاطمه انصدمت .. تحسابه بينوض وبيدلعها
طلعت وعيونها معبيات دموع وقعمزت فالصاله
وحتى الفطور ماصارش منه
قعد مراد للعصر وهوا راقد …
بعد العصر ناض ..طلع من دار النوم
-مراد: صباح الخير
-فاطمه بزعل : صباح النور
مدورهاش .. خش للحمام دوش وطلع لبس حوايجه بيطلع
-مراد: مفيش فطور
-فاطمه بهدوء : هى دقيقه اهو تو نجيبهولك
وخشت للمطبخ
لحقها مراد
-مراد : خيرك
-فاطمه: لاااا مافى شى
-مراد: نوضتينى وعيطت عليك
فاطمه سكتت
-مراد : اسمعى انا راهو اللى ايجى ينوضنى نعيط عليه منغير منحس
طبيعتى هكى…
نبدا مش فايق ومنندريش على روحى ..
بس لما نديرها لصحابى يعاودولى يقولولى هكى درت وهكى درت
-فاطمة: ولما عيطت عليا بكرى فايق
-مراد: والله ماندكر انى عيطت عليك.. بس مدامك زعلانه قلت اكيدة هكى صار
-فاطمة : حصل خير
السفرة واتيه فيها دحى وشاهى وجبنه وخبزة .. خدتها و طلعت بيها للصاله .. ولحقها مراد
وبدى يفطر وهيا تشبحله
-مراد : فطرتى
-فاطمة : لا لا
-مراد: باهى مدى يدك افطرى
لما كلمها كويس .. حست كأنه طيبلها خاطرها ..
ونست الزعلة نهائي .. وبدت تاكل معاه
-فاطمه: مالاحظتكش صليت
-مراد قام راسه شبحلها : نعم نعم !!… وانتى شن دخلك
-فاطمه : اولا انا سألتك بس .. ثانيا كيف شن دخلى انا مرتك
-مراد بعصبيه: اسمعى انا شؤونى الخاصه منحبش من يدخل فيها فهمتى ولا مزال
-فاطمه : فهمت غير متعصبش روحك.. انا قصدى الصلاة عماد الدين والمفروض انت …..
وقبل ماتكمل هيا كلامها
-مراد: انتى الباين عليك متفهميش من كلمه
وياخد مراد هاديكا السفرة ويقلبها ..يجيبها الفوقى لوطى …
وناض طلع من الشقه …
فاطمه مقعمزة مصدومه… شن صار لهدا كله .. هوا نقاش عادى
ناضت زيها زى الفالحه نضفت هداكه المكان كله وهيا تبكى …
وجى الليل …
اهو يروح ..اهو يروح …وهوا لا حس ولا خبر
باتت بروحها مرة ثانية
ماخشتش دار النوم .. رقدت برة فالصالة …
الفجر ناضت صلت ..
واوقات الصلاة تحسب فيهم هيا بروحها بالساعه
مالقتش من تسأل على مواعيد الادن وكيف تعرفه
المهم صلت وبكت ودعت ربي انه يشبح في حالها ..وهيا مافاهما شى ..
وولت رقدت فمكانها عالصالون
________________________
ثانى يوم الضهر ..
انفتح باب الشقه …خش مراد
لقاها متكيه عالصالون
-مراد : السلام عليكم
-فاطمه حايرة فى هدوءه: وعليكم السلام
-مراد مبتسم: شنو مفيش غدى ليبي
فاطمه سكتت …
جى قعمز فى جنبها: تى مشى امورك يا فطومه
نتعاركو وثانى يوم نتصالحو وتمشى الامور
وهيا تشبح لرقبته ..
فى بدايتها عالليمين دويرة زرقا
عرفت انه كان بايت مع وحدة ..
خش للحمام دوش
وهيا فالمطبخ اطيب فالغدى … ومصدومه .. وافكار ترفعها وافكار اتجيبها
زعما حق كان مع مراءة …
كيف ادير .. تواجهه ..ولا تسكت …تى هيا عروسه من اول يوم اطيح فالخيانه
دارت بازيليا .. وجابت حطتها فالصالة
وجى مراد وبدى ياكل
-مراد : الله الله على نفسك فالاكل ..
اسمعى وتى روحك بيش تنزلى معاى توة نوريك السوبرماركت وينه
انزلى خودى اللى يعجبك للمطبخ .. وسجلى على اسمى تلقينى داير عنده حساب
فاطمه لا عرفت تفرح ولا عرفت تزعل
وهيا عينها على هاديكا الدويرة الزرقا فى رقبته
وبالفعل لبست حجابها ونزلت معاه للسوبر ماركت
لقت المتغطيه والعريانه فالطريق
وصلو للسوبر ماركت ووراها اماكن كل حاجه بروحها
وقاللها ان هدا السوبر ماركت الوحيد فالجهه اللى
فيه لحم خروف ودجاج مدبوح حلال
وشرو حاجات وروحو للشقه
وصلها للشقه
-مراد: تبى حاجه انا طالع
-فاطمه صوتها مخنوق: بتبات برة الليله ولا بتروح
-مراد مبتسم ?: لا تو نروح ..
-فاطمه تشجعت : انت وين بايت امبارح
-مراد : قلتلك معش تسالى
-فاطمه : كنت بايت مع مراءة ولا
-مراد يضحك: يا والله فاطمه ..وكيف عرفتى
-فاطمه: يعنى حق الكلام
-مراد : اسمعى هادو صاحباتى ومعارفى من قبل ماتجى انتى …
عجبك مرحبتين …ماعجبكش بالسلامه
الطريق اللى جاباتك تردك ..والتداكر والسفرة كلها على حسابى لين توصلى لحوشكم
-فاطمه قامت يدها : ومدامك صايع ليش باعت لاهلك وتقوللهم ابعتولى مراءة..
مدامة عندك اكثر من صاحبة وادير فالحرام.. ليش ادور فالحلال
-مراد عيونه حمر: ماشالله صار عندك لسان تبانى هادية ..
وبعدين من كدب عليك وقالك انى بعتلهم نبى مراءة …
هما الل خطبوك وبعتوك راهو منهم ليهم
-فاطمه تبكى :و ليش زلبحتونى حسبيا الله فيكم
رعش مراد من كلمت حسبيا الله
وهجم عليها شدها من كتافها : الكلمه هادى اخرلك مرة تقوليها فاهمه
ودفها عالصالون ..هيا اقعدى فيها بروحك …
وطلع من الحوش
_________________
خلاص هنايا فاطمة اصطدمت بواقع الحياة
وعرفت انه مقلب وكلاته
وتوة عرفت شن معناها لما قاللها عمها يحيى نوصيك بالصبر
قعمزت عالصالون تفكر …
معقولة توة جيت توة بنروح لليبيا..
الناس شن بتقول …وامى وبوى شن بيصير فيهم
وتزيد تفكر .. باهى معقولة نرضا بالدل ..
معقولة نرضا بالراجل اللى يبات برة ويمشى يدير فالحرام مع النساوين
وحتى الصلاة ميصليش
مسكينه راسها داخ من التفكير …
وقررت حاليا تسكت ومعش تناقشه ..لين ايدير الله طريق
ولييل الليل .. وروح مراد
وفاطمه مقعمزة فالصاله …
خش قعمز عالكرسى وهوا مش شاد روحه يتمايل غادى وجاى
تاريته سكران .. وهيا طبعا زبطاته من حركاته ومن صنته
-مراد: فطومه تعالى جنبى
-فاطمه ناضت وبتخش لدارها : بالله فكنى
شدلها يدها : تعالى
فكت فاطمه يدها : حول يدك
وجى هاجم عليها يبي يبوسها
وقفت دفاته بكل مايجبب جهدها..جى طايح عالصالون ..
-فاطمه: نتحمل منك كل شى ..الا نعاشرك وانت سكران ..
وخشت تجرى لدارها وسكرت بالمفتاح
وهوا يتمايل لحقاها ..لقى الباب مسكر بالمفتاح …
قعد يطقطق وهوا مفيشى قوة بكل
-مراد: افتحى حبي .. افتحى خيرك
وقعمز قدام الباب ومشى فالنوم
وفاطمه مقعمزة فسريرها وتبكى..ياشينك مقلب طاحت فيه
ولما ناضت الفجر تبى تتوضا وتصلى …
فتحت باب الدار بيش تمشى للحمام ..
لقاته ممدود قدام الباب راقد عالزليز
سخفها ..قعدت تنوض فيه وقاماته مشى على رجليه رقداته عالسرير وغطاته
وطلعت وسكرت الباب
وصلت الفجر ..وقعمزت تدعى وتبكى
فى فكرها تبى تدعى عليه من غيضها
لكن لما بدت تدعى لقت لسانها يقول فكلام ثانى …
لقت روحها تقول ..ياااارب اهدى زوجى..ياااارب اهدى زوجى …
وهيا شادة الدعاء هدا وتستغفر
ناض مراد العصر من النوم لقاها فالصاله
-مراد: صباح الخير
-فاطمه منغير ماتشبحله: صباح النور
-مراد: امتى روحت انا امبارح
-فاطمه: مش عارفه نضت الصبح لقيتك جنبى عالسرير
مراد مدكر اللى صار ..لكن تحشم من فعله فدار الحولة ودار نفسه مش مدكر ..
وانصدم من جوابها ليش ردت هكى ومادارتش مشكلة
وفاطمه فرحت انه مش مدكر وقالت خلى انلف الموضوع على خاطر كرامتى
هوا خش للحمام يدوش ..وهيا خشت للمطبخ تسخن فالغدا
هوا حاير فى تصرفها ..
وهيا حايرة فى هدوءه وكلامه بحنيه معاها تقول مش نفس الشخص متع امبارح
طلع مراد مالحمام لقاها مطيبه كسكسى
-مراد اتفاجأ : الله كسكسى … وين لقيتيه
-فاطمه : طلعت بكرى شريت كيسه سميد .. وبرمت طاستين بروحى
-مراد ياكل: ماشاء الله يسلمو يدياتك قداش ليا بطنى ماخش فيها شى مقوم
وشبحلها : كولى خيرك
-فاطمه: تو ناكل
-مراد: اسف عاللى صار امبارح
-فاطمه: يعنى مدكر
-مراد : من دخلنى لدار النوم
-فاطمه : انا
سكت مراد وكمل اكله …
والمرة هادى قعد فالحوش ومطلعش ..
وخشت فاطمه تغسل فالماعين .. هما ينغسلو فى عشرة دقايق ..
تضربها فاطمه نص ساعه فالمطبخ وهيا زعميتا اضم
مش قادرة تقعمز معاه
جى مراد وقف على باب المطبخ
-مراد: بنطلع تبى شى
-فاطمه : نبى نكلم اهلى
-مراد: كود امريكا مسكر على ليبيا اصلا .. فكيف بتحصليهم …
سكتت فاطمه
-مراد: اسمعى انتى واضح انك بنية كويسه ..وبنت ناس ..لكن انا منصلحش بيك
- فاطمه متلفتة للحوض : عارفه
انصدم مراد بالجراءة اللى عندها ..
وطلع مراد من الحوش …
لقى صحابه يراجو فيه تحت العمارة
-منير : وين نمشو .. نبى نتغدا
-مراد ضرب بطنه : كانا نقوللكم شن متغدى
-منير : شنو
-مراد: ضاربها بالكسكسى منحكيلكمش
-طارق: اووووو كسكسى غدوة نبو منه مدخلناش فيك
-مراد: يا سلام .. غدوة غداكم عندى كسكسى باللحم
وطلعو ودارو دورتهم
وروح مراد فالليل فايق صافى لا سكران لا شى
وحكالها ان صحابه الزوز ليبيين بيجو غدوة يتغدو عنده كسكسى
وافقت فاطمه وقالتله غدوة ننزل انجيب لحم ونطيبلكم
وناضت خشت دار النوم بترقد
خش وراها مراد …
ورقد جنبها فالسرير
وحضنها ..وبدى يبوس فيها بدون مقدمات
هيا مارفضتش ..بس مرحبتش
-مراد: خيرك
-فاطمه : شى
-مراد: وبعتالى تقوليلى كيف تمشى للاجنبيات ولا
-فاطمه : انا مامنعتكش عن شى
-مراد: نرقد معاك وانتى ماتبينيش ..والله مايكتبها عليا الزمان
-فاطمه : قلتلك انا مامنعتك على شى
-ناض مراد من السرير: لعلمك انا النساوين يتعاركو عليا عراك..
والف وحدة تتمنى انها تكون تحتى
-فاطمه بكل جراءة: الا انا
شبحلها مراد : معش نبدا راجل كان مزال نقربك
وطلع من الغرفه …
رقد فالصاله …
ثانى يوم نزلت فاطمه مع العشرة بيش تجيب اللحم
مشت شراته وروحت …
وهيا مروحه فتحت باب الاسانسير وخشت فيه
كيف بيتسكر الاسانسير
وقفه راجل بيده وركب معاها
راجل فالخمسينات مهندم ولابس قرواطه
شبحلها عرفها عربيه ..فكلمها بالعربي
-زهير : اما طابق
-فاطمه : الطابق الرابع
-زهير: ليبيه
-فاطمه : ايه
-زهير مصدوم : ماتقولليليش مرت مراد
-فاطمه: ايه مرت مراد
-زهير : عييت وانا ندور فى رقم بوك نبى نكلمه ومقدرتش نوصله
فاطمه تشبحله وحايرة فالكلام اللى يقول فيه
ضغط زهير رقم الطابق 4 ورقم الطابق 9
وتلفتلها : انا اللى بعتت الصور لبو مراد
-فاطمه : اى صور
-زهير: صوره وهوا صايع فى بلاد الاجانب وقلت لبوه الحق ولدك ..
عرفت فاطمه ان اهل مراد عارفين ولدهم صايع ومع هدا زلبحوها
-زهير: ونفس المرسال اللى بعتت معاه الصور
هوا اللى قالى ان بوه خطبله وبيبعتله مراءة هنايا
انفتح باب الاسانسير لانه وصل الطابق الرابع
وطلعت منه فاطمه وطلع معاها زهير وشاد باب الاسانسير بيده بيش مايتسكرش
-زهير: لكن المرسال فات فيه روح لامريكا وقعدنا نكلمو فى ناس فى ليبيا بيش يوصلولكم ويحدروكم ..
لكن مالقولكمش عنوان ..ومزبطناش منين خدوله
وانفتح باب شقه فاطمه
وطلع منها مراد
شبحله زهير شبحت كره
وخش للاسانسير وسكره
ومشت فاطمه للشقه
-مراد: شن كان يقولك
-فاطمه : رحب بيا لما عرف انى ليبيه
-مراد ضغط على يدها اليمين: متزلبحينيش ..شن كان يقولك المسخ هدا نعرفه يكرهنى
-فاطمه: قلتلك قالى انه ليبي ولو نبى اى حاجه نكلمهم هوا ومرته
-مراد: تعرفى اخر مرة نلقاك واقفه عليه ..
ولو لقيتك واقفه عليه مرة ثانية ماتلومى الا نفسك شيبانى النحس هدا
-فاطمه: باهى باهى.. آه وجعتنى
حول مراد يديه من عليها
ولبس حوايجه وطلع
الساعه 3 .. جى هوا وصحابه
خش مراد هوا الاول ..
لقاها فى دار النوم
-مراد: فاطمه كان تبى تلبسى حجابك لان صحابى بيخشو
-فاطمه : وين بيخشو الحوش فمه فى قعره
-مراد : بيخشو للصاله
-فاطمه : توقعتك ان بنسقيه الغدى وبترفعه عندهم لشقتهم
-مراد : لا هما بيخشو عندنا هنايا
-فاطمه : يا مراد منحبش الاختلاط انا
وكانت هادى اول مرة مراد يسمع فاطمه تنطق فى اسمه
-مراد: مشيها المرة هادى على خاطرى …ومرة ثانية يصير خير
وبالفعل لبست فاطمه حجابها .. وخشت للمطبخ
وخشو الشباب للصاله
سخت الكسكسى وسقتلهم وهيا فالمطبخ
ودارت شاهى اخضر ومداته ليهم
حسها مراد انها انحبست فالمطبخ ومفروض تطلع للدار ..
فحطها فالامر الواقع
-مراد: فاطمه تعالى سلمى على منير وطارق
طلعت فاطمه من المطبخ تمشى باستحياء
-فاطمه : السلام عليكم شنحالكم
-طارق: اهلا بيك اختى فاطمه
اما منير قعد يشبحلها وهوا ساكت ..
وفى خاطره ..الله اكبر عالجمال .. الله اكبر عالطول ..
وعالحشمة ..وعالحجاب …
منير عجباته فاطمه من اول نضرة ..
-طارق : يسلمو يدياتك غالغدى السمح هدا .. نلقانك بدعتى فيه
” طارق شرقاوى??”
ومنير يشبحلها قريب ياكلها
وهيا منبهتش ليه اصلا
-فاطمه : صحتين
-منير: تسامحينا كان نقلقوك مرة مرة ونجو ناكلو هنايا
-فاطمه: مرحبتين بيكم
وخشت دار نومها وسكرت الباب
منير سرحان : ياااازين مابعتولك اهلك يا مراد
____________________
الحلقه الجاية فاطمه بيكلموها اهلها زعما شن بتقوللهم
والقصه اليوم طلع فيها زهير اللى حيغير هلبا فى احداثها القدام
السوبر ماركت اللى تنزله فاطمه من بتلقى فيه المرة الجايه
وعلى فكرة الحلقات الطوال ماينفتحوش بالفيس الايت .. لازم بالفيس الازرق او بالاوبرا او بالغوغل كروم
يتبع ???
نحبكم ❤