حكاية فاطمة للكاتبة زهور جمال الدين

#حكاية_فاطمة

?بقلم زهور جمال الدين?

?الحلقه الثالثة عشر?

لبست فطومه وتكمت ولبست عالوردى

خش مراد للحوش لقاها واتيه

-فاطمة: شنو حلوة

-مراد: القالب غالب يا عمرى

-فاطمه: مش عارفه كيف بنقعمز فى وسط رجالة هكى

-مراد : وخيرها لبستك انيقه وحلوة ومحتشمه ..

هيا نمشو والهدية قاعدة معاه

وطلعو خدو تاكسى …

مراد قعمز جنبها من الخلف

وقعدو يهدرزو

-فاطمه : هوا العريس منين

-مراد : لبنانى

-فاطمه : صار تعرف ناس مش ليبيين

-مراد : اكيد فبلاد تتعرف على ليبيين وعرب واجانب من كل الجنسيات

فالغربه تتعثر واطيح وتوقف لين تزبط ..

-فاطمة : اهاا

-مراد: وحتى انتى نبيك تتعرفى عالناس واديري صاحبات هنايا …

-فاطمه : انشالله خير

-مراد مبتسم : لكن طالعه تهبلى يا عمرى

-فاطمه : اهم شى عندى نكون حلوة فعيونك

-مراد : كل شى فيك حلو فعيونى

وصلو قدام حوش العرس

نزلو من التاكسى وفاطمه شادة فى يد مراد وترعش

-مراد : مترعشيش وخليك واثقه من نفسك

-فاطمه تضحك : حاضر

-مراد : واول ما تتضايقى وتبى تروحى قوليلى انوضو طول

“محلاه كلامه.. مرات كلام الراجل هوا اللى يعطيك كمية كبيرة من الثقة بالنفس”

مراد عطى لفاطمة الكيس اللى فيه الهدية وقاللها مديها انتى

الهدية عبارة عن بوكس فيه ساعتين

وحدة رجالية ووحدة نسائية من نفس الماركه

خش من الباب لقى اخت العريس مدام فيولا

لان العريس هوا واخته بس فى امريكا باقى عويلتهم لا

سلمت على مراد كويس لانها تعرفه

-وسلمت على فاطمه : يؤبرنى هالطول ..

وتلفتت لمراد : مراد انت تجوزت

-مراد : ايه تجوزت بس ماعملت فرح لان جت بسرعه الحكاية

-فيولا : الف مبروك وجوازة الدهر انشالله

-مراد : انشالله

مدت فاطمه الهدية لفيولا .. وخدتها منها وشكرتها

وخشو للصالة

لقو فيها متع 20 شخص ممكن

وهما هادو المعازيم كلهم

قعمزت فاطمه جنب مراد عالصالون

هيا جميلة ..وجمالها ملفت .. وحجابها ملفت

-مراد: انا بنوض نسلم وانتى خليك مقعمزة هما يجو يسلمو عليك …

هكى الاتيكيت.. الا الكبار فالعمر ونعرفهم نمشولهم انا وياك نسلمو عليهم

-فاطمة : باهى

ناض مراد سلم عالشباب صحابه واقفين مع بعضهم على جنب من ضمنهم طارق

وتلفت لقى واحد لبنانى هوا ومرته يعرفهم سلم عليهم ..

ومن الباب يبان منير خاش للفرح

وانصدم لما شاف مراد

وقعد يدور بعيونه لقى فاطمه مقعمزة

زاد انصدم لانه متوقعهم فى عز المشاكل توة ..لقاهم مع بعضهم فى عرس

كيف صار … هوا حاير

-منير: اهلين بيك يا فاطمة

-فاطمه انخلعت: اهلا خوى

-منير: كيف حالك انشالله بخير

-فاطمه مواطية راسها : الحمدلله بخير خوى

طارق شافه من بعيد ناداه : منييير

تلفتله منير وفى خاطره : يلعن وجهك

-منير: نستادنك

-فاطمه : ادنك معاك

سلم منير عالشباب

-طارق: منير زى العادة بتسلم وبتعطى الهدية وشلاكتك والباب ???

-منير: سمير يعز عليا ..المرة هادى بنقعد

ستادنهم مراد ومشى لفاطمه …مسك يدها وهوا مقعمز

ومنير يشبحلهم ومحولش عينه من ايديهم اللى فى بعض

فاطمه تكلم فى مراد ..ومراد مواطى راسه جيهتها بيش يسمعها ومنير يتفرج وقريب يموت

-فاطمه : معش تخلينى

-مراد : حاضر

-فاطمه تضحك: يحضرلك الخير

-مراد يشبحلها: عندك علم انك اجمل وحدة فالموجودات

-فاطمه: المهم انى حلوة فعيونك

-مراد : انتى حلوة لكن طيبتك زايدة محلياتك ..

وضحكتك ياخرااابى موضوع ثانى

هما يتغزلو فى بعضهم

وجى وقف راجل قدامهم فى عمر الخمسينات داير لحية خفيفه : فاطمه ولا انا غالط

-فاطمه فرحت: استاد فرحات

-فرحات : والله ماعرفتك يابنت ماشالله عالزين والطول ..
وين مشت فاطمه القصيرة متع زمان ..وشنو اديري هنايا

-فاطمه : انا تزوجت وهدا زوجى مراد

سلم مراد على فرحات

-فاطمه تكلم فى مراد : هدا استاد فرحات كان يقري فيا فى مادة المجتمع الجماهيري فى صف اولى اعدادى

-مراد : تشرفت بيك خوى فرحات

-فرحات : خلى انادى العويله تتعرفى عليها ..اكيدة راك مكسدة زيها حتى انتى ..

ونادى مرته واشرلها : غاليه تعالى

وعرفهم على بعض

-ابله غالية : اهلا بيك اختى فاطمه

-فاطمه : اهلا بيك ابله غالية يسعدنى نتعرف عليك

-مراد: انت جاى تقرا ولا تشتغل خوى

-فرحات ضحك: انا جيتى لامريكا صارت زى الحلم

-مراد : كيف

-فرحات : انا انقري مجتمع جماهيري.. خديت دورات فالمدرج الاخضر

وتفوقت ..وبعتونى هنايا عامين بيش نكمل دوراتى

توة ليا ست شهور

وقعدو يهدرزو ..ومنير معش طاقه الصبر

خلااااص يبي يقعمز جنبها ..يبي يحكى معاها ..

لانه صدمه كيف لقاها وهوا مش متوقع حضورهم

والصدمه الاكبر كيف لقاهم متفاهمين مفيش عراك

حس ان اللى داره كله مشى هباءً منثورا

خدى بعضه واستادن من الشباب ومشى جهه مراد وفاطمه …

سلم على فرحات ومرته …

-مراد : تفضل قعمز يا منير

فرح عمك منير وقعمز طول …

ومقدرش يشبح لفاطمه خاف عيونه تفضحه

-ابله غالية: تعالى يا فاطمه نعرفك على زوز مدامات

وحدة ليبيه ووحدة تونسيه .. ماشالله خيار الناس

تلفتت فاطمه لمراد .. اشرله براسه بمعنى بري

وناضت مشت معاها

“فاطمة ناضت وفلق وكلاه منير ??..وعمك فرحات كسرله راسه بالهدرزة ”

_____________________

ابله غاليه : نعرفكم على فاطمه من ليبيا ..

فاطمه هادو.. نجمه من ليبيا .. و محاسن من تونس

سلمت عليهم فاطمه …

عزمو عليها بالتقعميز .. وقعمزت معاهم

لما قعمزت جى مقابلها طول مراد

شبحلها وضحكلها وهيا ضحكتله

واهل العرس بدو يمدو

مدولهم عصير وشوكلاته .. عالراقى طبعا

-نجمه : قداش ليك متزوجه

-فاطمة تشبح لمراد وتبتسم ..لان حتى هوا يشبحلها : مالياش هلبا

وطبعا منير قليل الادب مركز معاهم

وقعدو يهدرزو وينشدو فيها حامل والا لا

-فاطمه: لا مش حامل .. جتنى الدورة يوم واحد بس ومشت

وضحكو الثلاثه فى مرة وحدة

-نجمه: هادى ممكن توراية

-فاطمه: وشن معناها توراية

-غالية: معناها انتى ممكن حامل يا لاللا

-فاطمه فرحت قريب طارت : قصدكم اللى تجيها يوم واحد ممكن حامل

-محاسن : مش ممكن .. الا اكيد

فاطمه قريب اطير كان من يجيبلها مراد توة وتقوله عاللى قالوهولها

ومراد لاحظ ان فى حديث شيّق صار ..

لكن هوا مقعمز بعيد وماسمعش شنو حكو

_________________

خشت العروسة والعريس

فاتحين اغنية زفو العروس زفوها

وفاطمه مقعمزة جنب مراد ..

يوشوسلها مراد : نشوف فيك فرحانه بكرى شن قالولك غالية وصحباتها

-فاطمه : تو نقولك بعتالى

-مراد : خاطرك فى زفه زى هادى

-فاطمه : المهم انا معاك توة حتى بلا زفه عادى

-مراد : غير كانا نعرف من يعلملك فيه الرد بالطريقه الحلوة هادى

-فاطمه : نتعلم فيه منك انت

-مراد قام يدها وباسها : ربي يخليك ليا يا عمرى

منير يشبح فيهم وقريب داخ

كان متوقع انهم فى اشد الازمه والمشاكل ..

لقى احضان وحب وبوس يدين

عرف ان خطته مامشتش صح

ويخمم : زعما نادية مشت خبراته عاللى درناه

… لا لا كنهدا راهو ماسلمش عليا هكى

..باهى شنو اللى صار.. ضحك عليها بكلمتين وسكتت

..لكن هدا مش منضر وحدة مضحوك عليها..

البنت سعيدة بجد وفرحانه

راسه قريب يطير من التفكير

بعد وصلو العريس والعروس لمكانهم

قعدو فاطمه ومراد متع عشرة دقايق

وبتبدا الدبكة والرقيص

ناضو هما الزوزسلمو عالعرسان واستادنو منهم للمرواح …

حييت فاطمه غالية وصاحباتها لانها بتروح

حيوهها هما وقاللولها باى

وطلعو للشارع بياخدو تاكسى

وطلع منير وراهم يراقب

_______________________

ركبو التاكسى وروحو للحوش

وهما خاشين من العمارة

لقو التوامه محمد واحمد فالكرادورى متع العمارة

جو لفاطمه يجرو زبطوها : مس فاطمه

-فاطمه : اهلين .. انتو تسكنو هنايا

جت روعه لابسه شورت وفاتحه شعرها : مرااااد

-مراد : روعه الجميلة .. يا اهلين

وين كنتو انتى وخوتك الدنيا ليل

-روعه : كنا فالمحل …و تلفتت لفاطمه : انتى مس فاطمه ولا

-فاطمة مزبطتهاش : ايه انا فاطمه

-روعة: معرفتينيش .. انا اليوم جيتك للجامع ودخلت خوتى عندك

-فاطمه: اهاا بس الصبح لقيتك بالحجاب

-روعة: ايه لزوم الجامع ..

وتلفتت لمراد : ليك وحشة مراد

-مراد : انتى اكثر يا روعه .. لكن الله غالب

-روعه: هادى زوجتك

-مراد ضم فاطمه من كتافها : هادى مرتى وحبيبتى

-روعه: ربي يخليكم لبعض

وقف زهير فى بداية الممر

ونادى بصوت عالى : رووووعه

انخلعت روعه وخدت خوتها وطلعت تجرى وقالتلهم باى

ركبو مراد وفاطمه لشقتهم

حولت فاطمه كندرتها: ااه رجليا وجعونى

-مراد : خلى نصلو العشى تأخرنا ولا

-فاطمه فرحانه : سمعت صح ولا انا غالطه.. انت تتكلم عالصلاة صح

-مراد قرب منها وباسها بوسة خفيفه : ايه هيا نصلو عندى معاك شغل

-فاطمه : هههههه . حتى انا حرت قلت اكيدة عندك فيها مصلحه ??

-مراد : خشى توضى هيا مابين مادرت قهوة ..

وبتشربي معاى راهو

-فاطمه : باهى

خشت فاطمه حولت حوايجها

ولبست قفطان قصير ومخصر وخشت توضت وطلعت

لقت القهوة واتية عالطاولة مغطيه

وخش مراد توضا …

وصلو مع بعضهم جماعه

وقعمزو عالصالون

-فاطمه تشرب فالقهوة : هيا احكيلى

-مراد: شنو بنحكيلك

-فاطمه : شن تشتغل

-مراد : نشتغل ديلر

-فاطمه : شن معناها ديلر

-مراد : ديلر يا عزيزة الراس ..تعنى تاجر ربط

-فاطمه : كيف تاجر ربط يعنى

-مراد : اسمعينى بالشوى بيش تفهمى

-فاطمه حطت الفنجان : باهى

-مراد : فى بعض الاعمال هنايا فى امريكا مش اى جنسية تقدر اتخش عليها

يعنى الوزارة ماتقبلش تعطيهم اودونات عمل ..

فلازم يلاقو شخص امريكانى..

يفتحو على اسمه المكان .. بس يكون الشخص هدا ثقه

ويكونو واخدين عليه ضمانات لان ممكن يغدر بيهم وياخد المكان

انا الشخص هدا .. انا ديلر.. وهادى مهنتى

وعندى اكثر من مصلحه انا ديلر فيها

-فاطمه: ويعطوك معاش ولا كيف

-مراد : الديلر ديما نسبته 20 %

-فاطمه : فى هلبا يشتغلو هكى

-مراد : هلبا طبعا بس ميقولوش على ارواحهم ..

انا الاول عمرى ماقلت لحد انى ديلر ..

نخاف حد يضرنى لانى عاطى ضمانات

-فاطمه: فهمت عليك

-مراد يضحك: انا قلتلك انتى بس يا قطوسة وانتى مش حتطلع منك نهائي طبعا

-فاطمه : باهى الاعمال اللى انت ديلر فيها اعمال كويسه وحلال

-مراد :طبعا.. امالا تبينى ندخل روحى فى حفر ونقعد فى عملة …

تو نوريك اوراقهم كلهم

-فاطمه : عندك هنايا فالشقه

-مراد : لا طبعا ..حاطهم فى تيجورى فالمصرف

-فاطمه تضحك : وشنهوا التيجورى

-مراد : وااااك منك كل شى تبى تعرفيه ..

التيجورى صندوق فالمصرف امأجره خاص بيا انا بس نحط فيه حاجاتى المهمه

فاطمه تضحك

-مراد : تو جى دورى انا نسألك..شنو اللى فرحك بكرى

-فاطمه : نخاف نقولك ويطلع مهناك شى

-مراد : لا قولى شنو

-فاطمه واطت راسها وتحرك فى ايديها فى بعضهم : والله النساوين قالولى ممكن …

-مراد : ممكن شنو .. خيرك

-فاطمة: قالولى ممكن نكون حامل

مراد انصدم بالكلمه .. قعد يشبحلها ..فرح .. قريب دموعه نزلو

-مراد : بلحقه.. وانتى شن حاسة … قصدى زعما حق .. انتى شن تقولى

تلخبط مراد من كثر ما فرح ..

بالرغم هوا مقتنع انه مش قد مسؤلية اطفال ..

بس مش عارف شنو اللى غيرله رايه فى لحظه

وخلاه يفرح بالشكل الكبير هدا

وقف

-مراد : اسمعى اصبري ننزل نجيبلك تحليل بيتى

-فاطمه : كيف يديرو فيه ..اول مرة نسمع بيه

-مراد : تحليل بول ..بالك مزال موصلش ليبيا ..

تو نروح ونقولك كيف يديرو فيه

وطلع يجرى من الشقه ..

نزل للصيدليه .. جاب منها التحليل

وركب وقال لفاطمه على طريقته كيف

وخشت فاطمه للحمام ..دارت التحليل

وطلعت

شافه مراد

وقف قامها من عالارض : مبروك حبيبتى انتى حامل

وفاطمه متعلقه فرقبته وفرحانه

_______________________

فاطمه طلعت حامل ومراد فرحان

غير انشالله صحاب السو يخلوهم فى حالهم بس

نحبكم❤❤