الصديقتان

الفصل التانى

صمتت يارا في ذهول .. و هي تفكر في أختها و كيف استطاعت قتل أقرب الناس إليها .. كيف استطاعت قتل إنسان و هي لا تتحمل رؤية حيوان يقتل ؟
و انتبهت عندما قالت علا
– أنا صارحتك علشان تساعديني يا يارا لازم ننقذ أميرة
ظلت يارا صامتة .. فكيف تعقل كلام مثل هذا .. كيف تعقل أن أختها أصبحت قاتلة .. قالت علا مرة أخرى
– فوقي يا يارا بقى و ردي عليا .. هاتسيبي أختك تضيع !!؟
قالت يارا بصوت مختنق
– أعمل إيه ؟
– أختك لو إعترفت باللي عملته هاتطلع براءة .. انها تسلم نفسها و تعترف أحسن مليون مرة من إنها يتقبض عليها .. لازم تقنعيها علشان مانخسرهاش
عادت يارا مرة أخرى لصمتها .. فقالت علا
– أنا هاسيبك دلوقتي علشان شكلك من الصدمة مش قادرة تتكلمي .. ساعة كده و هاكلمك تاني .. باي
أغلقت علا الخط .. و بخطواط بطيئة ذهبت يارا إلى أختها .. و دفعت الباب قائلة
– أميرة
– نعم ؟
اقتربت منها يارا و قالت
– أنتي حقيقي قتلتي أحمد
نظرت إليها أميرة بفزع ثم قالت
– مين قالك الكلام ده .. عرفتي ازاي ؟
هبطت الدموع من عين يارا و هي تقول
– عرفت ازاي !! كان نفسي تقولي لي ان علا كدابة
قالت أميرة بصوت متقطع
– علا قالت لك ليه ؟
– عايزة تساعدك .. أنا مصدومة فيكي .. ازاي عملتي كده ؟
– غصب عني والله غصب عني
قالت يارا بصوت مرتفع
– ازاي غصب عنك
دخلت الأم على صوت يارا و قالت بقلق
– في إيه ؟! .. انتوا بتتخانقوا
جلست يارا بجانب أميرة ثم قالت
– أيوة
– ليه بس .. بتتخانقوا ليه
نظرت يارا إلى أختها التي تنظر إليها بخوف ثم نظرت إلى والدتها قائلة
– خلاص يا ماما حصل خير
قالت الأم بنظرة عتاب
– ماتعليش صوتك على أختك الكبيرة تاني
– حاضر يا ماما
خرجت الأم من الغرفة .
و استمر نقاش يارا و أميرة ساعتين بدون فائدة.
(و في الساعة العاشرة مساءا .. في منزل علا)
قالت علا لوالدتها و هي تشاهد التلفاز
– أنا هادخل انام يا ماما
– بدري كده !! مش عوايدك
– علشان مانمتش كويس امبارح جالي نوم بدري
– ماشي يا حبيبتي .. تصبحي على خير
نهضت علا و قبل دخولها غرفتها .. سمعت طرقات على الباب بقوة جعلت نبضات قلبها تتسارع من شدة الخوف و سمرت في مكانها .. نهضت الأم و تقدمت لفتح الباب و هي تقول بغضب
– في حد يخبط كده
فتحت الباب و انتابها شعور القلق عندما رأت ثلاث رجال أمام الباب و أحدهم مرتدي زي شرطة و يقول لها
– منزل علا عبد الرحمن ؟
ردت الأم بإرتباك
– أيوة .. خير في حاجة
– هي فين ؟
– أفهم بس في إيه ؟
– مطلوب القبض عليها
– مطلوب القبض على بنتي أنا .. أكيد حضرتك غلطان
– بنتك مطلوب القبض عليها في جريمة قتل .. هاتجيبيها ولا ندخل نجيبها بنفسنا
– طب ممكن أكلم أبوها ييجي
اقتربت علا بخوف من الباب و هي تقول
– أنا علا اللي عاوزين تقبضوا عليها