حكاية فاطمة للكاتبة زهور جمال الدين

#حكاية_فاطمة

?بقلم زهور جمال الدين?

?الحلقه الاولى ?

بعد ماقامت الثورة سنه 69 .. انفتحت ليبيا عالعالم ..

وبدى فى حاجه اسمها الضباط الوحدويين الاحرار

وطبعا بدو يصولو ويجولو فالبلدان

وياخدو فى دورات عسكرية خارج ليبيا

عمك يحي كان من ضمن الضباط هادو ..

وفى بداية سنه 70 تزوج ..

تزوج سالمه بنت خاله اللى كان يبيها من زمان

وشاء القدر ان سالمه تحمل على طول ..

ولما كانت فى نهاية الثامن عمك يحي جاته سفرة لامريكا

والحامل متقدرش تسافر

وهوا مايقدرش على فراقها

باهى كيف يدير

-سالمه: انت برة ولما نجيب نلحقك

-يحى: هادو ثلاثه سنين يا سالمه .. وانا منقدرش نخليكم وراى ونمشو

-سالمه: قلتلك نلحقوك طول

-يحى: شن تحسابى روحك ماشيه للخمس ..

نقولك امريكا تبى عالاقل ثلاث مطارات

-سالمه : باهى كيف بدير

-يحى : هدا امر عسكرى وانا منقدرش منمشيش

وسكت …..: تعرفى كيف ياسالمه ..

انتى ضعيفه وماتبانيش حامل بكل …

البسى بالطو ومفيش داعى نقولو انك حامل

فرحت عمتك سالمه وقالت الحمدلله انها بترافق زوجها فى سفرته

قولى خبرو اهلهم بالسفرة .. وان المدة متع البعته ثلاثة سنوات …

ماوتى يحى اوراقه وجهز نفسه خدى عالاقل ثلاث اسابيع …

كانت سالمه خشت فى شهرها

وليلة السفرة …

تكمت عمتك سالمه وساوت الحوايج ..

وسافرو ..ودارت زى ماتفقو ..

لبست بالطو بحيث ماتبانش بكل

وصلو امريكا بحكمه .. وسالمه تعبانه من السفرة لانها تعبتها هلبا

لما وصلو المطار فى امريكا .. خلاص جتها الاوجاع

رفعها طول لاول مستشفى وجابت فيه

جابت ولد زى القمر .. وسماته مراد …

بعد قعدت ثلاث ايام فالمستشفى ..

روحو للمقسم متع المبنى اللى مخصصاته ليبيا للاشخاص متع البعثه

وفاتو الثلاثه سنين ..

وجى وقت المرواح …

دارو شناطيهم وولدهم مراد فى ايديهم وركبو الطيارة وروحو

_________________________

وفاتت سنين .. جابت سالمه بعد مراد ثلاث بنات وولد …

الهام م 75 وامال م 78 وصلاح م 80 ..وبسمة م 81

طبعا يحى وسالمه حريصين ان ولدهم مراد

مايعرفش انه يقدر يحصل الجنسيه الامريكيه باعتباره مولود غادى

لان مراد ديما ينقرز على بوه يبه يسافر بيهم لامريكا زى زمان

والناس فالثمنينات ماتزبطش هلبا

ومتعرفش الافكار هادى على امريكا باعتبار اننا

معاديينها وشادينها طز طز فى امريكا ???

سنه 85 ..مراد بدى عمره 15 سنه …

ومزال يراود فيه حلمه القديم انه يسافر امريكا

شوره ترا وين متعرف على فرخ فالح ..

قاله يا مراد انت تقدر تخش امريكا بالساهل لانك مولود فيها ..

وتقدرتاخد الجنسيه فى شهر

مراد دكى ماباش يقول الكلام اللى سمعه قدام بوه وامه …

لانه بالتاكيد ح يشكو فيه وح يدسو الجواز

ومن يوم سمع بموضوع الجنسية ..وهوا شادها خدمه فالميناء

يلقط فالفلوس بيش يسافر

وفى ليله مافيها ضى قمر مراد قال لامه وبوه انه مزرد مع صحابه فالقرابولى

بعد يومين جاهم تلفون فالليل …

ناض عمك يحي يجرى بيرد حاير من يتصل عقاب الليل

تاريته فرخ مراد دارجوازه وسافر لامريكا

-مراد : انا نكلم فيك من امريكا يا بوى

-يحى ماستوعبش الكلمه: منين تكلم فيا

-مراد : من امريكا يا بوى …متخافش عليا وسلملى على امى وصلاح وخواتى

وانفصل الخط

-يحى : يا سالمه تعالى ولدك مراد سافر لامريكا

جت سالمه وبناتها مخلوعات من صياح بوهم

ويحى يفكر ان المشكلة مش هنايا..

المشكلة فكلام الناس

وزمان فى الثمنينات مكنش فى مكيفات …

الرجالة كلها تتبرد فالشوارع من النو

وهاتك يا قرمه فلان خنب فلان استغنى

والنساوين الفطور كل يوم عند جارة ومنحكيلكمش طرالها وجرالها

ويحى ضابط مهم وتهمه سمعته

فقررو يقولو للناس ان مراد جاته بعته لامريكا ..

وسافر فيسع منغير مايسلم على حد

لان بوه حصلهالها بالواسطه

“ايام زمان الواسطه والمحسوبيه ??”

________________________

السنه اللى بعدها جت الغارة على ليبيا

وانقطعت الاتصالات بامريكا

والحوش اللى يضرب رقم تليفون لامريكا هدا حوش مشبوه …

وتجى اللجان الثورية ادير فيهم حوسة

ومنها …

وانقطعت كل اخبار مراد …

سالمه متقطعه على ولدها …

ويحى يصبر فيها: ولدنا عاقل يا فاطمه متخافيش خيرك انتى

_______________________

جت الهام لامها : يااام بنمشى لحوش جيرانا نعاونهم

-يحى: منهما

-الهام: حوش فاطمه

-يحى: من فاطمه

-سالمه: هادو جيرانا اللى محولين جدد

-يحى: وراس بنيتى فكينا منهم .. بوها لحيته تضرب لصدره ..

وانا تعرفينى فى مكتب مقاومه الكلاب الضالة ..

وراس بنياتى ماتحطونى فى موقف مش باهى

-الهام: بالعكس يابوى ..والله عمى محمود من نعم الناس ..

سيورك تتعرف عليه وتقول حق كلام الهام

وطلعت الهام مشت لفاطمه بيش تعاونها فى ضمان الحوش والحوسة

” زمان الناس طيبه وتعاون فى بعضها مش زى توة اللى تفكرى تعاونيها تقول هادى جاية بتبخرلى مفيش ثقه ??”

_________________________

فاطمه مواليد 75 الكبيرة فى خوتها وخواتها كلهم اصغر منها …

وهيا والهام انداد .. اعمارهم 11 عام .. يقرو صف الخامس

وخشت فاطمه نفس مدرسه الهام .. وقعمزت معاها فى نفس المقعد

وبالرغم فاطمه عمرها صغير لكن كان حجابها كامل وشاربتها كبيرة

وزمان فالثمنينات البنات يطلعو بلا حجاب فى ليبيا …

اللى تكبر شوى تبدا تطلع بالفراشيه

لكن الحجاب مكنش وارد وميعرفوشى

ومع هدا فاطمه وامها يطلعو بالشاربات الكبار ..

لكن فاطمه تلبس فى جلابيه …

وامها زى النساوين فراشيه

فاطمه عندها زوز خوات امانى م 79.. ونادرة م 81

وبعدهم طول محمد م 82 ..وخالد م 84

كانو ساكنين فى منطقه ثانية

وانتقلو لحوش هدا لان بوها دارولة انتقالة فالاوقاف

ومسك شيخ جامع المنطقه اللى هما فيها

وبعد ثلاث سنوات سنه 89 …

بدو حوش يحى وحوش محمود من اعز الجيران

النساوين صحاب والرجاله صحاب

وعمك يحى ديما شادها ع الجامع مع محمود

فاطمه والهام وصلت اعمارهم 15 عام.. يقرو فى ثالثه اعدادى …

دارو الامتحانات ويراجو فالنتيجه …

فاطمه نوعها كانت شاطرة وكانت تجيب فيها الاولى ع الفصل

___________________

وفى يوم روح يحى وجهه اسود للحوش

-الهام: النتيجه طلعت يابوى ونجحنا انا وفاطمه

-يحى داهش : باهى مبارك بنيتى

-الهام: مدخليش نبى طبق باسطى نوزعه عالجيران

-يحى: حاضر نجيب لبنتى

-سالمه : خيرك يا راجل

-يحى بصوت واطى : تعالى الحقينى للدار

وخشت سالمه ورا يحى للدار …

حدف يحى ظرف عالطاولة وقاللها تفرجى وشوفى

فتحت سالمه الضرف …وتلقاه مليان صور لولدها مراد

مطول شعره موضه زمان عاد وهوا شعره ناعم زى الحرير ولونه قصدلى

ولابس هادوكة السلاسل …

وداير هادوكا الطرحات

والبنات على يمينه ويساره والسكير فى شيش قدامه

صور تحشم .. شى فالبارات .. شى فالشوارع

-سالمه شهقت : حيه عليا ..خيره ولدك هكى يا راجل

-يحى: اسمعى اسكتى خير ما نحط اللى فى قلبى فيك

سالمه متعودة غير عالدلال من يحى..

ومدامه تكلم هكى عرفت ان الموضوع كبير

-سالمه واطت صوتها: من جابهملك الصور هادو

-يحى: جابهملى ولد حلال ..والله ما وصيته ..

هوا بروحه صوره وقالى الحق ولدك

-سالمه: باهى اتصل بيه يا راجل

ماهو عاطيك رقم مولى العمارة اللى ساكن فيها

-يحى: نتصل بيه…. تبيهم يقيمونى امالا ..وبعتالى نتصل بيه شن بنقوله ..

خلى نساوى الدابر اللى درته فدماغى وبعتالى ساهل

-سالمه: وشن مفكر ادير يا يحى

-يحى: كان نقوله روح مستحيل يسمع كلامى ويروح

-سالمه: امالا شن بدير

-يحى شبحلها : بنزوجه

-سالمه: بتزوجه وهوا عمره 19 سنه

?????

__________________________

يتبع ????

غدوة نكملو باقى الحلقات انشالله

نحبكم ❤