رمضان/جود يا جود تعالى .

جود كانت تغسل في الماعين وتدعي يارب ايكون من نصيبي لعند سمعت بوها اينادي.

جود/انعم بابا

رمضان/قعمزي سلم بنتي بنهدرزك حاجه وقولي الي في قلبك متتحشميش مني.

جود خافت /ان شاء الله خير.

رمضان/تبي جاد انتي ?

جود/هوا في الحقيقه اه نبيه ???????????

رمضان/راه يابنتي خلاص بيولي الشريك حياتك يعني زوجك. متاكده ?

جود فرحت ومكنتش فاهمه ومتحشمه?/اه يابابا نبيه ?

رمضان/باهي يابنتي ايصير خير.

في حوش خالد الموضوع امسكر خوفا على بوهم ومعدش امشوا لحوش جدهم ?

خالد/ساره نبي قهوه وقولي لخوتك اينوضوا عصر.

جاد عيط من داره/احسبيني في القهوه .

اياد/يعطيك بكشه ضم فمك اتشوف فيا راقد?????(الكائن هذا في كل حوش فيه??)

ودارت ساره القهوه وقمزو كلهم مع بوهم ايهدرزو لعند طق الباب.

جاد/ساره وماما خشوا الداخل خلي نفتحه.

خشوا الداخل وفتح جاد الباب ولقاه عمه رمضان.

جاد/اتفضل بابا في الصاله .

رمضان/انته بتطلع؟

جاد/اه تبي حاجه.

رمضان/اه اني جاي نبيك ونبي منك اتكون هادي وراجل.

جاد/باهي ان شاء الله.

وخشوا وقعمزوا ودارت ساره لعمها قهوه ومشت لدارها غيرت ملابسها ومشت للجامع.

رمضان/اسمعوا اني راجل ومثقف ونفهم في كل شيء ومستحيل نضلم اصغاري .

خالد/باهي شن فيه خيرك ?

رمضان/اني بنقنع بوي لاني قررت نعطي بنتي لشخص هيا اختاراته.

جاد/ومنو الشخص ?

رمضان/انته ??

جاد فرح لكن خَله روحه ارزين.

جاد/وشن اتغير ?

رمضان/اني خايف من بوي كنهدا نعطيك وعيوني امصكرات لكن كيف انخلي بوي يقتنع ?

جاد/توا يقتنع .

رمضان/لكن عندي شرط ?

جاد/ادلل قوله وكان نقدره عادي.

رمضان/تقعدوا مخطوبين لعند انتوا الزوز تتخرجوا وهذا شرطي.

جاد/واني موافق طبعا بعد اذن بوي.

خالد/ياوليدي دير الي يريحك.

رمضان/خلاص معنها توا خلي يقتنع بوي و تجي تخطبها وبعدين لما اتكملوا اقرايتكم تتجوزو.

جاد من الفرحه مش امصدق والابتسامه مرسومه على وجهه.

رمضان/واني جيتي هاذي لحاجتين لاوله قلتها وتانيه ان شاء الله متردونيش.

خالد/مش اني الي انرد اوخيي ?

رمضان/جاي نطلب في ساره لولدي محمد ?

اياد/ياعمي ولدك في ابريطنيا واحني هيا راس اوخيه ونبوها بجنبنا.

خالد/والله يارمضان منبيهاش تتغرب الغربه صاعبه ?

رمضان/ولدي بشقته وبخدمته وتكمل غادي اقرايتها وكان على الغربه كل عام اتزوركم والله ليبيا معادش ينقعد فيها وخيرلها وانتو زوروها وتزوركم ومرات بعد فتره ايروحوا لليبيا ?

جاد/والله ياعمي هوا ولدك اكويس لكن قصت ابلاد برا صعبه والحاجه هاذي اتقررها البنت.

خالد/اصدقت توا انشاورو البنت ونشوفوا روحنا ويصير خير ان شاء الله.

رمضان/حقكم خودوا وقتكم.

خالد/وبوي كيف ايصير فيه.

رمضان/توا ايجي بالشويه ?

خالد/باهي ربي ايتمم على خير .

جاد ،واياد/ان شاء الله

خالد/خلوقي ضايقه قداش ليه مطلعتش من الحوش.

رمضان/توا اني بنمشي جاهت المزارع بندير اعليهم دوره من النهار مرضك معدش امشي حد برا امعاي.

خالد/اه والله خلي انوض نلبس.

ومشوا خالد ورمضان لرزقهم. وجاد بيطير من الفرحه وكلم جود وقاللها شن صار وفرحت وقعدوا ايهدرزو.

اما اياد فكان يدعي كل ادقيقه انها اتكون من نصيبه وكان ساكت وصابر ومسلم احكامه لربي.

اما عبدوا سافر لمصر اسبوعين وبيولي.
___________________

اما نور كانت في المطبخ ادير في كيكه وخشلها علي :

علي /نونو جي صاحبي احمد ديرينا قهوه وحطينا من كيكتك.

نور سمعت اسمه ابدي قلبها ينبض ابسرعه.

نور /حاضر.

وناضت اتفتلك في هاديكه السفره رسمتها رسم ??

نور/علي علي

علي افتح الباب اخدي السفره منها .واحمد اسمع صوتها افرح وقعد ايبيت من الباب ايشوف فيها بعدها اكلي من الكيكه ويدير في الجو.

احمد/يعطاها الصحه امك ماشاء الله الحق على الكيكه امي اني والله هاذا كله متعرفه ??(ترا ياشباب قولوا منديروش فيها ?)

علي/ههه لالا امي متفهمش في الجو هذا هاذي اختي ?امي دابها بازين وكسكسي ورز.

وشرب احمد لاميه وحط تحت الطاسه رقمه ??

عند نور تتأمل في السفره وكيف جت بتغسل الماعين ألقت الورقه فيها رقمه واسمه احمد وكاتبلها كلميني ??

نور في الليل قعدت اتفكر اتكلمه اولا لكن قررت متكلماش طول توا ايقول اخفيفه ورقدت وهيا تتامل فيه اما هوا صاهر للفجر ايراجي فيها اتكلمه??
______________________

روحت ساره من الجامع وخشت للحوش ألقت امها فرحانه وزعلانه:

ساره/السلام عليكم.

ربيعه/وعليكم السلام .

ربيعه/اسمعي سلم بنتي بدلي وديري قهوه وتعالي نبيك.

ساره/باهي ?

ودارت ساره شاهي لانها شربت قهوه مع بوها ?وجت قعمزت بجنب امها :

ساره تمد لامها في الفنجان والكيكه/خيرك شن فيه ??

ربيعه/تعرفي علاش عمك رمضان جي .

ساره/هههه لالا منعرفش لكن انحس فيه على موضوع جود??

ربيعه/اه وحكتلها الي صار…………………………………….?

ساره??/باهي الحمد لله ربي اخدي بخاطرهم لكن جدي صاعب يقتنع .

ربيعه/اه وفي موضوع تاني هوا ايفرحك ويزعل ??.

ساره/???شني ماما ابديتي عاد في جو الالغاز شن فيه.

ربيعه/راهو عمك جي طلبك رسمي لمحمد ولده وقال اعطوها اتفكر وترد اعليا.

ساره/كيف هكي اني منبيش ????

ربيعه/عينك شن متبيش تي تعرفي احكي على لي عنده اتعيشي اميره.

ساره/ماعمره الفلوس خلو حد أمير ??

ربيعه/اسمعي عنده شقه في بريطانيا ويخدم ومتخرج شن تبي بعد هكي وقال عمك اتكمل اقرايتها غادي وكل فتره بتزورينا.

ساره/???بابا شن قال وخوتي.

ربيعه/هما قالوله منبوهاش اتعبد اعلينا لكن عمك قعد ايوضحلهم انك تقدري اتزورينا وقال بوك وخوتك على ساره كان تبي باهي كنهدا سامحني.

ساره/خلاص توا انفكر والي ايقوله بابا باهي لكن منبيش نطلع من ليبيا.

ربيعه/تي يابنتي صح هوا منبيكش اتبعدي اعليا لكن حتى انك اتعيشي في بريطانيا ماخله ربي معطاك ???(توا الي اتجيه فرصه يهرب من الجحيم خلي ايشيط خيرله )

ساره/خشت لدارها وصلت ركعتين استخارت فيهم ربي والتكت على السريرها اتفكر لعند اخداها النوم وحلمت انها تمشي في الطريق كلها خضرا لعند اللقت قصر اعجبها وخشتله القاته كله اسود والدنيا كلها امكسره وفيه راجل امقعمز وتحته مرش وبجنبه مرش ويعيط يقوللها ساعديني هيا قعدت تقراء في القران لعند الراجل اسكت وهذاك الراجل كله اسود زي القصر امشت ساره ابدت اضم وتمسح في الحوش لعند خلاته يبرق?? وبعتالي قامت المرش كله قالت منيش املوحاته خلي انلاصقه وقعمزت على الوطاء وقعد اتلسق وكلهم تشكيلات فازات حلوات هلبااابعتالي اوقف اعليها الراجل قاللها نظفيني زي القصر اني اعيت ناضت قعدت التنظف فيه لن خلاته انظيف وخشت لدار القت زوز اولاد سود يلعبوا قتلهم تعالوا نغسللكم ونظفتهم خلتهم زي الشمامه وناضت مخلوعه. تعوذت من الشيطان الرجيم وقعدت سارحه………………..

شن تتوقعوا هل ساره بتوافق او بترفض ؟ وهل بتتجوز من محمد او لا الموضوع كله ابدي في يد ساره ?نبي توقعاتكم??
وشكرا لكل من ادعالي وقدر ظرفي،?????ومنسبه للتفاعل اضعيف هلبا معقوله اقصه حد ٥٠٠ تعليقا وينكم الي تقرا اتحط ١٠ ملصقات نبي تفاعلنا ايولي الف ?
راه تعليقاتكم اتشجعني هلبااااااااااااااااااااااااااااا

#انحبكم #ARWA ???????