السم الابيض بقلم امل احمد سلوم
#حبوب_الكيبتاجون
المخدرات والمنشطات هنالك مفهوم شائع بين الناس أن كل ما يندرج تحت مسمى مخدرات فإن تأثيره في (تخدير العقل والجسد)..
إلا ان المخدرات لها أنواع : فهنالك المثبطة (المهبطة) وهذه التي تنتج شعورا بالنشوة والتخدير في نفس الوقت .
وأخرى تلك التي تعطي نشوة مترافقة مع نشاط مفرط (المنشطات)..
وأخرى المهلوسات والتي ينتج عنها أوهام ورؤية أشياء لا وجود لها على ارض الواقع واختبار تجربة تظل في إطار ذهن المتعاطي فقط.
اليوم سنتحدث عن واحد من أكثر الحبوب المنشطة التي يساء استخدامها إلى حد الإدمان، وهي مادة (الكبتاجون) او كما لها من عدة أسماء شائعة بين المروجين لها ومتعاطيها مثل ( الأبيض، كبتي ، الكبت، حبوب السهر، طباشير، حلاوة، أبو قوسين…وأسماء أخرى).
كيف نستطيع تمييز متعاطي الكبتاجون؟ ماهي العلامات والأعراض على مدمن الكبتاجون؟
الأعراض تختلف في ظهورها، فهناك من تظهر عليه الأعراض مباشرة بعد التعاطي والبعض الآخر بعد فترة من التعاطي، ومن هذه العلامات :
– كثرة الحركة المفرطة والكلام،
– حك الأسنان ببعضها،
– التدخين بشراهة،
– جفاف الريق، تشقق الشفتين، كثرة إخراج اللسان لمسحها،
– الأرق وكثرة السهر لأيام،
– التحسس من الضوء وخاصة ضوء الشمس، بسبب اتساع حدقة العين،
– حك الأنف، ضعف الشهية، سواد العينيين.
– وأعراض أخرى يتم فحصها عبر عينة من البول بشرط أن تناول المادة تم قبل ما لا يقل عن 4-6 أيام.
*ما هي مكونات الكبتاجون؟
يتحلل الكبتاجون في الجسم إلى مادتين (أمفيتامين+ثيوفيللين) وكلاهما منشط قوي للجهاز العصبي، الأسوأ من هذا هو أن سوق المخدرات والمروجين يقومون بخلط وإضافة مواد مغشوشة ومواد مخدرة أخرى إلى تركيبة هذه الحبوب.
دعوني ابسط لكم اضرار هذه الحبوب بقصه قصيره توضيحيه واتمنى ان لاتمرو بين سطورها مرور الكرام وان تأخذو منها المنفعه والفائده
*╚══════ღღ══════╝
#الــــــسم_الابيـــــــض
#الجـــــزء_الاولـــــ
#بقــــــلمي_امـــل_احــــ
*╚══════ღღ══════╝
تالا : قربت الامتحانات والله كتير خايفه ومتوتره
حلا : لاتتوتري ولا عبالك ادرسي منيح وحاجتك فرجه ع افلام الرعب يلي ادمنتيها ونظمي وقتك وطفي التليفون يلي حامليته 24 ساعه رح تلاقي حالك مركزه وحافظه منيح
تالا : لك والله عم بدرس بس مشكلتي مابقدر اسهر بجي افتح الكتاب عيوني بيغموضو لحالهم
حلا : بعرفك خم نوم بس انتي هلأ عم تقدمي للشامل ولازم تجتهدي لتجيبي معدل منيح والا امي رح تنتفلك هالشعرتين يلي بتلعبي فيهم
تالا : طيب هوينا ست حلا لاعرف ادرس وازا نمت صحيني ?
حلا : اي مو علـّۓ عيني
طلعت حلا من الغرفه وبقيت تالا تحاول تركز وتدرس بس بعد دقايق عيونها بلشوا يدبلوا وانكفت عالكتاب ونامت
تاني نهار فاقت من نومها على رنة موبايلها فتحت عيونها بتثاقل ومدت ايدها عالكومدينه تتحسس موبايلها وتناولته وردت
تالا : الو
رغد : صباحو توتو
تالا بنعاس : صباحو
رغد : شو بعدك نايمه
تالا : اديش السَـآعــهْْ
رغد : داخله علـّۓ 11 يالله قومي وتنشطي رح امرق لعندك لنروح عالمركز
تالا : اي ماشي قايمه ?
حطت الموبايل حدها وحضنت مخدتها ورجعت تشخور
حبها للنوم مو طبيعي ومو قادره تنظم وقتها ولا قادره تركز بدراستها
بعد نص سَـآعــهْْ فاتت حلا وسكبت عليها كاسة مي وفطت من التخت علـّۓ اربعتها
تالا : بسم •اللّـہ̣̥ الرحمن الرحيم… شو في ?
حلا : سلامتك ست تالا بس مافي طريقه لتصحي الا هي
تالا : تضربي شو غليزه
حلا : اي قومي بلا علاك مصدي رغد واقفه برا وعم تستناكي لتروحوا عالمركز
ضربت ب ايدها علـّۓ جبينها… يوووه راحت عليي نومه وبعدني ماجهزت
حلا : ع اساس غريبه عليكي… قومي قومي رح اعمل كاسة شاي للمخلوقه لحتى تجهزي
قامت تالا اخيرا من تختها سحبت المنشفه وطلعت م̷ـــِْن غرفتها وهي عم تتاوب
تالا : صباح الخير
ام الياس (امها ) : قولي ضهر الخير ..شو كل هاد نوم ياخانوم نسيانه عندك مركز
تالا وهي عم تحك شعرها… مو كنت سهرانه وعم ادرس
حلا : اللي بيسمع بيفزع لك صوت شخيرك كان واصل لاخر الحاره
مطت شفايفها بعدم رضا وحطت ايديها ع خصرها: هلأ انا عم شخر
رغد : تالا بعدين بتتخانقوا عجلي البسي عنا مركز
*╚══════ღღ══════╝
طلعت تالا برفقة رغد عالمركز وعيونها بعدهم دبلانين من النعس…
رغد : لك حاجتك عم تتاوبي و •اللّـہ̣̥ نعستيني
تالا بكسل : لك شو اعمل بحالي يعني عم حاول اتنشط
رغد : عسيرة النشاط ليش ماتاخدي حبوب منشطه
تالا : شلون يعني… وشو هالحبوب
رغد : هلأ شو هالحبوب والله مابعرف بس بسمع انه بعض للطلاب الكسالى متل حلاتك بياخدو منها ليبقوا فايقين
توسعوا عيونها بفرح :لك ايدي بزنارك وين ممكن لاقيها
رغد : وين يعني بالصيدليه
تالا : لكن عجلي لنروح بالاول عشي صيدليه ونسأل
رغد : ماحزرتي هلأ بس نخلص من المركز بنروح وين مابدك
تالا : بربك خلينا نروح كلا خمس دقايق
رغد : ولاخمس ثواني نحنا اساسا متأخرين كتير…
تالا : امري لله رح بصبر لبعد المركز
رغد : لكن خفيلي اجرك يالله
*╚══════ღღ══════╝
بجهه تانيه كان الياس مروح م̷ـــِْن شغله وماشي متل عادته بحاله وبدون مايحاكي حدا
كان يطرح السلام من بعيد ويكفي طريقه من تم ساكت
سليم : شوفلي هالعينتين
اتلفت زيد وراه وشاف الياس مرق من حدهم وبهمس خافت طرح السلام
زيد : اهلين الياس تفضل
مرق عنهم بدون مايرد
سليم : تضرب من بين الرجال شو شايف حالك
زيد : لك شو بدك فيه الرجال بحاله وكافي خيرو شرو وبعمرو ما ازى حدا
سليم : بعمرو ما ازى حدا… واشر ع جبينه بغل… وهي نسيتها
زيد : بعدك متزكر !!
سليم : كيف بدك ياني انسى وانا كل ما اطلع بالمرايه وشوف هالندبه بجن
زيد : بس هالموضوع قديم كتير وبيومها انت يلي تحركشته
عصب سليم وعقد حاجبيه : هالموضوع قديم بالنسبه الك انا مستحيل انسى لاخد تاري منه
زيد : على شو ناوي لك سليم
سليم : مابعرف .. بس الا مالاقي طريقه وكسرله راسه
زيد : ايه… بنكسرو ليش لأ
سليم : بتعرف شو داق خلقي قوم لنتمشى شوي
زيد : وانت قلتا
*╚══════ღღ══════╝
بعد ماخلصوا الحصه بالمركز طلعوا البنات بوجهم يدورو ع شي صيدليه تبيع منشطات
تالا : هه ليكا في صيدليه هونيك تعي لنسأل عن الدوا
رغد : يالله
فاتو عالصيدليه بكل برائه وبدون اي مقدمات اخدت تالا نفس وسألت الصيدلي
تالا : زكاتك بتبيعوا هون منشطات
استغرب الصيدلي ونزل حاجبه : منشطات !! الك انتي !!
تالا : ايه
الصيدلي : العفو يا انسه بس هيك ادويه مابتنعطى الابوصفه طبيه
زمت شفايفها واطلعت برغد : شو الحل هلأ لازم وصفه طبيه
همست رغد : طولي بالك رح اخد واعطي معه
رغد : يا استاز هي البنت طالبه وهالسنه عندها امتحانات للشامل ومافيها تسهر ودايما عم تحس بخمول ونعس…
الصيدلي : اي !!
رغد : اي فقلت يمكن هالمنشطات تساعدها لتقدر تسهر وتركز
قاطعها بحده : هالدوا مابينعطى لمين من كان وبعدين رفيقتك صغيره بالعمر وهيك دوا احتمال يعمل عندا مضاعفات ومو بعيده اتصيبها جلطه وتصلب شرايين
حطت ايدها عصدرها بخوف : ولي .. جلطه وتصلب شرايين
الصيدلي : اي طبعا لهيك انا بعتزر منكم مافيي اعطيكي هالدوا الا بوصفه طبيه
رغد : اي تمام يعطيك العافيه
طلعوا البنتين من الصيدليه وعلامات الغضب كانت واضحه علـّۓ وجه تالا
تالا : ولي كنتي بتعرفي انه هالمنشطات بتعمل جلطه
رغد : لا و •اللّـہ̣̥ ماكنت بعرف تضربي بهالوش معقول يعني انا ضرك
زفرت بضيق : هفففف فكرت رح لاقي طريقه تخليني اسهر
رغد : شو رأيك نمرق ع صيدليه تانيه بس مارح نسأل ع منشطات رح نسأل عشي دوا مايخليكي تنامي وتقدري تسهري
تالا بقلة حيله : امري لله شرفي
*╚══════ღღ══════╝
كانو زيد وسليم عم يتمشوا .. ويعاكسوا كل بنت بتمر من حدهم
زيد : لك سليم شوفيلي هالخستين يلي جايين علينا
تلفت سليم ولمعوا عيونه بخبث : لك هي مو تالا اختو ل الياس
زيد : اي والله هيه بزاتا لك ايمت كبرت وصارت عروس
سليم : لك اجيتي بوقتك .. واشر لزيد يلحقه
*╚══════ღღ══════
تالا : خلص انسي ماعاد بدي دور ع شي
رغد : ماتوقعت تكون هالادويه ممنوعه
تالا : يضربوا هنه والوصفه الطبيه تبعن ..
رغد : احسن حل تشربي قهوه كتير .. وبهيك بتسهري
تالا : لك و •اللّـہ̣̥ لو بشرب برمسل قهوه مارح يحوق فيي راسي وبعرفه غاوي نوم
رغد : طيب وينك هي في صيدليه تعي لنسأل فيها لعل وعسا تزبط
تالا : انسي ماعاد بدي
رغد : اي مشي معي يمكن هالمره تزبط
تالا : قولتك
رغد : بنجرب
تالا : اممممم اوك يالله
فاتو عالصيدليه وفات وراهم سليم وزيد
وبعد دقيقه
تالا : يضربوا كل الصيدليات خلص فكينا منهم
رغد : شو رح تعملي طيب…ب امتحان بكرا
تالا : رح جيب ملاقط وعلق عيوني ماعليكي
رغد : هههههه طيب بشوفك صار لازم ارجع عالببت هلأ بتستعوقني مرت اخي وبتعملي جرسه مع اخي
تالا : لك هالزفته مو ناويه تحل عنك
اتهدت رغد ب اسف : ااااه ياتالا و •اللّـہ̣̥ تعبت من كل هالعيشه سقالله وانا متخرجه لحتى اشتغل وكفي حالي وما احتاج منيتها
تالا : منيتها عحالها هدول مصاري اخوكي
ضحكت ب الم : خليها ع •اللّـہ̣̥ لك اختي ..يالله بخاطرك
تالا : •اللّـہ̣̥ معك
افترقوا البنتين وراحت كل وحده على بيتها ومانتبهوا انه في عيون عم تراقبهم
رمى السيجاره م̷ـــِْن ايدو ودعس عليها برجله وهو عم يرسم ابتسامه صفرا ع وجهو
سليم : بدك منشطات لكن .. هه لك مو على عيني يا اخت الياس
*╚══════ღღ══════╝
وصلت تالا لبيتها وهي حاسه حالها مزعوجه ومخنوقه… شلحت من رجلها وفاتت بوجه عابس لعند اهلها
تالا : مسا الخير
ام الياس ; مسا النور بنتي شبك هيك عابسه
تالا بضيق رمت الشنته وقعدت : مافي شي امي مزعوجه شوي
حلا : صاير معك شي اختي
هزت راسها بالنفي ..لا مافي شي
الياس بشك : حدا تعرضلك عالطريق
تالا : لاا اخي وين راح تفكيرك
الياس : لكن شبك احكي
شبكت ايديها ببعض وتنهدت : بصراحه خايفه من امتحان بكرا وماعم اقدر اسهر لادرس
ام الياس : ولي على امتي لتروحي ترسبي ولي والله بجن
تالا : الله لا يقدر امي انا بس لو بقدر اسهر كنت درست احسن
الياس : ازا مافيكي تسهري بالليل… ادرسي بالنهار
تالا : بالنهار كتير دوشه ومابركز
الياس : والحل يعني ناويه ترسبي مثلا
اتدايقت تالا وحطت ايديها ع راسها واردفت بصوت متحشرج
تالا : شبكم عليي عم ناقشكم لحتى تلاقولي حل مو لتبشروني بالرسوب لك انا مضغووووطه مضغووووطه ?
حلا : خلص اختي طولي بالك
ام الياس : حلا قومي ساوي لاختك كاسة زهورات
حلا : حاضر امي
ام الياس حضنت تالا لحضنها وصارت تلمس ب ايدها عشعرها لتهديها وتالا عم تبكي ومو قادره تسيطر على اعصابها… . احساسها بالخوف من الرسوب ولد عنها عقده لدرجة انها اوقات بتقضم اضافيرها وهي مو حاسه عحالها
ام الياس : خلص ياروحي انتي اهدي ..
تالا بتبكي : بالكم انا مو حابه انجح وفرحكم بس شو ساوي بحالي ازا جمجمتي تقيله ومافيي اسهر والله حاولت وماقدرت
الياس : طيب اختي ادرسي بالبرندا منه بتشمي هوا ومنه مابتحسي بنعس
تالا : قولتك رح يمشي الحال
الياس : اي قولي ان شاء الله.. وانا كل شوي رح شق عليكي
ام الياس : وانا كمان
اجت حلا وناولت كاسة الزهورات لاختها : وانا رح اسهر معك وساويلك كلشي بدك ياه منيح هيك اختي
مسحت دمعتها واخدت رشفه من الزهورات
تالا : ايه .. ايه منيح الله يخليلي ياكم
ام الياس : ويخليكي النا ياحق .. يالله بنتي فوتي خودي دوش وتعي لتتغدي معنا
تالا : لا مالي نفس اتغدو انتو انا بدي نام
ام الياس بتعجب : تنامي !!
تالا : يعني بدك ياني اسهر ومانام بنوب امي
الياس : اي معك حق اختي روحي ناميلك ساعتين لحتى تتنشطي يالله
تالا : حاضر
قامت بسرعه وفاتت لغرفتها اخدت المنشفه وبوجهها عالحمام ضربت دوش سريع وبدلت تيابها ودحشت حالها بتختها الدافي ومافي ثواني كانت غرقانه بالنوم
ام الياس : مو عاجبني وضع تالا بنوب ياخوفي ترسب
حلا : تفي من تمك امي انشالله بتنجح وبمعدل منيح نسيانه انها من الاوائل
ام الياس : لك هاد شامل مو حيالله
حلا : ولو كان امي اوثقي فيها وحفزيها وماتنسيها من دعواتك
ام الياس : يارب تنجحها وتفرحني فيها يااارب
الياس وحلا : امين يارب
بهالوقت بيرن موبايل تالا ..و بيطلعوا الكل ببعض
الياس : في تليفون عم يرن
حلا : هاد تليفون تالا…
ام الياس : خير انشالله شوفي مين عم يدق بنتي
فتحت حلا الشنته وتناولت الموبايل وابتسمت… لك هي رغد
حلا : اهلين رغد
رغد : اهلين حلوشه .. وينا تالا
حلا : نايمه
رغد : لحقت تنام ?
حلا : ههههه نحنا طلبنا منها تنام لتحسن تسهر بالليل
رغد : هههه ياحبيبي على هالافكار… .
حلا : شو بدنا نساوي بدنا نسايرها
رغد : اي مو غلط…
حلا : صحيح انتي شو كان بدك
رغد : اختك الهبله نسيت دفترها معي وعليه ملخصات مهمه لامتحان بكرا
حلا : بجد !!
ام الياس بقلق : شو في بنتي !!
حلا : مافي شي امي بس تالا نسيانه دفترها مع رغد وعليه ملخصات مهمه لامتحان بكرا
ام الياس : اسأليها بتقدر اتجييو !
حلا : بتقدري اتجيبه رغوده
رغد : لا والله ياروحي هلأ صعب اطلع من البيت
حلا : امممم
ام الياس بتهمس : رح تجي !!
اشرتلها رغد بحواجبها . لا
الياس : اسأليها ازا في مجال امرق لعندهم وجيب الدفتر
حلا : رغد في مجال يمر اخي الياس وياخدو !!
رغد : اي ماشي حبي بس خليه يعجل قبل مايروح اخي ويعملي مشكله
حلا : طيب اوك
نزلت رغد الموبايل من ايدها ونسيت تسكر الخط وتلفتت وراها وشهقت
بسم •اللّـہ̣̥ رعبتيني يامرت اخي شبك لي هيك واقفه
كانت سعديه واقفه قدامه وهيه مكتفه ايديها وعم تزورها بشك
سعديه : مين هاد يلي كنتي عم تحكي معه ولي وبكل وقاحه عم تعطيه موعد
توسعوا عيونها وانصدمت .. رفعت اصبعها واشرت عحالها
رغد : انا عم واعد واعطي مواعيد !!
سعديه : لاتغشمي حالك ولي وتعمليلي فيها البريئه انا ب ادانيي التنتين سمعتك عم تحكيلو ياروحي هلأ صعب اطلع من البيت تعال انت قبل مايجي اخي ويعملي فضيحه
رغد ‘ : لك لاااا
سعديه : ولوواااا نشالله ياعايبه يافلتانه انا بأرجيكي بس يروح توفيق والله لاخليه يشرب من دمك
رغد : حلي عني سعديه واعملي شو مابدك مو ناقصني جنانك… عن ازنك رايحه ادرس
تجاوزتها وفاتت لغرفتها وبقيت سعديه تغلي وتاكل بحالها
سعديه بقلبها : ايه شو عليه يابنت الفران ان ماسففتك التراب مابيكون اسمي سعديه ?
حست عالباب انفتح واتسكر منبأ بوصول زوجها وبحركه تمثيليه بتستاهل عليها جائزة اوسكار صارت تبكي وتولول وتصرخ بصوت الحره اللي مابترضى تشوف العيبه وتسكت
وصرخت… لك لاعشتي ولاكنتي ازا بدك توطي راس جوزي ابو ولادي فهمانه ولي… هلأ اول مايجي رح خبرو بكل شي
سمع توفيق كلام مرته وفات بسرعة لعندها وعلامات الخوف باديه عليه :خير شوفي
سعديه :اسآل اختك المصونة …بسألها مع مين عم تحكي بتقلي شي ما بخصك وبكل عين وقحة بتقلي طلعي خليني كفي مكالمتي مع حبيبي
احمرو عيون توفيق وشد على قبضته لبرزت عروقه ونده بصوت جهوري… . لك رررررررررغد
طلعت رغد ووجها اصفر متل الليمونه واجريها ماعادو حملوها…
رغد : نعم اخي
مسكها من شعرها وصرخ فيها : منو هاد حبيبك يلي كنتي عم تحكي معه ياقليلة الادب
(كانت حلا بعدا عالتلفون وسامعة كل الحديث ومصدومة بهالشي يلي عم تسمعه )
رغد :لا والله اخي هالحكي ماصار … اقسم بالله كنت عم بحكي مع اخت رفيقتي تالا لانها نسيت دفترها معي… وازا بدك خود شوف بعينك
سعديه :والك عين تكزبي كمان يا حيوانة ..
رغد : حرام عليكي انتي شو بدك مني ليش عم تكزبي
سعديه بدهششه وهي بتأشر عحالها : انا عم كزب !!
. وبلشت تتمسكن ودمعو عيونا : هاد فوق ماني خايفه عليكي ليروح شي واحد ازعر يلعب بعقلك وياخدك معه ويرجعك…… . استغفر •اللّـہ̣̥ العظيم، بس
بهاللحظه عصب توفيق وطلع عن السيطره وهجم على رغد متل التور الهايج وبلش فيها ضرب وعلى وين بيوجعك …
كانت حلا عم تبكي وتصرخ عالتلفون لحتا يتركها بس للأسف مين بدو يسمع صوتها من عالموبايل … وام الياس والياس واقفين بحدها ومو فاهمين شي
صوت بكا رغد وصراخها كان عالي كتير لدرجة انه الياس حس بنار وشعلت بقلبه رغم انه مابيعرفها ولاشافها الا كم مره وبالصدفه
رغد بتصرخ :الله لا يسامحك يا توفيق…الله لا يسامحك يا سعديه الله ينتقم منكووون ? وينك يا امي ااااه ?
بكاها وقلة حيلتها ماشفعلها عند اخوها يلي تحول لوحش كاسر لمجرد انها مرته المدلله بخت سمها ب ادنه بقي يضرب فيها بدون رحمة وسعديه متكتفه وسانده كتفها عالحيط وبتطلع فيها بشماتة …. لحتا أغمي عليها وهدي الجو أخيرا …
شحطها لغرفتها ورماها وطلع وتركها مرمية عالأرض ?
كانت حلا عم تبكي وتصرخ :يااا رغد مششاااان الله ردي لك سمعيني صوتك …
الياس : خلينا نروح بسرعه قبل مايعملا شي
حلا : بس ازا رحت انت وشافك اخوها يمكن اتثبت سعديه كلامها انها رغد مواعده حده
مرر ايدو بين خصلات شعرو وزفر بضيق… لكن بوصلك وبستناكي تحت
حلا : افيق تالا لتروح معنا
الياس بعصبيه : شو بدك بتالا هلأ عجلي البسي
حلا : اي يالله
رمت الموبايل وراحت بسرعة على غرفتها لبست تيابها وطلعت من البيت مع الياس اللي كان قلبه عم يحترق من الغيظ والقهر وكيف ممكن لاخ يعمل ب اخته هيك !!
الياس بقلبه : يارب مايكون ضاربها شي ضربه مؤذيه… لك شو هالانسان هاد بيضرب اخته كرمال مرته اتفيه عليه
وصلو أخيرا على بيت رغد…… بقي الياس بالسياره وطلعت حلا ركض وبلشت تخبيط عالباب .. وفتحتلا سعديه
سعديه :خير يا طير ؟ شو بدك !!
حلا :بدي شوف رغد
سعديه :والله ياروحي رغد مو موجودة … الله اعلم وين عم تتصرمح
وردت الباب بوجه حلا … بس حلا دفشتو وفاتت وهي عم تصرخ فيها… بعدي هيييييك
تجاوزت سعديه وفاتت عالصاله وشافت توفيق متسطح عالكنبا وعم يدخن … وبس شاف حلا وقف وبلش يطلع فيها بخوف
سعديه :شو انتي جنيتي
حلا :وينا ؟ احكي وينااا رغد
توفيق:…..
فاتت حلا على غرفة رغد وانصدمت من منظرها وهي مكومة بدما عالأرض… ركضت عليها ورفعتا وبلشت تصحيها…
حلا :رغد حبيبتي اصحي مشان الله
سعديه بمسخره :اتركيها عطول بتمثل انها فاقدة الوعي
اطلعت فيهم حلا واحمرو عيونها وحست الدم عم يغلي بعروقها
حلا :لك انتووووو شو … لك حرام عليكم شو ساوت البنت لحتى عاملين فيها هيك وانت يامحترم كلو هاد ضرب ضاربها ايااه
توفيق :انتي شو عرفك انو كنت عم بضربها؟
سعديه : اكيد بعد ما طلعنا من الغرفه اتصلت فيكي صح ؟
توفيق : اتصلت فْيَگي تستنجدك !!!!
حلا :وانت السادق انا يلي كنت عم حاكيها عالتلفون وهي الحيوانة مرتك تهمتا انها عم تحكي مع شب …انا سمعت المكالمة كلها وسجلتا وخاصة لما كنت عم تضربها هالضرب كلو وانشالله رح سمعها للشرطه لحتى يعرفوا يتصرفوا مع المجرمين امثالك ?
توفيق :…..
بلشت رغد تتحرك وتصحصح بين ايدين حلا… كانت عم تآن بألم دفين ونفس مكسوره .. وبسرعه سندتها حلا وشدتها لحضنها اكتر وصارت تضرب غخدودها بخفه
حلا :رغد سامعتيني… رغد رغد
فتحت عيونها بتعب واطلعت بحلا ودمعتها عالقه بطرف عينها
رغد : اي حلا انا منيحة ……
سعديه : هه مو قلتلك ممثله بارعه
بلشت رغد تحاول تصلب طولها وهي عم تتلوى وتتوج وتتمسك بالكومادينا والتخت لحتا قدرت توقف على اجريها
سندتها حلا ومسكتا من ايدها واخدتها غسلتلا وشا ورجعو عالغرفة .بدون مايحكوا حرف زياده لتوفيق وسعديه
*╚══════ღღ══════
كان الياس قاعد بالسياره عم يشد عالمقود بضيق
مسح وجهو واخد نفس
الياس : لك ليش تأخرتي ياحلا !! بس مايكون البنت فيها كسور او… !!!!!!! معقول يكون هالواطي مد ايدو على اختي،!!! لك شووو. يمد ايدو علـّۓ اختي والله بحسب •اللّـہ̣̥ ماخلقو
ترجل من السياره بسرعه وطلع بخطوات بطيئه عالدرج وهو محتار اي بيت هو بيت رغد !!
الياس : لك وبعددددين انو بيت بيتها شو ساوي هلأ انااا
*╚══════ღღ══════
فاتت حلا مع رغد لغرفتها وقعدو عالتخت وبلشت تنضفلا جروح وجها
حلا : من ايمت بيضربك هيك !!
رغد : من لما ماتو ابي وامي
حلا :انتي مالازم تضلي ساكتة على هالوضع
رغد :وشو فيني أعمل ؟
حلا :لازم تشتكي عليه لازم يتربا ويبطل يمد ايدو عليكي بهالوحشية
رغد :لا … كيف بدك اياني اشكي على اخي
حلا :ماهان عليكي تشتكي عليه …هوة كيف عم يهون عليه يمد ايدو عليكي ويضربك هالضرب كلو
رغد : بس انا مافيي اشتكي عليه … أخي عندو ولاد محتاجينو. … وعم يصرف عليهون وما الون معين غيرو …حرام
حلا :حرااام !! حراااام ؟ لك وانتي مو حرام ! شوفي وجهك كيف مورم من الضرب شوفي مافي مكان يبجسمك مافي ضربة من ورا اخوكي … ريتو يبلي بكسر ايديه….
رغد :….. ?
حلا (عم تبكي ) :انا اسفة رغد… بس والله من قهري عليكي انا بعدك متل اختي تالا ومابيهون عليي وحده منكم تنئزي
رغد : ربي مايحرمني منكم والله انا بعدكم متل خواتي واعز… بس اني اشتكي على اخي هي مو وارده بنوب
حلا : •اللّـہ̣̥ يهدي بالك ويصلح الحال
رغد : يارب
حلا : طيب حبيبتي انا صار لازم روح لانه اخي الياس ناطرني برا
رغد : الياس معك !!
حلا : اي معي… وجن جنونو عليكي ولولا مامنعته بالزور كان بدو يفوت يخربط الواجهه تبع اخوكي
حست رغد بدقات قلبها عم تزيد خفاقته… . من سنين طويله والياس مسيطر على كيانها وتفكيرها بس بتبقى الغصه انه مافيها ترتبط لافيه ولابغيرو… ?
حلا : عطيني هالدفتر الملعون لاروح
رغد : ليكو بشنتايتي
حلا : خليكي مرتاحه… انا باخدو
اخدت حلا الدفتر وطلعت م̷ـــِْن غرفة رغد .. كانو توفيق وسعديه قاعدين م يتفرجوا عالتلفزيون ولا كأنه صاير شي
تفلت ع جنبها وطلعت وضربت الباب وراها بقوه ليجفل الياس ويطلع وراه بسرعه ويتوجه لعند اخته
الياس : ليش تأخرني !! هالواطي عملك شي
حلا : مافشر بنص عينه .. بس المسكينه رغد جسمها مصبغ تصبيغ من كتر الضرب
الياس بقهر : لك و •اللّـہ̣̥ لو اللي سلطه على هالبنت لكنت فرجيتو قيمتو لهلواطي هو ومرته
حلا : الها •اللّـہ̣̥ مابينساها اخي .. مشي لنروح عالبيت ونصحي تالا لتلحق تدرس كلمتين
الياس : جبتي الدفتر !!
حلا : ايه ليكو معي
الياس : طيب خلينا نرجع عالبيت
نزلت حلا عالدرج وبقي الياس واقف مكانه بيطلع بقهر عالباب كان نفسه يكسرو ويفوت يطربق البيت عراس توفيق ومرته… احساس غريب حس فيه… ممكن يكون احساسه بالعجز بهديك اللحظه وانه مو قادر يعمل شي لهي البنت المسكينه… . رمى نظره ناريه ملتهبه عالباب وفتل حاله ومشي…
*╚══════ღღ══════
وبالبيت
تالا : شوووو كل هالشي صار مع رغد وانا ماعندي خبر
حلا : ماحبيت ازعجك اختي وبعدين انا واخوكي قمنا بالواجب واكتر
تالا بحزن : ازاها شي
حلا : الله يكسر ايديه مو مخلي شقفه بجسمها مو مهبرها
شدت الحرام على صدرها وحست بغصه على حال صديقتها هيه بتعرف حجم المعاناه يلي بتمر فيها رغد والمشكله القديمه يلي تعرضتلها بالماضي
تالا بقلبها : مافي قدامي الا اني اجوز رغد لاخي الياس وبهيك بخلصها من الجحيم يلي عايشه فيه وبأمن عليها مع اخي لانه رجال ورح يصونها
حلا : وين شردتي اختي
تالا : اه… ليكني معك حبيبتي
حلا : يالله قومي اتنشطي لتاكلي لقمه وتدرسي
تالا بتنهيده : حاضر
*╚══════ღღ══════
اما ببيت رغد
..
دخلت عليها سعديه وقعدت عطرف التخت وهي راسمه ابتسامه هزليه ساخره… …
رغد :خير .. ما اشتفى قلبك مني لسا ؟
بلشت سعديه ترقص بحواجبها وهي عم تضحك بمسخره
سعديه :لللأ …لساتو قلبي مليان منك
صفنت فيها لثواني وبعدا طمرت حالها بالحرام ودمعتها على خدها…
رغد :ممكن تطلعي بدي نام
سعديه بخبث :لك رغد … كيفو حبيب ألبك لسا عم تشوفيه
رفعت الحرام عنها وتجلست من جديد وهي مستغربه ورافعه حواجبها :أي حبيب سعديه…كرمال الله انتي ليش مانك مسدقه انو يلي صار غصب عني … ليش مو مسدقه انو خطفني من جنب المدرسة وعمل عملتو فيني ورماني
سعديه :ههههه ليش قصتك بتسدق؟…لتكوني مفكرتيني هندية بنقطة حمرا لحتى صدق هالحكي ؟ شو نحنا وين عايشين ! بغابة ؟
مسكت رغد ايدين سعديه ونطقت بشايف مرتجفه كلا رجاء وتوسل :بترجاكي تسدقيني …لك كل عمري كان وقتا 12 سنه كيف بدك اياني اغلط هيك غلطة… . لك قلبيها بعقلك هداك الوقت ليش اجيت عالبيت بهديك الحالة ؟ لك مرت اخي صدقيني هالكلب دمرلي حياتي كلها وانتي عم تزيديها عليي بإتهامك الي ?
نترت سعديه ايدين رغد ونطقت بدون مبالاه :عكل حال مو هاد موضوعنا… بتعرفي لأبو شاهر
رغد :اي شبو ؟
سعديه :طلبك مني
اتفاجأت رغد وتوسعوا عيونها وحكت بقلبها :لهون وصلت ،صارو يطلبوني من سعديه ،ومعد حدا عمل اعتبار لأخي
سعديه:وين رحتي ؟
رغد :ليش ليطلبني منك ؟ ليش ماحكا مع اخي توفيق
سعديه بضحكه رقيعه :انا وللا جوزي واحد ما بتفرق… وعموما انا عطيت ابو شاهر موافقتي وخلص
رغد :كماااان ! هههه ليش انتي مين لحتى تقرري عني
سعديه :سمعي وليه … بدك توافقي عليه غصبن عن راسك
رغد :لهون وبس مرت اخي انتي مافيكي تغصبيني..انه اتجوز ختيار النحس هاد. لك لك. حرام عليكي ابو شاهر عمرو 70 سنة ومتجوز مرتين وعندو ولاد شباب ساكنين معو بنفس البيت … كيف بتعطي موافقه بهالبساطة ؟
سعديه :اي الرجال ما بعيبو شي و بكفي انو بيملك نص هي الحارة وحتى بيتنا اللي ساكنينو الو … لهيك ما تتكبري… وارضي بنصيبك
رغد :ودخلك بشو وعدك ازا قنعتيني ؟
سعديه بإبتسامة خبيثة :بهالبيت
رغد :طلعي لبراااا
سعديه :عم تقلعيني لك رغد
رغد بصراخ :سعددددديه انقلعي من غرفتي …طلعي لبراااا
سعديه : اي طالعة بس وينك لما يجي أخوكي انا بعرف اتصرف معك يا**** وسخة
رغد : لبرااااا براااااا
بلشت تصرخ وصابتها حالة هستيريا وبكي مو طبيعية … ?
مرت اخوها ماسكيتها من ايدها اللي بتوجعها وبأي لحظه ممكن تكشف المستور قدام اخوها
كلشي حسبت حسابه الا هالمواجهه كانت تهرب منها حتى بخيالها .. خوفها من بطش اخوها خلاها تخاف حتى من نفسها… ولانها بتعرف انه توفيق مارح يصدقها سكتت كل هالسنين وبقيت سعديه تغني هالموال لتطربها ب انغامه المؤلمه كل ما اجا عبالها
*╚══════ღღ══════╝
كانت تالا قاعده عالبرندا وحاضنه كتابها بين ايديها وعم تتأمل ضو القمر .. لحتى حست بحدا واقف وراها
تلفتت بسرعه وتبسمت : هاد انت اخي
الياس : مو قلتلك رح شقشق عليكي كل شوي
وناولها كاسة الشاي وقعد قبالها بس عيونو كانو شاردين ناح القمر ولمعانه بكبد السما
الياس : شو حكالك
نزلت الكاسه من ايدها ب استغراب : مين !!
الياس : القمر… كنتي شارده لبعيد لدرجة انك ماحسيتي عليي الا بعد بفتره
رجعت خصله من شعرها لورى دانها واتبسمت
تالا : كل مَـرّھٌ بطلع بالقمر بشوف انعكاس صورتي
الياس : مداح نفسه بيسلم عليكي اختي
تالا : هههههه لاتفهمني غلط .. بقصد انه القمر متل المرايه يلي بتعكس صورتنا بكل صدق سواء كانت حلوه او بشعه .. والقمر متل هيك بيعكس اشعة الشمس الصادقه وبالتالي بيكتسب منها النور ليبان ب احلا منظر رغم انه بالحقيقه مظلم
صار الياس يقلب الكتب يلي قدامها
الياس : هالحكي من انو كتاب حفظتيه
تالا : حاج تتمقلس عليي اخي
الياس : وحاج اتضيعي وقتك مع القمر… يا بتدرسي او بتفوتي لغرفتك
تالا : وبنام
الياس : ماحزرتي ست تالا بدك تدرسي
تالا : طيب حاضر هففففف
قام وفتل حاله ليفوت لجوا واستوقفه صوت تالا
شو رأيك ب رغد اخي
تلفت عليها ب استغراب : من انو ناحيه !!
تالا : من كل النواحي
الياس : بنت ادميه وخلوقه
تالا : ايه
الياس : لشو بتلمحي بالضبط هاتي من الاخر
تالا : عم قول القمر ببجنن الليله اخي
الياس ب ابتسامه دافيه : وانا هيك عم قول… . ادرسي اختي ادرسي
تالا : امرك
تركها وفات لجوا وبقيت تفكر بوضع رغد
تالا : لازم لاقي طريقه خبر الياس بالحادثه يلي صارت مع رغد وهي صغيره .. وازا حسيته متفهم دغري رح فاتحه بموضوع زواجهم
سمت بالرحمن ورجعت حطت عيونها بكتابها وبلشت تدرس
*╚══════ღღ══════╝