نصائح للشطورة في بيتها

* كل يوم اغسلي فوط المطبخ ولو حتي بشويه صابون وانتي واقفه ع الحوض وانشريها ودخليها تاني يوم ااصبح هتبقي نضيفه وملهاش ريحه
* لما تخلصي وتغسلي مواعين العشا حطي حله ميه بتغلي وفيها ليمونه وشويه خل هتخلي ريحه المطبخ نضيفه جدا

* عودي ولادك يلموا اللعب بعد اما يخلصوا واعمليلهم باسكيت كبير او كرتونه للعب ولو مسمعوش الكلام لميهم انتي وحطيهم في مكان عالي يشوفوه ولما يطلبوهم منك قوليلهم لا عشان مش بتلموها وسيبيهم يزنوا شويه عشان لما يخلصوا يلموها
* رتبي الدولاب اول بأول قبل ما تدخلي الهدوم عشان ميتكركبش
* لو عندك بيبي خلي دايما جنبك فوطه صغيرة عشان تمسحي بيها اول بأول ايده قبل ماهو يمسحها في الملايات والكراسي
* اوعي تحطي حلل في التلاجه فضي الاكل في علب بلاستيك عشان تحافظي علي نظامها ونضافتها

* لو عندك بنوته علميها تلم التوك في علبه وليها غطا عشان الكركبه
* علمي بنوتك تدخل التواليت لوحدها وراقبيها من بعيد وخلي دايما معاها فوطه تنشف بيها بعد الحمام وتغير البانتي بتاعها مرتين في اليوم ع الاقل
* لو عندك بيبي اقل من اربع سنين شيلي كل الاوكر بتاعه الادراج والدواليب عشان ميعرفش يفتحها ويطلع اللي جواها وتيجي انتي تصوتي وفي الاخر تقعدي تلميها طول اليوم
* هاتي مفرش جلد حوالي مترين وحطيه ع السفرة وقت الاكل عشان تحافظي عليها وبعد الاكل امسحيه بقماشه وشويه ديتول
* غودي نفسك انتي وولادك تشربوا كوبايه ينسون كل يوم عشان تحافظوا علي صحتكوا
* خلي عندك دايما لبان وشيكولاته وبالونات ولما ولادك يسمعوا كلامك اديهم وفرحيهم عشان يسمعوا كلامك دايما
* قبل ما تنامي رشي شويه صابون او شاور او معطر في قاعده الحمام
* لو في يوم حد من ولادك تعبان او مأريف اقعدي جنبه مش مهم تروقي وتنضفي وتطبخي في اليوم ده
* افرشي مشمع فوق الدواليب عشان التراب
* في مثل قديم بيقول ….حاجه البدريه مقضيه…. يعني اصحي بدري يومك يبدأ بدري هتخلصي شغلك بدري وباقي اليوم بتاعك انتي وولادك شويه مذكرة وشويه ولادك يلعبوا وشويه اهتمي بنفسك

* عودي ولادك. جوزك دايما يشوفوكي في احسن شكل حتي وانتي في المطبخ عشان يبقوا زيك وتبقي نفسيتك احسن وبلاش ربطه سعديه في المطبخ والشراب المعفن اللي فرده وفرده

* واخيرا مهما حصل في يومك من مشاكل وحوارات وشغل كتير وعصبيه ولادك وزنهم وطلباتهم اللي مبتخلصش ارمي كل ده ورا ضهرك وبلاش تتعصبي وتزعقي وفي الاخر انتي بتعملي كل حاجه يبقي ان جالك الغصب خوديه بجميله فرفشي وانتي بتشتغلي عشان نفسيتك ترتاح وتخلصي بسهوله