مراهقـــين و مـن ربنــا قريبيــن

( الحلقة الثالثة عشر )

المشهد الأول

فوزية رجعت البيت ..

الأم مسكت نفسها من إنها تجيبها من شعرها و حاولت تتكلم بهدوء معاها ..

الأم : كنتى فين يا فوزية ؟؟ تعالى اقعدى جمبى هنا يا بنتى

فوزية : ايه يا ماما ما انتى عارفة قولتلك انى خارجة مع صحباتى !

الأم : صحباتك ولا صاحبك ؟؟

فوزية : !!!!!!!!

الأم : فوزية يا بنتى متنكريش انا عرفت كل حاجة !

فوزية : عرفتى ايه و مين اللى قالك ؟؟

الأم : مش مهم الكلام ده دلوقتى .. المهم انتى ليه عملتى كده ؟؟؟ ليه تسوءى

سمعتك هى البنت إيه غير سمعة طيبة ؟؟ ليه تشوهى صورتنا ليه يا بنتى ليه ؟؟

فوزية : !!!!!!!!!!!!

الأم : ردى عليا لييييييييييه ؟؟

فوزية : ماما انا معملتش حاجة غلط !!

الأم : معملتيش حاجة غلـــط ؟!!! بتمشى مع ولاد من ورا اهلك

و بتقولى مبعملش حاجة غلط ؟؟ لييييه انتى فاكرة نفسك إيييه ؟؟ انتى فاكرة

نفسك عايشة فيين ؟؟

انا يمكن معلمتكيش الحلال و الحرام بس ربنا فطر جوانا فطرة تخلينا نحس

و نشعر إذا كانت الحاجة دى حلال ولا حرام و اللى انتى بتعمليه ده فى وجهة

نظرك إييه ؟؟

حلال ؟؟؟؟؟؟؟

فوزية : صحباتى كلهم مصاحبين اشمعنى انا ؟؟؟

الأم : انتى هتشوفى الناس كلها بتغرق فى البحر هتقولى اشمعنى انا كمان انا

عايزة اغرق زيهم ؟؟ ايه الكلام اللى انتى بتقوليه ده يا فوزية ؟؟؟

فوزية : انتى عيزانى اعمل إيه يعنى يا ماما ؟؟

الأم : و هى دى فيها كلام يا هانم ؟؟ تقطعى علاقتك بيه نهاااائى !

فوزية : بس هو واعدنى انه يتجوزنى

الأم : واعدك !!! يا بنتى هو هيرضاها لأخته ؟؟؟ يرضى لأخته انها تمشى مع

واحد غريب بحجة انه ” واعدها ” انه يتجوزها ؟؟

اعقلى الكلام يا فوزية قبل ما تقوليه !!

انتى بالنسبة له مجرد تسلية وقت مش اكتر يا بنتى فوووووقى الله يكرمك!

فوزية : ايه الكلام الغريب اللى بتقوليه ده يا ماما ؟؟ ازااى رامى يستحيل يكون بيضحك عليا !!

الأم : يعنى انتى مش مصدقانى ؟؟ طيب هثبتلك يا فوزية !!

هتشوفى انا هعمل إيه ؟؟

و تانى يوم …

الأم اخدت عنوان رامى من شئون الطلبة لمدرسة فوزية ..

و راحتله البيت و معاها فوزية ..

فوزية : نفسى افهم إنتى موديانى على فييين ؟؟

الأم : ده بيت رامى يا فوزية !

فوزية : إيييييييييييه ؟؟ و انتى جاية هنا لييه انتى عاوزة تعملى ايه يا ماما فهمينى ؟؟

الأم : مش قولتلك هثبتلك انه بيضحك عليك و بيتسلى بيكِ .. هتشوفى

دلوقتى .. انتى هتقفى هنا على الباب و انا اللى هدخل هخبط و ادخل و انتى

اووعى يشوفك ماشى ؟؟

فوزية : حاضر يا ماما اما اشوف آخرتها معاكى إييه ؟

و فعلاً نفذت الأم اللى خططت ليه ..

فتحلها الباب ام رامى و دار بينهما الحوار الآتى ..

ام رامى : يا اهلاً و سهلاً مين حضرتك ؟

الأم : انا ابقا والدة زميلة رامى فى المدرسة يا حاجة ..

ام رامى : اممممم اهلا اتفضلى ..

الأم : يزيد فضلك .. تعيشى ..

ام رامى : وااااااااد يا رامى انت يا ولاااا

تعالى كلم يا واااد !

الأم : ازيك يا رامى يابنى عامل ايه ؟؟ انا ام فوزية على فكرة !

رامى : نعــم ؟؟!!!!!! فوزية ؟؟؟

الام :آه و انا بقولك ادام والدتك اهوا غن فوزية قالتلى على كل اللى بينكم

و إنك ناوى على الجواز ..

رامى : هى البت دى اتجننت ولا ايه ؟؟ و جواز إيه يا حاجة احنا لسة عيال ؟!!

ام رامى : ما تفهمنى يابنى الكلام اللى بيتقال ده ؟!! انتوا هتخلونى كده زى الأطرش فى الزفه ؟؟

رامى : هفهمك يا آما كل حاجة بعدين !!

الأم : يعنى انت مش ناوى تتجوز بنتى ؟؟

رامى : انا اصاحبــها ( آه ) , اتجوزها ( لأ ) ده يختلف يا حاجة ؟؟

الأم : طب ليه عملت فيها كده ؟؟ انت معندكش اخوات تخاف عليهم ..

ربنا مش هيسيبك يا شيخ والله ربنا مش هيسبك !

رامى : يوووووه بقا انتى يا حاجة جاية تعكننى عليا ولا ايه ؟؟ ما قولتلك

فوزية دى مجرد صاحبتى بس كده حاجة تانى غير كده يبقا انا مليش فيه !

الأم : يعنى انت مش بتحب فوزية ؟؟

رامى : حب إيه و بتاع إيه ؟؟ ايه الكلام الفاضى ده ؟!

الأم : انت مش خايف اقول الكلام ده لفوزية ؟

رامى : انا جبتلك كل حاجة من الآخر يا حاجة و انا بصراحة زهقت من

بنتك و خليها توافق على العريس اللى جايلها احسنلها !

فوزيـــــة خلاص كانت على الآخـر من الكلام اللى سمعته ..

محستش بنفسها إلا و هى عمالة تخبط الباب عليهم بعنف جاامد

فتحلها رامى ..

فوزية : آآآآه يا نــدل يا ……

و طبعاً طلعت القديم و الجديد عليه و بهدلته بهدلة الجنيه فى البورصة 🙂

الأم : يللا يا بنتى من هنا .. دى ناس ربنا ينتقم منها !!

فوزية مبطلتش عياط طول السكة لأنها اتصدمت صدمة حيآآآتها كلها كاانت

فوووووووق اووووى و فجأة نزلت لتحت اوووووى ..

و فى البيت ..

الأم : صدقتينى يا بنتى لمنا قولتلك بيضحك عليكى ؟

فوزية : سامحينى يا ماما .. انا آسفة اوووووى بجد ده إنسان حقير ميستاهلش

حتى إننا نجيب سيرته على لساننا !

ارجوووكى يا ماما سامحينى و صدقينى هبدأ صفحة جديدة معاكى

و هحكيلك كل مشاكلى .. بس عشان خاطرى متسبنيش يا ماما انا

محتجااالك اووووى بجد انا مسكووورة اوى و مجروحة يا ماما حاسة إن كل

الدنيا دى ناس غشاشين و كدابين مفيش أمان خااالص , انا تعباانة اووى بجد .

و اترمت فوزية فى حضن ماماتها ..

فوزية : ياااااااااااااااااااه يا ماما بقالى كتير اوووى مدوقتش طعم الحضن الجميل ده ..

و نآآمت فوزية فى حضن والدتها .. ممكن من التعب و الإرهاق ؟ ممكن لأنها

اول مرة تحس فعلاً بحنان الأم ..

و نكمل الحلقة الجاية إن شاء الله 🙂