رواية زوجتي الثانية
رواية زوجتي الثانية
جميع الحقوق محفوظة للكاتبة أروى الطاهر
الاولى (مقدمه)
(حقيقيه)100%
فتحت عيوني ببطئ علي صوت اغاني وزغاريط قعمزت علي حيلي شفت للحنه يلي في يدي وشفت العيله كلهااا كيف فرحانين ويجهزو للحفله اليوم هاذي توتي في لبستها وهاذي تستشور في شعرها وهاذي بتطلع للمزين خشيت للحمام غسلت وجهي وتوضيت وصليت الصبح نادوني بنات العيله قعمزت فطرت معاهم وضحكنا وهدرزتنا ماليه الحوش كملت فطوري ونضت لان خلاص وقت شويه وبنطلع للمزين مش مصدقه ان اليوم عرسي خلاص بنفتكا من دوة الناس ليش لتوا متزوجتيش خواتك احلا منك ان شاء الله تلقي حد ياخذك …ومن هاذا الكلام ?
انا ايمان عمري24سنه من طرابلس بوسليم مواصفاتي بيًضه وجهي كله حب رقيق واحمر شعري طويل هلبا ومعبي بس احرش?طولي متوسط بس جسمي يميل شويه لسمنه عيوني متوسطات ولونهم عسلي ..هادي مش مواصفات بطلة روايه صح؟يعني في العاده ديمه البطله حلوه وشقراء بس للاسف انا هكي الوحيده من دون خواتي منعرفش نلبس ونركب اللبس ولا نهتم بروحي يمكن بسبب اني اصغر وحده في خواتي وقعدت نتربى مع5ولاد?يمكن بسبب اني خليت المطبخ وتنضيف الحوش عندي اهم من كل شي عندي زوز خوات متزوجات و5خوت 3متزوجين و2شباب قريت قانون بس وقفت بسبب شوية ضروف من فتره تقدملي ولد صاحب بابا وطبعا يافرحته ممكن لانه اول عريس تقدملي واحتمال اخر عريس وافقت وبابا تمسك بيه بس الغريب ان كلللل شي يبوه يتم بسرعه يعني العرس صار في خلال شهرين فقطط
مراهقتي معشتهاش زي البنات بكل الكل في المدرسه يضحك عليا ويتهزو بيا بدات لاني مركبه تقويم?لما صكرت ال19سنه حبيت قريبي من بعيد اسمه فراس ❤️ولد يجنن وكل بنت تتمناه بس طبعا مستحيل حتا يفكر يشبحلي الولد الانيق الحليوه والجنتل خليت حبه في قلبي ومقلتش لي حد لين تزوج حبيبته?واهو حتا انا بتزوج ع حالي
ايمان:كملت فطوري وركبت مع خوي السياره مشت معاي بنت عمتي ساره❤️وصلت للمزين بدت تحاول تخفي الكوارث يلي في وجهي وتلملم شعري المعبي الطوووويل الخشن هلبا في هاذي اللحضه غمضت عيوني وندعي لي ربي نطلع حلوه ومحدش يضحك عليا زي كل مره قعدت مغمضه عيوني لين سمعت كلمة
المزينه:صحه صحه ياعروسه
ايمان:فتحت عيوني وشفت روحي في المرايا ..كان منضري مقبول نوعا ما مش جميله وحلوه لدرجه زي ابطال الروايات والافلام مكياجي سموكي وشعري تسريحه نازله لانه طويل هلبا ميجيش فوق كله ..حمدت ربي ع الاقل مطلعتش نخوف حتا مقبوله عادي راضيه …خشيت لدار لبست الڤيلو وشفت روحي في المرايا تمنيت روحي اضعف من هكي راهو طلعت احلا ❤️…بس الله غالب كملت لبس باقي حجاتي تاكمي القوانطي الكندره…لين جهزت خلاص بمساعدة بنت عمتي ساره
ايمان:لبست كاب العروسه وطلعت بعد مجاني خوي ..ركبت السياره وكان مدايرلي جو بي الاغاني بس انا متوتره وخاايفه من راجلي كيف رح يكون؟خصوصا اني مكلمتاش ولا مره وشفته مره وحده في النضره الشرعيه ومتكلمش حتى كلمه بوه هوا يلي حكي معاي …وصلنا للقاعه نزلت نحيت الكاب وقعدو يساوو فيا هاذي تعدل في البودره وهادي تعدل في تسريحتي وهكي❤️
ايمان:خشيت ندرج علي اغنية لا إله الا الله حسين الجسمي..وكانت نضرات الناس مختلفه ليا فيه منهم يقولو اخيرا مسكينه تزوجت وفي من بنات يقولو معقووووله هاذي تنخطب وانا بي جمالي هاذا قاعده؟….مهتميتش وقعمزت ع الكوشه ولما شفت فرحة امي بيا نسيت كل شي
ايمان:اجواء حفلتي كانت زي اي حفلة بنت ليبيه بسيطه هاذي تصور في روحها وهاذي ماشيه جايه للحمام باش يشوفو لبستها وهادي تراجي في العشي وهاذي تغيض في سلفتها وهاذي ترقص باش يخطبوها وهكي ….لين سمعت بي امالي العريس جو ❤️❤️❤️خشو خواته ونساوين خوته دارو شوط وغنو وطلعوني معاهم
ايمان:ركبت السياره ونصدمت?يلي يسوق خوه ومن قدام مرته..مش المفروض العريس هوا يلي يجي يروح بي مرته؟؟؟قلبي قبضني وقريب بكيت بس بعدين بيني وبين نفسي قلت خيرني موليه حساسه هكي ؟لالا عادي اكيد مع صحابه مدايريله جو بي النوبه عادي
وصلت لي حوشي نزلت بي مساعدة مرت خوه وطبعا بما ان مفيش دخول محدش جي معاي غير اختي بس جت ورانا بي السياره …خشيت لي حوشي وكان بسم الله مشاء الله قنين صح صغير بس حلووو خشيت لي دار النوم وجت اختي جابتلي شنطة الدخول وفهمتني كم حاجه وطلعت قعدت مقعمزه ع السرير نستنى في عريسي بس الغريب في الموضوع ان خواته كلهم وامه جو معانا وقعدوساااعه واقفين معاه برا ….شويه ونسمع في صوت الباب وقفت وساويت روحي قعد يقرب بي خطواته لين وصل فيا
ابراهيم:قعد يشوفلها فتررررره
ايمان:معش عرفت شنو نقول ولا كيف نتصرف
ابراهيم:بدلي حوايجك تو نجيك
ايمان:ان شاء الله
ابراهيم:طلع من الدار
ايمان:قعدت حايسه في روحي بس شوي شوي قدرت انحي الفيلو ولبست روب الدخول ونضمت اموري
ابراهيم:خذي حبوب وكان يرعش مع بعضه …..وخش لي الدار
ايمان:قعدت واقفه قدامه وساكته
ابراهيم:يقرب علي ايمان ويوخر …يقرب ويوخر …لين فجأه تحووووول دفها ع السرير بس ايمان مدارتش ردة فعل لان هاذا راجلها حاول انه يدير معاها علاقه قداش مره حاول يقرب عليها زي اي عريس يوم دخوله بس مقدرش اخر شي قعد يضرب فيهابدووون سبب يضرب يضرب يضرب لين خلاص معش قادره نوقف شدني من شعري ويشح فيا ويقولي في كلام مش مفهوم لين طلعني قدام الحوش وانا نبكي ومش فاهمه شي طلعني وسكر الباب ونسمع فيه يعيط ويخبط داخل وانا نطق عليه ونترجى فيه يدخلني بس مفيش فايده ?
نبكي ونخبط عليه نبيه يدخلني بس بصوت واطي خفت ننفضح من الجيران ويسمعني حد
ايمان:قعدت قريب ربع ساعه نطق عليه ونبكي لين طلع من الحوش عيونه حمرررر ويرعش جبدني من حوايجي لين الروب تمزق من جيهت الصدروطلعني في الشارع بكل وسكر عليا باب الحوش الخارجي قعدت واقفه ع الرئسي نبكي ونحاول نستر روحي ….يتبع